E Na’o le Faaeletonika
3 Lesona mai La’u Misiona e uiga i le Faatuina o Sini
O le taulai atu i taumafaiga, fetuutuunai, ma le olioli i le malaga—ae le o fuainumera—e mafai ona aumaia ai le fiafia moni ma le manuia mo oe ma i latou o loo e auauna atu i ai.
Sa ou le lelei i le faatuina o sini a o ou tuputupu ae. Ou te lei malamalama lelei i le faamoemoega. Ae sa ou aoao e faatu ni sini moni ma faamaoni a o auauna atu i se misiona i Dallas, Texas, ISA. Talu mai lo’u toe foi mai i le fale i le 2018, ua ou faaaogaina ni lesona taua se tolu e uiga i le faatuina o sini.
Lesona 1: Taulai Atu i Taumafaiga ma le Auaunaga
I le avea ai ma se faifeautalai, sa ou faatuina ai ni sini i aso taitasi ma vaiaso taitasi ma la’u soa lea sa taulai atu i o ma’ua faamoemoega faafaifeautalai. O nei sini na amata o ni fuainumera, ae a o ou tuputupu ae ma malamalama atili i le mafuaaga na ma faatutuina ai nei sini, na suia fuainumera i igoa taitasi sa ma tatalo ai.
E faatauaina e le Alii a tatou taumafaiga ma e finagalo ia tatou auauna atu i isi. Taulai atu i le faia o taumafaiga ma auauna atu i isi i le faagasologa, ma tuu atu taunuuga i le Alii. E pei ona fautuaina e le Tupu o Limae lona nuu, “Ia ea i luga o outou ulu, ma ia olioli, ma tuu atu lo outou faalagolago i le Atua” (Mosaea 7:19). Nai lo le faatuina o se sini e faitau fuaiupu e 50 i le vaiaso, atonu e sili atu ona aoga le faatuina o se sini e suesue ma le filiga i tusitusiga paia i aso taitasi, ma saili e faasoa atu ni malamalamaaga i isi.
Lesona 2: Talia le Fetuutuunai ma Uunaiga a le Agaga
E tele taimi i la’u misiona, sa matou faatutuina ai ni sini e le gata i a matou taumafaiga ae faapea foi mea sa naunau isi e fai. Mataupu e 8 o le Tala’i La’u Talalelei: O Se Taiala i le Faasoaina Atu o le Talalelei a Iesu Keriso o loo aoao mai e uiga i le faatuina o nei ituaiga o sini: “Pe e te ausia [se sini patino] e faalagolago lea i le faitalia a isi tagata. Ae fai le mea o loo e puleaina ina ia ausia ai.”
Sa ou aoao e fetuutuunai ma mulimuli i le Agaga i sini ma aafiaga i aso uma. Sa tele aso sa matou faamoemoe e ausia ai ni sini patino—ae na faaletonu ni mea. O taimi uma lava, na fesoasoani ai le Agaga e taiala i matou i avanoa fou e faataunuu ai lo matou faamoemoega faafaifeautalai ma fesoasoani ai i isi. E tulai mai ni tulaga e lei faamoemoeina, ma e mafai e le Agaga ona taialaina oe e sui lou ala i le toetoe lava o soo se tulaga.
Lesona 3: Maua le Olioli i le Malaga, Ae Le Na o le Taunuuga
I le amataga o la’u misiona, sa ou iloaina o misiona e faatatau i le tuputupu ae ma le auaunaga, ae le o le aofai o papatisoga. Ae na faatoa ou malamalama i lenei mea ina ua uma ona ou aoao e fiafia a o ou galue agai i se sini, nai lo le taimi tonu lava na ou ausia ai lena sini. O sini e le tatau ona na ona aumaia ai le faamalieina i le laina faaiu; o le malaga ina ia ausia sini e tatau foi ona aumaia ai le olioli ma le faamoemoega.
O se faataitaiga o lenei ituaiga o sini o le saili lea e atiina ae uiga faaKeriso e ala i faatinoga o auaunaga i aso taitasi. E mafai ona e maua le faamalieina i le aafiaga i isi, e le na o le faailogaina o lau pusa “itula o auaunaga”. Sa ou aoaoina lenei mea a o auauna atu i tagata o Texas i la’u misiona.
E finagalo le Alii ia tatou “auai ma le naunautai i se faamoemoega lelei, ma faia mea e tele i [lo tatou] lava loto malie, ma aumai le amiotonu tele” (Mataupu Faavae ma Feagaiga 58:27; tagai foi fuaiupu 26–29). O nei lesona ua fesoasoani ia te au ia ou malamalama ai i le auala e “auai ai ma le naunautai i se faamoemoega lelei” e ala i le faatuina ma le ausiaina o sini.