Digital Lamang
2 ka Kasinatian Nagtudlo Nako nga ang Dios Patas nga Nahigugma sa Tanan
Ang atong Langitnong Amahan mihatag og bili ug miila kanato isip mga indibidwal, minyo man o dili minyo.
Ni Minerva Teichert
Sa tibuok nakong kinabuhi, usa ka baroganan ang nakatabang nako nga makakaplag og kalipay bisan unsa pa man ang akong mga kahimtang: ang kasegurohan nga ang Dios nahigugma kanako ug gusto sa labing maayo alang nako. Tugoti ko nga mopasabot.
Ang akong mga ginikanan mihimo sa oras sa pamilya nga prayoridad sa dihang ako ug ang duha pa nako ka igsoong babaye mga bata pa lang. Karon nga mga hamtong na kami, kini nagpadayon isip kabahin sa among kultura sa pamilya. Ang higayon nga kami mag-uban makalingaw ug puno sa mga tradisyon sama sa mga lumba ug mga dula, nga adunay mga kalihokan nga naglakip sa pag-itsa og tortilyas ug paghuyop sa bulá nga kompetisyon.
Samtang nagtubo, nakabaton ko og pagsalig sa paggahin og higayon nga mag-uban sa akong pamilya ug mibati nga ako mahinungdanon. Gibati nako nga ang akong mga kontribusyon gipangita ug gikinahanglan. Apan, human gayod sa akong pagpauli gikan sa akong misyon, ang paggahin og higayon nga mag-uban nausab. Ang rason: ang akong magulang nga babaye naminyo pipila ka buwan sa wala pa ko mouli.
Nalipay ko alang niya ug naghinam-hinam nga makabaton og igsoong lalaki sa unang higayon. Apan akong nabantayan nga ang akong mga ginikanan nagsugod og tratar sa akong manghod nga babaye ug nako sa lahi nga paagi. Gibati nako nga tungod kay wala pa ko maminyo, gipadaplin ra ko ug gitratar nga mura og bata. Sa kataposan, nakig-istorya ko sa akong mga ginikanan mahitungod sa mga kausaban sa among pamilya. Kami nakahukom nga ang among indibidwal nga mga sitwasyon walay kalabotan sa among bili. Ang tanan mahinungdanon sa among pamilya, bisan unsa pa man ang edad, sekso, sitwasyon sa pinansyal, mga talento , o estado sa kaminyoon.
Ang akong hunahuna naabli sa ideya nga ang atong Langitnong Amahan nahigugma ug miila kanato isip mga indibidwal. Gusto sa Langitnong Amahan nga kita makaestablisar ug makaugmad og lig-on nga mga relasyon sa pamilya, apan ang atong indibidwal nga bili wala maggikan sa atong pamilya. Tungod kay kita hinigugmang mga anak sa Dios ug kabahin sa Iyang pamilya, ang atong bili walay kataposan ug mahangtoron. Si Jesukristo nagpakita niini pinaagi sa paghatag sa Iyang kinabuhi alang sa matag usa kanato. (Tan-awa sa Doktrina ug mga Pakigsaad 18:10–11.)
Si Elder Alan T. Phillips sa Seventy nag-awhag kanato sa “pag-ila kon kinsa ka. Hibaloi ang inyong tinuod nga balaanong kailhanan. Ang plano sa Dios alang sa kalipay mahitungod sa tanan kaninyo. Kamo Iyang bililhon nga anak ug may talagsaon nga bili. Nakaila Siya ug nahigugma kaninyo.”
Samtang ang mga tuig milabay ug ang akong mga kasinatian sa kinabuhi nagkadugang, nagsugod ko pagkakita sa ebidensiya sa gugma sa Dios alang sa tanan nga anaa sa akong palibot, apan wala nako kanunay gidahom o giila ang Iyang gugma alang sa akong kaugalingon. Akong gikwestiyon ang akong bili isip usa ka indibidwal.
Menos Ba ang Akong Pagkaangayan sa Gugma sa Dios?
Niadtong Hulyo sa 2008, kusog kaayo ang akong gibati nga pag-aghat nga mobiya sa usa ka trabaho nga dili na maayo alang nako. Wala koy lain nga trabaho, apan mao pa kadto ang pagsugod sa akong karera ug ang mga opsiyon mura og walay kataposan. Usab, tungod sa akong pag-aghat, masaligon ko nga ang Langitnong Amahan motabang nako nga makakita sa eksakto nga oportunidad.
Mga semana human niana, ang kalibotan nasulod sa usa ka pinansyal nga krisis ug misaka og maayo ang gidaghanon sa walay trabaho. Samtang ang mga semana ug dayon ang mga bulan milabay, nagsugod ko og kataranta. Nakadungog ko og mga makapasakit sa kasingkasing nga mga istorya sa mga amahan ug mga inahan nga nawad-an og mga trabaho. Wala pa ko maminyo ug walay nagsalig nako, mao nga naghunahuna ko kon ang uban mas labaw bang nanginahanglan ug mas angayan ba sa trabaho kay kanako.
Usa ka gabii, akong gipaabot ang akong mga kahingawa ngadto sa Ginoo. Ako Siyang gisultihan nga nagkinahanglan ko og trabaho aron maatiman ang akong kaugalingon apan nakita nako nga adunay mga pamilya nga mas nanginahanglan. Kini mura og akong gihanduraw ang tanan nga naglinya aron modawat sa mga panalangin sa Ginoo, ug tungod kay wala pa man ko maminyo, gilaoman ko nga motugot sa mga pamilya nga mouna nako og dawat sa mga panalangin.
Samtang nag-ampo ko, ang Espiritu nagtudlo nako nga dili kini mao ang gilaoman gikan nako. Walay linya aron makaadto sa Langitnong Amahan. Gidapit Niya ang tanan Niyang anak nga moduol Kaniya tungod kay ang “tanan managsama ngadto [Kaniya]” (2 Nephi 26:33). Ang panghunahuna miabot nga klaro kaayo sa akong hunahuna nga ang Langitnong Amahan dili limitado sa bisan unsa pa diha sa atong kalibotan ug nga Siya motabang sa matag indibidwal nga moduol ngadto Kaniya ug ni Jesukristo.
Niana nga higayon, gipahinumdoman ko nga walay sistema sa kahimtang tali sa mga anak sa Langitnong Amahan. Siya mopanalangin kanato samtang kita mopili nga mohimo ug motuman sa mga pakigsaad ngadto Kaniya ug ni Jesukristo. Kitang tanan gihigugma ug importante ngadto Kaniya, bisan pa man og asa kita diha sa dalan sa pakigsaad.
Wala madugay human niana, gitanyagan ko og trabaho nga nagpahimutang sa akong karera sa dalan diin ania kini karon.
“Importante kita sa Dios dili tungod sa atong résumé apan tungod kay kita Iyang mga anak,” miingon si Elder Dieter F. Uchtdorf sa Korum sa Napulog Duha ka Apostoles. “Siya naghigugma kanatong tanan, bisan kadtong adunay mga depekto, sinalikway, maulawon, masulub-on, o nangaparot.”
Misulay ko sa pagbantay sa mga kahimtang, motimaan sa mga pagbati, ug mohinumdom sa mga kasinatian nga nagpahinumdom nako sa gugma sa Dios alang nako. Lisod diha sa kalibotan, ug matag adlaw mura og nagdala og bag-o nga pakigbisog. Ang pagpadayon sa akong pagtutok sa gugma sa Dios alang nako nakatabang nako nga magmalipayon bisan pa man sa akong mga kahimtang. Kon magsakay og bisikleta, imong iliko padulong sa unsay imong gitan-aw. Mipili ko nga magtutok sa gugma sa Dios ug itimon ang akong kinabuhi padulong niini tungod kay nakahibalo ko nga ako Iyang hinigugma nga anak nga babaye.