Digital Lamang
3 ka Paagi sa Paghimo sa Paghinulsol nga Kabahin sa Atong Kada Adlaw nga Kinabuhi
Ang paghinulsol usa ka makalipay nga proseso nga mahimong mahitabo sa tibuok panahon sa imong kinabuhi.
Niadtong 2019 nakadungog ko og pakigpulong nga miusab sa akong kinabuhi. Si Presidente Russell M. Nelson miingon, “Walay laing mas makapagawasnon, mas makapahamili, o mas importante sa atong kaugalingong pag-uswag kay sa usa ka kanunay, matag adlaw nga paghatag og gibug-aton sa paghinulsol.”
Matag adlaw? Sa tinud-anay lang dili ako hingpit, apan wala ko magtuo nga naghimo ko og dako nga mga sayop kada adlaw. Mao nga unsa kaha ang buhaton sa usa ka tawo aron makatutok sa paghinulsol sa matag adlaw? Ang miaging pipila ka tuig usa ka panaw aron sa paghunahuna niana. Ania ang tulo ka baroganan nga akong nakat-onan sa pagpadayon.
Dangop ngadto sa Dios
Kaniadto naghunahuna ko nga ang paghinulsol mahitungod sa pag-ingon og pasayloa ko kon nakahimo ko og usa ka butang nga sayop. Apan, nagsugod ko sa pagkasabot nga ang paghinulsol labaw pa sa pagtalikod sa sala; kini mao ang pag-atubang padulong sa Dios. Dili lang kini ang paghunong sa daotan. Kini mao usab ang paghimo sa maayo nga mahimong mas maayo.
Si Elder David A. Bednar sa Korum sa Napulog Duha ka Apostoles miingon, “Ang ebanghelyo ni Jesukristo nagtingob og mas labaw pa kay sa paglikay, pagbuntog, ug sa pagkanalimpyohan sa sala ug sa daotang mga impluwensya sa atong mga kinabuhi; kini usab nagkinahanglan sa pagbuhat og maayo, sa pagpakamaayo, ug sa pagkahimong mas maayo.”
Kon ako maningkamot sa pagbaton og mas makahuloganon nga pagtuon sa kasulatan kada adlaw, kana ang paghinulsol.
Kon ako mag-ampo nga makabaton og dugang nga gugmang putli, kana ang paghinulsol.
Bisan unsang higayon nga kita mopili sa pagsunod ni Jesukristo ug magtinguha nga mahimong mas sama Kaniya, kana ang paghinulsol.
Paghimo og Ginagmay nga mga Lakang
Si Presidente Nelson nagpahinumdom kanato nga “ang paghinulsol dili usa ka panghitabo; usa kini ka proseso.”
Akong nakat-onan nga ang paghinulsol dili lamang mahitabo kon ako mag-ampo alang sa kapasayloan o moambit sa sakramento (bisan kon kini kabahin niini). Ang paghinulsol usa ka butang nga akong buhaton kada adlaw.
Si Elder Bednar miingon, “Ang gamay, makanunayon, magtubo sa espirituhanong pag-uswag [mao ang] mga lakang nga buot sa Ginoo nga atong buhaton.” Usahay, ang milagrosong mga kausaban mahitabo dayon. Mas kasagaran, ang kausaban mahitabo sa hinay-hinay samtang kita maningkamot nga mahimong mas maayo matag adlaw.
3. Dapita ang Manluluwas nga Motabang Nimo
Si Elder Dale G. Renlund sa Korum sa Napulog Duha ka Apostoles mitudlo nga ang tinuod nga paghinulsol kinahanglang maglakip og hugot nga pagtuo kang Jesukristo.
Siya miingon, “Kon wala ang Manunubos, ang paglaom ug kalipay mawala, ug ang paghinulsol mahimo lang nga miserable nga pag-usab sa kinaiya.”
Nagtakda ko og daghang tumong sa akong kinabuhi, apan ang mga tumong nga namunga og igo nga paglambo mao kadtong akong giapil ang Manluluwas pinaagi sa pag-ampo matag adlaw alang sa Iyang tabang. Siya mitabang nako nga mausab dili lang ang akong kinaiya apan ingon man ang akong kasingkasing.
Nakahibalo ko nga samtang kita magtutok sa Manluluwas ug maningkamot nga mahimong sama Kaniya kada adlaw pinaagi sa paghinulsol, Siya makausab sa atong mga kasingkasing ug makatabang nato nga makasinati og dugang nga kalipay, pagtuo, ug kalinaw.