Sootaga Malolosi ma Latalata Atu i le Atua e ala i Feagaiga e Tele

O le papatisoga o le feagaiga muamua lea e osia e tagata uma i le ala o le feagaiga. O le feagaiga o le papatisoga o se molimau faalauaitele i le Tama Faalelagi i ni tautinoga patino se tolu: ia auauna atu i le Atua, ia tausia Ana poloaiga, ma ia naunau e tauave le suafa o Iesu Keriso (tagai i le 2 Nifae 31:7, 13–14; Mosaea 18:10; 21:32, 35; Mataupu Faavae ma Feagaiga 20:37). O isi itu e tele ina o faatasi ma feagaiga o le papatisoga—tatou te “tauamo avega a isi,” “faanoanoa faatasi ma e faanoanoa,” ma “faamafanafana ia i latou [e] manaomia le faamafanafanaga” (Mosaea 18:8–9)—o fua na o le osia o feagaiga nai lo le na o se vaega o le feagaiga moni. O nei vaega e taua aua o mea ia e masani ona faia e se agaga liua.

O le isi feagaiga e sosoo ai e osia e tagata uma i le ala o feagaiga o le faaeega paia. E pei ona ou ta’ua, o le faaeega paia e aofia ai feagaiga e usitai i tulafono e lima e le mavavaeeseina. A o ou iloiloina ia tulafono taitasi, vaai pe faapefea ona ogatasi ma faamalosia vaega o le feagaiga o le papatisoga.

Muamua, tatou te osifeagaiga i le faaeega paia e “ola i le tulafono o le usiusitai,” o lona uiga tatou te “taumafai e tausi poloaiga a le Tama Faalelagi.” O lenei feagaiga e ogatasi tonu lava i lalo o le folafolaga o le feagaiga o le papatisoga e tausi poloaiga a le Atua.

Lona lua, tatou te osifeagaiga e “usitai i le tulafono o le taulaga, o lona uiga o le ositaulaga lea ma lagolago le galuega a le Alii ma se loto momomo ma le agaga salamo.” O lenei feagaiga e ogatasi ma folafolaga o le papatisoga e auauna atu i le Atua ma tausi Ana poloaiga. E le gata i lea, o le salamo o se vaega autu lea o le tauaveina o le suafa o Iesu Keriso.

Lona tolu, tatou te osifeagaiga e “usiusitai i le tulafono o le talalelei a Iesu Keriso.” Tatou te faia lenei mea, i se vaega, e ala i le ola ai i le aoaoga faavae a Keriso. E aofia ai le “osia o feagaiga ma le Atua e ala i le mauaina o sauniga o le faaolataga ma le faaeaga” ma le tausia o na feagaiga i o tatou olaga atoa. O le feagaiga e aofia ai le “taumafai e ola i poloaiga sili e lua”: ia alofa i le Atua ma tuaoi (tagai Mataio 22:37, 39). O lenei feagaiga e ogatasi ma vaega uma e tolu o le feagaiga o le papatisoga.

Lona fa, tatou te osifeagaiga e tausi le “tulafono o le ola mama a le Atua, o lona uiga o le aloese mai feusuaiga i fafo atu o se faaipoipoga faaletulafono i le va o se alii ma se tamaitai.”

Na saunoa Elder Jeffrey R. Holland: “O le faaipoipoga na faamoemoeina [e le Atua] e faaatoaina ai le faatasiga o se alii ma se tamaitai---o o laua loto, faamoemoega, olaga, alofa, aiga, lumanai, ma mea uma. … Sa tatau ona avea i laua ma ‘tino e tasi’ i o laua olaga faatasi [tagai Kenese 2:23–24].”

E le mafai ona tatou ausia le ituaiga olaga o loo olioli ai lo tatou Tama Faalelagi e aunoa ma se tautinoga atoatoa i le faamaoni i totonu o se faaipoipoga i la tatou tane po o le avā e tusa ma le fuafuaga a le Atua. O lenei feagaiga e ogatasi ma le vaega o le feagaiga o le papatisoga e tausi poloaiga a le Atua.

Lona lima, tatou te osifeagaiga, e “tausi le tulafono o le faapaiaga,” o lona uiga tatou te tuuto atu i tatou lava ma mea uma ua faamanuiaina ai i tatou e le Alii i le fausiaina o Lana Ekalesia. Na toefuatai mai ki o le perisitua paia ina ia mafai ona faatinoina sauniga o le perisitua, ma faatagaina ai i tatou e osia feagaiga ma le Atua. E na o le Ekalesia toefuataiina a Iesu Keriso e mafai ona faia ai lenei mea mo fanau a le Atua i itu uma e lua o le veli. Tatou te tautino atu la tatou lagolago i le galuega a le Atua. O lenei feagaiga e ogatasi ma le vaega o le feagaiga o le papatisoga e auauna atu i le Atua. E le gata i lea, o lenei feagaiga e ogatasi ma le tauaveina i o tatou luga o le suafa o Keriso aua o le ola ai e manaomia ai lo tatou faatumauina tumau o se loto ua matuai suia lava.

O lenei la ua faatulagaina le tulaga mo le feagaiga e fesootai ma le faamauina faatasi o se tamaitai ma se alii. I lenei sauniga la te maua ai folafolaga, la te osia ai se feagaiga ma le tasi ma le isi, ma la osia ai se feagaiga ma le Atua. Ina ia toe faamanatu folafolaga, se’i o tatou toe fo’i i tua i le faitau afe o tausaga. Na maua e Aperaamo le talalelei (tagai Mataupu Faavae ma Feagaiga 84:14; Aperaamo 2:11) ma ulu atu i le faaipoipoga selesitila, o le feagaiga lea o le faaeaga (tagai Mataupu Faavae ma Feagaiga 131:1–4; 132:19, 29). Na maua e Aperaamo se folafolaga o faamanuiaga uma o nei feagaiga o le a ofoina atu i ana fanau faaletino (tagai Mataupu Faavae ma Feagaiga 132:29–31; Aperaamo 2:6–11). O tagata uma e o atu i le ala o le feagaiga e avea ma “fanau a Aperaamo, ma suli e tusa ma le folafolaga” (Kalatia 3:29).

Pe a faamauina se alii ma se tamaitai i le tasi ma le isi, ua folafola atu ia i laua nei faamanuiaga, e pei lava ona sa faia ia Aperaamo. O faamanuiaga e aofia ai le, o le a latou “o mai i le uluai toetutu; … mautofi i nofoalii, malo, itumalo, ma mana, puleaga …; ma o le a latou ui atu i agelu … i lo latou faaeaga ma le mamalu i mea uma …, o le mamalu lena o le a avea ma se atoatoaga ma se faaauauga o fanau e faavavau faavavau lava” (Mataupu Faavae ma Feagaiga 132:19; tagai foi i le fuaiupu 20). I le taimi o le faamauga, e osia ai e se tamaitai se feagaiga ma lana tane ma osia ai e se alii se feagaiga ma lana avā. Ua tuufaatasi ai galuega o le olaga faaletino. E ulu atu uma le tane ma le avā i se faatulagaga o le perisitua lea e le mafai ona ulufale toatasi i ai ma e manaomia e ulufale atu ai i le tikeri aupito maualuga o le malo selesitila (tagai Mataupu Faavae ma Feagaiga 131:1–4). La te auauna atu i le tasi ma le isi ma a la’ua fanau ma faapea ona auauna atu ai i le Atua. A o faamauina se alii ma se tamaitai, la te osifeagaiga ma le Atua e tausi poloaiga uma e faatatau i le faaipoipoga i le feagaiga fou ma tumau-faavavau.

O elemene o le faaeega paia ma le faamauga e ogatasi faatasi ma e faamalosia ai vaega uma e tolu o le feagaiga o le papatisoga. O vaega taitasi o le feagaiga o le papatisoga ma feagaiga o le faaeega paia ma le faamauga e fesiliai ma e faamalosia e le tasi le isi.

E le faamalosia i tatou i soo se auala e tumau ai i se sootaga faalefeagaiga ma le Atua e tusa lava pe ua uma ona tatou filifili e osia nei feagaiga. Pe a tatou osia se sootaga faalefeagaiga ma le Atua, ua tatou tausoa faatasi i se feagaiga ma Ia. Tatou te oo ma auai faatasi i le feagaiga. E moni foi lenei mea mo se tamaitai ma se alii pe a faamauina i laua; la te osia se feagaiga ma le tasi ma le isi. Ou te talitonu e taufaasese le manatu faapea, e noatia le tasi i le isi mo le faavavau; e le o faapologaina, faamalosia, saisaia, pe faamalosi i la’ua. Ae, la te tausoa ma aafia faatasi i le feagaiga. O loo faaauau pea ona avea le faitalia ma se vaega sili ona taua o le faaipoipoga e faavavau. Na saunoa mai Peresitene Dallin H. Oaks, Fesoasoani Muamua i le Au Peresitene Sili: “Ua tatou iloa foi o le a le faamalosia lava e le [Atua] se tasi i se sootaga o faamauga pe a le manao ai o ia. O faamanuiaga o se sootaga faamauina ua faamautinoa mai mo i latou uma o ē tausi i a latou feagaiga ae e le ala i le faamalosia o se sootaga faamauina i luga o se isi tagata, o lē e le agavaa pe lē loto i ai.” E leai se tasi o le a faamalosia e ola i se faaipoipoga latou te le filifilia pe talia, e tusa lava pe ua uma le faamauga o le malumalu.

O feagaiga e tele e tosina latalata atili ai i tatou ia Keriso ma faamalosia ai lo tatou sootaga ia te Ia. O le faamoemoega o nei noataga o le fesoasoani lea ia i tatou ia avea ma soo e sili atu ona liua, faamaoni, ma tuuto o Iesu Keriso. O lo’u lava aafiaga ua fautua mai ai, i le aluga o taimi, o tagata matutua ua papatisoina, [maua] faaeega paia, ma faamauina i se toalua, o le a sili ona faatumauina ma faalolotoina lo latou avea ma soo i le ala o le feagaiga. O tagata matutua e ono le [faatumaua ma faaloloto lo latou avea ma soo], o e ua papatisoina ma maua faaeega paia ae e le’i faamauina i se toalua. O e atonu e aupito itiiti ona faatumau ma faaloloto lo latou avea ma soo i le aluga o taimi, o tagata matutua ia ua papatisoina ae e lei maua faaeega paia. A o umi lo tatou avea ma soo, tatou te faaopoopo i ai feagaiga o le faaeega paia i la tatou feagaiga o le papatisoga. O le mea lena e atili malosi ai le fusia o i tatou i le Atua. Ma, a oo mai le faamanuiaga o le faamauina i se toalua, e mafai ona atili malosi ai le sootaga o le feagaiga.

Ae peitai, faamolemole ia manatua, o nei mea moni e le filimaotia ai. Ua outou ma ou iloa tagata taitoatasi e lei maua faaeega paia o e o ni soo matuai faamaoni o Keriso, ae ua tatou iloa i latou o e ua faamauina i se toalua e le o ni soo faamaoni. O le faamaoni o se filifiliga a le tagata lava ia e uiga i le auala tatou te ola ai i feagaiga ua tatou osia. O le le faamauina i se toalua e le taofia ai lou alualu i luma i lou avea ma se soo i le Faaola. A o faaauau pea ona e lototoa i lau molimau ia Iesu Keriso, e faaauau pea lou alualu i luma.

E ui i lena faamatalaga, i le avea ai ma se Aposetolo a le Alii o Iesu Keriso, e i ai ni a’u valaaulia mo outou taitoatasi. O la’u valaaulia mo i latou o e ua papatisoina ae e lei maua faaeega paia, ia e saunia mo, ma maua ou faaeega paia. O le faaiuga e maua le faaeega paia e patino i le tagata lava ia ma e tatau ona faia ma le agaga tatalo. E na o lou faitalia lava e faalagolago i ai—e leai se isi tagata. Ma le isi, e le o le matafaioi a se isi lava tagata—taitai, uo, vaega o tupulaga, aiga, po o a’u—e filifilia lenei mea mo oe pe uunaia soo oe e faia lena mea. O le toatele o outou ua uma ona ausia tuutuuga uma e tatau ona faaeeina atu pe afai tou te lagona se manao e maua ma faamamalu feagaiga paia o le malumalu i lo outou olaga atoa. I le Tusitaulima Aoao tatou te faitau ai:

“O tagata o le Ekalesia e mafai ona filifili e maua o latou lava faaeega paia, pe a latou ausia uma ia tulaga nei:

• Ia le itiiti ifo ma le 18 tausaga le matutua.

• Ua mae’a pe ua latou le o toe auai i le a’oga maualuga, a’oga tulagalua, po o le maualuga talitutusa.

• Ua atoa lelei le tausaga e tasi talu ona fai o latou faamauga.

• Ua latou lagona se manao e maua ma faamamalu feagaiga paia o le malumalu i o latou olaga.”

Seia oo ina e saunia, ia faaauau pea ona sauniuni. E aofia ai le faia o galuega o talafaasolopito o aiga ma le agavaa mo ma le faaaogaina o se pepa faataga o le malumalu mo papatisoga ma faamauga sui. Ma le isi, taulai atu ma le toto’a i le feagaiga ua uma ona e osia. Aai ma feinu ma le faautauta i le faamanatuga i vaiaso uma. Afai e te filifili e misi sauniga faamanatuga ae e mafai ona e auai, ua e tuu oe lava i se tulaga lamatia faaleagaga. Ia faaauau ona ola faamaoni i le talalelei a Iesu Keriso. A o e talia lenei valaaulia, o le a e latalata atili atu ai i le Atua.

Se’i o tatou liliu atu ia i latou ua papatisoina ma maua faaeega paia ae e le’i faamauina i se toalua. Ua tatou iloa uma lava o le faamauina i se toalua e aofia ai le faitalia a se isi tagata. E te le filimaotia na o oe lenei laasaga. O la’u valaaulia e taulai atu i mea e mafai ona e faia.

Afai o le faamauina i se toalua e le o lou faamanuiaga lea i le taimi nei i le tulaga e aofia ai lou faitalia, aua le faatuai ona faaaoga ou avanoa. Aua ne’i tapunia le faitotoa i le mea e mafai ona tupu. Ia Me 2023, na aoao mai ai Peresitene Dallin H. Oaks:

“O loo i ai se fuafuaga a se Tama Faalelagi alofa mo Ana talavou matutua, ma o se vaega o lena fuafuaga o le faaipoipoga ma fanau.

“… Matou te fautuaina outou e faaaoga au fegalegaleaiga ma le itupa faafeagai i mamanu o tafaoga faamasani ia e i ai le gafatia e faasolo atu i le faaipoipoga.”

Manatua, o le ola e faavavau e le o se fesili o le tulaga faale-faaipoipoga i le taimi nei ae o le avea ma soo; o lona uiga, o le “lototoa i le molimau ia Iesu” (Mataupu Faavae ma Feagaiga 76:79; tagai foi i le 121:29). E te maua le alofa tunoa o Keriso e ala i le usiusitai i tulafono ma sauniga o le talalelei. E le gata i lea, ou te valaaulia outou e taulai atu i feagaiga ua outou osia. Alu soo i le malumalu ma auai i le galuega o talafaasolopito o aiga. Ia aai ma feinu ma le faautauta i le faamanatuga i vaiaso uma. A o e faia, o le a e faamalosia lau sootaga ma Iesu Keriso (tagai 3 Nifae 18:12–13).

Mo i latou e le’i faamauina lava i se toalua i lenei olaga po o i latou e lei i’u a latou faamauga i le mea e pei ona sa faamoemoe i ai, mafaufau i le folafolaga faamafanafana lenei na faia e Peresitene Lorenzo Snow i le 1899. O le saunoa ai e uiga i tamaitai e le’i faaipoipo: “E foliga mai e tele ni auega e faatatau i lenei tulaga. E le manaomia lenei mea. …[Ae] ua tuuina atu nisi o aoaoga faavae valea i nisi o tuafafine e faatatau i lenei mea ma isi mea tai faapenei. … E leai se tagata o le Au Paia o Aso e Gata Ai, e maliu i le mae’a ai ona soifua i se olaga faamaoni, o le a aveesea soo se mea, ona o le lē mafai ona faia o nisi o mea ona ua latou lē maua ni avanoa. … O le a latou maua faamanuiaga uma, faaeaga ma le mamalu o le a maua e soo se alii po o se tamaitai na mauaina lenei avanoa. … O le a [latou] maua auala e tuuina atu ai ia i latou e mafai ai ona latou faamautu faamanuiaga uma e alagatatau mo tagata ua faaipoipoina.”

Ou te lagona le faamalosia e faaopoopo atu e le tatau ona e faananau pe na e maua le avanoa e faamauina ai i se toalua ae ua misia pe e lei taunuu foi lou faamauga i se maota o le Alii e pei ona e faamoemoe i ai. Aua le toe mateina faalua oe lava. Ua lava le alofa tunoa o le Atua mo tagata uma. O soo se mea “e le talafeagai e uiga i le olaga e mafai [ma o le a] faasa’oina e ala i le Togiola a Iesu Keriso.” A o e talia lenei valaaulia, o lenei mea o le a e latalata atili atu ai foi i le Atua.

Mo i latou ua faamauina i se toalua, o lenei faamauga o se tulaga taua i lou olaga, ae le o se faaiuga ua tamau. E tatau ona e fetaomi atu i luma ma taulai atu i feagaiga ua e osia, e pei lava ona ou faamalosiau atu isi e fai: fetagofi atu ma le faautauta i le faamanatuga, tapuai i le malumalu, ma le faia o galuega o talafaasolopito o aiga. E lē gata i lea, saili ia avea ma se toalua e sili atu ona lelei e ala i le mauaina o uiga faaKeriso. Ia avea ma toalua e tatau ona maua e lou toalua. Afai ua faamanuiaina oe e avea ma se matua, ia avea oe ma matua e tatau ona maua e lau fanau. A o e talia lenei valaaulia, o le a e latalata atili ai foi i le Tama Faalelagi ma Iesu Keriso ma faamalosia ai au sootaga o feagaiga ma i La’ua.

Pe ua e osia se feagaiga se tasi pe tele, ia faalogo ma usitai i le lapataiga a le Faaola:

“Peitai e i ai se avanoa e ono paʼū ai le tagata mai le alofa tunoa ma alu ese mai le Atua soifua;

“O lea ia faaeteete ai le ekalesia ma tatalo e lē aunoa, neʼi pauu atu i latou i faaosoosoga;

“Ioe, ma ia faalogo foi i latou o e ua faapaiaina” (Mataupu Faavae ma Feagaiga 20:32–34).

Na faatuina e le Atua ni feagaiga se tele e faamanuia ai i tatou, ae le o le ta’usalaina o i tatou. O le taulai atu ma le toto’a i feagaiga ua tatou osia ma sauniuni mo le isi feagaiga o le auala sili lea e saunia e maua mea uma ua i ai i le Tama Faalelagi. O le auala lea tatou te “mafaufau ai faaselesitila.” Ou te molimau atu o Iesu Keriso e malosi e laveai. E finagalo o Ia i se sootaga vavalalata ma oe, e oo lava i se sootaga faalefeagaiga. Ou te tatalo ina ia outou osia feagaiga ma le faamoemoe moni ma faataga na feagaiga e faamanuia outou i le taimi nei ma le faavavau.