Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko Hono Ako e Ngaahi Pōpoaki ʻa e Kau Tamaioʻeiki ʻa e ʻEikí: Ko Hono ʻAi ke Hoko e Ngaahi Lea ʻa e Kau Taki ʻo e Siasí ko ha Konga Hoʻo Ako ʻo e Ongoongoleleí

“Ko Hono Ako e Ngaahi Pōpoaki ʻa e Kau Tamaioʻeiki ʻa e ʻEikí: Ko Hono ʻAi ke Hoko e Ngaahi Lea ʻa e Kau Taki ʻo e Siasí ko ha Konga Hoʻo Ako ʻo e Ongoongoleleí,” Fuakava Motuʻá – Tohi Lēsoni ʻa e Faiako Seminelí (2026)

Ngaahi Akonaki ʻa e Kau Taki ʻo e Siasí: Lēsoni 206

Ko Hono Ako ʻa e Ngaahi Pōpoaki ʻa e Kau Tamaioʻeiki ʻa e ʻEikí

Ko Hono ʻAi ke Hoko e Ngaahi Lea ʻa e Kau Taki ʻo e Siasí ko ha Konga Hoʻo Ako ʻo e Ongoongoleleí

Young Vietnamese woman wearing eyeglasses, writing and studying scriptures while watching General Conference. (horiz)

Kuo tāpuekina fēfē hoʻo moʻuí ʻe he ngaahi pōpoaki ʻa e kau tamaioʻeiki ʻa e ʻEikí? ʻOku tokoni hono ako e ngaahi folofola ʻa e ʻEikí kuo ʻomi ʻe he kau taki ʻo Hono Siasí ke tau fanongo ki he leʻo ʻo e ʻEikí. ʻE lava ke tokoni ʻa e lēsoni ko ʻení ki he kau akó ke fakakau hono ako e ngaahi pōpoaki ʻa e ʻEikí naʻe ʻomi ʻe Heʻene kau tamaioʻeikí ko ha konga ʻo ʻenau ako fakataautaha ʻa e ongoongoleleí.

Teuteu ʻa e tokotaha akó: Fakaafeʻi e kau akó ke nau fakakaukau ki ha niʻihi ʻo e ngaahi tāpuaki kuo nau maʻu ʻi heʻenau ako e ngaahi pōpoaki fakamuimuitaha mei he kau taki ʻo e Siasí. Mahalo te nau fie ʻeke foki ki ha mēmipa ʻo e fāmilí pe taki fakalotofonua ʻo e Siasí ha ngaahi tāpuaki kuo nau aʻusia. Te nau maʻu ha faingamālie lolotonga e kalasí ke vahevahe ʻa e ngaahi tāpuaki ko ʻení.

Ngaahi ʻEkitivitī Ako ʻOku Ala Fakahokó

Ko e hā e ʻuhinga hono ako e ngaahi pōpoaki ʻa e kau taki ʻo e Siasí?

Ke kamatá, fakakaukau ke vahevahe ʻa e ngaahi fakamatala ko ʻení pea fakaafeʻi e kau akó ke nau vakavakaiʻi fakataautaha ʻenau ngaahi feinga ke kau ʻi he konifelenisi lahí.

ʻI hoʻo vakaiʻi ʻa e ongo fakamatala ʻi laló, te ke fakamatalaʻi nai ʻa e fakamatala takitaha ʻoku “moʻoni kiate au” pe “ʻikai ke moʻoni kiate au”?

ʻOku ou mamata ʻi he konifelenisi lahí.
ʻOku ou lau mo ako ʻa e ngaahi leá hili ʻa e konifelenisi lahí.

Hili hono maʻu ʻe he kau akó ha kiʻi taimi ke fakalaulauloto aí, fakapapauʻi ange kiate kinautolu ko e taumuʻa ʻo e siviʻi pē kitá ko ha faingamālie ia ke nau vakaiʻi ai ʻa e tuʻunga ʻoku nau ʻi aí mo e feituʻu te nau lava ʻo fakalakalaka aí.

ʻI he fakaʻosinga ʻo e konifelenisi lahí, naʻe pehē ai ʻe Palesiteni Nalesoni:

ʻOku ou fakatauange te mou toutou ako ʻa e ngaahi pōpoaki ʻo e konifelenisi ko ʻení ʻi he ngaahi māhina ka hoko maí. (“Fiefia ʻi he Meʻaʻofa ʻo e Ngaahi Kī ʻo e Lakanga Fakataulaʻeikí,” Liahona, Mē 2024, 119)

ʻOkú ke pehē ko e hā ʻoku mahuʻinga ai ke ako ʻa e ngaahi pōpoaki ʻo e konifelenisi lahí?
Ko e hā ʻe ala faingataʻa ai ki he toʻu tupú ke nau ako e ngaahi pōpoaki ko ʻení? Ko e hā ha ngaahi fakafeʻātungia kuó ke fehangahangai mo ia, pe ala fehangahangai mo ia, ʻi hoʻo feinga ke ako maʻu pē ʻa e ngaahi pōpoaki ko ʻení?

ʻI he vahevahe ʻa e kau akó, mahalo te ke fie hiki ʻi he palakipoé ha niʻihi ʻo e ngaahi fakafeʻātungia ʻoku nau fakamatala ki aí. Te ke lava ʻo fakaʻaongaʻi e lisi ko ʻení ʻamui ange ʻi he lēsoní.

ʻI hoʻo ako he ʻaho ní, fakaafeʻi ʻa e Laumālie Māʻoniʻoní ke tokoni atu ke ke fakatokangaʻi ʻa e ʻuhinga ʻoku mahuʻinga ai ke ako ʻa e ngaahi pōpoaki ko ʻení. Te ke lava ʻo kumi ha ngaahi founga ʻe lava ke tokoniʻi ai koe ʻe he Tamai Hēvaní mo Sīsū Kalaisi ke ke ikunaʻi ha faʻahinga faingataʻa pē ʻokú ne ʻai ke faingataʻa hono fakakau ʻa e ngaahi pōpoaki ko ʻení ʻi hoʻo ako fakataautaha ʻa e ongoongoleleí.

ʻOku lea ʻaki ʻe he kau palōfitá ʻa e ngaahi folofola ʻa e ʻEikí

Ke tokoni ke mahino ki he kau akó ʻa e ʻuhinga ʻoku fuʻu mahuʻinga ai hono ako e ngaahi pōpoaki ʻa e kau tamaioʻeiki ʻa e ʻEikí, te ke lava ʻo fakaafeʻi kinautolu ke nau ako ʻa e ui ʻa ʻIsikeli ke hoko ko ha palōfita lolotonga ha taimi ʻo e hē ʻa ʻIsileli mei he moʻoní. Mahalo kuo ako ʻe he kau akó ʻa e ui ʻa ʻIsikeli ke hoko ko ha “leʻo” (vakai, ʻIsikeli 3:16–17) ʻi he Lēsoni 138: “ʻIsikeli 1–3; 33”. Kapau kuo teʻeki ai maʻu ʻe he kau akó ʻa e lēsoni ko ʻení, te ke lava ʻo vahevahe ʻa e fakamatala fakanounou ko ʻení.

Naʻe puke pōpula ʻa ʻIsikeli fakataha mo ha kau ʻIsileli kehe tokolahi pea ʻave ki Pāpilone. Lolotonga ʻene nofo pōpulá, naʻe ʻaʻahi kiate ia ʻa e ʻEikí pea ui ia ko ha palōfita (vakai, ʻIsikieli 1–2).

Lau ʻa e ʻIsikeli 3:4, 10–11, 27, ʻo kumi e ngaahi fakahinohino ʻa e ʻEikí ki Heʻene palōfitá.

Ko e hā ha meʻa te tau lava ʻo ako fekauʻaki mo e fatongia ʻo e palōfita ʻa e ʻEikí?

Mahalo te ke fie fakamamafaʻi ʻa e ongo kupuʻi lea “pe te nau fanongo” ʻi he veesi 11 mo e “Ko ia ʻoku fanongó, tuku ke ne fanongo” ʻi he veesi 27. Vahevahe ange ʻoku ʻoange ʻe he ʻEikí ki Hono kakaí ʻa e fili ke fanongo ki Heʻene ngaahi folofolá ʻo fakafou ʻi Heʻene kau palōfitá mo kinautolu ʻokú Ne ui ke takí.

Te ke lava leva ʻo hiki ʻi he palakipoé ʻa e moʻoni taʻekakato ko ʻení: ʻI heʻetau fili ke fanongo ki he folofola ʻa e ʻEikí kuo ʻomi ʻe Heʻene kau tamaioʻeikí, te Ne …

Fakaafeʻi e kau akó ke fakakakato ʻa e kupuʻi lea ko ʻení ko ha tefitoʻi moʻoni, ʻo fakaʻaongaʻi ʻa e lea ko ʻeni meia Palesiteni Nalesoní.

Naʻe vahevahe ʻe Palesiteni Lāsolo M. Nalesoni ha niʻihi ʻo e ngaahi tāpuaki kuo talaʻofa ʻe he Fakamoʻuí kiate kinautolu ʻoku fanongo (fanongo ki he), tuitala (loto-fiemālie ke talangofua), mo talangofua (muimui ʻi he tui) ki he ngaahi akonaki ʻa e Fakamoʻuí kuo ʻomi ʻe Heʻene kau tamaioʻeikí:

24:24

[ʻOku] tau fanongo kiate Ia ʻi heʻetau talangofua ki he lea ʻa e kau palōfitá, kau tangata kikite, mo e kau tangata maʻu fakahaá. ʻOku fakamoʻoniʻi maʻu pē Ia ʻe he Kau ʻAposetolo ʻa Sīsū Kalaisi kuo fakanofó. ʻOku nau fakahinohino ʻa e halá ʻi heʻetau foua e hala fihituʻu ʻo ʻetau aʻusia fakamatelié.

Ko e hā ʻe hoko ʻi hoʻo fanongo, tokanga, mo talangofua moʻoni ange ki he meʻa kuo folofola ʻaki ʻe he Fakamoʻuí mo e meʻa ʻokú Ne folofola ʻaki he taimí ni ʻo fakafou ʻi Heʻene kau palōfitá? ʻOku ou palōmesi ʻe tāpuekina kimoutolu ʻaki ha mālohi lahi ange ke fepaki mo e ʻahiʻahí, faingataʻá, mo e vaivaí. ʻOku ou talaʻofa atu ha ngaahi mana ʻi hoʻomou nofo-malí, feohi fakafāmilí, mo e ngāue fakaʻahó. Pea ʻoku ou palōmesi ʻe tupulaki homou ivi ke ongoʻi e fiefiá neongo ʻo ka fakautuutu e palopalemá ʻi hoʻomou moʻuí. (“Fanongo kiate Ia,” Liahona, Mē 2020, 90) (taimi 13:07 ki he 14:16)

Ko e hā ha ngaahi tāpuaki kuo talaʻofa mai naʻá ke ʻilo?

ʻE lava ke ʻilo ʻe he kau akó ʻe hanga ʻe he Fakamoʻuí ʻo:

Fakahinohino hotau halá ʻi he hala fihifihi ʻo ʻetau ngaahi aʻusia fakamatelié.
Tāpuakiʻi kitautolu ʻaki Hono mālohi ke fehangahangai mo e ʻahiʻahí, ngaahi faingataʻá, mo e vaivaí.
ʻOmi ha ngaahi mana ki hotau ngaahi fāmilí mo e ngāue fakaʻahó.
Fakatupulaki ʻetau malava ke ongoʻi fiefiá ʻo aʻu ki he taimi ʻoku fakautuutu ai e ngaahi faingataʻa ʻo e moʻuí.

Fakakaukau ke fakaafeʻi e kau akó ke vahevahe ha toe ngaahi tāpuaki kehe kuo nau mamata ai mei heʻenau feinga ke ako e folofola ʻa e Fakamoʻuí pea tānaki ia ki he lisi ʻi he palakipoé. Mahalo ʻe tokoni ki he kau akó hano ʻiloʻi ha niʻihi ʻo e ngaahi founga ʻe lava ke tokoniʻi ai ʻa e toʻu tupú ʻe he ngaahi tāpuaki ko ʻeni kuo talaʻofa maí. Ke fakahoko ʻení, te ke lava ʻo vahe ʻa e kau akó ki ha fanga kiʻi kulupu iiki ke aleaʻi ʻeni:

ʻI he vakai ki he ngaahi tāpuaki ko ʻeni kuo talaʻofa maí, fakakaukau ki ha tūkunga pau ʻe tokoni ai ha taha ʻo e ngaahi tāpuaki ko ʻení ki ha toʻu tupu.

Ko e hā te ke lava ʻo vahevahe ke tokoni ke ako ʻe he toʻu tupú e ngaahi pōpoaki ʻa e kau taki ʻo e Siasí ʻo kapau ʻoku nau faingataʻaʻia hono fakahokó?
Ko e fē ha taimi kuó ke aʻusia ai pe ko ha taha ʻokú ke ʻilo ʻa e ngaahi tāpuaki ko ʻení?

Fakatupulaki hoʻo ako e ngaahi pōpoaki ʻa e ʻEikí

Fakakaukau ke fakaafeʻi e kau akó ke nau fili ʻi he faʻa lotu ha tāpuaki ʻe taha pe lahi ange kuo talaʻofa mai ʻi he palakipoé te nau loto ke maʻu ʻi heʻenau moʻuí pea hiki ia ʻi heʻenau tohinoa akó.

Te ke lava ʻo vakai ki he lisi ʻo e ngaahi fakafeʻātungia ʻe ala fehangahangai mo e toʻu tupú ʻa ia naʻe faʻu he konga kimuʻa ʻo e lēsoní. Te ke lava ʻo fili ha fakafeʻātungia pea fai ha fehuʻi hangē ko ʻení:

Ko e hā ha faleʻi te ke fai ke tokoni ki ha taha ke ne ikunaʻi e fakafeʻātungia ko ʻení?

Fakakaukau ke fakaafeʻi e kau akó ke nau fakakaukau ki he founga te nau lava ai ʻo fakakau e ako ʻa e ngaahi pōpoaki ʻa e kau taki ʻo e Siasí ʻi heʻenau moʻuí. Fakapapauʻi ange ʻoku ʻikai fiemaʻu ha taimi lahi ia ki he meʻá ni. Vahevahe ha ngaahi fakakaukau ʻe niʻihi mo e kalasí pea fakaafeʻi e kau akó ke vahevahe ha niʻihi kuo tokoni kiate kinautolu. Te ke lava ʻo maʻu ha ngaahi ʻekitivitī fakaʻilekitulōnika lahi ange ʻi he Ngaahi ʻEkitivitī Fakalahi ki he Akó ʻi he tatau ʻo e tohi lēsoni ko ʻení ʻi he ʻinitanetí.

Fakakaukau ki ha founga ʻe taha ʻokú ke ongoʻi te ke lava ʻo fakakau ai hono ako e ngaahi pōpoaki ʻa e kau taki ʻo e Siasí ʻi hoʻo ako fakatāutahá. Fili ha taha ʻo e ngaahi fakakaukau ko ʻení:

Muimui ʻi he ngaahi ʻakauni mītia fakasōsiale ʻa e kau taki ʻo e Siasí.
Ako ha lea pe ko ha konga ʻo ha lea ko e konga hoʻo moihū ʻi he Sāpaté pe ʻi ha ʻaho kehe ʻe taha pe lahi ange ʻo e uiké.
Fakafanongo ki ha lea lolotonga hoʻo fai ha ʻekitivitī ʻe taha hangē ko e fakamālohisinó, fefonongaʻakí, pe ngāué.
Fakaʻaongaʻi ʻa e konga ki he Palani Akó ke faʻu ha palani ke ako ʻa e ngaahi lea mei he konifelenisi lahi fakamuimuitahá pe ngaahi pōpoaki mei he Palesiteni lolotonga ʻo e Siasí.
Fakaʻaongaʻi ʻa e Scripture Citation Index ʻi hoʻo maʻu ha potufolofola ʻoku mahuʻingamālie kiate koe ʻi hoʻo ako folofola fakatāutahá. ʻOku maʻu e index ko ʻení ʻi he scriptures.byu.edu, pea ʻe lava ʻo tokoni ke ke vakai ki he fakaʻaongaʻi fakamuimuitaha ʻo e vēsí ʻi he konifelenisi lahí. Te ke lava ʻo fakafehokotaki ʻa e kupuʻi leá ki he veesi ʻi he Gospel Library.
Faʻu haʻo meʻa pē ʻaʻau.

Te ke lava ʻo poupouʻi e kau akó ke nau lotua e tokoni ʻa e Tamai Hēvaní ʻi heʻenau feinga ke ako ʻEne folofolá ʻa ia ʻoku fakafou mai ʻi Heʻene kau tamaioʻeikí. Te ke lava ʻo vahevahe hoʻo fakamoʻoni ki he ngaahi tāpuaki kuó ke maʻu ʻi hoʻo feinga ke fakatupulaki hoʻo ako e ngaahi pōpoaki ʻa e kau tamaioʻeiki ʻa e ʻEikí. Fakakaukau ke vakaiʻi e kau akó ʻi ha ngaahi uike siʻi, ʻo ʻoange kiate kinautolu ha faingamālie ke vahevahe ʻa e ngaahi lavameʻa mo e ngaahi faingataʻa kuo nau aʻusiá.

Ngaahi Maʻuʻanga Tokoni Kehe

Ko e hā ha ngaahi tāpuaki te tau lava ʻo maʻu mei hono ako e ngaahi pōpoaki ʻa e kau taki ʻo e Siasí?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:21

Ko ha konga ʻe taha ʻo e loto-toʻa ʻi he fakamoʻoni ʻo Sīsuú ko e tokanga ki Heʻene kau talafekaú. ʻOku ʻikai fakamālohiʻi kitautolu ʻe he ʻOtuá ki ha hala lelei ange, ʻa e hala ʻo e fuakavá, ka ʻokú Ne fakahinohinoʻi ʻEne kau palōfitá ke nau fakamahino kakato kiate kitautolu ʻa e ngaahi nunuʻa ʻo ʻetau ngaahi filí. Pea ʻoku ʻikai ko e kāingalotu pē ʻo Hono Siasí. ʻOkú Ne kōlenga mai, ʻo fakafou ʻi Heʻene kau palōfitá mo e kau ʻaposetoló, ki māmani kotoa ke nau tokanga ki he moʻoni te ne fakatauʻatāinaʻi kinautolú, siʻaki ʻa e fefaʻuhi taʻeʻaongá, pea ʻomi ʻa e fiefia ʻoku tuʻuloá kiate kinautolu. (“Ko e Fakamoʻoni ʻo Sīsuú,” Liahona, Mē, 2024, 98–99) (taimi 6:22 ki he 7:00)

6:1

ʻOku ou tapou atu ke mou toutou ako e ngaahi pōpoaki ʻo e konifelenisi ko ʻení—pe maʻu pē—lolotonga e māhina ʻe ono ka hokó. Fekumi fakamātoato ki ha ngaahi founga ke fakaʻaongaʻi ai e ngaahi pōpoakí ni ʻi hoʻomou efiafi fakafāmili ʻi ʻapí, ʻi hoʻomou akoʻi e ongoongoleleí, ʻi hoʻomou fetalanoaʻaki mo e fāmilí mo e kaungāmeʻá pea mo hoʻomou talanoa mo kinautolu ʻoku ʻikai kau mai ki heʻetau tuí. … Pea ʻe toe fakalahi ange ai hoʻomou holi ke talangofuá, ʻi hoʻomou manatua mo fakalaulauloto ki he meʻa kuo mou ongoʻi he ongo ʻaho ʻe ua ne toki ʻosí. (“Tuku ke Tau Vilitaki Atu,” Liahona, Mē 2018, 118) (taimi 6:22 ki he 7:00) (taimi 1:18 ki he 1:59)

Ko e fē ha feituʻu te u lava ʻo maʻu ai ha ngaahi fakakaukau kehe ke tokoni mai ke u ako e ngaahi pōpoaki ʻa e kau taki ʻo e Siasí?

“Learn Elder Bednar’s Pattern for Studying Conference Messages — Doctrine, Invitations, Blessings,” (Newsroom.ChurchofJesusChrist.org, Mar. 30, 2021)

“Studying General Conference,” (New Era, June 2013, 40–42)

Ngaahi ʻEkitivitī Fakalahi ki he Akó

ʻOku vahevahe ʻe he kau tamaioʻeiki ʻa e Fakamoʻuí ʻEne pōpoakí

ʻE ala tokoni ke fakamahinoʻi ange ʻoku toutou vahevahe lahi ange ʻe he kau tamaioʻeiki ʻa e ʻEikí ʻa ʻEne pōpoakí pea ʻi ha ngaahi founga lahi ange ʻi ha toe taimi ʻi he hisitōlia ʻo Hono Siasí. Te ke lava ʻo kole ki he kau akó ke vahevahe ha niʻihi ʻo e ngaahi founga ʻoku tataki ai kitautolu ʻe he kau tamaioʻeiki ʻa e ʻEikí kia Sīsū Kalaisí.

ʻE lava ke ʻiloʻi ʻe he kau akó ha ngaahi fakataha lotu, ngaahi fakamafola mata–ki he-mata, ngaahi fakamatala ʻi he makasini ʻa e Siasí, mo e ngaahi tohi he mītia fakasōsialé ko ha ngaahi founga ia ʻoku tataki ai kitautolu ʻe he kau taki ʻo e Siasí ki he Fakamoʻuí. Te ke lava ʻo fakaafeʻi e kau akó ke nau toe vakaiʻi ha taha ʻo e ngaahi maʻuʻanga tokoni ko ʻení pea fili ha kupuʻi lea nounou ke vahevahe:

Ko e pulusinga ʻo e konifelenisi lahi fakamuimuitahá ʻi he Liahona
Fakamatala fakanounou ʻo e ngaahi pōpoaki lahi ʻi he konifelenisi lahi fakamuimuitahá mei he Newsroom.ChurchofJesusChrist.org
Ngaahi tatau ʻo e fakamatala “Ngaahi Pōpoaki Fakamuimui mei he Kau Taki ʻo e Siasí,” mei ha makasini lolotonga ʻo e Liahona pe Ki Hono Fakamālohia ʻo e Toʻu Tupú
Ko ha tatau ʻo ha pōpoaki ʻe taha pe lahi ange kimuí ni mai mei he ngaahi ʻakauni mītia fakasōsiale ʻa e kau taki ʻo e Siasí

Te ke lava ʻo fakaafeʻi ʻa e kau akó ke vahevahe ʻa e kupuʻi lea naʻa nau filí pea mo e founga ʻe lava ke fakahinohinoʻi ai ʻe he pōpoaki ko ʻení ha taha ki he Tamai Hēvaní mo Sīsū Kalaisí.

Fakaʻaongaʻi ʻa e Gospel Library ke faʻu ha palani ako

ʻE lava ke tokoni ki he kau akó hono faʻu ʻenau palani akó ʻi he Gospel Library. ʻE lava ke tokoni ʻa e ngaahi fakahinohino ko ʻení ke nau faʻu ʻa e palani ko ʻení:

Fakaava ʻa e peesi kamata ʻo e Gospel Library pea ʻalu ki he “Study Plans.” Lomiʻi leva ʻi he + ke faʻu ha palani foʻou. (Mahalo ʻe fiemaʻu ke “Fakatonutonu” ʻe he kau akó ʻenau peesi kamatá ke fakakau ai ʻa e Ngaahi Palani Akó.)
Lomiʻi ʻa e Konifelenisi Lahí pea ʻalu leva ki he konifelenisi fakamuimuitaha ʻoku maʻú.
Fakamoʻui ʻa e Faʻu ha taimi-tēpile, ʻo fili e tuʻo lahi ʻokú ke palani ai ke akó.
Fakamoʻui ʻa e Fakahū ha fakamanatu ke tokoni atu ke ke fakatupulaki ha tōʻonga moʻui ʻo e akó.
Seivi ʻa e palani akó. ʻOku totonu ke lisi ia he taimí ni ʻi he konga Ko ʻEku Palaní ʻi he peesi kamatá.

Tānaki atu ʻa e “Quote of the Day” ki he peesi kamata hoʻo Gospel Library

ʻE lava ke tānaki atu ʻe he kau akó ʻa e konga “Quote of the Day” ki he peesi kamata ʻenau Gospel Library ke maʻu fakaʻaho ha pōpoaki mei he kau taki ʻo e Siasí. Ke fai ʻení, ʻoku nau lomiʻi e Edit Home ʻi he konga ki lalo ʻo e screen pea lomiʻi e Quote of the Day. Te nau lava ʻo fakamoʻui e Notification, ʻa ia te ne ʻoatu ha fanongonongo ki heʻenau telefoní ʻi he taimi ʻoku ʻi ai ha konga leá.

ʻE lava ke ʻai ʻe he kau akó hono toe vakaiʻi ʻa e kupuʻi lea ko ʻení ko ha konga ʻo ʻenau palani akó.

Fakaʻaongaʻi ʻa e mītia fakasōsialé ke ako ʻa e Folofola ʻa e ʻOtuá ʻo fakafou ʻi Heʻene kau tamaioʻeikí.

ʻE lava ke fakakau ʻe he kau akó ʻi heʻenau palani akó ʻa e ngaahi pōpoaki ne fai ʻe he kau taki ʻo e Siasí ʻo fakafou ʻi heʻenau ʻakauni mītia fakasōsialé. ʻE lava ke tokoni ʻa e ngaahi fakahinohino ko ʻení ke nau fakahoko ai ʻeni.

Hili hono kumi e ʻakauni mītia fakasōsialé, “Follow” ʻi he ʻakauní, ʻo ʻai ia ko ha “Favorite” kapau ʻoku ʻi ai.
ʻE lava ke lau ʻe he kau akó ha ngaahi tohi ʻe niʻihi pe ngaahi fetohiʻaki. Fakaafeʻi kinautolu ke nau lomiʻi ʻi he fakaʻilonga Like pe fakaʻilonga hātí. Te nau lava foki ʻo tohi ha “Comment” ʻo fakahā ʻenau houngaʻia ʻi he pōpoakí pe ʻuhinga ʻoku ʻuhingamālie ai ʻa e pōpoakí kiate kinautolú. ʻI hono fakahoko ʻení ʻe fakalahi ai ʻa e malava ke mamataʻi fakamāmani lahi e ngaahi ʻakauni mītia fakasōsiale ʻa e kau takí, ʻo tokoni ke fakamafola e pōpoaki ʻa e Fakamoʻuí.
ʻE lava ke faʻu ʻe he kau akó ha “Push Notification” ki he ngaahi ʻakauni ʻoku nau filí. ʻE faʻu heni ha fanongonongo ʻi heʻenau meʻangāué ʻi he taimi kotoa pē ʻoku faʻu ai ha tohi foʻou.