Na o le Tusiga Faaeletonika: Talavou Matutua
O Le Auala na Mamanuina ai Lo’u Talitonuga i le Atua e se Molimau ia Iosefa Samita
Ua leai so’u talitonuga i le Atua. Pe na tupu ea?
I le tele o tausaga ua mavae, sa avea ai a’u ma se tagata e le talitonu i le Atua.
Sa ou fanau mai i le Katoliko, ae mai lo’u talavou seia oo i le 25 o o’u tausaga, sa ou lagonaina e pei o loo i ai se avanoa faaleagaga i totonu ia te a’u. Sa ou taumafai e auai i lotu eseese, ae sa leai se tasi o na lotu na mafai ona faatumuina le avanoa. Sa ou filifili ina ua mavae sina taimi o le a faigofie atu ona lafoai le talitonu i le Atua nai lo le taumafai pea e saili le ekalesia sa’o.
Na ou aoao muamua e uiga i le Tusi a Mamona ma Iosefa Samita mai se polokalama o le TV e uiga i tagata o e faatau mai ma faatau atu mea tuai ma isi mea taua e aoina mai. Sa aumai e se tasi i le vaega sa ou matamata ai se kopi tuai o le Tusi a Mamona e faatau atu.
A o faamatala e se tagata atamai le mea na tuuina atu ai le taua o le tusi, sa ia faamatala teisi atu sina mea e uiga i le talafaasolopito o le Ekalesia ma le tusi. Sa ta’u atu e le tagata tomai faapitoa i le tagata talimalo, “O le tusi sili lea ona taua ua e fai mai ou te iloiloina.”
Sa faagaeetia au i le tusi ma le tala, o lea sa ou filifili ai e aoao atili.
Taialaina i le Upumoni
Sa ou faia ni sailiiliga, ma o le tele o lo’u aoaoina e uiga ia Iosefa Samita, o le tele foi lena o lo’u faaaloalo ia te ia ma le sootaga ia te ia.
Sa ou sailia foi le upumoni ma sa ou le iloa po o fea e maua ai.
Sa ou auai foi i le anoanoai o lotu e saili ai le lotu sa’o ae ou te lei mauaina.
A o ou faasolo mulimuli ane i le Facebook, sa oso mai se faasalalauga mo se itulau e ta’ua o le “O Mai ia Keriso.” Sa le’i tele so’u mafaufau i ai. Ae peitai, sa i ai se mea na tosina atu ai au i totonu, ma e lei umi ae ou tuuina la’u numera o le telefoni i totonu o le saite.
I ni nai masina mulimuli ane, sa ou maua ai se valaau mai Le Ekalesia a Iesu Keriso o le Au Paia o Aso e Gata Ai.
Ou te le’i tali.
Ina ua maea se sailiga vave i le Google, sa ou filifili e toe valaau le numera. Sa faamatala mai e faifeautalai na tali maina latou maua mai la’u faamatalaga mai le uepisaite o le O Mai ia Keriso, ma na faafuasei lava ona manino mea uma. Sa ou saini ma le le iloaina mo faamatalaga mai le Ekalesia lava lea sa ou aoaoina.
O Se Faamaoniga Faaiu
Sa amata ona ou feiloai ma faifeautalai ma aoao atili ai. Na amata ona faatumulia le gaogao faaleagaga i totonu ia te au. I le taimi na ou filifili ai e papatiso, na valaaulia a’u e nisi o uō Kerisiano i se tasi o a latou tolauapiga i le lotu.
I le taimi o le lauga mulimuli i le aso mulimuli o le tolauapiga, sa ou tatalo ai i le Atua e faamautu mai ia te au e moni le Tusi a Mamona. I lena lava taimi, sa ave ifo ai e se tamaitiiti aoga sa aoga e avea ma se faifeau le Tusi a Mamona ma faapea mai, “Aisea tatou te le faitau ai mai lenei tusi? O lenei tusi e faatatau uma lava ia Iesu Keriso ma e ogatasi ma le Tusi Paia.” Sa gūgū le motu o tagata. Ua ou talitonu o se tali lenei i la’u tatalo.
Ina ua uma ona ou faalogo mai lena tamaitiiti aoga, sa ou lagonaina le faamautu mai e le Agaga ia te au o lenei tusi o se isi molimau ia Iesu Keriso. E lei umi ae ou papatiso.
Ou te Alofa i Lenei Ekalesia.
Talu mai lo’u auai i le Ekalesia, ua faatumulia le gaogao faaleagaga o i totonu ia te a’u, ma o la’u molimau i le Perofeta o Iosefa Samita ma le Tusi a Mamona ua faaauau pea ona tuputupu ae.
Ua fesoasoani le Tama Faalelagi ia te au ia ou iloa, e ala i le tatalo ma Lona Agaga, o le Ekalesia lenei a Iesu Keriso. O le mea moni, maimau pe ana mafai ona ou iloa e uiga i le Ekalesia a o ou laitiiti. Ou te alofa i lenei Ekalesia. O le Ekalesia moni lava a Iesu Keriso i le lalolagi i aso nei.