“Makasalig ba Gayod Ako sa Giya sa Propeta?,” Liahona, Mar. 2025.
Mga Young Adult
Makasalig ba Gayod Ako sa Giya sa Propeta?
Sa kanunay gipili nako nga mosunod sa propeta, apan makasalig ba ko niya niini nga sitwasyon?
Paghulagway pinaagi ni Kylee Bodily
Sa dihang nakadawat ko og tawag nga balhinon ko gikan sa akong misyon, nasagmuyo ug naglibog ko.
Pipila ka bulan sa wala pa ko ma-release, ang Unang Kapangulohan midesisyon nga papaulion ko ug ang pipila sa ubang mga misyonaryo base sa unsay akong gihunahuna nga mga hungihong lamang sa posibleng internasyonal nga panagbangi. Walay bisan unsa nga ebidensya nga adunay mahitabo.
Wala ko maghunahuna nga adunay angay nga kabalak-an.
Nagkwestiyon sa Inspirasyon
Sa kanunay ganahan ko nga moserbisyo og misyon ug naningkamot og maayo aron matuman kana nga tumong. Lisod kaayo ang kwarta, apan nakakita ko og trabaho nga nakatabang nako nga makasweldo og igo aron ibayad sa akong misyon. Sa dihang akong giablihan ang akong tawag, nindot kaayo ang akong gibati, ug nasayod ko nga nagagikan kini sa Dios.
Dayon, tungod sa COVID-19 nga pandemya, gidestino ko og laing misyon didto sa Utah sulod sa siyam ka bulan sa wala pa ko gipadala sa laing nasod nga mao ang akong orihinal nga madestinohan. Nahupay ko ug nalipay kaayo nga makaadto na gayod sa lugar diin ang Dios orihinal nga mitawag nako nga moadto.
Dayon, human sa pipila lang ka bulan nga anaa didto, kalit lang ko nga gipalayo sa mga tawo ug nasod nga akong gihigugma. Mibati ko nga ang tanan gikuha gikan nako.
Mibati ko nga gibudhian. Sinsero ko nga mikwestiyon kon dinasig ba kini nga pagpili.
Nagbagulbol, sakay sa eroplano mipauli ko sa Texas. Ang akong pagbalhin wala gayod dahoma nga ang akong papa ug mga igsoon wala sa airport aron mosugat nako pauli sa balay.
Usa ka Panalangin sa Kaseguroan
Pipila ka adlaw human sa akong pagbiya sa akong misyon, nakuratan ko sa dihang ang makuyaw nga panagbangi nahitabo duol sa dapit nga akong kanhi giserbisyohan. Nianang higayona, nakaamgo ko nga ang pagsunod sa propeta nakaluwas nako sa hilabihan ka tinuod nga paagi. Napuno ko sa pagpasalamat alang sa propeta ug sa iyang inspirasyon.
Mihimo ko og saad sa akong kaugalingon nga kanunay na ko nga mopatalinghog sa unsay isulti sa propeta, bisan kon dili ko makasabot sa sinugdanan.
Si Elder Ulisses Soares sa Korum sa Napulog Duha ka Apostoles bag-ohay lang miingon: “Ang pagkaadunay mga propeta usa ka timaan sa gugma sa Dios alang sa Iyang mga anak. Ipahibalo nila ang mga saad ug ang tinuod nga kinaiyahan sa Dios ug kang Jesukristo ngadto sa Ilang katawhan.”
Mituo gayod ako nga si Presidente Russell M. Nelson mao ang tigpamaba sa Ginoo. Direkta siya nga nakigtambayayong sa Langitnong Amahan ug sa Manluluwas sa paggiya kanato ngadto sa kaseguroan ug sa paghatag nato og paglaom ug direksiyon atol sa mahagiton nga mga panahon.
Ang mga Panalangin sa Pagsunod sa Propeta
Kon kamo naghunahuna pa gihapon kon ang propeta gitawag ba sa Dios, ang akong tambag mao nga buhata ang iyang mga pagdapit. Sulayi ang pagbasa pag-usab sa bag-ohay nga mga pakigpulong ni Presidente Nelson sa komperensiya ug ang pagtuon sa mga kasulatan nga iyang girekomendar. Buhata ang iyang mga pagdapit ug tun-i ang mga panalangin nga iyang gisaad nga nag-uban niadto nga mga pagdapit.
Si Elder Soares mitudo usab, “Pinaagi sa pagsunod [sa mga propeta], mas sadya ang atong kinabuhi ug minus ang kakomplikado, ang atong mga kalisdanan ug mga suliran mas sayon nga mapas-an, ug mamugna nato ang espiritwal nga taming libut kanato.”
Nakita nako kini nga mga panalangin sa akong kinabuhi samtang akong gisunod ang tambag sa propeta. Nasayod ko nga kini nga mga panalangin maanaa sa tanan nga misalig sa Dios ug sa Iyang propeta.