Pe a Le Faataunuuina Manaoga Amiotonu

E manao se uo i se aiga fiafia, ma faavavau, ae ua taumamao uma lana fanau mai le Ekalesia. O le isi e manao i se faaipoipoga selesitila ae e le’i maua lava le tagata sa’o. O isi uo e mananao i fanau ae e le mafai ona maitaga. Ou te manao e saoloto mai gasegase o le mafaufau, ae o loo ou tauivi e ui lava i tausaga o taumafaiga, fautuaga, ma tatalo.

E mafai ona faavaivailoto pe a le faataunuuina mea e sili ona tatou mananao i ai. E mafai ona sili atu ona faavaivailoto le faitauina o folafolaga i tusitusiga paia o loo faapea mai, “E pei ona outou mananao mai ia te au, e faapea foi ona faia ia te outou” (Mataupu Faavae ma Feagaiga 6:8; tagai foi 11:8) ma lagona e pei e le o faataunuuina na manaoga.

O le a la se mea e mafai ona tatou faia pe a le faataunuuina o tatou manaoga amiotonu? O ni nai aoaoga faaperofeta nei e mafai ona fesoasoani ia i tatou:

1. Faataitai le onosai mataalia. Na aoao mai Peresitene Dieter F. Uchtdorf o le Korama a Aposetolo e Toasefululua: “O le onosai o lona uiga o le faatalitali ma le malosi ma tumau. O lona uiga o le tumau i se mea ma fai mea uma tatou te mafaia—galue, faamoemoe, ma faaaoga le faatuatua; onosaia faafitauli ma le malosi, e tusa lava pe ua tolopo manaoga o o tatou loto.”

2. Ia faatuatua o le a tali mai le Alii i au tatalo i Lana taimi. Na aoao mai Peresitene Jeffrey R. Holland, Sui Peresitene o le Korama a Aposetolo e Toasefululua: “O le faatuatua o lona uiga o le faatuatuaina o le Atua i taimi lelei ma taimi leaga, e tusa lava pe aofia ai ni mafatiaga seia oo ina tatou vaai i Lona aao o faaali mai mo i tatou. E ono faigata lena mea i lo tatou lalolagi i nei aso pe a talitonu le toatele o le lelei aupito maualuga i le olaga o le alo’ese lea mai puapuaga uma, ma e leai se tasi e tatau ona tiga i soo se mea. Ae o lena talitonuga o le a le taitaia atu ai lava i tatou i le ‘fua o le tumu o Keriso’ [Efeso 4:13].”

3. Tatalo mo le taitaiga. “O le tatalo o le faatinoga lea e aumaia ai le finagalo o le Tama ma le manao o le tamaitiiti e o faatasi ma le tasi ma le isi.” E mafai foi ona tatou tatalo ia malamalama i le finagalo o le Atua mo i tatou. Mo se faataitaiga, pe i ai ea se laasaga itiiti e mafai ona tatou tatalo ai e ono taitai atu ai i tatou i lo tatou manaoga tele atu? Pe o i ai se faanaunauga e ese mai e ono sili atu ona taua mo i tatou e tulituliloa i le taimi nei? Afai tatou te le iloa le mea e fai o le isi laasaga e sosoo ai, e mafai ona tatou tatalo ia iloa le mea e tatalo ai.

Ua folafola mai e le Atua o le a faataunuuina manaoga amiotonu uma o o tatou loto. Faalagolago i Lana taimi o le a lelei ai mea uma, ma o le a Ia faamanuiaina oe mo lou onosai.