Na o le Tusiga Faaeletonika: Talavou Matutua

Lagonaina le Lofituina? E le afaina le Faifai Lemu

Saunia e Kate Stewart

Mekasini a le Ekalesia

E le afaina le faifai lemu. Ua silafia e le Atua oe ma ou tulaga

Ua tatou aoaoina i tusitusiga paia e le manaomia ona tatou taufetuli vave atu nai lo le malosi ua tatou maua (tagai Mosaea 4:27). Aisea la e masani ai ona tatou ola pea i taimi uma e taututuu ai i le saoasaoa atoa i luma atu?

O le lagona o le tamoe saoasaoa atu nai lo le malosi ua e maua, e manaomia ona faamaea le miliona o mea, ma le mafaufau e tatau ona e atoatoa i le taimi nei e mafai ona e lagonaina ai le lofituina ma le vaivai.

Afai o oe o se tagata ua lagonaina le mauaina i se asiosio taavilivili o galuega, tiutetauave, ma tautinoga e foliga mai e le muta, o le aoaoina o le auala e telegese ai ma toe faauigaina ai mea e te faamuamua atonu o lou ki lea i le malologa ma le filemu fou.

Motugaafa e Lima mo le Faalemuina

I taeao taitasi, tatalo mo le Agaga e fesoasoani ia te oe e nofo ai pea, ia faaosofia, ma ia faaaoga lelei aso taitasi. I le aso atoa, o le a e matauina ai taimi e taliina ai lau tatalo!
Tusi se lisi o mea uma e tatau ona e faia i aso taitasi, ona faamuamua lea po o a mea e sili ona taua. Faamaea muamua mea e sili ona taua.
Tuu atu se taimi i le Alii i aso taitasi. A o e faia faapea, e masani lava ona foia e isi mea uma. Po o fea lava o e i ai i lau malaga faaleagaga, taumafai ia faaauau pea ona agai i luma i aso taitasi.
Ia tausia oe lava i le faaletino ma le faalemafaufau. A o e faamuamuaina lou soifua maloloina faaletino ma le faalemafaufau, o le a tele atu lou malosi e faia ai isi mea. Faalogo i lou tino ma ou manaoga.
Ia tasi le laa i le taimi. O le isi taimi e te lagona ai le lofituina, fai ifo ia te oe lava, “Na pau lava le mea e tatau ona ou faia i le taimi lenei o le X.” A uma ona e faamaeaina lena galuega, toe taumafai i le isi mea e sosoo ai.

A o e faataitaia nei motugaafa, atonu o le a e faatuina ni mea e faamuamua manino i lou olaga, faaaluina o le tele o le taimi e motusia ai mai tekinolosi, po o le faatagaina o oe lava ia e malolo ma toe faaleleia.

Aveese Avega, Iloa le Olioli

O le ola ai i se olaga faamanuiaina e le leaga. E manaia le lagonaina o le ausiaina ma le faia o mea! Ae peitai, e le manaomia ona e tuuina atu le mamafa tele ia te oe lava ia pe faaaoga lou manuia e fai ma fua o lou taua faaletagata lava ia.

Na sili le faamalamalamaina mai e Elder Dieter F. Uchtdorf o le Korama a Aposetolo e Toasefululua: “Atonu e faigofie atu le foliga pisi. E mafai uma lava ona tatou mafaufau i se lisi o mea e fai o le a faapea ona lofituina ai a tatou fuafuaga faataatitia. Atonu foi e manatu nisi o lo latou taua faaletagata lava ia e faalagolago lea i le uumi o a latou lisi o mea e fai. … Ona o lo latou faafaigataina le talafeagai o o latou olaga, e masani ai ona latou lagonaina le tele o le ita, tau leai se fiafia, ma itiiti se lagona faatauaina o o latou olaga.”

Ae, ua faamalosi mai Elder Uchtdorf ia i tatou e “o lemu teisi, faaauau i le saoasaoa e sili ona fetaui ma o tatou tulaga, taulai atu i mea e taua, ea i luga o outou fofoga, ma iloa moni atu ai i mea e sili ona taua.”

Ia te au lava ia, o se faaaogaina o lenei mea o le filifili lea e tuua la’u telefoni i le fale i le isi taimi ou te alu ai e savalivali. Ona mafai lea ona ou fiafia moni i lo’u si’osiomaga ma toe mafaufau i lo’u aso!

O le faaitiitia o lo tatou saoasaoa i le olaga e mafai ona fesoasoani ia i tatou e aveese ai avega e le manaomia ma maua ai le olioli sili atu.

E Mafai e le Faaola Ona Faaatoatoaina a Tatou Taumafaiga Sili

Na aoao mai Elder Vern P. Stanfill o le Fitugafulu: “E tatau ona tatou manatua po o le a lava la tatou taulaga e sili ona lelei ae le atoatoa, e mafai e le Faaola ona faaatoatoaina. E tusa lava po o le a le foliga faatauvaa o a tatou taumafaiga, e le tatau lava ona tatou manatu faatauvaa i le mana o le Faaola.”

Pe a ou lagona le lofituina i galuega, popole i lo’u lumanai, pe popole ona ou te le o ola e tusa ai ma lo’u gafatia, ou te faatuatuaina le mea moni e mafai e le Faaola ona faaatoatoaina a’u ---taumafaiga laiti—ae faamaoni—.

Ou te tuuina atu lo’u faalagolago i le Atua lava lea e tasi o lē na aumaia le filemu ma le mafanafana i Lana fanau mo le faitau afe o tausaga. Sa fesoasoani mai o Ia ia te au, ma ou te iloa o le a Ia fesoasoani foi ia te oe.

E le afaina le faifai lemu. Ua silafia e le Atua oe ma ou tulaga

E alofa o Ia ia te oe!