E Na’o le Faaeletonika
Mulimuli i le Perofeta o Iosefa Samita: Saili Faaaliga Patino
Ua folafola mai e le Atua afai tatou te saili, o le a tatou maua.
Pe na e lagonaina ea e pei e te le o mauaina ni tali i fesili e mamafa ia te oe?
E le o tuua na o oe.
Sa ou tauivi ma fesili ma popolega mo le tele o tausaga ma sa ou liliu atu i le Atua mo ni tali. Ae o nisi taimi ou te lagona ai e pei ua tapunia le lagi ia te au. A o faaauau pea ona ou tauivi ma fesili o le olaga, ou te le mauaina i taimi uma ni tali manino. Ae ou te liliu atu pea i le Atua.
E faigofie lava le mafuaaga: o le mea lena na faia e le Perofeta o Iosefa Samita.
A o talavou, sa faitau Iosefa Samita i le Tusi Paia e faapea afai e leai sou poto, e tatau ona e ole atu i le Atua mo ni tali (tagai Iakopo 1:5). Sa alu mulimuli ane o ia i le togavao, tatalo, ma maua se tali i le ituaiga o se faaaliga faalelagi (tagai Iosefa Samita—Talafaasolopito 1:15–20). Atonu e foliga mai na vave ona ia mauaina faaaliga, ae o se vaega taua lenei o lenei tala: Sa popole Iosefa ma mafaufau soo e uiga i le faatuatua ma tapuaiga a o lei sailia ni tali.
I se tala i le 1832 o le Uluai Faaaliga, pe tusa ma le 12 tausaga o Iosefa ina ua popole o ia i “popolega taua uma mo le manuia o [lona] agaga tino ola pea.”
Sa ia tauivi ma nei lagona i lona loto ma lona mafaufau mo le lua tausaga pe sili atu, i le sailia o tali, auai i lotu eseese, ma le faitauina o le Tusi Paia (tagai Iosefa Samita—Talafaasolopito 1:3–10). Ona ia filifili lea e saili se tali e ala i le tatalo.
Ina ua ia faia, i le 14 o ona tausaga, na faaali mai ai le Tama Faalelagi ma Iesu Keriso, ma fesili atu Iosefa i le fesili lenei: “O fea o [ekalesia] uma sa sa’o”? (Iosefa Samita—Talafaasolopito 1:18). O lana tali mai le Alii o le, aua ne’i auai i soo se ekalesia (tagai Iosefa Samita—Talafaasolopito 1:19).
O lenei sailiga sa le o se aafiaga tuufua. Ina ua uma ona tali mai le Atua i lana tatalo, sa faaalu e Iosefa lona olaga atoa e saili ai tali mai le Alii, ma sa ia mauaina. O le tele o mea ua faamaumauina nei i le Mataupu Faavae ma Feagaiga o ni tusi faavae a le Ekalesia.
Na saunoa mai Peresitene Russell M. Nlelson: “O se tasi o mea na uunaia so’o e le Agaga i lo’u mafaufau … o le naunau lea o le Alii e faaali mai Lona mafaufau ma Lona finagalo. O le avanoa o le mauaina o faaaliga o se tasi lea o meaalofa silisili a le Atua i Lana fanau.”
Ou te taliaina lena savali, ma le faataitaiga a Iosefa, i lo’u loto. E mafai foi ona e faia. Aua ne’i muta le faamoemoe pe afai e te lagona e pei e te le o mauaina tali e te manaomia. Ua folafola mai e le Atua afai tatou te saili, o le a tatou maua (tagai Mataio 7:7). Tau lava o le sailiili pea ma, e pei o Iosefa Samita, o le a faaali mai e le Atua tali ia te oe.