Faalogoina o le Siufofoga o le Atua—Mauaina o Faaaliga Patino

“A uma ona tatou papatiso, e folafola mai e le [Faaola] e tuu mai ia i tatou le meaalofa o le Agaga Paia. O le a taialaina ma faamafanafanaina i tatou, ma o le a fesoasoani le Agaga Paia ia i tatou ia iloa le upumoni. O le a tatou lagona o loo faatasi le Agaga Paia ma i tatou. O le a tatou maua lagona o le filemu, alofa, ma le olioli, ma o le a tatou maua le naunautai e auauna atu i isi. O le a tatou taumafai malosi i o tatou olaga atoa e faafiafia le Alii.”

“O se tasi o fesili e fesiligia e le toatele o tagata i le lalolagi o le, pe silafia moni lava ma faafofoga mai le Atua ia i tatou. O le tala fiafia e faapea e le gata ina faafofoga mai le Atua ia i tatou—ae o faaaliga patino e avanoa mo i tatou taitoatasi a o tatou saili ma le agaga tatalo le finagalo o le Alii mo o tatou olaga. …

“Ua faamanino mai e tusitusiga paia e faapea, e mafai e le Agaga Paia ona fesootai mai i le tele o auala. O nisi taimi e tautala mai e Ia le filemu i lou mafaufau. O nisi taimi Na te uunaia ai mafaufauga po o manatu e faatumulia ai lou mafaufau. O nisi taimi e faamalamalamaina e Ia lou mafaufau. O nisi taimi e faamatua’ia e Ia lou loto ia faatumulia i le olioli.

“Ou te talisapaia tali faaagafesootai o ala o faasalalauga ua ou mauaina i la’u pou faasilasila o le auala e te maua ai faaaliga. Sa ta’ua e se tasi e tatau ona tatou lotomaualalo ma talia uunaiga faaleagaga tatou te maua. Ona tatau lea ona tatou faalogo ma usitai i uunaiga nai lo le lalolagi.

“Ua aoao mai e Peresitene Russell M. Nelson: ‘E te le tau mafaufau po o le a le mea e moni. E te le tau mafaufau po o ai e mafai ona e faatuatuaina ma le saogalemu. E ala mai i faaaliga faaletagata lava ia, e mafai ai ona e maua la oe lava molimau o le Tusi a Mamona o le afioga a le Atua, o Iosefa Samita o se perofeta, ma o le Ekalesia lenei a le Alii.’

“Ou te faamautinoa atu ia te outou o le taitaiga faafaaaliga e mafai ona maua e i tatou taitoatasi a o tatou galulue i le tovine a le Alii. O le tele o la tatou taitaiga e sau mai le Agaga Paia. O nisi taimi ma mo nisi o faamoemoega, e sau sa’o mai le Alii. Ou te molimau patino atu e moni lenei mea. O le taitaiga mo le Ekalesia atoa, e na o le Peresitene ma le perofeta o le Ekalesia e oo mai ai.”

“I lo’u olaga faalegaluega, sa ou galue ai o se fomai o le fatu. Ina ua ou faaaogaina se meafaalogo—o se masini e faalogo ai pa’o o le fatu o se tagata ma’i—sa ou faamautinoaina e filemu le potu; ou te tapeina soo se leitio po o se televise sa i ai. Ou te tapunia le faitotoa i le auala savali atu ma fai atu i tagata asiasi po o isi gasegase e aua le tautatala. Sa ou taulai atu i mea sa ou faalogoina ma aloese mai le mafaufau i nisi lava popolega.

“O faaaliga e manaomia ai le taulai atu faapena ma le aveesea o mea faalavefau. Ina ia maua faaaliga patino faaletagata lava ia, e manaomia ona tatou savavali ese mai le pisapisaō faalelalolagi. Tatou te le mauaina faaaliga pe a tatou ita, le fiafia, pe vevesi, to’atama’i pe na o le popole lava foi. Ae, tatou te fatuina se siosiomaga e atiina ae ai lagona ma iloa ai le Agaga.

“O le aoao e saili ma faalagolago i le Agaga o se tomai o le olaga, e le na o se auala le tumau e sao ai i se faalavelave. A o tatou sailia le Agaga Paia, o le a avea o Ia ma se soa faatuatuaina, faamoemoeina, ma pele.”

“O nisi taimi tatou te pauu atu ai i se mailei o le talitonu i eseesega sese.

“Mo se faataitaiga, atonu tatou te talitonu o le mātauina po o le mafuaaga ua na o le pau ia o auala aoga e aoao ai le mea moni. Pe atonu foi tatou te talitonu o le mātauina po o le mafuaaga e faavaivaia ai le faatuatua i se tulaga e lē tatau ai ona i ai so latou matafaioi i le olaga faalelotu. O se eseesega sese lenei aua o le matauina ma le mafuaaga e galulue faatasi ma le faatuatua. “O le faatuatua ‘e aunoa ma galuega’ o le a le faalauteleina e ia lava. O le a tuputupu ae le faatuatua e ala i matauga ma mafuaaga, e o faatasi ma isi galuega faaleagaga. E le gata i lea, o matauga, mafuaaga, ma le faatuatua e tele lava ina manaomia e le gata i le mauaina o faaaliga faaletagata lava ia ae ia malamalama i lena faaaliga.

“O le matauina, mafuaaga, ma le faatuatua e faafaigofie ai faaaliga ma mafai ai e le Agaga Paia ona avea ma se soa faatuatuaina, tauaogaina, ma peleina. O nei elemene o le a avea ma vaega autu i le mauaina o ‘saoasaoa faaleagaga i o tatou olaga,’ e fesoasoani ia i tatou e ‘agai ai i luma i le lotolotoi … o le fefe ma le le mautonu.’”

“I le taimi atoa o le Toefuataiga faifai pea o le talalelei a Iesu Keriso, o tekinolosi e le’i leva ona i ai, ua saofaga i Lana galuega i le aapa atu i le salafa o le lalolagi.

“I se fonotaga … ma tagata faigaluega o Le Ekalesia a Iesu Keriso o le Au Paia o Aso e Gata Ai, sa matou talanoaina ai atinaega faifai pea i, ma mataupu faavae taiala mo, le atamai faafoliga (AI).

“Sa ou fautuaina ina ia tatou fuaina, faapaleni, ma ia moni i a tatou iloiloga o avanoa ma lapataiga, o lona uiga, e le o ni tagata e le mautonu pe faapopoleina.

“Ia te au lava ia, e ui atonu e vave ona tuuina atu e le AI ia faamatalaga, ae e le mafai ona suitulaga i faaaliga pe faatupuina ai mea moni mai le Atua. I le Ekalesia, ua ia i tatou se tiutetauave taua e faamautinoa ai e mafai e le Agaga Paia ona tautino atu i le moni ma le faamaoni o mea tatou te tautatala ai ma faasoa atu i foliga ma anotusi.

“O le aotelega, ou te talitonu i lo tatou gafatia e faaaoga ma le atamai ma le mataalia nei tekinolosi AI, e aofia ai a o tatou saili e puipuia tagata o le Ekalesia ma uo mai taufaasese loloto po o pepelo.”

“Talu ai nei lava, i se tofiga e lauga, sa sau ai se tamaitai ia te au ma fai mai sa ia faitauina faafia le talaaga o lo’u olaga.

“I le le mautonu, sa ou fesili atu ai, ‘Aisea?’

“Sa ia fai mai ia te au e toafa lana fanau laiti i le fale ma sa ia lagona le tausalaina i le avea ai ma se tina faigaluega. O le faitauina o lo’u talaaga faapea sa ou faigaluega i fafo atu o le fale na tuuina atu ai ia te ia le filemu.

“Sa ou tilotilo atu i ona mata ma fesili atu,

“‘E te iloa le auala e maua ai faaaliga patino?

“‘Ioe,’ sa ia tali mai ai.

“Ona ou fai atu lea ia te ia, ‘O taimi uma lava e fai mai ai e se tasi se tala e tiga pe e te masalosalo ai i le mea o loo e faia, tau lava o le faamanatu ia te oe lava: Ou te iloa le auala e maua ai faaaliga patino mo au lava ia ma lo’u aiga.’

“E silafia e le Atua oe. E silafia e Ia lou tulaga. E silafia e Ia lou loto. Faalagolago i le Alii, aoao a lagona Lona siufofoga, ona agai lea i luma ma le mautinoa ma le toomaga. Na te manaomia oe i Lana galuega.”

“Feiloai ia Anastasia, o se tasi o a’u uo fou o le Peraimeri. I se faigalotu lata mai nei a le Peraimeri i Dallas, Texas, sa aoaoina ai e tamaiti Peraimeri mataupu faavae o le talalelei, usuina pese, molimau atu i le Faaola ma Lana talalelei, ma faasoa atu a latou taleni.

“I le taimi o le fonotaga, sa ou taitaia se gaoioiga e fesoasoani ia i latou e aoao ai e uiga i le auala e mafai ai e le Agaga Paia ona fetalai mai ia i tatou. “Sa ou hamuina se pese a tamaiti ma sa mate mai e tamaiti le pese sa ou hamuina. Ona ou fesili atu lea i tamaiti po o le a se mea na latou faia na fesoasoani ia i latou e iloa ai le pese.

“O se tasi tamaitiiti, o Anastasia, sa talotalo mai ma le naunautai lona lima e faasoa mai lana matauga faigofie ae loloto.

“I se leo mautinoa, sa ia faamatalaina ai le auala na taulai mai ai ona mata ma taliga ia te au a o ou hamuina le pese a le Peraimeri, ona mafai lea ona ia iloa le pese ma faalogo i upu i lona mafaufau.

“Pe a tatou tauivi e faalogo i le siufofoga o le Alii, e taua pe o ai tatou te faalogo i ai. Taulai atu ou mata ma taliga i upu ma le alofa o lo tatou Faaola.

“Au uo e, ou te molimau atu o mea na aoao mai e Anastasia e moni. Pe a tatou vaavaai atu i lo tatou Faaola—pe a tatou faalogo toto’a i Lona siufofoga—o le a mafai ona tatou maua le taitaiga paia ua tuu mai i o tatou mafaufau ma o tatou loto. O le a mafai ona tatou iloa le upumoni ma faatupulaia lo tatou faatuatuaina o Iesu Keriso. E taua le itu o loo faasino atu i ai i tatou. O lea, ia tatou ‘tepa atu i le Atua ma ola ai’ (Alema 37:47). Ola i olaga e tumu i le faatuatua ma faaaliga. Olaga ua faatumulia i le filemu, olioli, ma le faamoemoe. Olaga ua faatumulia i le Agaga o le Atua.

“E Faapefea ona e lagona le siufofoga o le Alii?”