Manatuaina o le Mafuaaga Ou te Ola ai i le Talalelei

Saunia e Isabelle Justice

Mekasini a le Ekalesia

O le faamanatu ia te au lava ia o la’u “mafuaaga” e uunaia ai au e faalatalata atili atu i le Faaola ma mulimuli i au sini faaleagaga.

O lo’u olaga e lagona le fenumiai i nisi taimi, ae ou te fiafia i le mafanafana ou te lagonaina pe a ou savali atu i totonu o se falesa. O se tasi lea o mafuaaga ou te fiafia ai e alu i le lotu!

Ma a ou manatua mea ou te fiafia i ai e uiga i le talalelei—e pei o le lagonaina o le Agaga Paia, mo se faataitaiga—ou te lagonaina le musuia sili atu e mulimuli i ou mausa faaleagaga, e pei o le alu i le malumalu, faitau au tusitusiga paia, ma tatalo i le Tama Faalelagi.

Talu ai e mafai ona pisi tele le olaga, e faigofie ai ona galo nei mea fafaatauvaa tatou te fiafia i ai. Ae o le faamanatu soo ia te au lava ia o mafuaaga ou te ola ai ma alofa i le talalelei a Iesu Keriso e fesoasoani ia te au e faafou ai au sini faaleagaga lea o le a ou latalata atili atu ai ia te Ia ma le Tama Faalelagi.

Faatulagaina o Sini Fou Faaleagaga

I le amataga o tausaga taitasi, ou te fiafia e toe iloilo au sini faaleagaga e ala i le tusia i lalo o tautinoga o le Tausaga Fou. Afai o loo e faia foi sina manatunatuga faaletagata lava ia ma mafaufau pe faapefea ona e manao e faaleleia atili lau sootaga ma Keriso i lenei tausaga fou, fesili ifo ia te oe lava i le fesili lenei:

Aisea ou te alofa ai i le talalelei a Iesu Keriso?

Na faamalamalama mai e Sister Ann M. Dibb, o le sa avea muamua ma Fesoasoani Lua i le Au Peresitene Aoao o Tamaitai Talavou, e faapea “e faatupulaia lo tatou alolofa i le talalelei a o tatou mauaina le alofa o lo tatou Tama Faalelagi ma le filemu sa folafola mai e le Faaola pe a tatou faaali atu ia te Ia lo tatou naunau e usiusitai ma mulimuli ia te Ia.”

O le iloaina o le mafuaaga e te fiafia ai i le talalelei o le a fesoasoani ia te oe e lagona ma iloa ai le alofa lea o loo i ai i le Tama Faalelagi ma Iesu Keriso mo oe. O lenei mafaufauga o le a fesoasoani foi ia te oe e faaitiitia ai le lofituina pe a e taumafai e faatulaga ma ausia au sini faaleagaga.

O la’u “mafuaaga” mo le ola ai ma le alofa i le talalelei a Iesu Keriso e aofia ai le malamalama faapea e mafai ona faatasia aiga e faavavau ma le filemu ou te lagonaina pe a uma se tatalo vaivai i le Tama Faalelagi.

Po o le a lava lau “mafuaaga”, taofimau i ai—o le a tuuina atu ai ia te oe le malosiaga faaleagaga e te manaomia e avea ai ma se soo sili atu o Iesu Keriso.

Ola i Lau “Mafuaaga”

O le taimi lava na ou iloa ai le mafuaaga na ou ola ai i le talalelei, na suia ai le ala na ou alu ai e faatulaga au sini faaleagaga. Sa ou le toe mafaufau i le mea sa ou toilalo ai e faia ma sa amata ona ou taulai atili atu i mea e mafai ona ou faia. Sa ou manatuaina e faapea, ou te ola i le talalelei aua ou te alofa i lo’u Faaola.

Na saunoa Elder Dieter F. Uchtdorf o le Korama a Aposetolo e Toasefululua: “E manaomia ona tatou taliaina o poloaiga a le Atua ua le na o se lisi umi o ni manatu lelei. … O ni fautuaga faalelagi, ua faavae i luga o upumoni e faavavau, ua tuuina mai e maua ai le ‘filemu i le lalolagi lenei ma le ola e faavavau i le lalolagi a sau’ [Mataupu Faavae ma Feagaiga 59:23].”

O le tulitulitatao i au sini faaleagaga ua faamanatu mai ai ia te au po o ai au: o se atalii paia o matua faalelagi. O lena mataupu faavae ou te maua ai le lototele e fetaiai ai ma o’u popolega ma vaivaiga e ala ia Iesu Keriso (tagai i le Eteru 12:27).

Na aoao mai Peresitene Russell M. Nelson: “E le o faamoemoeina e le Alii se atoatoa mai ia i tatou i lenei taimi i lo tatou alualu i luma e faavavau. Ae ua Ia faamoemoeina i tatou ia faateleina lo tatou mamā.” O lea la o loo ou taumafai i le mea sili ou te mafaia i aso uma e tumau ai le latalata atu ia Iesu Keriso ma manatua le mafuaaga ua ou filifili ai e mulimuli ia te Ia.