Ua Na’o Tusiga Faatekinolosi: Talavou Matutua
O Auala e 4 o loo Ou Faatoilaloina ai O’u Vaivaiga e ala ia Keriso
E alaala le tusitala i Bogotá, Kolomupia.
O loo ou tauivi e faatoilalo o’u vaivaiga faatasi ai ma le fesoasoani a le Faaola.
Sa masani ona ou manatu e tatau ona ou faaleleia uma o’u vaivaiga i le taimi e tasi.
A o ou auauna atu o se faifeautalai, sa matuai ou tauivi lava ma lenei manatu. Sa ou talanoa i lo’u peresitene o le misiona e uiga i o’u lagona.
Sa ia faamanatu mai se upumoni o le a le galo lava ia te a’u. Sa ma faitau faatasi i le Eteru 12:27 : “Ou te avatu i tagata ia vaivaiga ina ia faalotomaualalalo ai i latou; ma ua lava lo’u alofa tunoa mo tagata uma o e e latou te faalotomaualalaloina i latou lava i o’u luma; aua afai latou te faalotomaualalaloina i latou lava i o’u luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”
Na fesoasoani lenei mau ia te a’u ia ou malamalama ai e mafai ona ou sui. Sa ou filifili e amata i se mea se tasi ma tuu atu i le Alii se taimi e sui ai o’u vaivaiga i ni malosiaga.
O Mea e Fesoasoani ia te A’u e Tauivi Pea
O se tasi o a’u tauiviga sili a o lei faia la’u misiona o le matamata i ponokalafi, ma sa ou filimaoti ia ou le toe foi i lo’u mausa o ponokalafi pe a ou toe foi mai i le fale. Ae paga lea, sa ou toe gauai atu i lena faaosoosoga.
Sa ou lagona le faanoanoa tele. Ou te ala i le po, ma mafaufau i mea sese uma sa ou faia. Ae e ui i tiga uma, a o ou tatalo mo se fesoasoani ma se faamagaloga, sa ou lagonaina lava i taimi uma le faamanatu mai e le Agaga ia te au o se upumoni faatauvaa: faatasi ai ma le Faaola, e mafai ai ona avea lo’u vaivaiga ma malosiaga. E le’i tatau ona faamatalatalaina a’u i o’u vaivaiga.
A o faaauau pea ona ou liliu atu i le Alii mo se fesoasoani, ua ou aoaoina ni lesona taua se fa e fesoasoani ia te a’u e taumafai ai pea:
-
A tatou latalata atili atu i le Faaola, e mafai ona tatou lagona le filemu.
O le suesueina o tusitusiga paia e fesoasoani ia te au e alofa atili ai ia Iesu Keriso. Ma o le suesueina o savali o le konafesi aoao e uiga i le salamo ma le Togiola a le Faaola e fesoasoani lava ia te au e malamalama ai e leai se mea i lenei malaga faalelalolagi e le mafai ona Ia faamaloloina pe malamalama i ai. E mafai ona tatou faalatalata atu ia te Ia i le taimi atoa o le faagasologa o lo tatou faamalologa ma a tatou taumafaiga ia alualu i luma.
-
Aua le fefe e talanoa i lou epikopo e uiga i ou vaivaiga.
Manatua, ua vaetofia o tatou epikopo ma umia ki o le perisitua lea e mafai ona fesoasoani ia i tatou e faaloloto ai lo tatou sootaga i le Faaola ma maua ai Lana Togiola. E mafai ona latou fesoasoani ia i tatou e faamāmā a tatou avega ma maua ai le fesoasoani tatou te manaomia e faatoilalo ai o tatou vaivaiga.
Sa aoao atu e Peresitene Jeffrey R. Holland, o le Sui Peresitene o le Korama a Aposetolo e Toasefululua, ia talavou matutua e faapea “o le salamo o le ala lea tatou te maua ai se amataga fou; … E lava le faigata o le olaga e aunoa ma le tauaveina o se amoga o mea sese i lou papatua—i le aso atoa, i aso uma, le po atoa, po uma. Sasaa lena amoga. … Na tuuina mai e Keriso Lona lava soifua ina ia mafai ai ona e saoloto e fai lena mea.”
-
Saili se tagata atamai faapitoa pe afai e te manaomia nisi fesoasoani.
O le asiasi atu i se fomai o le mafaufau, na ou maua ai se fesoasoani faafomai ma ni meafaigaluega e fesoasoani ia te a’u e fausia ai ni mausa e sili atu ona lelei. Sa ou lagonaina le fesoasoani mai o le Alii ia te au ia faaosofia ma maua le malosiaga e fai ai mea sa ou manatu muamua sa faigata tele.
-
Faaalu se taimi i nofoaga paia.
O le auai i le inisitituti, tapuai i le malumalu, ma le alu i le lotu ua fesoasoani ia te a’u e taulai atu ai i le Faaola ma mea e mafai ona Ia faia mo a’u. A e tu i nofoaga paia, o le a e faalolotoina la oulua sootaga ma le Faaola ma Lona mana lagolago ma le faamalologa.
O Loo Faaloaloa Mai o Laua Aao o le Alofa Mutimutivale ia i Tatou Taitoatasi.
Ina ua aoao mai e uiga i le faia o suiga i o tatou olaga, sa aoao mai Elder Neil L. Andersen o le Korama a Aposetolo e Toasefululua, “A oo mai le taimi, o le a tatou lagonaina le mou atu o le tiga o lo tatou faanoanoa, ma aveesea ‘le tausalaina mai o tatou loto’ [Alema 24:10] ma aumaia le ‘filemu o le mafaufau’ [Mosaea 4:3].”
E ui lava o loo o’u aoao pea e pulea o’u vaivaiga, ou te iloa o loo silafia e le Alii a’u taumafaiga i aso taitasi. O lea ou te taulai atu ai pea i le salamo i aso taitasi, tausia o a’u feagaiga, ma agai i luma.
O lo’u faamoemoe ma le faatuatua o loo i le Faaola. Ou te le iloa po o afea o le a ou faatoilaloina atoa ai lo’u vaivaiga i ponokalafi, ae o le mea e tasi ua ou iloa o le, afai ou te taumafai pea e liliuese mai ai ma salamo pe a ou tauivi, o le a le taofia lava se faamanuiaga mai ia te a’u. E pei ona aoao mai Uso Bradley R. Wilcox, Fesoasoani Muamua i le Au Peresitene Aoao o Alii Talavou: “O le agavaa e le o le atoatoa. O le agavaa o le faamaoni lea ma taumafai.”
E alofa le Tama Faalelagi ia i tatou, ma o Iesu Keriso o lo tatou fesoasoani ma le toomaga. E taua i tatou ia i Laua. La te silafia o tatou faigata ma puapuaga, ma ua faaloaloa mai o Laua aao o le alofa mutimutivale ia i tatou taitoatasi. Ou te faafetai mo le avanoa na ou maua e mamanuina ai ma alofagia ai a’u e le Atua ma Lona Alo.
Ia faataga Iesu Keriso e fesoasoani ia te oe i ou tiga. Maua Lana faasa’oga ma le taitaiga. Ma ia manatua e alofa atoatoa o Ia ia i tatou.
E ala mai ia te Ia, e mafai ai ona tatou maua le faamalologa ma le faamagaloga.