Ua Na’o Tusiga Faatekinolosi: Talavou Matutua
O Le Tulafono o le Ola Mama E Le o se Maagao—O se Faamanuiaga!
E alaala le tusitala i Ulaanbaatar, Monokolia.
Sa foliga mai o tagata sa le tausia le tulafono o le ola mama sa sili atu ona fiafia nai lo a’u.
Sa avea lava au ma se tagata fiailoa.
A o ou tuputupu a’e, sa i ai ni a’u fesili tetele e uiga i le auala na foafoaina ai le lalolagi, le auala na fausia ai le ola o le tagata, ma le mafuaaga ua tatou i ai i lenei paneta. Ina ua ou aoao e uiga ma taliaina le talalelei a Iesu Keriso i le 14 o o’u tausaga, sa ou mauaina le tele o tali ma se faauigaga sili atu mo lo’u olaga. Sa ou faia le mea sili e tausi ai poloaiga a le Atua ma lagona ai le olioli moni i le ola ai i le talalelei.
Sa faaauau pea ona ou alualu i luma i le tele o auala mananaia—sa ou auauna atu i se misiona, auai i le iunivesite, ma isi mea. Ae ina ua latalata i le 30 o o’u tausaga, sa ou lotovaivai ona ou te lei maua le avanoa e faaipoipo ai. E ui lava sa ou vaaia le toatele o tagata na siomia au ua filifili e ola e le tusa ai ma le tulafono o le ola mama, ae sa ou mausali i la’u tautinoga e tausi a’u feagaiga ma saunia mo se faaipoipoga i le malumalu.
Sa ou talitonu o le fiafia e oo mai i le usiusitai (tagai Mosaea 2:41). Ae a o ou tilotilo solo i a’u uo o e na filifili e le tausia le tulafono o le ola mama, sa foliga mai sa sili atu lo latou fiafia nai lo a’u. Sa latou maua ni aafiaga fou i tafaoga faamasani ma mafutaga, ma sa ou lagonaina se lagona o le le tutusa. I le avea ai ma se tagata fiailoa ma aoaoina lelei, sa ou le fiafia ona ua foliga mai ua sili atu nei le atamamai ma le faatagata matutua o a’u uo nai lo a’u.
O poloaiga na amata ona faaitiitia le lagona e pei o se faamanuiaga ae na atili ona pei o se maagao ua taofia a’u mai le ola ai i lo’u olaga sili ona lelei.
Sa faaosoosoina a’u e savali ese mai le manatu o se faaipoipoga i le malumalu ma se olaga e faaogatotonu i le talalelei ina ua mavae sina taimi. Sa lagona le matuai faigata lava o le tausia o le tulafono o le ola mama ina ua siomia au e se lalolagi e le’i vaai i se mafutaga vavalalata faaletino e pei ona sa ou vaai i ai.
Taulai atu i le “Aisea”
I le taimi na sili ona ou tauivi ai, sa faasoa mai e lo’u faiaoga inisitituti se tala e uiga i le oo atu o faifeautalai mo le taumafataga o le afiafi. Sa ia faasoa mai le auala na saunia ai lona aiga atoa ma auai i manatu faaleagaga na faasoa mai e faifeautalai.
I lena taimi, sa ou iloa ai e sili atu nai lo se isi lava mea, sa ou manao e tausia se aiga e mafai ona olioli faatasi i faamanuiaga o le talalelei.
Ona [ou] malamalama atoa lea. O le tulafono o le ola mama sa le o se maagao na taofia a’u mai le oo i le meaalofa o feusuaiga—sa o se faamanuiaga na faasino atu ai a’u agai i le malumalu ma lo’u aiga e faavavau.
Na aoao mai Elder Dieter F. Uchtdorf o le Korama a Aposetolo e Toasefululua: “Pe sesē ea le i ai o tulafono? E leai. Tatou te manaomia uma lava [tulafono] i aso uma. Ae e sesē le taulai atu i na o tulafono nai lo le taulai atu i le Faaola. E tatau ona e iloa ia pe aisea ma pe faapefea ona iloilo lea o taunuuga o au filifiliga.”
Ina ua ou manatuaina le Faaola ma Lana taulaga mo a’u, sa ou filifili loa o faamanuiaga o le tausia o a’u feagaiga, e aofia ai le tulafono o le ola mama ma le faaipoipo i le malumalu, o le a aoga ai le faatalitali. O le fiafia moni e le faatatau i le faia o soo se mea e te manao ai. E faatatau i le agavaa e maua le mafutaga ma le Agaga Paia.
E mafai ona i ai isi taimi tatou te lagona ai le faaosoosoina e soli a tatou feagaiga. E le faigofie i taimi uma le ola ai i le talalelei! Ae o feagaiga tatou te osia ma poloaiga tatou te tausia na faatulagaina e se Tama Faalelagi alofa o le e finagalo ia sili ona tatou manuia. E mafai ona tatou faatuatuaina e sili atu mea ua Ia silafia nai lo i tatou ma o le mulimuli ia te Ia nai lo le lalolagi o le a taitai atu ai i tatou i taimi uma i le olioli.
Faatuatua i le Taimi a le Atua
Ou te lagona le faafetai ona sa ou gaualofa talu ai nei ma faaipoipoina i le malumalu. Ua ou fiafia sa ou tuuto atu i poloaiga ina ia mafai nei ona ou olioli i faamanuiaga o le faaipoipoga e faavavau.
Ioe, o le usiusitai e le galue pei o se masini faifaatau. E le na ona tatou maua o se faamanuiaga patino i le taimi lava e uma ai ona tausia se poloaiga. E pei ona saunoa mai Peresitene Jeffrey R. Holland, Sui Peresitene o le Korama a Aposetolo e Toasefululua, “O nisi faamanuiaga e vave oo mai, o nisi e tuai mai, ae o isi e le oo mai seia oo atu i le lagi; ae mo i latou o e talia le talalelei a Iesu Keriso, e oo mai lava.”
E i ai la’u molimau e silafia e le Atua i tatou taitoatasi ma o le a Ia tausia i tatou. E ui lava e mafai ona faigata ona lagona le le mautonu pe tulaga ese mai au tupulaga, aemaise lava i se lalolagi e le mama, ou te talitonu “e galulue faatasi mea uma lava mo le lelei o i latou o e alolofa i le Atua” (Roma 8:28). Ou te iloa o le olioli moni, tumau e le na o le usiusitai i poloaiga a le Atua e oo mai ai ae o le atiina ae foi o se sootaga ma Ia.