Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻIsikieli 47: Ngaahi Tāpuaki ʻo e Temipalé

“ʻIsikieli 47: Ngaahi Tāpuaki ʻo e Temipalé,” Fuakava Motuʻá – Tohi Lēsoni ʻa e Faiako Seminelí (2026)

“ʻIsikieli 47: Ngaahi Tāpuaki ʻo e Temipalé,” Fuakava Motuʻá – Tohi Lēsoni ʻa e Faiako Seminelí

ʻIsikieli 1–3; 33–34; 36–37; 47: Lēsoni 141

ʻIsikieli 47

Ngaahi Tāpuaki ʻo e Temipalé

ʻOku foaki mai ʻe he ʻEikí ha ngaahi tāpuaki lahi ʻo fakafou ʻi heʻetau moihū ʻi he temipalé. Naʻe mamata ʻa ʻIsikieli ʻi ha meʻa-hā-mai ki ha temipale ʻi ha kuonga kimui ange ʻa ia ʻe langa ʻi Selusalema. Naʻá Ne mamata ki ha vai naʻe tafe mei he temipale ko ʻení, ʻo fakamoʻui ʻa e fonua takatakaí mo ʻomi ʻa e moʻuí ki he Tahi Maté. ʻOku fakataipe ʻe he mata meʻa-hā-maí ʻa e ngaahi tāpuaki ʻoku foaki mai ʻe he ʻEikí kiate kitautolu ʻi heʻetau moihū kiate Ia ʻi Hono temipalé. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi lahi ange ke moihū ki he ʻOtuá ʻi he temipalé.

Teuteu ʻa e tokotaha akó: Fakakaukau ke ʻoange ki he kau akó ʻa e ngaahi fehuʻi ko ʻení pea fakaafeʻi kinautolu ke omi mateuteu ke vahevahe ʻenau ngaahi talí:

Ngaahi ʻEkitivitī Ako ʻOku Ala Fakahokó

Loto-holi ke moihū ʻi he temipalé

Kamata e lēsoní ʻi ha founga ʻe tokoni ki he kau akó ke fakakaukau ki heʻenau loto-holi ke ʻalu ʻo moihū ʻi he temipalé. Ke fai ʻení, te ke lava ʻo fakaʻaliʻali ha fakatātā ʻo ha temipale. Hili iá, hiki leva e tali ʻa e kau akó ki ha taha ʻo e ngaahi fehuʻi ko ʻení ʻi he tafaʻaki ʻe taha ʻo e temipalé pea mo ʻenau tali ki he fehuʻi ʻe tahá ʻi he tafaʻaki ʻe tahá.

Ko e hā ha ngaahi ʻuhinga ʻe ala fiemaʻu ai ʻe ha toʻu tupu ke ʻalu ʻo moihū ʻi he temipalé?
Ko e hā ha ngaahi ʻuhinga he ʻikai ke nau fie ʻalu ai ki he temipalé? Ko e hā ha meʻa te ne lava ʻo ʻai ke faingataʻa iá?

ʻE lava ke tokoni ʻa e ngaahi fehuʻi siviʻi fakaekitá ke ʻiloʻi ai ʻe he kau akó ha ngaahi faingamālie ki he tupulaki mo e ako fakatāutahá. Fakaafeʻi e kau akó ke nau fakaʻaongaʻi ha kiʻi taimi ke fakalaulauloto ki he ngaahi fehuʻi ko ʻeni fekauʻaki mo kinautolú.
ʻOku mālohi fēfē hoʻo loto-holi ke moihū ʻi he temipalé? Ko e hā hono ʻuhingá?
Ko e hā ha meʻa te ne ala taʻofi koe mei hoʻo fie ʻalu ki he temipalé?

ʻI hoʻo ako ʻa e ʻIsikielí he ʻaho ní, fekumi ki he tokoni ʻa e ʻEikí ke fakatupulaki hoʻo loto-holi ke ʻalu ʻo moihū ʻi he temipalé.

Mata meʻa-hā-mai ʻa ʻIsikieli ki he temipalé

Fakatokangaʻi ange: Ke tokoni ke ongoʻi ʻe he kau akó e ʻofa ʻa e ʻEikí, ʻoku mahuʻinga ʻi he lēsoni ko ʻení ke ʻuhinga ki he ngaahi tāpuaki ʻoku maʻu mei he ʻEikí ʻo fakafou ʻi he temipalé, kae ʻikai mei he temipalé ʻataʻatā pē.

Naʻe mamata ʻa ʻIsikieli ʻi he ʻIsikieli 47, ki ha meʻa-hā-mai ʻe lava ke ne fakataipe ʻa e ngaahi tāpuaki ʻoku foaki ʻe he ʻEikí kiate kinautolu kotoa ʻoku nau fakahoko ʻa e ngāue fakatemipalé mo e hisitōlia fakafāmilí. Naʻe kamata ʻaki hano ʻomi ʻe ha talafekau fakalangi ʻa ʻIsikieli ki he matapā ʻo e temipale ʻi Selusalemá.

Lau ʻa e ʻIsikieli 47:1, ʻo kumi e meʻa naʻe mamata ki ai ʻa ʻIsikieli ʻoku haʻu mei he temipalé.

ʻE hoko fēfē nai ʻa e vaí ko ha fakaʻilonga feʻunga ki he ngaahi tāpuaki ʻa e ʻEikí?

ʻE ala kau ʻi he ngaahi talí ʻa e foaki ʻe he vaí ʻa e moʻuí, ʻoku fiemaʻu ia ʻe he tokotaha kotoa pē, ʻoku fakamaʻa, pea ʻoku ʻatā ia ki he taha kotoa. Lolotonga e ngāue fakafaifekau ʻa e Fakamoʻuí ʻi he māmaní, naʻá Ne fakafehoanaki Ia mo e ngaahi tāpuaki ʻokú Ne foakí ki ha vai moʻui (vakai, Sione 4:10; 7:37–39).

Mahalo ʻe ʻaonga ʻi he ʻekitivitī ko ʻení ke fakamatalaʻi ange ko e kiupité ko ha ʻiuniti fua ia, mei he tuiʻi nimá ki he ngataʻanga ʻo e louhiʻi nimá, meimei ʻinisi ʻe 18 ki he 21 pe senitimita ʻe 45 ki he 53.

Lau ʻa e ʻIsikieli 47:2–5, ʻo kumi e founga naʻe loloto ai ʻa e vaí ʻi heʻene tafe ki tuʻa mei he temipalé.

Koeʻuhí ʻoku fuʻu ʻilonga e akonaki ʻa e ʻEikí ʻi he talanoa ko ʻení, ʻe ala tokoni ke tā fakatātaaʻi ʻa e meʻa ʻoku tau akó. Tā ʻi he konga ki ʻolunga ʻo ha peesi ʻi hoʻo tohinoa akó ha fakatātā faingofua ʻo ha temipale pea ʻoku haʻu mei ai ʻa e vaí. (Te ke tā ha konga lahi ange ʻo e feituʻu ʻoku tafe ki ai ʻa e vaí ʻi he konga ki laló ʻamui ange.)

ʻOkú ke pehē ko e hā e meʻa naʻe akoʻi ʻe he ʻEikí ʻi he mata meʻa-hā-mai ko ʻení fekauʻaki mo e ngaahi tāpuaki ʻokú Ne foaki ʻo fakafou ʻi he temipalé?

Fehuʻi ki he kau akó:

Kapau te ke tā ha meʻa ʻi hoʻo fakatātaá ke fakataipe ʻa e feituʻu ʻoku ʻikai moʻui pe maʻu ai ha meʻá, ko e hā ʻa e meʻa ko iá, pea ko e hā hono ʻuhingá?

Kapau naʻe fai ʻa e fehuʻi tatau kiate kinautolu ʻi Selusalema ʻi he kuonga ʻo ʻIsikielí, ʻe ngalingali ko e talí ko e toafa ʻo Siuteá pe ko e Tahi Maté. ʻOku maʻu ʻe he Tahi Maté ʻa hono hingoá koeʻuhí ko e ʻikai lava ke moʻui ai ha meʻa moʻui pe ʻakaú. ʻOku vai māsima foki pea ʻoku ʻikai lava ke inu ia. Kapau ʻe ʻaonga, fakaʻaliʻali pe fakahinohino e kau akó ki he fakatātā “Toafa ʻo Siuteá” (Ngaahi Tā ʻi he Tohi Tapú, fika 3) ʻi he Ngaahi Tokoni [ki he] Akó ʻi he Gospel Library ke vakai ki he feituʻu maomaonganoa ʻi he veʻe Tahi Maté. Te nau lava foki ʻo vakai ki he “Mape ʻo e Fonua Tapú” (Ngaahi Mape ʻo e Tohi Tapú, fika 1) pea kumi ʻa e Toafa ʻo Siuteá mo e Tahi Maté.

Lau ʻa e ʻIsikieli 47:8–9, 12, ʻo kumi e meʻa ʻe hoko ki he meʻa kotoa pē naʻe aʻu ki ai ʻa e vai mei he temipalé, kau ai ʻa e Tahi Maté.

Te ke fakamatalaʻi fakanounou fēfē ʻa e meʻa naʻá ke ako mei he meʻa-hā-mai ʻa ʻIsikielí?

Fakaloloto ʻa e mahino ʻokú ke maʻú

Lau ʻa e laʻipepa tufa “Ngaahi Tāpuaki ʻo e Temipalé” pea laineʻi pe siakaleʻi ha faʻahinga tāpuaki pē ʻoku makehe kiate koe.

ʻI heʻenau ʻū fakatātaá, ʻe lava ke hiki ʻe he kau akó ʻa e ngaahi tāpuaki ko ʻení ʻi he vai ʻoku tafe mei he temipalé. Te nau lava foki ʻo tānaki atu mo ha toe ngaahi tāpuaki te nau lava ʻo fakakaukau ki ai ʻoku foaki mai ʻe he ʻEikí ʻo fakafou ʻi he temipalé.

Fakakaukau ke fakaafeʻi e kau akó ke vahevahe ʻenau ʻū fakatātaá pe ngaahi tāpuaki kuo tohí mo ha hoa pe kulupu tokosiʻi. Pe ko hoʻo tā ʻa e vaitafé ʻi he palakipoé pea kole ki he kau akó ke hiki ai ʻa e ngaahi tāpuaki naʻa nau fakakaukau ki aí. Hili iá ʻe lava ke tānaki atu ʻe he kau akó ki heʻenau tā fakatātaá ha ngaahi tāpuaki te nau loto ke manatuʻi mei he meʻa naʻe vahevahe ʻe he niʻihi kehé.

Ko e hā ha ngaahi tāpuaki naʻe makehe kiate koe?

Fakaafe‘i ʻa e kau akó ke fakakaukau ki ha tali ki he ngaahi fehuʻi ko ‘ení ʻi ha kiʻi taimi siʻi kimuʻa peá ke fehuʻi angé. ʻI heʻenau vahevahé, te ke lava ʻo fai ha ngaahi fehuʻi hangē ko ʻení: “Ko e hā e ʻuhinga ʻoku mahuʻingamālie ai ia kiate koé?” “Kuo aʻusia nai ʻe ha taha kehe ha meʻa tatau?” mo e “Ko e hā ha meʻa ʻokú ke fie tānaki ki he meʻa kuo vahevahé?”

Kapau ʻoku nofo ʻa e kau akó ʻi ha feituʻu ʻoku teʻeki ō ai ha tokolahi ki he temipalé koeʻuhí ko e mamaʻó, pea ʻikai ke nau ʻilo ha kakai tokolahi kuo nau ō ki he temipalé, fakakaukau ke liliu ʻa e fehuʻi hono uá ke fehuʻi fekauʻaki mo e ngaahi tāpuaki kuo aʻusia ʻe he kau akó pe niʻihi kehé ʻi heʻenau teuteu ke moihū ʻi he temipalé.
ʻE founga fēfē nai hano fakahoko ʻe ha taha ʻo e ngaahi tāpuaki naʻá ke ʻiló ha fakamoʻui pe foaki moʻui?
Ko e fē ha taimi kuó ke aʻusia ai pe ko kinautolu ʻokú ke ʻiló ha taha ʻo e ngaahi tāpuaki ko ʻeni mei he ʻEikí ʻo fakafou ʻi he moihū ʻi he temipalé?

Ongo ʻokú ke maʻu fekauʻaki mo e temipalé

Ke fakaʻosi e lēsoní, fakakaukau ke kumi ha feituʻu ʻi hoʻo fakatātaá pe ʻi hoʻo tohinoa akó ke hiki ai hoʻo ngaahi ongo fekauʻaki mo e ʻalu ʻo moihū ʻi he temipalé pea mo hono maʻu e ngaahi tāpuaki ʻa e ʻEikí. Fekumi ki he tokoni ʻa e Laumālie Māʻoniʻoní ke lelei mo tonu hono hiki hoʻo ngaahi ongó.

Fakakaukau ke fakaafeʻi ha kau ako pē ʻoku nau fie vahevahe ʻenau ngaahi fakakaukaú mo e fakamoʻoní. Fakakaukau ke vahevahe foki mo hoʻo ngaahi fakakaukaú.

Ngaahi Maʻuʻanga Tokoni Kehé

Ko e fē ha feituʻu te u lava ʻo ʻilo lahi ange ai fekauʻaki mo e ngaahi temipalé pea mo e ngaahi tāpuaki ʻoku foaki mai ʻe he ʻEikí ʻo fakafou ʻi Hono ngaahi temipalé?

Ke ako lahi angé, vakai ki he uepisaiti ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní maʻá e ngaahi temipalé: https://folky.shop/temples

Ko e ngaahi fakamatala ʻi he Ngaahi Tefito ʻo e Ongoongoleleí fekauʻaki mo e ngaahi temipalé: https://folky.shop/study/manual/gospel-topics/temples

Thomas S. Monson, “Ngaahi Tāpuaki ʻo e Temipalé,” Liahona, ʻOkatopa 2010, 12–19

ʻOku fehokotaki fēfē ʻa e ngaahi temipalé mo e ʻEikí?

Naʻe akonaki ʻa Palesiteni Lāsolo M. Nalesoni ʻo pehē:

Ko e temipalé ko e fale ia ʻo e ʻEikí. Ko e makatuʻunga ki he ouau mo e fuakava fakatemipale kotoa pē—ʻa e uho ʻo e palani ʻo e fakamoʻuí—ko e Fakalelei ʻa Sīsū Kalaisí. ʻOku tuhu ʻa e ʻekitivitī, lēsoni, mo e meʻa kotoa pē ʻoku tau fai ʻi he Siasí, ki he ʻEikí mo Hono fale māʻoniʻoní. (“Personal Preparation for Temple Blessings,” Ensign, May 2001, 32).

Ngaahi ʻEkitivitī Fakalahi ki he Akó

Ko ha founga ‘e taha ke kamata ‘aki e lēsoní

Kapau ʻokú ke ongoʻi ʻe ʻaonga ki he kau akó, fakakaukau ke mou kamata ʻaki e ʻekitivitī ko ʻení:

Fakakaukauloto ʻoku fakaafeʻi koe ʻe hoʻo palesiteni fakasiteikí ke ke kau ʻi ha kōmiti makehe ʻa e toʻu tupu ʻi ho siteikí. ʻOkú ne hohaʻa ʻoku ʻi ai ha toʻu tupu ʻi homou siteikí ʻoku ʻikai ke nau fie ʻalu ki he temipalé pea ʻoku ʻikai ke nau palani ke fai mo ha toe ngaahi fuakava kehe ʻi he temipalé ʻamui ange. ʻOkú Ne fakaafeʻi koe ke mou alēlea ki he ngaahi meʻá ni:

Ko e hā e ʻuhinga ka ʻikai fie ʻalu ai ha toʻu tupu ʻe niʻihi ki he temipalé?

ʻOku fakaafeʻi koe ʻe hoʻo palesiteni fakasiteikí ke ke manatuʻi maʻu pē ʻa e ngaahi ʻuhingá ni ʻi hoʻo fai ʻa e ngaahi meʻa ko ʻení:

Ako e ngaahi tāpuaki kehekehe ʻoku foaki mai ʻe he ʻEikí ʻo fakafou ʻi he temipalé.
Faʻu ha kiʻi pousitā ke tokoni ki he toʻu tupú ke nau fie ō ki he temipalé. ʻE lava ke ʻoange ʻe he palesiteni fakasiteikí ha tatau ʻo e pousitā ko ʻení ki he toʻu tupu kotoa ʻi he siteikí ʻi ha fakataha lotu makehe.

ʻE lava ke hoko ʻa e tā fakatātā ʻo e kau akó ʻi he lēsoní ko ha pousitā, pe te nau lava ʻo fokotuʻutuʻu ha fakatātā kehe ʻi he fakaʻosinga ʻo e lēsoní.

Ko hono fakahoko mo tauhi ʻo e ngaahi fuakavá

Kapau ʻokú ke ongoʻi ʻe ʻaonga ke tukutaha e tokangá ʻi he fiemaʻu ke tauhi e ngaahi fuakavá ke teuteuʻi ai kitautolu ki he temipalé, fakaʻaliʻali ki he kau akó ha fakatātā ʻo ha temipale.

Ko e hā e ʻuhinga ʻoku toputapu pe māʻoniʻoni ai ʻa e ngaahi temipalé?

Lau ʻa e ʻIsikieli 44:5–9, ʻo kumi pe ko hai naʻe folofola ʻa e ʻEikí ʻe lava mo ʻikai lava ʻo hū ki he temipale māʻoniʻoní. Fakamatalaʻi ange ʻoku ʻuhinga ʻa e kupuʻi lea “taha muli, pe ha taʻekamu ʻi loto, pe ha taʻekamu fakakakano” ʻi he veesi 9 ki he niʻihi naʻe ʻikai ko ha kau ʻIsileli naʻe teʻeki ai ke nau fai ha ngaahi fuakava ke muimui ki he ʻEikí.

Makatuʻunga ʻi he ngaahi veesi ko ʻení, ko e hā ha tefitoʻi moʻoni te tau lava ʻo ako fekauʻaki mo e kakai ʻe lava ʻo hū ki he fale ʻo e ʻEikí? (Mahalo ʻe fakaʻaongaʻi ʻe he kau akó ha ngaahi lea kehe, kae fakapapauʻi ʻoku mahino kapau te tau fakahoko mo tauhi e ngaahi fuakava mo e ʻEikí, te Ne fakaʻatā kitautolu ke hū ki Hono fale māʻoniʻoní.)
ʻOkú ke pehē ko e hā e ʻuhinga kuo pau ke tau aʻusia ai e ngaahi tuʻunga moʻui ʻa e ʻEikí kimuʻa pea tau toki hū ki Hono falé?

Kole ki he kau akó ke nau toe vakaiʻi e ngaahi fehuʻi lekomeni temipalé, ʻo kumi e ngaahi tuʻunga moʻui ʻoku fiemaʻu ke tau moʻui taau ai ke moihū ʻi he temipalé. Fakaafeʻi kinautolu ke ʻeke ha faʻahinga fehuʻi pē ʻoku nau maʻu. Kole ange ke nau vahevahe ʻa e ongo ʻoku nau maʻu ʻi heʻenau moʻui ʻo fakatatau mo e ngaahi tuʻunga moʻui ko ʻení te ne teuteuʻi kitautolu ke tau fai ha ngaahi fuakava lahi ange mo e ʻEikí ʻi he temipalé.