E Faigata le Olaga, ae E Mafai Ona Tatou Faia Mea Faigata

I se tasi aso ina ua ou lagona le leiloa, sa ou malaga seia oo ina ou taunuu i se nofoaga filemu lea sa mafai ona ou vaaia ai le sami ma faalogoina ai le pese a manulele. O se nofoaga o le mafanafana—o le nofoaga lelei lea e talanoa ai i le Tama Faalelagi.

Sa ou sasaa atu lo’u loto i le tatalo, ma fesili atu pe aisea na ou oo ai i le tele o faigata. Sa ou fai atu ia te Ia ou te manatu ua faigata tele le olaga ma e le mafai ona ou faaauau na o au. Sa ou fai atu ia te Ia ou te le iloa pe faapefea ona ou taulimaina vaega faigata o le olaga.

Na faafuasei lava, i lena taimi o le vaivai ma le atuatuvale, ona ou lagonaina le mafanafana o le Agaga o siomia ai au—o se faamautinoaga malu sa le o tuua na o au, ma e le tuua lava na o au. Ma sa oo mai i lo’u mafaufau upu o le alofa ma le faamafanafanaga, e faamanatu mai ai ia te au lo’u faasinomaga paia, lo’u gafatia, ma lo’u tomai e faia ai mea faigata ia Iesu Keriso.

Ina ua mavae ni masina o lagonaina le tuuatoatasi ma le le mautonu, sa ou lagonaina le faamautinoaga faalelagi ua mafai ona ou faia—o au o se afafine pele o le Tama Faalelagi ma se faamoemoega. Ua faaeeina au i meaalofa faaleagaga, ma ua noatia au ia te Ia, o le tagata sili ona alofa ma mamana i le atulaulau, ona o a’u feagaiga. Sa ia faamautinoa mai ia te au e mafai ma ua tatau ona ou feagai ma mea uma i le olaga faatasi ma le Faaola o loo i o’u autafa.

Na molimau mai Peresitene Russell M. Nelson i lenei mea ina ua ia tuuina mai le fesili lenei: “I le avea ai ma se tamaitai po o se alii ua maua faaeega paia ma ua faaauupegaina i le mana o le Atua, e faapefea ona faateleina lou talitonuga mautinoa i le iloaina e te le tau feagai ma le olaga na o oe?”

Sa le faigofie, ae sa ou osooso i le faatuatua ma filifili ai e fetaiai ma mea i le olaga ma le faalagolago ia Iesu Keriso. Ua mafai ona ou taliaina le tele o avanoa ma ausia le tele o mea e sili atu nai lo le mea sa ou mafaufauina e mafai ona ou faia.

O loo faaauau pea ona ou feagai ma faafitauli ma luitau, ma o nisi taimi ou te lagona ai le toe tolotolo mai o lena fefe, ae a ou aapa atu mo lo’u faatuatua i le Faaola, ou te iloa “o le alofa atoatoa e tuliesea ai le fefe” (1 Ioane 4:18).

O le tele o lo’u oo i ai, o le tele foi lena o lo’u iloaina o o’u luitau o avanoa ia mo le tuputupu ae ma le aoaoina. E pei ona aoao mai Elder Gerrit W. Gong o le Korama a Aposetolo e Toasefululua, “Faanoanoa … o le a avea ma olioli e faavavau e ala i le Togiola toefuataiina a Iesu Keriso.”

Pe a ou toe mafaufau i la’u malaga, ou te iloa e le na o se tala o tauiviga. Ma ua ou aoaoina o le faatuatua e le na o le talitonu; e faatatau i le faatuatuaina o loo alofa atoatoa mai lo’u Tama Faalelagi ma Iesu Keriso ia te au. E ala i la tatou sootaga o le feagaiga, Latou te faatasi ma au i aso uma.

Na folafola mai e Elder David A. Bednar o le Korama a Aposetolo e Toasefululua e faapea “a o tatou fausia le faavae o o tatou olaga i luga o le ‘papa’ o Iesu Keriso, … e mafai ona faamanuiaina i tatou e fai ma faatoilalo mea faigata.”

E ala mai ia te Ia ma ona o a tatou feagaiga, e mafai moni ai lava ona tatou faatoilaloina soo se mea e faalavelave i lo tatou ala.