Digital Lamang: Mga Young Adult
4 ka Butang ang Akong Gisaligan Kon Maningkamot Ko sa Pagsalig sa Langitnong Amahan
Ang tagsulat nagpuyo sa Verona, Italy.
Gusto ang Dios nga makigsulti kanato ug mogiya kanato subay sa dalan sa pakigsaad.
“Kabahin ba kini sa plano?”
Usa kini ka pangutana nga usahay akong mapangutana sa kaugalingon. Nasayod ko nga ang Langitnong Amahan dunay hingpit nga plano, apan sa managlahing panahon sa akong kinabuhi, nanlimbasog ko sa pagkakita kon unsay dangatan sa akong kinabuhi. Kon makasinati kita og mga pagsulay nga makalibog ug sakit, lisod ang pagkakita kon sa unsang paagi kining “tanang butang maghiusa sa pagtabang alang sa [atong] kaayohan” (Doktrina ug mga Pakigsaad 90:24).
Ang maayong balita mao nga ang Dios gustong makigsulti kanato ug mogiya kanato subay sa dalan sa pakigsaad. Gusto Siya nga kita moduol Kaniya kong naglisod man kita aron masabtan nato ang Iyang mahangtoron nga panglantaw. Ug Iya kitang gihatagan og pipila ka himan aron matabangan kita sa pagpaminaw Kaniya.
Ang Akong Patriyarkal nga Panalangin
Dihang nag-18 na ko, nag-atubang ko og mahinungdanong kausaban sa akong pagtuo. May nailhan kong daghang tawo nga nagtubo nga relihiyuso apan dili aktibo sa ilang relihiyon, ug ingon og natental ko nga mahisama niana nga kinabuhi. Apan nasayod usab ako nga ang tinuod nga pasalig sa Ang Simbahan ni Jesukristo nagkinahanglan og dili lang kay basta nga mahimong disipulo, ug karon panahon na nga mohimo ko og usa ka pagpili.
Dihang mihukom ko kon gusto ba kong moserbisyo og misyon ug hingpit nga mopasalig ngadto sa Ginoo, nasayod ko nga nagkinahanglan ko og dugang nga direksyon nga ikahatag sa patriyarkal nga panalangin. Nagkinahanglan ko og personal nga direksiyon ug usa ka daklit nga panglantaw kon unsay giandam sa Langitnong Amahan alang kanako.
Bisan og nasayran nato gikan ni Elder Kazuhiko Yamashita sa Seventy nga “ang patriyarkal nga panalangin dili maoy mapa sa inyong kinabuhi o tubag sa tanan ninyong mga pangutana,” kini “usa ka mensahe gikan sa inyong Langitnong Amahan ug lagmit nga maglakip og mga saad ug dinasig nga tambag nga mogiya kaninyo sa tibuok ninyong kinabuhi.”
Ang akong patriyarkal nga panalangin mao gayod ang akong gikinahanglan. Nakakita ko og dinasig nga tambag gikan sa Langitnong Amahan ug kompirmasyon nga adunay plano alang sa akong kinabuhi.
Propetikanhong Pagpadayag
Usa sa labing makatingala nga mga butang nga nahitabo kanako sa akong misyon mao ang pagdawat og tinuod nga pagpamatuod nga ang mga propeta ug mga apostol tinawag sa Dios. Wala gyod ako mag-ampo niana nga kahibalo kaniadto, ug dihang miabot kana nga kompirmasyon, labihan kadako sa epekto niini ngari kanako. Ang kahibalo nga sila namulong gayod sa pulong sa Dios naghatag kanako og laing kapanguhaan alang sa pagpangita og direksiyon sa akong kinabuhi.
Sama sa gipamatuod ni Elder Allen D. Haynie sa Seventy: “Ang pagkahibalo pinaagi sa pagpadayag nga adunay buhing propeta sa kalibotan makausab sa tanan. … Ang propeta mao ang usa ka tawo nga personal nga giandam sa Dios, gitawag, gikorehian, gidasig, gibadlong, gibalaan, ug gipaluyohan.”
Personal nga Pagpadayag
Kon naghunahuna kita mahitungod sa mga pagsulay nga atong giatubang, mahimo natong pangutan-on ang atong kaugalingon sama sa gitudlo ni Presidente Russell M. Nelson: “Unsay maabli diha kaninyo atol sa inyong pagpangita? Unsa nga kaalam ang kulang kaninyo? Unsa ang gibati nimong dihadiha nga panginahanglan nga angay hibaloan o masabtan?”
Kon mahibaloan nato unsa gayod ang atong gikinahanglan gikan sa Langitnong Amahan ug ni Jesukristo, mahimo natong sundon ang tambag ni Presidente Nelson: “Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—oo, sa mga tinguha gayod sa inyong kasingkasing. Ug dayon maminaw! Isulat ang mga ideya nga imong mahunahunaan. Irekord ang imong mga gibati ug sundi kini sa paglihok sa unsay giaghat nga angay nimong buhaton.”
Dihang nagkat-on ko unsaon sa pagpangita og personal nga pagpadayag, akong namatikdan nga nagdala kini og daghang managlahi nga mga aspeto sa unsay atong naandan nga gibuhat sa Simbahan. Kon gusto kong masayod kon ang usa ka butang tinuod ba, mosalig ko sa pag-ampo, magtuon ko sa mga kasulatan, ug mangita sa mga pulong sa buhing mga propeta.
Ang pagtukod og makanunayong espirituhanong mga kinaiya maghimo kanakong andam sa pagdawat og personal nga pagpadayag kon kini akong gikinahanglan. Kon duna koy mga pangutana o mobati nga nahisalaag, ako nahinumdom nga duna koy paagi nga makakuha sa mga tubag nga akong gikinahanglan.
Ang Saad sa Hingpit nga Plano
Niadtong mga panahon dihang nagpangutana ako sa akong kaugalingon kon ang Langitnong Amahan naggiya ba gayod sa akong kinabuhi, akong nahinumdoman ang ikasiyam nga artikulo sa hugot nga pagtuo: “Kami nagtuo nga ang [Dios] mopadayag pa og daghan nga dagko ug mahinungdanon nga mga butang kalabot sa Gingharian sa Dios.”
Ang Langitnong Amahan dunay mas daghan pa nga ikapadayag ngadto sa Iyang mga propeta mahitungod sa Simbahan, ug Siya aduna pay daghang ikapadayag kanato mahitungod sa atong kinabuhi.
Sama sa makausa nga gisaad ni Elder Dieter F. Uchtdorf nga sakop sa Korum sa Napulog Duha ka Apostoles ngadto sa mga young adult, “Samtang maningkamot kita nga mosalig sa Dios ug mosunod sa Iyang Anak, si Jesukristo, usa ka adlaw atong makita ang nahuman nga produkto, ug atong masayran nga ang mismong mga kamot sa Dios ang nagdirekta ug naggiya sa atong mga lakang.”
Ang Langitnong Amahan makahimo sa tanan sa atong kinabuhi nga mohaom sa Iyang hingpit nga plano samtang padayon kitang mosalig ug mosunod Kaniya.