Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻIsikieli 1–3; 33: “Kuó u Tuku Koe ko e Leʻo ki he Fale ʻo ʻIsilelí”

“ʻIsikieli 1–3; 33: ‘Kuó u Tuku Koe ko e Leʻo ki he Fale ʻo ʻIsilelí,’” Fuakava Motuʻá – Tohi Lēsoni ʻa e Faiako Seminelí (2026)

“ʻIsikieli 1–3; 33: ‘Kuó u Tuku Koe ko e Leʻo ki he Fale ʻo ʻIsilelí,’” Fuakava Motuʻá – Tohi Lēsoni ʻa e Faiako Seminelí

ʻIsikieli 1–3; 33–34; 36–37; 47: Lēsoni 138

ʻIsikieli 1–3; 33

“Kuó u Tuku Koe ko e Leʻo ki he Fale ʻo ʻIsilelí”

A man standing under the awning of a small stone tower, looking out over the surrounding landscape.

ʻE lava fēfē ke tau malu ʻi he lahi ʻo e ngaahi fakatuʻutāmaki fakalaumālie ʻi he māmaní? ʻOku ui ʻe he ʻEikí ʻa e kau palōfitá ke nau hoko ko ha kau tangata leʻo ke fakatokanga mo maluʻi kitautolu. Naʻe ui ʻe he ʻEikí ʻa ʻIsikieli ke hoko ko ha tangata leʻo maʻá e kakai ʻIsilelí lolotonga ʻenau nofo pōpula ʻi Pāpiloné (vakai, ʻIsikieli 3:16–17). ʻE lava ke tokoni ʻa e lēsoni ko ʻení ke ongoʻi ʻe he kau akó ha holi lahi ange ke tokanga ki he ngaahi fakatokanga mei he kau palōfita ʻa e ʻEikí.

Teuteu ʻa e tokotaha akó: Fakaafeʻi e kau akó ke lau ʻa e “Palōfitá” ʻi he Fakahinohino ki he Ngaahi Folofolá pe “Kau Palōfitá” ʻi he Ngaahi Tefitó mo e Ngaahi Fehuʻí ʻi he Gospel Library. Te nau lava ʻo fekumi ki he fatongia ʻo e kau palōfitá mo fakakaukauloto ki he founga ʻoku nau vakai ai ki hono fakahoko ʻe he kau palōfitá ʻa e fatongia ko ʻení.

Ngaahi ʻEkitivitī Ako ʻOku Ala Fakahokó

Ngaahi ongo fekauʻaki mo e palōfita ʻa e ʻEikí

Fakakakato ʻa e fakamatala ko ʻení ʻi hoʻo tohinoa akó ʻaki ha tali ʻe taha pe lahi ange:

ʻI he taimi ʻoku ou sio ai ki he palōfitá, fanongo ki heʻene leá, pe lau ʻene ngaahi leá, ʻoku ou ongoʻi …

Fakaafeʻi ha fānau ako loto-vilitaki ʻe niʻihi ke vahevahe mo e kalasí ʻa e meʻa naʻa nau tohí. Te ke lava ʻo fakamatalaʻi ange ʻi heʻenau vahevahe mo fakafanongó, ʻe lava ke fakamaama ʻe he Laumālie Māʻoniʻoní honau ʻatamaí mo fakamolū honau lotó ke muimui ki he palōfita ʻa e ʻEikí.

Ko e ui ʻe he ʻEikí ʻa ʻIsikieli ke hoko ko ha palōfitá

Naʻe puke pōpula ʻa ʻIsikieli pea ʻave ki Pāpilone fakataha mo e kau ʻIsileli kehé. Lolotonga ʻene nofo pōpulá, naʻe ʻaʻahi kiate ia ʻa e ʻEikí pea ui ia ko ha palōfita (vakai, ʻIsikieli 1–2). Naʻe talaʻofa ʻe he ʻEikí te Ne fakamālohia ʻa ʻIsikieli ʻi heʻene malanga ki ha kakai angatuʻu mo loto-fefeká (vakai, ʻIsikieli 3:7–9).

Ko e ʻIsikieli 3:16–17 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

Lau ʻa e ʻIsikieli 3:10–11, 16–17, ʻo kumi e meʻa naʻe akoʻi ʻe he ʻEikí kia ʻIsikieli fekauʻaki mo hono fatongia ko e palōfitá.

Ko e hā ʻa e meʻa naʻá ke maʻú?

Ke tokoni ke mahino ki he kau akó ʻa e fakatātā ʻo ha tangata leʻo, fakakaukau ke fakaʻaliʻali ʻa e fakatātā ʻo Kākasoné ʻoku fakakau ʻi he lēsoni ko ʻení, fakataha mo e fakamatala ko ʻeni meia ʻEletā Niila L. ʻEnitasení.

Naʻe pehē ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá:

16:5

Ko Kākasoné ko ha kolo lahi ia ʻoku ʻaaʻi ʻi Falanisē kuo tuʻu talu mei he kuonga motuʻá. ʻOku tuʻu ha ngaahi taua kaekaea hake mei hono ngaahi ʻā maluʻí, ʻa ia naʻe langa maʻá e kau tangata leʻo ne tuʻu ʻi he ngaahi taua ko iá ʻi he ʻaho mo e pō, ke fakamaʻu ʻenau tokangá ki he fili mei he mamaʻó. ʻI he vakai atu ʻa e tangata leʻó ʻoku fakaofi mai ha fili, naʻe maluʻi ʻe hono leʻo fakatokangá e kakai ʻo Kākasoné mei he ngaahi fakatamaki ʻoku ʻikai ke nau lava ʻo mamata ki aí.

Ko e palōfitá ko ha tangata leʻo ia ʻi he funga tauá, ʻokú ne maluʻi kitautolu mei he ngaahi fakatuʻutāmaki fakalaumālie ʻoku ʻikai ke tau lava ʻo vakai ki aí. (“Ko e Palōfita ʻa e ʻOtuá,” Liahona, Mē 2018, 25)

Te ke fakamatalaʻi fakanounou fēfē ʻa e meʻa ʻoku akoʻi ʻe he ʻIsikieli 3:16–17 mo ʻEletā ʻEnitasení fekauʻaki mo e kau palōfitá?

Tokoni ke ʻiloʻi ʻe he kau akó ʻoku ui ʻe he ʻEikí ha kau palōfita ʻoku nau hoko ko ha kau tangata leʻo ke fakatokanga mai fekauʻaki mo e ngaahi fakatuʻutāmaki fakalaumālié. Fakamatalaʻi ange ʻoku hoko ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ko e kau palōfita ʻa e ʻEikí he ʻahó ni. Kapau ʻe fakakakato ʻe he kau akó ʻa e ʻekitivitī teuteu ʻa e tokotaha akó, te nau lava ʻo vahevahe ʻa e meʻa ne nau akó ko ha konga ʻo e fealēleaʻaki ko ʻení.

Ko e hā e ʻuhinga ʻoku hoko ai ʻa e “kau tangata leʻó” ko ha founga lelei ke fakamatalaʻi ʻaki e fatongia ʻo e kau palōfitá?

Naʻe toe akoʻi ʻe he ʻEikí ʻa ʻIsikieli ʻi he ʻIsikieli 33, ki hono fatongia ke hoko ko ha tangata leʻó pea mo vahevahe ʻa e pōpoaki ʻa e ʻOtuá mo ʻIsileli (vakai, ʻIsikieli 33:1–7).

Lau ʻa e ʻIsikieli 33:9–11, ʻo kumi e ʻuhinga ʻoku finangalo ai ʻa e ʻEikí ke fakatokanga ki Hono kakaí.

Ko e hā ha meʻa ʻe lava ke akoʻi mai ʻe he veesi 11 fekauʻaki mo e Tamai Hēvaní mo Sīsū Kalaisí?

Naʻe vahevahe ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻoku hoko ai e ngaahi fakatokanga fakaepalōfitá ko ha fakamoʻoni ʻo e ʻofa ʻa e ʻOtuá:

15:15

ʻOku feinga ʻetau Tamai Hēvaní mo hotau Fakamoʻuí ke tau fiefia kae ʻikai vēkeveke ke fakahalaiaʻi, peá Na kōlenga ai ke tau fakatomala, ʻi Heʻena ʻafioʻi lelei “kuo teʻeki ai [pea he ʻikai teitei] hoko ʻa e angahalá ko e fiefia” [ʻAlamā 41:10]. Ko ia kuo fakatokanga ai ʻa ʻIsikieli mo e kau palōfita kotoa kimuʻá mo talu mei aí, ʻaki e folofola ʻa e ʻOtuá ʻaki honau lotó kotoa, ko kinautolu kotoa ʻe lavá, ke nau tafoki meia Sētane, ʻa e fili ʻo honau laumālié, pea “fili ʻa e tauʻatāiná mo e moʻui taʻengatá, tuʻunga ʻi he [Fakalaloa] lahi ʻo e faʻahinga kotoa ʻo e tangatá” [2 Nīfai 2:27]. (“Ko e Leʻo ʻo e Fakatokangá,” Liahona, Mē 2017, 108)

ʻE tākiekina fēfē ʻe he mahino ʻo e ʻuhinga ʻoku ui ai ʻe he ʻEikí ʻEne kau palōfitá ke nau hoko ko ha kau tangata leʻó, ʻa ʻetau holi ke muimui ʻiate kinautolú?

Ngaahi fakatokanga mei he kau tangata leʻó

ʻOku fakataumuʻa ʻa e ʻekitivitī ko ʻení ke tokoni ki he kau akó ke nau vakai ki he ngaahi sīpinga ʻo e ngaahi fakatokanga kuo fai mai ʻe he ʻEikí ʻo fakafou ʻi Heʻene kau palōfitá. Fakakaukau ke fakaafeʻi e kau akó ke fili ha taha ʻo e ngaahi meʻa ko ʻení ke ako:

Ngaahi lea konifelenisi lahi kimuí ni mei he kau mēmipa ʻo e Kau Palesitenisī ʻUluakí pe Kōlomu ʻo e Kau ʻAposetolo ʻe Toko Hongofulu Mā Uá
Ko e ngaahi potufolofola fakataukei fakatokāteline ko ʻení pe ngaahi potufolofola kehe te ke fili: ʻĪsaia 5:20; 1 Kolinitō 6:19–20 (vakai foki, veesi 18); 2 Nīfai 2:27; 2 Nīfai 32:8–9; ʻAlamā 41:10; mo e Tokāteline mo e Ngaahi Fuakava 64:9–11

Hili hono fili ʻe he kau akó ha meʻa ke akó, fakaʻaliʻali e fakahinohino ko ʻení:

Ako e ngaahi akonaki mei he kau palōfita ʻa e ʻEikí pea teuteu ke vahevahe ʻeni:

Ngaahi fakatokanga kuo ʻomi ʻe he ʻEikí ʻo fakafou ʻi Heʻene kau palōfitá.
Ko e ngaahi tāpuaki te tau lava ʻo maʻu pe ngaahi faingataʻa te tau lava ʻo fakaʻehiʻehi mei ai ʻaki ʻetau talangofua ki he ngaahi fakatokanga ko ʻení. ʻE lava ke maʻu ʻeni mei he meʻa naʻá ke akó pe mei hoʻo ngaahi fakakaukaú mo e aʻusiá.
Ko e anga hoʻo ongoʻi ko e fakatokanga ko ʻení ko ha fakamoʻoni ia ʻo e ʻofa ʻa e ʻOtuá pe ko Hono finangalo ke tau fiefiá.

Te ke lava ʻo fakaafeʻi ʻa e tokotaha ako takitaha ke fili ha fakatokanga fakaepalōfita ʻe taha naʻa nau maʻu ʻi he sitepu 1 ʻo ʻenau akó pea hiki ia ʻi he palakipoé. Ko ha founga ʻe taha, ʻe lava ke hiki ʻe he kau akó ʻa e fakatokangá ʻi ha laʻipepa pea fakapipiki takai ia ʻi he lokí. Fakaafeʻi e kau akó ke nau lau e ngaahi fakatokanga kuo tohi ʻe he niʻihi kehé. Hili iá ʻe lava ke fili ʻe he kalasí ha niʻihi ke aleaʻi fakaikiiki ange. Te ke lava ʻo kole ki he kau ako naʻa nau hiki ʻa e ngaahi fakatokanga kuo filí ke vahevahe ʻenau ngaahi tali ki he sitepu 2 pe 3 mei heʻenau akó.

ʻI he fakafanongo mo kau ʻa e kau akó ʻi he fealēleaʻakí, fakaafeʻi kinautolu ke fakakaukau ki honau ngaahi tūkunga mo e ngaahi fiemaʻu fakatāutahá. Poupouʻi kinautolu ke fakakaukau pe ʻoku ʻi ai ha ngaahi fakatokanga pe pōpoaki pau ʻa e ʻEikí maʻanautolu.

Ko e muimui ʻi he palōfitá

Fakakaukau ki he ngaahi fakakaukau mo e ngaahi ongo naʻe mei fakahā atu ʻe he Laumālie Māʻoniʻoní kiate koe ʻi he kotoa ʻo e lēsoní fekauʻaki mo e ʻEikí mo ʻEne kau palōfitá. Tānaki atu ha laine ʻe taha pe fakatouʻosi ʻo e ongo laine ko ʻení ki hoʻo tohinoa akó pea fakakakato ia ʻaki hoʻo ngaahi fakakaukaú pe ongó:

Ko ha meʻa ʻoku ou fakaʻamu ke manatuʻi fekauʻaki mo e ʻEikí mo ʻEne kau palōfitá ko e …

ʻOku ou loto ke muimui ʻi he palōfita ʻa e ʻEikí koeʻuhí …

Te ke lava ʻo fakaʻosi ʻaki hano fakaafeʻi ha kau ako ke vahevahe ʻa e meʻa naʻa nau tohí. Te ke lava foki ʻo vahevahe ha ngaahi ongo kuó ke maʻu fekauʻaki mo e ʻEikí mo ʻEne kau palōfitá ʻi hoʻo teuteu mo akoʻi ʻa e lēsoní.

Ako Ma‘uloto

Te ke ala tokoni ki he kau akó ke nau ako maʻuloto ʻa e fakamoʻoni fakataukei fakatokāteliné mo e kupuʻi lea fakafolofola mahuʻingá, lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻinga ki he ʻIsikieli 3:16–17 “Ko e palōfitá ko ha ʻleʻo [ia] ki he fale ʻo ʻIsilelí.’” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahí ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Ko e hā e meʻa ʻoku lava ke mamata ki ai ʻa e kau palōfitá?

Naʻe fakamatala ʻe Palesiteni Lāsolo M. Nalesoni ʻo pehē:

ʻOku vakai atu ʻa e kau palōfitá ki he meʻa ʻe hokó. ʻOku nau vakai ki he ngaahi fakatuʻutāmaki faingataʻa kuo tuku pe ʻe tuku mai ʻe he filí ʻi hotau halá. ʻOku tomuʻa ʻiloʻi foki ʻe he kau palōfitá ʻa e ngaahi meʻa fakaʻeiʻeiki ʻe malava mo e ngaahi faingamālie ʻoku fakatatali maʻanautolu ʻoku fakafanongo ʻi he loto-fakamātoato ke talangofuá. (“Tuʻu Ko ha Kau Nofotuʻi Moʻoni,” Ensign, Oct. 2016, 31; Liahona, ʻOkatopa 2016, 53)

Ko e hā ha ngaahi tāpuaki te tau lava ʻo maʻu ʻi heʻetau muimui ki he kau palōfita ʻa e ʻEikí?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

16:5

ʻI heʻeku moʻui fakatāutahá, kuó u ʻilo ʻi heʻeku ako ʻi he faʻa lotu e ngaahi lea ʻa e palōfita ʻo e ʻOtuá mo fakafenāpasi fakalelei hoku lotó ki heʻene ngaahi akonakí, ʻoku tupulaki maʻu ai pē ʻeku tui ki he ʻEiki ko Sīsū Kalaisí. Kapau te tau fili ke tuku ʻa e faleʻi ko ʻení ki he tafaʻakí mo pehē ʻoku tau ʻilo lahi ange, ʻe faingataʻa ke tau tui pea ʻe veiveiua leva ʻetau fakakaukau taʻengatá. ʻOku ou palōmesi atu ʻi hoʻo kei tukupā ko ia ke muimui ki he palōfitá, ʻe tupulaki hoʻo tui ki he Fakamoʻuí. (“Ko e Palōfita ʻa e ʻOtuá,” Liahona, Mē 2018, 26–27)

Naʻe vahevahe ʻe ʻEletā ʻAlani D. Haini ʻo e Kau Fitungofulú ʻo pehē:

11:22

ʻOku hohaʻa ha niʻihi koeʻuhí ko e ngaahi meʻa ʻoku hoko ʻi he māmaní ʻi he taimi ní. ʻI heʻetau hoko ko e fānau fuakava ʻa e ʻOtuá, ʻoku ʻikai fiemaʻu ia ke tau fekumi ki ha ngaahi meʻa ke ʻilo ai ʻa e meʻa ke fai ʻi he ngaahi taimi faingataʻa ko ʻení. ʻOku ʻikai fiemaʻu ia ke tau manavahē. ʻOku maʻu ʻi he ngaahi lea ʻa e palōfita moʻuí ʻa e tokāteline mo e ngaahi tefitoʻi moʻoni kuo pau ke tau muimui ai ke hao fakalaumālie mo kātekina fakatuʻasinó. (“Ko ha Palōfita Moʻui maʻá e Ngaahi ʻAho Kimui Ní,” Liahona, Mē 2023, 26)

Ngaahi ʻEkitivitī Fakalahi ki he Akó

Ako ha puipuituʻa lahi ange

Te ke lava ʻo fakaʻaongaʻi ʻeni ke tokoni ki he kau akó ke nau ako ha ngaahi fakaikiiki lahi ange fekauʻaki mo e ui ʻo ʻIsikieli ke hoko ko ha palōfitá:

Fakaafeʻi ha vaeua ʻo e kalasí ke lau ʻa e ʻIsikieli 2:3–5; 3:7, ʻo kumi e fakamatala ʻa e ʻEikí ki ʻIsilelí.
Fakaafeʻi e vaeua ʻe tahá ke lau ʻa e ʻIsikieli 2:6–7; 3:4, 10–11, ʻo kumi e faleʻi ʻa e ʻEikí kia ʻIsikielí.

Hili hono vahevahe ʻe he kau akó ʻa e meʻa ne nau maʻú, te mou lava ʻo aleaʻi ʻeni:

Ko e hā e meʻa naʻá ke ako fekauʻaki mo e ʻEikí? Fekauʻaki mo ʻEne kau palōfitá?

Ko hono fakaʻaongaʻi ʻo e meʻa ʻokú ke ako fekauʻaki mo e kau palōfitá

Makehe mei hono fakaʻosi e lēsoní ʻaki hono tokoniʻi e kau akó ke fakakaukau ki he mahino mo e ngaahi ongo ʻoku nau maʻu fekauʻaki mo e kau palōfita ʻa e ʻEikí, te ke lava ʻo fakaʻosi ʻaki ha founga ʻe tokoni ke nau fakaʻaongaʻi ai e meʻa ne nau akó. Ko e founga ʻe taha ke fakahoko ai ʻení ko hono fakaʻaliʻali ʻa e fakamatala ko ʻení:

Naʻe fakahaaʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá:

16:5

ʻE ʻi ai ha ʻaho he kahaʻú, te tau toe vakai mai ai ki heʻetau moʻui fakamatelié, pea te tau fiefia ne tau ʻaʻeva he māmaní ʻi ha kuonga ʻo e palōfita moʻuí. ʻOku ou lotua te tau lava ʻo lea he ʻaho ko iá ʻo pehē:

Naʻa mau fanongo kiate ia.

Naʻa mau tui kiate ia.

Naʻa mau ako ʻene ngaahi leá ʻi he faʻa kātaki mo e tui.

Ne mau lotua ia.

Ne mau poupouʻi ia.

Naʻa mau loto fakatōkilalo feʻunga ke muimui kiate ia.

Naʻa mau ʻofa ʻiate ia. (“Ko e Palōfita ʻa e ʻOtuá,” Liahona, Mē 2018, 27)

Fakaafeʻi e kau akó ke fili ha fakamatala ʻe taha pe lahi ange naʻe ʻamanaki ʻa ʻEletā ʻEnitaseni te tau lava ʻo lea ʻaki. Fakaafeʻi kinautolu ke hiki ʻi heʻenau tohinoa akó ha ngaahi fakaikiiki pau ʻo fakamatalaʻi e meʻa te nau fai kae lava ke moʻoni ʻa e ngaahi fakamatala ko iá ʻi he toenga ʻo ʻenau moʻuí.

Moʻui haʻisia ʻa e kau palōfitá

Hili hono aleaʻi ʻa e ʻIsikieli 3:16–17, fakaafeʻi e kau akó ke lau ʻa e ʻIsikieli 3:18–19 (vakai foki, ʻIsikieli 33:6–8), ʻo kumi e meʻa naʻe fakahā ʻe he ʻEikí kia ʻIsikieli fekauʻaki mo hono fatongia ke fakatokanga ki he kakaí.

Fakatatau ki he ngaahi veesi ko ʻení, ko e hā e ʻuhinga ʻoku vahevahe ai ʻe he kau palōfitá e ngaahi folofola ʻa e ʻEikí mo kitautolú?

Naʻe vahevahe ʻe Palesiteni Lāsolo M. Nalesoni ha niʻihi ʻo ʻene ngaahi ongo fekauʻaki mo e haʻisia ki he ʻEikí ko ʻEne palōfitá:

61:35

ʻOku ou teuteu he taimí ni ki ha ʻaho ʻe fiemaʻu ai ke u fai ha fakamatala … ki he ʻEikí fekauʻaki mo hoku lakanga fakatauhi ko e palōfita ʻa e ʻOtuá ʻi he māmaní he ʻahó ni. ʻOku ʻikai ke u loto ke ʻeke mai, “Misa Nelson, ko e hā naʻe ʻikai ke ke fakahā mahino ange ai ki he toʻu tupú honau tufakanga ʻi he tānaki fakataha ʻo ʻIsilelí? Ko e hā naʻe ʻikai ke ke tuʻu mālohi ai ʻi hono fakaafeʻi kinautolu ke nau kau maí?”

Ko ia ai, ʻoku ou fakaafeʻi ʻa e finemui mo e talavou kotoa pē ʻi he vahaʻa ʻo e taʻu 12 ki he 18 ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke mou kau mai ki he kau tau ʻa e ʻEikí ke tokoni ki hono tānaki fakataha ʻo ʻIsilelí. (“ʻAmanakiʻanga ʻo ʻIsilelí,” [fakataha lotu fakaemāmani lahi ʻa e toʻu tupú, 3 Sune 2018], Gospel Library)

Te ke lava foki ʻo fakahaaʻi ange ʻe lava ke fakamatalaʻi ʻe he haʻisia ko ʻení ʻa e ʻuhinga ʻoku tokanga taha ai ʻa e kau palōfitá ki he pōpoaki ʻoku finangalo ʻa e ʻEikí ke nau fakahokó kae ʻikai ko hono vahevahe ʻo e ngaahi meʻa te ne ʻai ke nau manakoá.

He ʻikai fai ha lau ki heʻetau ngaahi angahalá

Ke tokoni ke ʻiloʻi ʻe he kau akó ʻa e ngaahi tāpuaki ʻo e talangofua ki he ngaahi fakatokanga fakaepalōfita ke fakatomalá, fakaafeʻi kinautolu ke lau ʻa e ʻIsikieli 33:14–16.

Ko e hā e meʻa ʻoku tau ako fekauʻaki mo e tefitoʻi moʻoni ʻo e fakatomalá?

Te ke lava ʻo fakaafeʻi e kau akó ke fakafehokotaki pe fakafekauʻaki ʻa e ʻIsikieli 33:16 ki he ongo potufolofola fakataukei fakatokāteline ʻĪsaia 1:18 mo e Tokāteline mo e Ngaahi Fuakava 58:42–43. Tokoni ki he kau akó ke nau ʻiloʻi ko e taimi ʻoku tau fakatomala aí, ʻe fakamolemoleʻi kakato kitautolu ʻe he ʻEikí mei heʻetau ngaahi angahalá.

ʻE tākiekina fēfē nai ʻe he mahino ʻo e foʻi moʻoni ko ʻení hoʻo ngaahi ongo ki he Tamai Hēvaní mo Sīsū Kalaisí?