O Le Auala na Suia ai Lo’u Olaga i le Suia o O’u Mafaufauga

E taua le faamanino atu o le mafaufau o le a lelei mea uma e le faapea o le ola ai i le faafitia o mea faigata po o lagona faigata. O le le amanaiaina o faafitauli o le a le foia ai.

O le mafaufau lelei e sili atu ona faatatau i mea tatou te filifili e taulai atu i ai, e ui lava i tauiviga o loo tatou feagai.

E pei ona aoao mai Peresitene Russell M. Nelson:

“O le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.

“… O le olioli e sau mai ma ona o [Iesu Keriso]. O Ia o le puna o le olioli uma.”

Talu ai sa tele lava ina taulai atu o’u mafaufauga i lo’u fefe ma le le mautonu, sa le’i tele so’u olioli i lo’u olaga. Sa ou tatalo mo le Tama Faalelagi ma Iesu Keriso e aveese o’u faafitauli. Ae ua galo ia te au, e tusa ai ma le fuafuaga a le Tama Faalelagi, sa faasaoina foi e Keriso lo’u tomai e faia ai filifiliga.

O se tasi o ki i le fesuisuiai o lo’u mafaufau ma le lagona lelei o le filifili lea e ola ma le lotofaafetai.

Nai lo le auai i talanoaga le lelei mo au lava ia, sa amata ona ou saili malosi mo mea lelei i o’u aso. O nisi taimi o se faamatalaga agalelei mai se tamaitiiti o le vasega. O isi taimi sa savalivali ai i le fale i se afiafi matagofie o le tautotogo po o le ai i se taumafataga lelei.

E lei umi ae ou iloaina o le faatinoina o le lotofaafetai na faateleina ai lo’u fiafia i le olaga. Faataitai i ai! O le mafaufau i soo se mea lelei tatou te oo i ai e faateleina ai lona aafiaga (tagai i le Mataupu Faavae ma Feagaiga 78:19).

Sa ou aoina mai taimi lelei e pei o ni fasi oa, ma i le faaiuga o aso taitasi, sa ou tei lava i taimi uma i le faamanuiaina ma le faafetai sa ou lagonaina. E lei mou ese atu vaega faigata o lo’u olaga, ae na amata ona le toe i ai se tui.

E masani ona tatou matua pisi i mea e le mafai ona tatou puleaina ma galo ai mea uma tatou te mafaia ona pulea.

I le Mataupu Faavae ma Feagaiga 58:27–28, ua faamanatu atu ai e le Alii i le Au Paia e faapea “e tatau i tagata ona … fai mea e tele i lo latou lava loto malie, ma aumai le amiotonu tele;

“Aua ua i totonu ia te i latou le mana, lea ua latou pule ai ia te i latou lava” (faaopoopo le faamamafa).

A o ou filifili e taulai atu i taimi o le olioli, ‘ata, filemu, ma musumusuga, sa ou iloaina e mafai ona ou filifili e fatu nisi o na mea. Sa i totonu ia te au le mana!

E mafai ona foliga faapenei:

• Auai ma fuafuaina ni gaoioiga malie.

• Mauaina o se faamanuiaga faaleperisitua.

• I ai i nofoaga faalenatura,

• Tu i nofoaga paia.

• Aoao se tomai po o se taaloga fou.

• Faitauina o se tusi lelei.

• Auauna atu i isi.

• Faaaluina o le taimi ma tagata e siitia oe.

• Faamalositino.

• Faalogologo ma matamata i ala o faasalalauga lelei.

Ou te iloa o luitau o le soifua maloloina faaletino ma le mafaufau e mafai ona avea ma papupuni i le auala tatou te faaaogaina ai lo tatou faitalia. I nei tulaga, e mafai ona faaauau pea ona tatou faaaogaina ma le amiotonu lo tatou faitalia e ala i le filifili e saili atu i se fesoasoani faafomai ma faapolofesa.

O fofo, manatunatu loloto, suiga o le olaga, ma fualaau, pe a tuufaatasia ma le tatalo faamaoni, suesueina o tusitusiga paia, ma tapuaiga i le lotu ma le malumalu, e mafai ona faia se eseesega tele pe a tatou tauivi. E mafai foi ona tatou faalemuina pe a lofituina pe vaivai, ole atu mo se fesoasoani mai tagata tatou te faatuatuaina, ma saili atu i le taitaiga ma le faamafanafanaga mai le Tama Faalelagi.

E finagalo le Tama Faalelagi ia tatou maua le olioli—o se olioli e maua ia Iesu Keriso. O le mafuaaga tonu lava lea ua tatou i ai! 2 Nifae 2:25–26 ua faamanatu mai ai ia i tatou:

“Na paʼū Atamu ina ia i ai tagata; ma ua i ai tagata, ina ia latou maua le olioli.

“… Ma ona ua togiolaina i latou mai le pau [e Iesu Keriso] ua latou saoloto ai e faavavau, i le iloa o le lelei mai le leaga; e fai mo i latou lava ae le faamalosia” (faaopoopo le faamamafa).

Ua mafai e Iesu Keriso ona tatou atiina ae le olioli e ala i lo tatou faitalia. A o tatou salamo, aoao mai a tatou mea sese, ma taumafai e fai mea lelei, ua tatou faataunuuina le fuataga o lo tatou foafoaga. Ua tatou filifilia le olioli.

Pe a e mafaufau moni i ai, o le mauaina o lenei mana o se faamanuiaga ofoofogia.

Na fautua mai Elder Dieter F. Uchtdorf o le Korama a Aposetolo e Toasefululua: “E le tatau ona tatou faatalitali ina ia fiafia seia tatou taunuu i se tulaga i le lumanai, ae iloa ai ua uma ona maua le fiafia—i taimi uma! E le talisapaiaina le olaga i le tau ina na ona mafaufau i mea ua tuanai. ‘O le aso lenei ua faia e le Alii … ,’ na tusia ai e le Fai Salamo. ‘Ia tatou olioli ma fiafia i ai’ [Salamo 118:24].”

Ua suia lo’u olaga a o ou filifili e sui ou mafaufauga. Ua sili atu lo’u mautinoa, agalelei, ma le fiafia. Ua sili atu lo’u fiafia e faataitai ni mea fou ma talia avanoa. Ma ua sili atu lo’u matauina o le aao o le Alii i lo’u olaga.

Faatasi ai ma le fesoasoani a le Tama Faalelagi ma Iesu Keriso, ua sili atu ai lo’u lelei i le faia o faaiuga e aumaia ai ia te au le fiafia moni ma le filemu.

A o outou sailia La latou taitaiga, ou te iloa o le a Latou taialaina foi outou.