E Le Mafai e Tupe Ona Faatau le Fiafia, ae e Ofo Fua Mai e Keriso le Olioli

Ina ua mavae se tausaga o lagona faapenei, sa ou faalogologo i se lauga a Peresitene Dallin H. Oaks, Fesoasoani Muamua i le Au Peresitene Sili. Sa ou lagonaina le faanoanoa a o ou faalogo atu o ia faamatala tonu mai le ituaiga tagata sa avea ai a’u:

“E faapena foi i le taimi nei, o nisi ua tautino mai o ni Kerisiano ae ua sili atu ona tosina atu i mea o le lalolagi—o mea e lagolago ai le olaga i le lalolagi ae e le fafagaina ai le ola e faavavau.”

Sa ou manatu e mafai ona ou faamuamuaina uma le Atua ma tupe i le taimi e tasi, ae o upu a Peresitene Oaks ma lenei malamalamaaga i le Mataio 6:24 na faamaonia le moni: “E leai se na te mafaia ona auauna i alii e toalua: aua e inoino o ia i le tasi, a e alofa atu i le tasi; a le o lea e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma mamone.”

Ina ua taulai atu lo’u mafaufau i mea faaletino, sa faigata ia te au ona iloa le moomia o le talalelei. Ou te lei malamalama pe faapefea ona fesoasoani i o’u faanaunauga le alu i le lotu ma le faitauina o tusitusiga paia.

E ui o le faalauteleina o aoaoga ma le mauaina o se tupe maua tumau o ni taumafaiga aoga, ae sa ou faamuamuaina tele. Sa ou manatu faavalea. Sa ou iloaina o le a ou faanoanoa tele seia oo ina ou aoao e suia lo’u ala o mafaufauga.

Sa ou tatalo i le Tama Faalelagi ma ole atu ia te Ia pe mafai ona Ia fesoasoani mai ia te au e amata ona taulai atu i mea e sili ona taua. Sa ou amata i le faitauina o tusitusiga paia. A o ou suesueina fuaiupu sa ou manatu sa ou faitauina i le tele o taimi muamua, sa amata ona gaua’i atu lo’u mafaufau i nei tala masani. Sa ou lagonaina le Agaga Paia o fesootai mai ia te au!

O se tasi o tala na fesootai i o’u lagona o le tala lea i le alii talavou mauoa. Sa ta’u atu e Iesu ia te ia, “Afai e te manao ina ia atoatoa ona lelei o lau amio, ia e alu ma e faatau atu au mea, i le e avatu ai i e matitiva, ona ia te oe lea o le faulaigāoloa i le lagi: i le e sau ma mulimuli mai ia te au” (Mataio 19:21).

Ina ua ou faitauina lenei tala faatusipaia, sa ou lagona le uunaiga e tu ma mafaufau pe faapefea ona faatatau ia te au. I le taimi muamua, sa lei foliga mai sa i ai se mea na ou tutusa ai ma le taitai talavou mauoa—ua uma ona ia maua ana oa ma sa le naunau e faatea ese mai ai. Ae o a’u, i le isi itu, ou te lei mauoa lava, ma sa ou manatu o a’u taumafaiga ia maua nisi tupe e amiotonu.

Ae e le’i umi ae ou iloaina o le a ou tauivi e tuuina atu a’u tupe, e pei lava o le taitai talavou mauoa. Ae maise lava pe a mafaufau i ai o loo o’u tauivi e lafoai la’u sailiga mo nisi tupe.

Sa ou manao e toe tuu faamuamua le Tama Faalelagi i lo’u olaga. Sa ou filifili e tatala la’u api talaaga, tusi ou lagona, ma toe tepa i tua i a’u tusiga na muamua atu ina ia malamalama lelei ai i le mea na amata ai lo’u maivalea.

A o ou faia lenei mea, sa amata ona ou iloa atili le le sa’o o le faatulagaga o mea sa ou faamuamua. E pei ona ou matauina i se tasi o tusiga, “Ou te mafaufau pea lava pea pe faapefea ona ou maua ni tupe mama mai mea uma nai lo le mafaufau pe faapefea ona ou lelei atili pe fesoasoani i isi.”

Mulimuli ane, e ala i le suesueina o tusitusiga paia, faalogo i le Agaga, ma le tusiaina o api talaaga, na amata ai ona ou suia.

Sa ofoofogia le lagonaina o le folafolaga o loo i le Faataoto 3:5–6 ua taunuu i lo’u olaga:

“Ia e faatuatua i le Alii ma lou loto atoa; ae aua le faalagolago i lou lava atamai.

“Ia e manatua o ia i ou ala uma, ona faatonuina ai lea e ia lava ou ala.”

Ou te taumafai pea e atiina ae a’u taleni ma galue malosi i lo’u a’otauina ma faatufugaga. O le sailia o le saogalemu tautupe e tausia ai i tatou lava ma o tatou aiga o se manao amiotonu. Peitai, e tatau ona tatou faaeteete ina ne’i avea lo tatou sailia o le manuia ma tupe ma mea e sili atu ona tāua na i lo se isi lava mea.

O aso nei, ua ou le popole pe ua ou lauiloa pe maua se tupe tele e ala i la’u galuega. Ua ou iloaina o le ola ai i se olaga ou te alofa atu ai—ma lagona ai le alofa mai—le Tama Faalelagi ma Iesu Keriso, lo’u aiga, ma faatufugaga ua lava mo au. Ou te le o toe ita i tupe faaalu e lei faamoemoeina po o faamanuiaga a isi tagata. Nai lo lena, ua sili atu lo’u tuuto atu i le talalelei a Iesu Keriso aua o loo faaauau pea ona laveaiina ai au mai se olaga o le matape’ape’a, faatusatusa, ma le le faamalieina faifai pea. Ma a amata ona galo ia te au, e faamanatu mai lava e tusitusiga paia ma perofeta ia te au i taimi uma le mea e sili ona taua i le olaga.

Na aoao mai Peresitene Russell M. Nelson:

“E ui e manatu pea le lalolagi o le pule, o meatotino, lauiloa, ma mea faafiafia o le tino e aumaia ai le fiafia, ia e leai! E le mafai lava ona latou aumaia!

“O le upumoni lava, e matuā sili ona vaivai le saili o le fiafia i nofoaga e lē mafai ona e maua ai! Peitai, pe a e mulimuli oe lava ia ia Iesu Keriso ma faia le galuega faaleagaga e manaomia e manumalo ai i le lalolagi, o Ia, ma e na’o Ia lava, o loo i ai le mana e siitia ai oe i luga a’e o faaosoosoga o lenei lalolagi.”

O suiga na fesoasoani le Faaola ia te au e faia i lo’u agaga sa avea ma se vavega. Ua ou iloa nei o le faamanuiaina e le faatatau i le faamaoniaina o lo’u ofoofogia po o le faafesootaia lea o lo’u taua i le tele o a’u tupe e maua; e faatatau i le lagonaina o le agaga faafetai mo le avanoa e oo ai i le olaga faaletino ma vaaia faamanuiaga ofoofogia ua saunia e le Tama Faalelagi mo au i taimi uma. Ou te iloa afai ou te faamuamuaina o Ia, o le a faatulaga lelei isi mea uma.

Ou te uunaia outou e mafaufau i mea e te faamuamua i le olaga. Pe o e taula’i atu i le manao i mea faaletino ma mea e le o ia te oe? Pe o e taula’i atu i mea e sili ona tāua? Ia faamaoni ia te oe lava ia. Vaai pe manaomia ona e fetuunai lou ala e toe foi atu ai i le Faaola.

Pe a e faia lena filifiliga, o le a e maua le olioli sili atu nai lo le mea sa e mafaufauina e mafai ona e faia.