Digital Lamang: Mga Young Adult
Unsaon Nako sa Pagdawat ug sa Pag-ila og Personal nga Pagpadayag?
Ang personal nga pagpadayag masinati ngadto sa tanang andam nga mohimo sa paningkamot.
“Ang Dios gusto ba gayod nga makigsulti kanako?”
Usa kini sa akong pangutana kaniadto mahitungod sa personal nga pagpadayag. Ang Dios makatabang nato sa paghimo og mga desisyon sa kinabuhi pinaagi sa pagpadayag, apan daghan kanato magduda pa gihapon kon unsaon.
Sa dakong pasalamat, sama sa gipamatuod ni Presidente Russell M. Nelson: “Ang Dios buot ba gayod nga makigsulti kaninyo? Oo!”
Ang Langitnong Amahan matinguhaon kaayo nga makigsulti sa tanan Niyang mga anak! Ang imong kasinatian tingale lahi kay sa akoa, apan niay pipila ka kamatuoran ug mga ideya nga mahunahuna aron makatabang sa pagpalambo sa atong abilidad sa pagdawat og personal nga pagpadayag gikan sa Langitnong Amahan.
Unsaon Nako sa Pagdapit og Pagpadayag?
Dunay daghang paagi sa pagdapit og pagpadayag. Ang usa, kita mahimong “magsiksik, mamalandong, ug mag-ampo.” Alang nako, maglakip kini sa pagsiksik sa mga kasulatan ug sa ubang kapanguhaan sa ebanghelyo o pagpakigsulti sa matinud-anong mga higala ug mga tigtambag. Human sa tanan, si Presidente Nelson mipamatuod nga ang “maayo nga inspirasyon nagbase sa maayo nga impormasyon.”
Ang pagpamalandong sama ra ka importante sa pagsiksik sa mga kasulatan ug sa pag-ampo. Dili ako perpekto sa paggahin og panahon sa pagpamalandong sa unsay akong gitun-an, apan kasagaran kadtong mga higayon nga akong gigahin nga layo sa pagkabalda ug pagdangop sa Ginoo mao kadto ang panahon nga akong mabati ang Espiritu nga naggiya kanako.
Si Presidente Nelson nagdapit kanato sa “pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—oo, sa mga tinguha sa inyong kasingkasing. Ug dayon maminaw! Isulat ang mga ideya nga imong mahunahunaan. Irekord ang inyong mga pagbati ug sundi kini sa paglihok sa unsay giaghat nga angay ninyong buhaton.”
Ang mga lider sa Simbahan mihatag usab og gibug-aton sa kaimportante sa kaputli, sa oras nga ipasalig alang sa buhat sa templo ug family history, sa pagserbisyo sa uban, ug sa kaandam nga motuman. Kini nga mga butang makapadugang sa inyong kasensitibo ngadto sa Espiritu ug makatabang ninyo sa pagdawat og paggiya gikan sa Dios.
Unsaon Nako sa Pag-ila ang usa ka Pagpadayag?
Tingali mawad-an kita sa kadasig tungod kay dili kita makakita og mga panan-awon, dili makadungog og mga tingog, o makaangkon og mga kasinatian sama niadtong anaa sa mga kasulatan o gani sa mga tawo sa atong palibot. Apan hinumdomi nga, “walay duha ka tawo nga makasinati sa kahayag ug kamatuoran sa Dios sa eksakto nga managsamang paagi.”
Usahay ang tubag moabot pinaagi sa pagbati og kalinaw kon mohimo ko og usa ka pagpili nga nahiuyon sa kabubut-on sa Dios (tan-awa sa Doktrina ug mga Pakigsaad 19:23). Sa ubang mga higayon ang akong hunahuna ingon og mahayagan kon duna koy bag-ong makat-onan gikan sa mga kasulatan (tan-awa sa Doktrina ug mga Pakigsaad 11:13). Usahay usa ka hunahuna kon unsaon sa pagserbisyo og usa ka tawo ang mosantop sa akong hunahuna (tan-awa sa Moroni 7:13). Ug sa hilom nga mga higayon, makadungog ko og malumo nga tingog sa akong hunahuna nga magpahinumdom kanako sa mga kamatuoran sa ebanghelyo (tan-awa sa Helaman 5:30).
Tanan kini nga mga hunahuna ug mga pagbati—ug daghan pa—mahimong mga paagi nga ang Espiritu makigsulti kanato. Mangayo og tabang sa Langitnong Amahan sa pag-ila sa Iyang tingog, ug Siya motabang ninyo nga makapaminaw Kaniya.
Nganong Walay Tubag nga Moabot?
Usahay mabuhat na nako ang tanan nga akong mahunahuna ug sa gihapon mobati ko nga wala ko matubag. Mobati ka ba gihapon og sama niini? Ayaw pagpakawala sa paglaom! Wala kita talikdi sa Dios. Adunay daghang kalagmitang mga rason kon ngano nga dili man dayon nato madawat ang pagpadayag human sa atong pagpangayo niini.
Tingali ang Dios mitubag na kaninyo, apan lisod ang pag-ila niini. Ang Espiritu makahatod og mga mensahe sa daghang paagi, ug kon naglaom ka lamang og tubag sa usa ka piho nga paagi, basin dili nimo kini mabantayan.
Tingali wala ka makadawat og klarong tubag kay ang Dios misalig kanimo ug gusto nga gamiton nimo ang imong kabubut-on sa paghimo og maalamong pagpili (tan-awa sa Ether 2:23–25). Ang paglihok inubanan sa pagtuo magtugot sa Dios nga mokumpirma kon naa ka ba sa eksaktong dalan o wala.
Ang mga hagit sa mental nga kahimsog ug ubang mga panlimbasog nga dili atong mga sayop makapahimong lisod sa pagbati o pagkadungog sa Espiritu.
Tingali dunay butang nga angay nimong hinulsolan.
O basin nagkinahanglan ka og dugang nga panahon ug pagpangandam sa dili ka pa maandam nga modawat sa pulong sa Dios (tan-awa sa 3 Nephi 17:2–3).
Adunay pipila ka rason kon nganong dili kita makadawat sa mga tubag diha-diha dayon sa atong gusto, apan hinumdomi, ang Dios nahigugma kanimo! Moduol Siya kanimo sa tukmang panahon ug paagi kon ikaw padayon nga mangita Kaniya (tan-awa sa Doktrina ug mga Pakigsaad 88:63).
Samtang padayon kitang modapit sa Espiritu sa atong kinabuhi, atong maamgohan nga ang Dios gustong makigsulti kanato! Andam Siyang motubag sa atong mga pangutana.