Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko e Teuteu ki he Konifelenisi Lahí: Ko e Fanongo ki he Ngaahi Folofola ʻa e Fakamoʻuí ʻi he Konifelenisi Lahí

“Ko e Teuteu ki he Konifelenisi Lahí: Ko e Fanongo ki he Ngaahi Folofola ʻa e Fakamoʻuí ʻi he Konifelenisi Lahí,” Fuakava Motuʻá – Tohi Lēsoni ʻa e Faiako Seminelí (2026)

“Ko e Teuteu ki he Konifelenisi Lahí: Ko e Fanongo ki he Ngaahi Folofola ʻa e Fakamoʻuí ʻi he Konifelenisi Lahí,” Fuakava Motuʻá – Tohi Lēsoni ʻa e Faiako Seminelí

Ngaahi Akonaki ʻa e Kau Taki ʻo e Siasí: Lēsoni 205

Ko e Teuteu ki he Konifelenisi Lahí

Ko e Fanongo ki he Ngaahi Folofola ʻa e Fakamoʻuí ʻi he Konifelenisi Lahí

ʻOku folofola mai ʻa e ʻEikí kiate kitautolu takitaha ʻo fakafou ʻi Heʻene kau tamaioʻeikí ʻi he konifelenisi lahí. ʻE lava ke tokoni ʻetau teuteu fakamātoato ki he konifelenisí ke tau maʻu ha fakahā fakataautaha. ʻE lava ke tokoni ʻa e lēsoni ko ʻení ki he kau akó ke nau teuteu ke maʻu ʻa e ngaahi pōpoaki mei he Fakamoʻuí ʻi he konifelenisi lahí.

Teuteu ʻa e tokotaha akó: Fakaafeʻi e kau akó ke fakalaulauloto ki he ngaahi tāpuaki ʻe lava ke maʻu mei he mamata ʻi he konifelenisi lahi hono hokó mo e founga te nau lava ai ʻo teuteu ki aí.

Ngaahi ʻEkitivitī Ako ʻOku Ala Fakahokó

Ko e teuteu ki he ngaahi meʻa ʻe hokó

Fakatokangaʻi ange: Koeʻuhí ʻoku hoko tuʻo ua ʻa e konifelenisi lahí he taʻu takitaha, mahalo ʻe fiemaʻu ke ke akoʻi tuʻo ua ʻa e lēsoni ko ʻení. Ki ha ngaahi founga kehe ke akoʻi e lēsoni ko ʻení, vakai ki he konga ʻo e Ngaahi ʻEkitivitī Fakalahi ki he Akó ʻi he lēsoni ko ʻení ʻi he Gospel Library ʻi he ChurchofJesusChrist.org.

Ke tokoni ke teuteuʻi e kau akó ke akó, fakakaukau ke kamata e kalasí ʻaki hano tā ha meʻa hangē ko ʻení ʻi he palakipoé:

Fakaafeʻi e kau akó ke nau fakamanatuʻi ha pōpoaki ne nau maʻu naʻe mahuʻingamālie kiate kinautolu. Ko e ngaahi sīpinga ʻe niʻihi ko ha kiʻi tohi mei ha mātuʻa, pōpoaki telefoni mei ha kaungāmeʻa, ko ha fakahīkihiki mei ha kaungāʻapi pe taki ʻo e Siasí, pe faleʻi mei ha kui.

Fakakaukau ke vahevahe ha sīpinga ʻo ha pōpoaki naʻá ke maʻu naʻe mahuʻingamālie kiate koe. ʻEke ki he kau akó ʻa e fehuʻi ko ʻení:

Ko e hā naʻe mahuʻingamālie ai e pōpoaki naʻá ke maʻú?

Fakakaukauloto ʻe ʻoatu ʻe he ʻEikí ha pōpoaki kiate koe. Fakaʻaongaʻi ha kiʻi taimi ke ke hiki ai ʻi hoʻo tohinoa akó ʻa e meʻa ʻokú ke ʻamanaki te Ne fakakau ʻi Heʻene pōpoakí, hangē ko ʻení, fakahinohino ki hoʻo moʻuí, ko ha pōpoaki ʻo e ʻamanaki leleí mo e fakapapaú, ko ha fakapapauʻi ʻo e moʻoní, pe ko ha tali ki ha fehuʻi.

Founga ʻoku ʻomi ai ʻe he ʻOtuá ha ngaahi pōpoaki kiate kitautolú

Lau ha niʻihi ʻo e ngaahi veesi ko ʻení, ʻo kumi ha founga ʻe taha ʻoku ʻomi ai ʻe he ʻEikí ʻEne ngaahi pōpoakí mo e ngaahi kupuʻi lea ʻokú ne fakahaaʻi ʻa e ʻuhinga ʻoku mahuʻinga aí:

Fakaafeʻi e kau akó ke vahevahe e meʻa ne nau maʻú pea poupouʻi kinautolu ke fakaʻilongaʻi e ngaahi kupuʻi lea ʻoku nau fanongo ki ai mei honau toʻú te nau fie manatuʻí.

Lolotonga e konifelenisi lahí, ʻoku vahevahe ʻe he kau palōfitá, kau tangata kikité, mo e kau tangata maʻu fakahaá, fakataha mo e kau taki kehe ʻo e Siasí kuo ueʻi fakalaumālié, ha ngaahi pōpoaki mei he ʻEikí.

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ou fakamoʻoni atu ko Sīsū ʻa e Kalaisí, ʻokú Ne tataki ʻa e ngāue toputapu ko ʻení, pea ko e konifelenisi lahí ko e taha ia ʻo e ngaahi taimi mahuʻinga ʻaupito kuó Ne ʻomi ai e fakahinohino ki Hono Siasí pea mo kitautolu fakataautaha. …

Ko e ngaahi akonaki ʻo e konifelenisi lahí, ko e ngaahi fakakaukau ia ʻoku tuku mai ʻe he ʻEikí maʻatautolu ʻi he taimí ni pea ʻi he ngaahi māhina ka hokó. (“Ko e Leʻo ʻo e ʻEikí,” Liahona, Nōvema 2017, 122, 124)

Te ke fakamatalaʻi fakanounou fēfē ʻa e meʻa ne akoʻi ʻe ʻEletā ʻEnitasení?

Ko e moʻoni ʻe taha ʻe lava ke fakamatala ki ai ʻa e kau akó ko e, ʻi he konifelenisi lahí, ʻoku ʻomi ʻe he ʻEikí ʻa e fakahinohino ki Hono Siasí pea kiate kitautolu fakataautaha ʻo fakafou ʻi Heʻene kau tamaioʻeikí, ʻa e kau palōfitá.
Ko e hā ʻokú ke ʻilo fekauʻaki mo Sīsū Kalaisí ʻokú ne ʻai ke mahuʻingamālie ha pōpoaki meiate Iá?

Ke tokoni ki he kau akó ke fakakaukau ki heʻenau teuteu ki he konifelenisi lahí, fakakaukau ke fakaʻaliʻali ʻa e ngaahi fehuʻi ko ʻeni ke siviʻi pē kitá.

Fakalaulauloto pea tali e ngaahi fehuʻi ko ʻení ʻi hoʻo tohinoa akó:

ʻOku fēfē hoʻo loto-falala te ke lava ʻo ʻiloʻi e ngaahi pōpoaki ʻa e ʻEikí kuo fakataumuʻa kiate koe fakataautaha ʻi he konifelenisi lahí? Ko e hā hono ʻuhingá?
Ko e hā te ke ala fai ke teuteu ai ki he konifelenisi lahi ka hokó kae lava ke ke maʻu lelei ange ʻa e ngaahi pōpoaki ʻa e ʻEikí maʻaú?

Ko e Teuteu ki he konifelenisi lahí

Ko e fē ha taimi kuó ke maʻu ai, pe ko ha taha ʻokú ke ʻilo, ha pōpoaki mei he konifelenisi lahí naʻá ke ongoʻi naʻe ʻomi mei he ʻEikí? Naʻe tokoni fēfē ia kiate koe pe kiate iá?

Teuteu ki he konifelenisi lahí

Hiki ha taumuʻa ʻo e meʻa te ke fie fakahoko ke maʻu ai e ngaahi pōpoaki ʻa e ʻEikí lolotonga e konifelenisi lahí.

Tufa ha kiʻi laʻipepa ʻoku lava ʻo fakapipiki pe laʻipepa ki he tokotaha ako takitaha pea fakaafeʻi ke nau tohi ʻi ʻolunga ʻa e kupuʻi lea “Maʻau Pē”. ʻE lava foki ke fakaʻaongaʻi ʻe he kau akó ʻenau tohinoa akó pe kiʻi pepa hiki fakamatala, kapau ʻoku nau saiʻia ai.

Kole ange ke nau hiki ha faʻahinga pōpoaki pē ʻoku nau ongoʻi naʻe ʻomi ʻe he ʻEikí kiate kinautolu lolotonga e konifelenisi lahí. Poupouʻi kinautolu ke nau foki mai ki he kalasí hili e konifelenisi lahí ʻo mateuteu ke vahevahe e meʻa naʻa nau fakahoko ke teuteú. Kapau ʻoku ʻikai fuʻu fakataautaha, te nau lava foki ʻo vahevahe ʻa e ngaahi pōpoaki ne nau fanongo ai mei he ʻEikí.

ʻI ha kalasi he kahaʻú hili e konifelenisi lahí, fakakaukau ke fakaʻaongaʻi ha ngaahi miniti siʻi ke lipooti ai ʻe he kau akó ʻenau aʻusiá.

ʻEkitivitī toe vakaiʻi ʻo e konifelenisi lahí

ʻI he kalasi semineli hoko hili ʻa e konifelenisi lahí, fakakaukau ke ʻoange ki he kau akó ha faingamālie ke toe vakaiʻi mo vahevahe ʻa e meʻa ne nau akó. Te ke lava ʻo hiki ha ngaahi fehuʻi ʻi he palakipoé, hangē ko e:

Ko e hā naʻá ne ʻai koe ke ke katá?
Ko e hā ʻa e lea ʻokú ke vēkeveke ke akó?
Ko e hā ha ngaahi pōpoaki naʻá ke ongoʻi naʻe ʻomi maʻau pē?
Ko e hā naʻá ke ako pe ongoʻi fekauʻaki mo e Fakamoʻuí?

Te ke lava ʻo fakaafeʻi ʻa e kau akó ke nau hiki ʻi he palakipoé ha ngaahi tali ki ha taha pē ʻo e ngaahi fehuʻí. Ko e founga ʻe tahá, te nau lava ʻo hiki honau hingoá ʻi ha kiʻi laʻipepa fakapipiki pe kiʻi laʻipepa pea tuku ia he tafaʻaki ʻo ha fehuʻi ʻoku nau loto-fiemālie ke tali. Fai ha fealēleaʻaki fakakalasi ʻaki hano fakaafeʻi e kau ako ʻoku loto-fiemālié ʻi honau hingoá ke vahevahe ʻenau tali ki he ngaahi fehuʻí. Te ke lava foki ke vahevahe ha niʻihi hoʻo ngaahi talí.

Ngaahi Maʻuʻanga Tokoni Kehé

Ko e hā ʻa e meʻa naʻe fakatefito ai ʻa e ngaahi pōpoaki ʻo e konifelenisi lahí?

Naʻe akonaki ʻa Palesiteni Lāsolo M. Nalesoni ʻo pehē:

5:27

Ko e Kau Taki Māʻolunga mo e Kau ʻŌfisa Māʻolunga ʻe leá, ʻe nofotaha ʻenau pōpoakí ʻi hotau Fakamoʻui ko Sīsū Kalaisí, ʻEne ʻaloʻofá, mo Hono mālohi huhuʻi taʻe-fakangatangatá. Kuo teʻeki ai ha taimi ʻi he hisitōlia ʻo māmaní ʻe mātuʻaki mahuʻinga fakataautaha lahi ange ai mo kaunga ʻa e ʻilo hotau Fakamoʻuí ki he laumālie ʻo e taha kotoa. Fakakaukau ki he vave hano fakaleleiʻi ʻo e ngaahi fepaki fakalilifu he funga ʻo e māmaní—mo ia ʻi heʻetau moʻui fakafoʻituituí—ʻe lava ke fakaleleiʻi kapau naʻa tau fili kotoa ke muimui kia Sīsū Kalaisi mo tokanga ki Heʻene ngaahi akonakí. (“Moʻoni Haohaoa, Tokāteline Haohaoa, mo e Fakahā Haohaoa,” Liahona, Nōvema 2021, 6) (taimi 1:41 ki he 2:26)

Ko e hā ha founga ʻe taha ke hiki ai ha ngaahi fakamatala lolotonga ʻa e konifelenisi lahí?

Naʻe akoʻi ʻe ʻEletā Lōpeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:51

ʻI heʻeku hiki e ngaahi fakamatala he konifelenisí, ʻoku ʻikai ke u tohi ʻa e meʻa totonu ʻoku lea ʻaki ʻe he tokotaha leá; ʻoku ou hiki e fakahinohino fakataautaha ʻoku fai mai ʻe he Laumālié kiate aú.

ʻOku ʻikai ke mahuʻinga fēfē e meʻa ʻoku lea ʻakí ʻo tatau mo e meʻa ʻoku tau fanongoa mo ongoʻí. ( “Konifelenisi Lahí: Ko e Fakamālohia ʻo e Tuí mo e Fakamoʻoní,” Liahona, Nōvema 2013, 6) (taimi 5:00 ki he 5:19)

Ngaahi ʻEkitivitī Fakalahi ki he Akó

Ko ha faingamālie ke fefolofolai mo e ʻEikí

Ko ha founga ʻe taha ke kamata ʻaki e lēsoní ko hono fehuʻi ki he kau akó, “Kapau te ke lava ʻo maʻu e faingamālie ke talanoa mo ha taha ke maʻu ha faleʻi mo e tokoni ki hoʻo moʻuí, ko hai te ke fie talanoa mo iá pea ko e hā hono ʻuhingá?”

Fakaʻaliʻali ha tā ʻo e Fakamoʻuí ʻoku akonaki. Fakaafeʻi e kau akó ke fakakaukauloto te nau maʻu ha faingamālie ʻi ha ngaahi ʻaho lahi ke fefolofolai mo e ʻEiki ko Sīsū Kalaisí. Te nau lava ʻo kole kiate Ia ha faleʻi mo ha fakahinohino ki heʻenau moʻuí.

‘E lava leva ke tali ʻe he kau akó ʻa e ngaahi fehuʻi ko ʻení ʻi heʻenau tohinoa akó:

Ko e hā ha fakahinohino pe tokoni te ke ala kumia meiate Ia?
Ko e hā te ke ala fakahoko ke teuteu ki hoʻo ʻaʻahi mo Iá? Ko e hā hono ʻuhingá?

ʻOku faleʻi kitautolu ʻe he ʻEikí ʻo fakafou ʻi Heʻene palōfitá

Kapau ʻe akoʻi ʻa e lēsoni ko ʻení ko hono tuʻo uá ʻi he taʻú, fakakaukau ke kamata ʻaki ʻa e fakakaukau fakalahi ʻi ʻolungá pea fakahoko ʻa e ngaahi meʻa ko ʻení:

Lau ha niʻihi ʻo e ngaahi veesi ko ʻení, ʻo kumi e founga naʻe hanga ai ʻe he fakahinohino naʻe fai ʻe he ʻEikí ʻo fakafou ʻi Heʻene palōfita ko Mōsesé ʻo tokoniʻi ʻa Hono kakaí ʻi ha ngaahi taimi kehekehe.

ʻEkesōtosi 3:15–17. ʻI he taimi naʻe nofo pōpula ai ʻa e kakaí.

ʻEkesōtosi 12:21–23, 27. ʻI he taimi naʻe talaʻofa ai ʻe he ʻEikí ʻe tāmateʻi ʻe ha ʻāngelo ʻo e maté ʻa e ʻuluaki fānau ʻi ʻIsipité.

ʻEkesōtosi 14:13–14, 21. ʻI he taimi naʻe fihia ai e kakaí ʻi he vahaʻa ʻo e kau tau ʻIsipité mo e Tahi Kulokulá.

ʻEkesōtosi 16:4. ʻI he taimi naʻe ʻikai maʻu ai ʻe he kakaí ha meʻakaí.

ʻEkesōtosi 17:5–6. ʻI he taimi naʻe ʻikai maʻu ai ʻe he kakaí ha vaí.

ʻEkesōtosi 25:1-2, 8. ʻI he taimi naʻe ʻi he toafá ai ʻa e kakaí. (Fakatokangaʻi ange: naʻe ʻuhinga ʻa e foʻi lea potu toputapu ki he tāpanekalé, pe ko e temipale ne fehikitakí.)

Nōmipa 21:8–9. ʻI he taimi naʻe uʻu ai ʻa e kakaí ʻe he fanga ngata huhu koná.

Naʻe kehe fēfē ʻa e ngaahi pōpoaki ko ʻení? Ko e hā hono ʻuhingá?
Ko e hā e meʻa naʻá ke akó?
Naʻe fakahaaʻi fēfē ʻe he ngaahi pōpoaki ko ʻení ʻa e ʻofa ʻa e ʻEikí?

Fakakaukau ke hiki ʻeni ʻi he palakipoé: ʻOku ʻomi ʻe he ʻEikí fakafou ʻi Heʻene palōfitá, ha fakahinohino ki hotau ngaahi faingataʻá mo e ngaahi tūkungá.

Fakaafeʻi e kau akó ke nau fakamanatuʻi ha faʻahinga ʻuhinga pē te nau loto ai ke maʻu ha fakahinohino pe faleʻi ʻi heʻenau moʻuí. Aleaʻi ha ngaahi founga te nau lava ai ʻo teuteu ke fanongo ki he folofola ʻa e ʻEikí ʻi he konifelenisi lahí. Hangē ko ʻení, ʻe lava ke hiki ʻe he kau akó ʻenau ngaahi ʻuhingá, pea ʻi heʻenau mamata ʻi he konifelenisi lahí, hiki ha fakamatala ki ha meʻa pē ʻoku nau fanongo ki ai ʻe ala tokoni ʻi he ngaahi tūkunga ko iá.

Feinga ke fakatupulaki e ngaahi ʻulungaanga faka-Kalaisí ʻo fakafou ʻi he konifelenisi lahí

Ko ha founga ʻe taha ke teuteu ai ki he konifelenisi lahí ko e fakakaukau ki ha ʻulungaanga faka-Kalaisi ʻe taha pe ua ʻoku fie fakatupulaki ʻe he kau akó (hangē ko e manavaʻofá, loto-fakatōkilaló, faivelengá, faʻa kātakí, mo e alā meʻa pehē). Hili iá pea fakafanongo ki ha fakahinohino ʻi he konifelenisi lahí ki he founga ke hoko ai ʻo hangē ange ko e Fakamoʻuí ʻi he founga ko iá.