E Na’o le Faaeletonika
Pe e Finagalo Moni le Atua i La’u Fesoasoani?
A e lagona le le agavaa, e mafai e le Faaola ona siitia oe ma faalautele au taumafaiga.
Pe na e lagonaina ea e te le’i ausia se tulaga? Atonu na e mauaina se valaauga e te le’i manatu e mafai ona e faataunuuina, pe atonu foi na e lagonaina e pei e te le’i faataunuuina ou tiutetauave. Sa i ai taimi na tatou i ai uma iina. O mea nei e tolu ua ou aoaoina e fesoasoani ia te au ia maua ai le lototele.
E Valaauina e le Atua e Vaivai ma Faatauvaa
I la’u misiona, sa ou lagonaina le le agavaa e aoao atu ai isi tagata i le talalelei.
Sa ou lagonaina le laitiiti tele, leai se poto masani, ma le le atoatoa e faia ai se eseesega moni i le olaga o soo se tasi. Sa ou manao e faasino atu au uo ia Iesu Keriso, ae faapefea?
I se tasi aso, sa ou suesueina ai le Mataupu Faavae ma Feagaiga ma tau atu ai i le fuaiupu lenei: “Ina ia mafai ona folafola atu le atoatoaga o la’u talalelei e e vaivai ma e faatauvaa i tuluiga o le lalolagi, ma i luma o tupu ma pule,” (Mataupu Faavae ma Feagaiga 1:23).
O lenei fuaiupu na faatumulia ai lo’u agaga i le faamoemoe ma le olioli. E lei fetalai mai le Alii e finagalo o Ia i tagata atoatoa e fai Lana galuega. Nai lo lena, na te valaauina tagata lē lelei atoatoa e i ai gafatia e le gata—o tagata e pei o au ma oe.
E Mafai e le Atua Ona Faamamaluina Oe
Ua tuputupu ae lo’u fiafia i le tala i le uso o Iareto. Na tuuina mai e le Alii i le uso o Iareto se avanoa e faaaoga ai le faitalia ma le fatufatuai e ala i le fesili atu ia te ia pe faapefea ona maua e sa Iareto le malamalama i totonu o a latou vaa pogisa a o latou malaga atu i le laueleele folafolaina. Sa faia e le uso o Iareto ni maa lamolemole mai papa ma ole atu i le Alii e faamalamalama ia maa. Sa pa’i atu le Faaola i maa taitasi ma faamalamalamaina i latou (Eteru 2:25; 3:1–6).
E faapena foi, pe a tatou aumaia i le Atua a tatou taumafaiga sili, e mafai ona Ia faaagavaaina i latou ma faia mea e sili atu nai lo mea sa tatou mafaufauina. E faia e le Atua le vavega, ae le o i tatou.
Na saunoa Elder Vern P. Stanfill o le Fitugafulu, “E tatau ona tatou manatua po o le a lava la tatou taulaga e sili ona lelei ae le atoatoa, e mafai e le Faaola ona faaatoatoaina. E tusa lava po o le a le foliga faatauvaa o a tatou taumafaiga, e le tatau lava ona tatou manatu faatauvaa i le mana o le Faaola.”
O Lo’o E Lelei Atu Nai lo le Mea E te Mafaufau I ai
Ou te faailoa atu ia te oe se mealilo: atonu o loo sili atu lou lelei nai lo le mea e te mafaufau i ai. Na saunoa Peresitene Russell M. Nelson, “E tatau ona tatou manatua uma lava: ua i ai tagata ina ia latou maua le olioli—ae le o malaga tausalaina! [tagai i le 2 Nifae 2:25].”
O se tasi o auala e mafai ona tatou faamisi ai malaga tausalaina o le sailia lea o le atoatoa e ala i le alofa tunoa o Iesu Keriso (tagai Moronae 10:32) nai lo a tatou taumafaiga.
“O le faaatoatoaina ia Keriso,” o le tala lea a Elder Stanfill, “e faamamaina ai i tatou mai avega o le tausalaina ma le le agavaa, ma faamamafaina ai i taimi uma po o ai i tatou i le silafaga a le Atua.”
E ui lava o loo ou tauivi pea ma lagona le le agavaa, ae o loo ou aoao e faaaofia ai le Alii i lo’u faaleleia o au lava ia. A o ou faamaualaloina au lava, sa Ia liliuina o’u vaivaiga i malosiaga (tagai Eteru 12:27).