Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻIsikieli 34: “Te Ne Tauhi Kiate Kinautolu”

“ʻIsikieli 34: ‘Te Ne Tauhi Kiate Kinautolu,’” Fuakava Motuʻá – Tohi Lēsoni ʻa e Faiako Seminelí (2026)

“ʻIsikieli 34: ‘Te Ne Tauhi Kiate Kinautolu,’” Fuakava Motuʻá – Tohi Lēsoni ʻa e Faiako Seminelí

ʻIsikieli 1–3; 33–34; 36–37; 47: Lēsoni 139

ʻIsikieli 34

“Te Ne Tauhi Kiate Kinautolu”

Jesus Christ depicted as the Good Shepherd. Christ is portrayed with a small herd of sheep. He is carrying a sheep (or lamb) over His shoulders. Christ is also carrying a staff in His hands.

ʻOku tau ongoʻi hē, loto-mamahi, puke, pe faingataʻaʻia kotoa ʻi he taimi ʻe niʻihi. Naʻe fekauʻi mai ʻe he Tamai Hēvaní ʻa Sīsū Kalaisi ke “nonoʻo ʻa ia naʻe mafesí” mo “fakamālohia ʻa ia naʻe vaivaí” (ʻIsikieli 34:16). ʻI he ʻIsikieli 34, ʻoku fakatatau ai ʻe he palōfita ko ʻIsikielí ʻa e founga ʻoku tokangaʻi ai ʻe ha tauhisipi lelei ʻene tākangá ki he founga ʻoku tokanga ai ʻa Sīsū Kalaisi ki he fānau ʻa e Tamai Hēvaní. ʻE lava ke tokoni e lēsoni ko ʻení ke muimui ʻa e kau akó ʻi he sīpinga ʻa e Fakamoʻuí ke fekumi mo tauhi ʻa e niʻihi kehé.

Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi founga ʻoku hoko ai ʻa e “Tauhi [Sipi] Leleí” (Sione 10:11, 14) ko ha huafa feʻunga maʻa Sīsū Kalaisi. Te nau lava ʻo fakalaulauloto ki he founga ʻoku tokoniʻi ai kinautolu ʻe he huafa ko ʻeni ʻo e Fakamoʻuí ke mahino ʻEne ʻofá mo e hōifua ke tokangaʻi e fānau ʻa e Tamai Hēvaní.

Ngaahi ʻEkitivitī Ako ʻOku Ala Fakahokó

Ko ha fakataipe maʻá e Fakamoʻuí

ʻI ha ʻaʻahi ʻa ʻEletā Sione R. Lasata ʻo e Kau Fitungofulú ki Molokó, naʻá ne ako ai fekauʻaki mo e ʻofa ʻa Sīsū Kalaisi ki he fānau ʻa e Tamai Hēvaní ʻi he taimi naʻe tuiʻi ai ha sipi ʻe ha kā fakatuʻi, ʻo maʻu ai ʻe he tauhisipí ha fuʻu totongi lahi. Naʻe pehē ʻe he fakatonulea ʻa ʻEletā Lasataá ne ʻikai tali ʻe he tauhisipí ʻa e paʻangá. Naʻe vahevahe leva ʻe ʻEletā Lasata ʻa e meʻa naʻe hokó:

ʻI heʻeku ʻohovalé, naʻá ku fehuʻi ange pe ko e hā hono ʻuhingá. Naʻá ne pehē, “Koeʻuhí ko ʻene ʻofa ʻi heʻene fanga sipí takitaha.” Ko e taimi ia ne u fakatokangaʻi ai e ala hifo ʻa e tauhisipi toulekeleká, hiki hake ʻa e lami naʻe laveá ki hono nimá, pea faʻo ia ʻi ha kato lahi ʻi muʻa ʻi hono pulupulú. Naʻá ne toutou milimilihi pē ʻulu ʻo e lamí, mo toutou lea ʻaki ʻa e foʻi lea tatau. ʻI heʻeku fehuʻi ange pe ko e hā e ʻuhinga ʻo e foʻi leá, naʻe fakahā mai kiate au, “ʻOkú ne ui ia ʻaki hono hingoá. ʻOku fakahingoa kotoa ʻene fanga sipí, he ko honau tauhí ia, pea ʻoku ʻiloʻi ʻe he tauhisipi leleí ʻa ʻene fanga sipí takitaha ʻaki honau hingoá.” (“Shepherds of Israel,” Ensign, May 1988, 74)

Ko e hā ha meʻa te ke lava ʻo ako fekauʻaki mo Sīsū Kalaisi mei he ngaahi ngāue ʻa e tauhisipí?

ʻI hoʻo ako ʻi he ʻaho ní, fekumi ki he tokoni ʻa e Laumālie Māʻoniʻoní ke ako ʻa e founga te tau lava ai ʻo muimui ki he sīpinga ʻa Sīsū Kalaisí ke tokangaʻi e fānau ʻa e Tamai Hēvaní.

Kau Tauhisipí

Naʻe fakafehoanaki ʻe he ʻEikí ʻi he ʻIsikieli 34, ʻa e kau taki ʻo ʻIsilelí ki he kau tauhisipi naʻe ʻikai ke nau tokangaʻi ʻenau tākangá. Lau ʻa e ʻIsikieli 34:1–6, ʻo fakaʻilongaʻi ʻa e ngaahi kupuʻi lea naʻe fakaʻaongaʻi ʻe he ʻEikí ke fakamatalaʻi ʻaki ʻa e kau taki ʻIsilelí.

Ko e hā e meʻa ʻokú ke ako fekauʻaki mo e ʻEikí mei he ngaahi meʻa naʻá Ne tokanga ki ai ʻi he ngaahi veesi ko ʻení?

Ke tokoni ki he kau taki ʻo ʻIsilelí ke tokangaʻi lelei ange ʻenau tākangá, naʻe fakamatalaʻi ʻe Sīsū Kalaisi ʻa e founga ʻokú Ne tokanga ai ki Heʻene tākangá (vakai, Sione 10:11, 14, ʻa ia ʻoku fakamatalaʻi foki ai ʻe Sīsū Ia ko e “Tauhi Leleí”).

Fakakaukau ke fakaʻaliʻali ha fakatātā ʻo Sīsū Kalaisi ko ha tauhisipi, ʻo hangē ko e fakatātā ʻi he kamataʻanga ʻo e lēsoni ko ʻení. ʻI he tafaʻaki toʻohema ʻo e fakatātaá, fakakaukau ke tohiʻi ʻa e “ʻI he hoko ʻa e Fakamoʻuí ko e Tauhisipi Leleí, ʻokú Ne …” ʻE lava ke fakamatalaʻi fakanounou ʻe he kau akó ʻa e meʻa ʻoku nau fakaʻilongaʻi ʻi he ʻIsikieli 34:11–16 ʻi lalo ʻi he ʻuluʻi tohi ko ʻení.

Lau ʻa e ʻIsikieli 34:11–16, ʻo fakaʻilongaʻi ʻa e ngaahi kupuʻi lea ʻoku nau fakamatalaʻi ʻa e meʻa ʻoku fai ʻe Sīsū Kalaisi maʻá e fānau ʻa e Tamai Hēvaní.

ʻE lava ke kau ʻi he ngaahi fakamatala fakanounou ʻoku ʻomi ʻe he kau akó mei he ngaahi vēsí ʻa e:

Fekumi kiate kinautolu ʻoku heé (veesi 11–12, 16)
Fakahaofi ʻa kinautolu mei he fakapoʻulí (veesi 12)
Fafanga kinautolu mo tokonaki maʻa ʻenau ngaahi fiemaʻú (veesi 13–15)
Nonoʻo ʻa ia naʻe mafesí (veesi 16)
Fakamālohia ʻa ia naʻe vaivaí (veesi 16)

Te ke lava ʻo fakaafeʻi e kau akó ke vahevahe ha ngaahi talanoa mei he folofolá ki he founga naʻe fakahoko ai ʻe he Fakamoʻuí ha niʻihi ʻo e ngaahi ngāue ko ʻení ki he fānau ʻa e Tamai Hēvaní.

Ke tokoni ke fakakaukau e kau akó ki heʻenau ngaahi feinga ke muimui ki he sīpinga ʻa e Fakamoʻuí ke tokangaʻi e niʻihi kehé, fakakaukau ke fakaʻaliʻali ʻa e sivi-fakaekita ko ʻení.

Fakafehoanaki ʻa e meʻa kuó ke fakaʻilongaʻi ʻi he ongo seti veesi kuó ke ako ʻi he ʻIsikieli 34, pea fakalaulauloto leva ki he founga te ke tali ʻaki ʻa e ngaahi fehuʻi ko ʻení:

Ko e hā ha ngaahi founga ʻokú ke ongoʻi ʻokú ke hangē ai ko e Fakamoʻuí?
ʻOku ʻi ai nai ha ngaahi founga te ke lava ai ʻo hangē ko e kau tauhisipi ʻi ʻIsilelí?
Ko e hā ha ngaahi fakafeʻātungia ʻokú ke fehangahangai mo ia ʻi hono tokangaʻi ʻo e niʻihi kehé ʻo hangē ko e Fakamoʻuí?

Ko hono tokangaʻi ʻEne fanga sipí

Fakakaukau ke hiki ʻa e “Te u lava ʻo muimui ki he sīpinga ʻa e Fakamoʻuí ʻaki ʻa e …” ʻi he tafaʻaki toʻomataʻu ʻo e fakatātā ʻo e Fakamoʻuí. Vahevahe ʻa e kau akó ki ha fanga kiʻi kulupu iiki pea ʻoange ʻa e fakahinohino ko ʻení.

Fakaʻaongaʻi e meʻa naʻá ke maʻu ʻi he ʻIsikieli 34:11–16, ke hiki ha lisi ʻo e ngaahi founga ʻe lava ke tokangaʻi ai ʻe he toʻu tupú e niʻihi kehé ʻo hangē ko ia ʻoku fai ʻe he Fakamoʻuí.

Ko ha ngaahi fakakaukau ʻeni ʻe lava ke maʻu ʻe he kau akó:

ʻAʻahi ki ha taha kuo fuoloa ʻenau taʻefesiofakí (“Te u hakule ʻa ʻeku fanga sipí, mo kumi ki ai” [ʻIsikieli 34:11])
Fakaʻaongaʻi lelei honau taimí pe maʻuʻanga tokoní (“Te u fafanga ʻa ʻeku fanga sipí” [ʻIsikieli 34:15])
Fakaafeʻi ha taha ke kau mo koe ki ha ʻekitivitī (“Te u toe ʻomi ʻa ia naʻe fakaheeʻi atú” [ʻIsikieli 34:16])
ʻIloʻi e ngaahi fiemaʻu fakatuʻasino pe fakaeloto ʻa e niʻihi kehé (“Te u nonoʻo ʻa ia naʻe mafesí, pea te u fakamālohia ʻa ia naʻe vaivaí” [ʻIsikieli 34:16])

Hili hono faʻu fakakulupu e lisi ko ʻení, mahalo te ke fiemaʻu ke lisi ʻe he kulupu takitaha ha taha ʻo ʻenau ngaahi fakakaukaú ʻi he palakipoé. Hili hono hiki ha ngaahi fakakaukau ʻi he palakipoé, ʻe ala tokoni ke aleaʻi ʻe he kau akó ʻa e ngaahi fehuʻi ko ʻení:

Ko e hā ha meʻa te ne lava ʻo ʻai ke faingataʻa hono fai ʻo e ngaahi meʻá ni?
‘E ala tokoniʻi fēfeeʻi koe ʻe he Fakamoʻuí ke ke ikunaʻi e ngaahi faingataʻa ko ʻení?

Fakakaukau ke fakaʻaliʻali e ngaahi fehuʻi ko ʻení pea fakaafeʻi e kau akó ke fili ha fehuʻi ʻe taha pe lahi ange ke tali. ʻI he fakakaukau ʻa e kau akó ki he ngaahi aʻusia fakatāutahá, ʻe lava ke tokoniʻi kinautolu ʻe he Laumālie Māʻoniʻoní ke nau ongoʻi ʻa e moʻoni mo e mahuʻinga ʻo e meʻa ʻoku nau akó.
Kuo tāpuekina fēfē koe pe ko hoʻo fāmilí ʻe he Fakamoʻuí ʻaki hono fekauʻi atu ha taha ke fekumi mo tokangaʻi koe?
Kuo fakaʻaongaʻi fēfē koe pe ko hoʻo fāmilí ʻe he Fakamoʻuí ke kumi mo tokangaʻi e niʻihi kehé?

Faʻu ha palani

ʻE lava ke tokoni hono faʻu ha palani ʻi he kalasí ke ngāueʻi ʻa e meʻa kuo nau akó ke fakaloloto ai e ului ʻa e kau akó kia Sīsū Kalaisí.

Fakaʻaongaʻi ha kiʻi taimi ke ke fakakaukau ai ki he kakai ʻi hoʻo moʻuí ʻoku nau hangē ko e fanga sipí (hē, fakamoveteveteʻi, loto-mamahi, vaivai) ʻi he ʻIsikieli 34. Mahalo ko ha kakai ʻeni ʻi hoʻo kalasí pe kōlomú, fāmilí mo e kaungāmeʻá, pe kakai ʻi he akó. Fekumi ki he tokoni ʻa e Laumālie Māʻoniʻoní ʻi hono fakakaukauʻi pe ko hai te ne fiemaʻu hoʻo tokoní.

Mei he ngaahi fakakaukau kuo tau aleaʻí, pe ko ha meʻa kehe ʻokú ke ongoʻi ʻoku ueʻi koe ke ke fai, tohi ʻa e founga te ke lava ai ʻo muimui ʻi he sīpinga ʻa e Fakamoʻuí ke fekumi mo tokangaʻi ʻa e tokotaha ko ʻení.

Ke fakamanatu kiate koe hoʻo palaní, te ke lava ʻo hiki ia ʻi ha laʻipepa pe ʻai ia ko ha fakamanatu ʻi hoʻo telefoní.

Mahalo te ke fie palani ke fakaʻaongaʻi ha ngaahi miniti siʻi ʻi ha lēsoni he kahaʻú ke muimuiʻi mo e kau akó ʻenau ngaahi palaní pea vakaiʻi ʻenau fakalakalaká. Ke fakaʻosí, te ke lava ʻo vahevahe ʻa e founga kuo tokangaʻi ai koe ʻe ha taha pe ko e founga kuó ke tokangaekina ai e niʻihi kehé ʻo hangē ko ia ko e founga ʻoku fakahoko ʻe he Fakamoʻuí.

Ngaahi Maʻuʻanga Tokoni Kehé

Naʻe tokangaʻi fēfē ʻe he Fakamoʻuí ʻa e niʻihi kehé?

Naʻe akoʻi ʻe Sisitā Sini B. Pingihami, ko e Palesiteni Lahi mālōlō ʻo e Fineʻofá, ‘o pehē:

13:4

ʻOku tau faʻa fakakaukau he taimi ʻe niʻihi kuo pau ke tau fai ha meʻa lahi mo maʻongoʻonga kae toki “lau” ia ko ha tokoni ki hotau kaungāʻapí. Ka ʻoku lava e fanga kiʻi ngāue tokoni faingofuá ʻo hoko ko ha ivi tākiekina mālohi ki he niʻihi kehé—pea mo kitautolu foki. Ko e hā naʻe fai ʻe he Fakamoʻuí? ʻI Heʻene ongo meʻafoaki fakalangi ko e Fakaleleí mo e Toetuʻú … “kuo teʻeki ke ʻi ai ha taha kuo ʻi ai hano mālohi pehē ʻiate kinautolu kotoa kuo moʻuí, pe ʻe moʻui he funga ʻo māmaní” (Ko e Kalaisi Moʻuí: Ko e Fakamo‘oni ‘a e Kau ʻAposetoló). Ka naʻá Ne fofonga malimali foki, talanoa, lue, fanongo, tuku taimi, fakalotolahi, akoʻi, fafangaʻi, mo faʻa fakamolemole. Naʻá Ne tokoniʻi e fāmilí mo e ngaahi kaungāmeʻá, kaungāʻapí pea pehē ki he solá foki, pea naʻá Ne fakaafeʻi e ngaahi mahení mo kinautolu ne ʻofa aí ke nau fiefia ʻi he ngaahi tāpuaki fungani ʻo ʻEne ongoongoleleí. Naʻe ʻomi ʻe he ʻofa mo e fanga kiʻi ngāue tokoni “faingofua” ko iá ha sīpinga ki heʻetau ngāue fakaetauhi he ʻaho ní. (“Ngāue Fakaetauhi ʻo Hangē ko e Fakamoʻuí,” Liahona, Mē 2018, 104)

Te tau lava fēfē ʻo muimui ʻi he tā sīpinga ʻa e Fakamoʻuí ke tokoniʻi e niʻihi kehé?

Naʻe akoʻi ʻe Sisitā Poni H. Kōtoni ko e Palesiteni Lahi mālōlō ʻo e Kau Finemuí:

12:30

Mahalo ʻoku mamahi ʻetau fanga sipí, mole, pe hē ʻi heʻenau loto pē ki ai; ka ʻi heʻetau hoko ko honau tauhisipí, te tau lava ʻo kau [ʻi he niʻihi] ʻe fuofua fakatokangaʻi ʻenau fiemaʻú. Te tau lava ʻo fakafanongo mo ʻofa ʻo ʻikai fakaangaʻi pea ʻoange ha ʻamanaki pea mo ha tokoni ʻi he fakahinohino ʻilo pau ʻa e Laumālie Māʻoniʻoní.

Kāinga, ʻoku fonu ange ʻa e māmaní ʻi he ʻamanaki leleí mo e fiefiá koeʻuhí ko e ngaahi ngāue fakalaumālie ʻo e angaʻofa ʻoku mou faí. ʻE ʻā homou fofongá, ʻi hoʻomou fekumi ki he fakahinohino ʻa e ʻEikí ʻi he founga ke fakahoko ai ʻEne ʻofá mo fakatokangaʻi e ngaahi fiemaʻu ʻa kinautolu ʻoku mou ngāue fakaetauhi ki aí. (“Ko e Hoko ko ha Tauhisipí,” Liahona, Nōvema 2018, 76)

Naʻe vahevahe ʻe ʻEletā Kēliti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá:

15:19

ʻOku ʻomi ʻe he “[Tauhisipi] ʻo ʻIsilelí” (Saame 80:1), ʻa Sīsū Kalaisi, ha sīpinga ki he anga ʻo e ngāue fakaetauhi ʻa e kau tauhisipi ʻo ʻIsilelí ʻi he ʻofá. … ʻOku talaʻofa mai ʻa e ʻEikí ko e taimi ko ia ʻe fafanga ai ʻe Heʻene kau tauhisipí ʻEne fanga lamí mo e sipí, ko kinautolu ko ia ʻi Heʻene lotoʻaá he ʻikai “te nau toe manavahē, pe vaivai, pea ʻe ʻikai te nau masiva” (Selemaia 23:4).

ʻOku fakatokanga mai hotau Tauhisipi Leleí ko e kau tauhisipi ʻo ʻIsilelí kuo pau ke ʻoua naʻa nau tulemohe, pe movetevete pe fakatupunga ha hē ʻa e fanga sipí, pe feinga pē ke maʻu haʻane meʻa. Ko e fatongia ʻo e kau tauhisipi ʻa e ʻOtuá ke fakamālohia, fakamoʻui, fakaleleiʻi ʻa ia ʻoku maumaú, kumi mai ʻa ia naʻe heé, mo ia naʻe molé. (“Tauhi Sipi Leleí, Lami ʻa e ʻOtuá,” Liahona, Mē 2019, 98)

Ngaahi ʻEkitivitī Fakalahi ki he Akó

Ko e ngaahi talaʻofa ʻa e Fakamoʻuí ki Heʻene sipí

ʻOku ʻikai ngata pē ʻi heʻetau vakai ʻi he ʻIsikieli 34 ki he founga ʻoku fekumi mo tokanga ai ʻa e Fakamoʻuí ki Heʻene fanga sipí, ka ʻoku tau ako foki ha niʻihi ʻo e ngaahi talaʻofa kuó Ne foaki ki Heʻene fanga sipí. ʻE lava ke tokoni hono ʻiloʻi ʻEne ngaahi talaʻofá ke ʻilo ʻe he kau akó ʻa e ʻuhinga ʻoku nau fie tānaki fakataha ai kia Sīsū Kalaisí.

ʻE lava ke hiki ʻe he kau akó ʻa e ngaahi talaʻofa ʻa e Fakamoʻuí ʻi heʻenau lau ʻa e ʻIsikieli 34:22–31. Te ke lava ʻo vaeua ʻa e ngaahi vēsí pea vahe ki he vaeua ʻo e kau akó ke nau lau ʻa e veesi 22–26 pea lau ʻe he vaeua ʻe tahá ʻa e veesi 27–31. Te ke lava ʻo talaange ki he kau akó ʻoku kamata ha konga lahi ʻo e ngaahi talaʻofá ʻaki ʻa e kupuʻi lea “Te u.”

Hili iá, ʻe lava ke vahevahe ʻe he kau akó ʻa e meʻa naʻe makehe kiate kinautolú mo e ʻuhinga ʻe fiemaʻu ai ʻe ha taha ʻa e ngaahi tāpuaki ko ʻeni mei he ʻEikí.

Ngāue Fakaetauhí

Ko e founga ʻe taha te ke lava ʻo tokoniʻi ai e kau akó ke nau ʻiloʻi e ngaahi founga te nau lava ai ʻo muimui ai ki he sīpinga ʻa e Fakamoʻuí ke fekumi mo tokangaʻi e niʻihi kehé ko hano aleaʻi ʻo e ngāue fakaetauhí. Fakakaukau ke fakaafeʻi ʻa e kau akó ke kumi e Kaveinga ʻa e Kau Finemuí pe Lakanga Taulaʻeiki Faka-ʻĒloné pea kumi ha faʻahinga kupuʻi lea pē ʻokú ne akoʻi fekauʻaki mo e ngāue fakaetauhí. ʻE lava ke ʻiloʻi ʻe he kau akó ha meʻa ʻoku nau ako ʻi he ʻIsikieli 34 ʻe lava ʻo tokoni ke nau fai ʻa e meʻa ʻoku akoʻi ʻe he ngaahi kupuʻi lea ko ʻení.

Hili iá, ʻe lava ke vahevahe ʻe he kau akó ha ngaahi aʻusia fakataautaha, pe ngaahi aʻusia ʻa e niʻihi kehé, ʻo e founga kuo nau ngāue fakaetauhi ai ki he niʻihi kehé. Kapau ʻe tokoni ki he kau akó ke nau vakai ki he ngaahi sīpinga ʻo e founga ke ngāue fakaetauhi aí, te ke lava ʻo huluʻi ʻa e “Ministering as the Savior Does” (6:08).

13:4