Ang Dios Nakigsulti sa Nahaunang mga Santos—Makigsulti ba Siya Kanako?

Mapaubsanong Pag-ampo ni Joseph

Nagsugod kini sa usa ka pangutana. Ug nahimo kining sama sa unsay gihulagway ni Elder Alexander Dushku sa Seventy nga “kalit nga pag-ulbo sa kahayag ug kamatuoran.” Ang mapaubsanong pag-ampo ni Joseph Smith misangpot ngadto sa matahom nga pagbisita sa Langitnong Amahan ug ni Jesukristo (tan-awa sa Joseph Smith—Kasaysayan 1:14–17). Bisan og dili kini katuohan nga makigsulti sa Dios nawong sa nawong, kini nga mga kasinatian talagsaon ug sagrado.

Samtang kitang tanan walay kahigayonan sama ni Joseph, “kita usab makabaton sa atong kaugalingong gilis sa kahayag—usa ka bidlisiw sa usa ka higayon.” Kon kita mangutana ug moluhod sa mapaubsanong pag-ampo, makadawat kita og tubag gikan sa Dios pinaagi sa Espiritu Santo.

Litrato sa bunyaganan sa Ogden Utah Temple

Ang Gahom sa Templo

Ang mga Santos sa Kirtland, Ohio, misakripisyo og panahon, kwarta, ug paghago sa pagtukod sa balay sa Ginoo. Sa pagpahinungod sa Templo sa Kirtland, si Joseph Smith nag-ampo nga ang Dios mopanalangin niining matinud-anon nga mga Santos og gahom samtang sila mosulod ug mosimba (tan-awa sa Doktrina ug mga Pakigsaad 109:13). Ang templo kinahanglan nga mahimong “usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa himaya ug sa Dios” (Doktina ug mga Pakigsaad 109:16).

Sa ulahing mga adlaw, napanalanginan kita og mga templo sa tibuok kalibotan. Kita gisaaran nga makadawat kita og pagpadayag kon kita motambong sa templo. Si Presidente Russell M. Nelson bag-ohay lang nga miingon nga “sa templo kita mahimong ‘makadawat sa kahingpitan sa Espiritu Santo’ [Doktrina ug mga Pakigsaad 109:15]. Hunahunaa unsa ang gipasabot niana nga saad bahin sa pagdawat og balaan nga pagpadayag alang sa matag sinserong tigpangita sa mahangtorong kamatuoran.”

Pangutana ni Hyrum ngadto sa Propeta

Nakahunahuna ba kamo kon sama sa unsa kaha nga mohangyo sa propeta nga makigsulti sa Dios alang kaninyo? Si Hyrum, ang igsoong lalaki ni Propeta Joseph, mihimo niana. Nakadawat siya niini nga tambag gikan sa Ginoo pinaagi ni Joseph: “Tan-awa ikaw si Hyrum, akong anak; tinguhaa ang gingharian sa Dios, ug ang tanang butang idugang sumala nianang unsay makiangayon” (Doktrina ug mga Pakigsaad 11:23).

Usahay, ang giya moabot gikan sa ubang mga tawo. Si Presidente Russell M. Nelson mitambag kanato nga “[ma]ngita og giya gikan sa mga tingog nga inyong kasaligan—gikan sa mga propeta, mga manalagna, ug mga tigpadayag, ug gikan sa mga pag-aghat sa Espiritu Santo.” Bisan kon kitang tanan dili direktang makapangutana sa propeta, makadawat gihapon kita sa mga tubag sa atong personal nga mga pangutana.

Hulagway ni Oliver Cowdery pinaagi ni Lewis A. Ramsey

Ang Pagtuon ni Oliver sa Hugot nga Pagtuo

Si Oliver Cowdery usa ka mahinungdanon kaayo nga tabang ni Joseph atol sa paghubad sa Basahon ni Mormon. Apan niadtong 1829, mibati siya og kasagmuyo. Nganong dili siya makahubad? Ang Ginoo mihatag ni Oliver og pipila ka piho nga tambag kon unsaon nga makabaton og tubag sa iyang pangutana—tambag nga magamit nato karon.

Kon kita adunay pangutana, kita giawhag nga tun-an kini, magbaton og hugot nga pagtuo, ug mosalig sa mga impresyon (tan-awa sa Doktrina ug mga Pakigsaad 9:6–9). Ang atong mga impresyon mahimong moabot pinaagi sa mga emosyon, init nga mga pagbati, o kalinaw sa hunahuna. Sama sa giingon ni Elder Mathias Held sa Seventy, “Sa panahon nga ang [lohikal nga pangatarongan ug ang inspirasyon sa Espiritu Santo] mahiusa diha sa atong mga kalag, usa ka kompleto nga hulagway magpakita sa katinuod sa mga butang kon unsa gayod sila.”

Paglitrato pinaagi ni Craig Alan Shelley

Ang Patriyarkal nga mga Panalangin sa Pamilya Smith

Ang patriyarkal nga mga panalangin nahimong kabahin sa Simbahan sukad pa sa panahon sa Daang Tugon (tan-awa sa Genesis 48). Sa dihang ang Simbahan giorganisar sa ulahing mga adlaw, ang Dios misulti ni Joseph nga tawagon ang iyang amahan, si Joseph Smith Sr., isip patriyarka niadtong 1834. Tulo ka adlaw ang milabay, ang pamilya Smith nagpundok aron si Joseph Smith Sr. makahatag og patriyarkal nga panalangin sa matag usa sa iyang mga anak ug sa ilang mga kapikas. Kini nga mga panalangin naghatag og tambag ug kahupayan alang sa ilang kinabuhi.

Agi og dugang ngadto sa pagpahayag sa kaliwatan, ang patriyarkal nga panalangin “mao ang personal nga kasulatan nganha kanimo.” Kon kanunay kita nga magtuon sa atong kaugalingong patriyarkal nga mga panalangin, kita “kinahanglang mohatag og bili sa mga pulong, mamalandong niini, ug magpuyo nga takos nga modawat sa gisaad nga mga panalangin niini nga kinabuhi ug sa kahangtoran.”

Hulagway ni Emma Smith pinaagi ni Lee Greene Richards

Personal nga Direksiyon ni Emma gikan sa Dios

Isip asawa sa propeta, si Emma Smith kanunay nga nanglimbasog sa mga pagsulay ug sa mga panagbangi nga gihangyo nga antoson sa iyang pamilya. Diha sa Doktrina ug mga Pakigsaad 25, atong mabasa ang mga pulong sa paghupay ug paglig-on sa Langitnong Amahan ngadto ni Emma.

Kon magtinguha kita sa atong kaugalingong mga mensahe sa paghupay gikan sa Langitnong Amahan, makapangayo kita og mga panalangin sa pagkapari. Sama sa gitudlo ni Presidente James E. Faust (1920–2007), Ikaduhang Magtatambag sa Unang Kapangulohan: “Ang mga panalangin sa pagkapari makatabang nato sa gagmay ug dagko nga mga desisyon sa atong kinabuhi. Kon, pinaagi sa atong mga panalangin sa pagkapari, kita makasabot lamang sa gamay nga bahin sa pagkatawo nga gusto sa Dios nga kita mamahimo, mawala ang atong kahadlok ug dili na gayod magduhaduha.”

Hulagway ni Joseph F. Smith pinaagi ni Albert Salzbrenner

Pagtuon ni Joseph F. Smith sa Kasulatan

Sa dihang ang sakit, gubat, ug kamatayon grabe nga miguba sa kalibotan niadtong 1918, si propeta Joseph F. Smith midangop ngadto sa mga kasulatan alang sa mga tubag. Human sa pagtuon sa mga pulong ni Pedro diha sa Bag-ong Tugon, misugod siya sa paghunahuna og lawom ug sa pagpamalandong. Siya nakasinati og usa ka panan-awon alang sa Simbahan diin iyang nakita ang Manluluwas nga nag-organisar og misyonaryo nga buhat didto sa kalibotan sa mga espiritu. (Tan-awa sa Doktrina ug mga Pakigsaad 138.)

Sama sa gitudlo ni Elder Robert D. Hales (1932–2017) sa Korum sa Napulog Duha ka Apostoles: “Kon kita gustong makigsulti sa Dios, mag-ampo kita. Ug kon kita gusto nga Siya makigsulti kanato, mosiksik kita sa mga kasulatan.” Ang mga kasulatan mao ang mga pulong sa Dios nga gipreserba pinaagi sa pagsulat, ug sa atong digital nga panahon, nahimo kining mas maakses nato. Kon kita magbasa ug mamalandong sa mga kasulatan, kita makakaplag og tabang gikan sa langit nga atong gikinahanglan.

Paglitrato pinaagi ni John McKinney

Gitinguha nga mga Paningkamot sa Pagpaminaw Kaniya

Si Presidente Nelson mitudlo: “Samtang kita maningkamot nga mahimong mga disipulo ni Jesukristo, ang atong mga paningkamot sa pagpaminaw kinahanglan nga mas gitinguha nato. Kinahanglan kini og tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulun-an, sa Iyang mga kamatuoran.” Sama sa nahaunang mga Santos, makadawat kita og mga mensahe gikan sa Dios nga personal ug tinuod.

Ang Dios nakigsulti kanila. Siya makigsulti kanato. Kinahanglan lang kita nga maminaw Kaniya.