Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻIsikieli 37: ʻOku Fakamoʻoni ʻa e Tohi Tapú mo e Tohi ʻa Molomoná kia Sīsū Kalaisi

“ʻIsikieli 37: ʻOku Fakamoʻoni ʻa e Tohi Tapú mo e Tohi ʻa Molomoná kia Sīsū Kalaisi,” Fuakava Motuʻá – Tohi Lēsoni ʻa e Faiako Seminelí (2026)

“ʻIsikieli 37: ʻOku Fakamoʻoni ʻa e Tohi Tapú mo e Tohi ʻa Molomoná kia Sīsū Kalaisi,” Fuakava Motuʻá – Tohi Lēsoni ʻa e Faiako Seminelí

ʻIsikieli 1–3; 33–34; 36–37; 47: Lēsoni 140

ʻIsikieli 37

ʻOku Fakamoʻoni ʻa e Tohi Tapú mo e Tohi ʻa Molomoná kia Sīsū Kalaisi

2026 Old Testament Seminary Teacher Materials

ʻI he ʻIsikieli 37, naʻe mamata ai ʻa ʻIsikieli ki ha tānaki fakataha ʻi he kahaʻú mo hano toe fakatahaʻi ʻo e ngaahi faʻahinga kotoa pē ʻo ʻIsilelí ki he ʻEikí (vakai, ʻIsikieli 37:20-28). Kuo fakaʻuhingaʻi foki ʻe he kau palōfita ʻo onopōní ʻa e mata meʻa-hā-mai ʻa ʻIsikielí ko e vaʻakau ʻo Siutá (ko e Tohi Tapú) pea mo e vaʻakau ʻo Siosefá (ʻa e Tohi ʻa Molomoná) ʻa ia ʻoku fakatahaʻi ko e ongo fakamoʻoni ʻo Sīsū Kalaisi mo ʻEne ongoongolelei kuo fakafoki maí (vakai, ʻIsikieli 37:15–17). ʻE lava ke tokoni ʻa e lēsoni ko ʻení ke mahino ki he kau akó ʻa e ngaahi founga ʻoku ngāue fakataha ai ʻa e Tohi Tapú mo e Tohi ʻa Molomoná ko ha ongo fakamoʻoni ʻo Sīsū Kalaisi mo ʻEne ongoongoleleí.

Teuteu ʻa e tokotaha akó: Fakaafeʻi e kau akó ke fakakaukauloto ʻoku fehuʻi ange kiate kinautolu, “Ko e hā e ʻuhinga ʻokú ke fiemaʻu ai ʻa e Tohi ʻa Molomoná kapau ʻokú ke tui ki he Tohi Tapú?” pea teuteu ke vahevahe ʻenau founga talí. Te nau lava ʻo ʻeke ki ha kaungāmeʻa pe mēmipa ʻo e fāmilí pe te nau tali fēfē ʻa e fehuʻí.

Ngaahi ʻEkitivitī Ako ʻOku Ala Fakahokó

Ko ha fakamoʻoni pau hono ua

Fakakaukauloto ʻokú ke sio ʻi ha tohi ʻi he mītia fakasōsialé ʻoku fehuʻi ai ʻo pehē, “Ko e hā e ʻuhinga ʻokú ke fiemaʻu ai e Tohi ʻa Molomoná kapau ʻokú ke tui ki he Tohi Tapú?”

Te ke lava ʻo fakaafeʻi ʻa e kau akó ke nau fakalaulauloto ki he fehuʻi ko ʻení lolotonga hoʻo hiki ia ʻi he palakipoé. Hili iá pea fakaafeʻi ʻa e kau akó ke nau fehuʻi loto pē:

Ko e hā ho tuʻunga loto-falala ki hoʻo malava ke tali ʻa e fehuʻi ko ʻení?
Kapau ʻe fai atu ʻe haʻo kaungāmeʻa ʻa e fehuʻi ko ʻení, ko e hā e meʻa te ke vahevahé?

ʻI hoʻo ako ʻa e ʻIsikieli 37 he ʻaho ní, fakaafeʻi ʻa e Laumālié ke tokoniʻi koe ke ke ʻiloʻi ha ngaahi founga ʻoku fakamoʻoni ai ʻa e Tohi Tapú mo e Tohi ʻa Molomoná kia Sīsū Kalaisi mo ʻEne ongoongoleleí. ʻI he fakaʻosinga ʻo e lēsoní, te ke maʻu ha faingamālie ke tali ʻa e fehuʻi ko ʻení.

Ko e vaʻa ʻo Siutá mo e vaʻa ʻo Siosefá

Naʻe fekauʻi atu ʻa e palōfita ko ʻIsikielí ke malanga ʻaki ʻa e fakatomalá ki he kau ʻIsileli ne nofo pōpula ʻi Pāpiloné. Naʻe lekooti ʻe he palōfitá ʻi he ʻIsikieli 37, ha meʻa-hā-mai ʻa ia naʻe akoʻi ai ʻe he ʻEikí ʻe toe foki ʻo moʻui ʻa e Fale ʻo ʻIsilelí, ʻa ia naʻe mate fakalaumālie koeʻuhí ko e hē mei he moʻoní, ʻo fakafou ʻi hono Fakafoki Mai ʻo e ongoongoleleí. Naʻe mamata ʻa ʻIsikieli ko ha konga ʻo e meʻa-hā-maí ki ha vaʻakau ʻe ua pe ongo laʻipapa lafalafa ʻa ia ʻe hiki ai ha ngaahi pōpoaki.

ʻI hono ako ʻe he kau akó ʻa e potufolofola ko ʻení, mahalo te ke fie fakamahinoʻi ange ʻoku ʻuhinga ʻa e “vaʻakau ʻa Siutá” ki he Tohi Tapú. ʻOku ʻuhinga ʻa e “vaʻakau ʻa Siosefá” ki he Tohi ʻa Molomoná (vakai, Fakahinohino ki he Ngaahi Folofolá, “ʻIfalemi”; “Siuta”). ʻE lava ke fakakau ʻeni ʻe he kau akó ko ha kiʻi fakamatala ʻi heʻenau folofolá ʻi he tafaʻaki ʻo e veesi 16.

Ko e ʻIsikieli 37:15–17 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

Lau ʻa e ʻIsikieli 37:15–20, ʻo kumi e talaʻofa ʻa e ʻEikí fekauʻaki mo e ngaahi folofola ʻi he ngaahi ʻaho kimui ní.

ʻOkú ke pehē ʻoku ʻuhinga ki he hā ʻa e kupuʻi lea “ʻe hoko ia ʻo taha pē ʻi ho nimá” (veesi 17)?

Ke tokoni ke mahino kiate kitautolu ʻa e founga ʻe hoko ai ʻa e Tohi Tapú mo e Tohi ʻa Molomoná ko ha fakamoʻoni ʻe “taha” ʻo e Fakamoʻuí, naʻe akoʻi ai ʻe Palesiteni Lāsolo M. Nalesoni ʻo pehē:

14:33

Ko e Tohi Tapú mo e Tohi ʻa Molomoná ʻokú na fakatou fakamoʻoni kia Sīsū Kalaisi. ʻOkú na akoʻi ko e ʻAlo Ia ʻo e ʻOtuá, naʻe hoko ʻEne moʻuí ko ha faʻifaʻitakiʻanga, naʻá Ne fakalelei maʻá e faʻahinga kotoa pē ʻo e tangatá, naʻá Ne pekia ʻi he kolosí pea toe tuʻu hake ko e ʻEiki toetuʻú. ʻOkú na akoʻi ko e Fakamoʻui Ia ʻo e māmaní.

ʻOku fefakamoʻoni ʻaki ʻa e kau fakamoʻoni fakafolofolá ki hono moʻoní. Naʻe fakamatalaʻi ʻa e foʻi fakakaukau ko ʻení ʻi he ngaahi taʻu lahi kuohilí ʻi hano tohi ʻe ha palōfita ʻo pehē ko e Tohi ʻa Molomoná naʻe “tohi [ia] koeʻuhí ke mou tui ki [he Tohi Tapú]; pea kapau te mou tui ki [he Tohi Tapú] te mou tui ki he [Tohi ʻa Molomoná] foki” (Molomona 7:9). ʻOku fefakamatala ʻaki ʻa e ongo tohí. ʻOku hoko ʻa e tohi takitaha ko ha fakamoʻoni ʻoku moʻui ʻa e ʻOtuá pea ʻokú Ne folofola ki Heʻene fānaú ʻi he fakahā ki Heʻene kau palōfitá. …

ʻI he ʻaho ní, ʻoku maʻu ʻe he Kāingalotu ʻi he ngaahi puleʻanga lahi ʻo e māmaní ʻa e Tohi Tapú (ʻa e vaʻakau ʻo Siutá) pea mo e Tohi ʻa Molomoná (ʻa e vaʻakau ʻo ʻIfalemí) ʻi he loto-houngaʻia, kuo fakatahaʻi ʻo taha ʻi honau nimá. (“Scriptural Witnesses,” Liahona, Nov. 2007, 43, 44)

Te ke fakamatalaʻi fakanounou fēfē ʻa e meʻa ʻoku tau ako mei he ʻIsikieli 37:15–20 mo Palesiteni Nalesoní?

Neongo ʻe fakaʻaongaʻi ʻe he kau akó ha ngaahi lea kehe, tokoniʻi kinautolu ke vahevahe ha moʻoni peheni: ʻoku fakatou fakamoʻoni ʻa e Tohi Tapú mo e Tohi ʻa Molomoná kia Sīsū Kalaisi.
ʻOkú ke pehē ko e hā e ʻuhinga ʻoku mahuʻinga ai ke fakatou fakamoʻoni ʻa e Tohi Tapú mo e Tohi ʻa Molomoná kia Sīsū Kalaisí?

Kaungā fakamoʻoni ʻo Sīsū Kalaisi

ʻE lava ke tokoni ʻa e ʻekitivitī ko ʻení ki he kau akó ke fakatupulaki ʻenau mahino ki he founga ʻoku fakatou fakamoʻoni ai ʻa e Tohi Tapú mo e Tohi ʻa Molomoná kia Sīsū Kalaisi mo ʻEne ongoongoleleí.

Te ke lava ʻo vahevahe ha konga pe kotoa ʻo e saati ʻi laló. ʻE lava ke fili ʻe he kau akó ha tefito ʻe taha pe lahi ange ke ako fakafoʻituitui, mo ha hoa, pe ʻi ha kiʻi kulupu tokosiʻi.

Ngaahi Tefito ʻo e Ongoongoleleí	Hoa Folofolá
Ngaahi Tefito ʻo e Ongoongoleleí Ko e Fakalelei ʻa Sīsū Kalaisí	Hoa Folofolá Tohi Tapú: ʻĪsaia 53:3–5 Tohi ʻa Molomoná: ʻAlamā 7:11–13
Ngaahi Tefito ʻo e Ongoongoleleí Toetuʻu ʻa e kakai kotoa pē koeʻuhí ko Sīsū Kalaisi	Hoa Folofolá Tohi Tapú: 1 Kolinitō 15:20–22 Tohi ʻa Molomoná: ʻAlamā 11:42–45
Ngaahi Tefito ʻo e Ongoongoleleí ʻOku talaʻofa ʻa e Fakamoʻuí te Ne tānaki mo huhuʻi Hono kakaí	Hoa Folofolá Tohi Tapú: ʻIsikieli 37:21–23, 26–27 Tohi ʻa Molomoná: 1 Nīfai 10:14
Ngaahi Tefito ʻo e Ongoongoleleí Ko e ngaahi ʻulungaanga ʻo Sīsū Kalaisí	Hoa Folofolá Tohi Tapú: ʻĪsaia 63:7 Tohi ʻa Molomoná: Mōsaia 4:11
Ngaahi Tefito ʻo e Ongoongoleleí Ko e ouau ʻo e papitaiso ʻa e Fakamoʻuí	Hoa Folofolá Tohi Tapú: Mātiu 3:13–17 Tohi ʻa Molomoná: 2 Nīfai 31:5–12
Ngaahi Tefito ʻo e Ongoongoleleí Fili ha tefito	Hoa Folofolá Tohi Tapú: Tohi ʻa Molomoná:

Fakakaukau ki ha founga ke tokoni ke vahevahe ʻe he kau akó ʻa e meʻa naʻa nau akó. Ko e founga ʻe taha ke fai ai ʻení ko hono ʻoange ʻa e laʻipepa tufa ko ʻení ke fakaʻaongaʻi ʻe he kau akó ke faʻu ʻaki ha tohi ʻi he mītia fakasōsialé. Kapau ʻoku ʻikai feangai ʻa e kau akó mo e mītia fakasōsialé, te ke lava ʻo liliu e ʻekitivitī ko ʻení ke fakafaivaʻi ʻe he kau akó ʻa e meʻa te nau vahevahe mo ha tahá. ʻOku fakaafeʻi ʻe he ʻekitivitií ʻa e kau akó ke nau tali ʻa e fehuʻi ʻoku ʻoatu ʻi he kamataʻanga ʻo e lēsoní.

Fili ha taha ʻo e ngaahi tefito naʻá ke akó pea faʻu ha tohi ʻi he mītia fakasōsialé ʻa ia ʻe lava ke fakaʻaongaʻi ke tali ʻaki e fehuʻi, “Ko e hā e ʻuhinga ʻokú ke fiemaʻu ai e Tohi ʻa Molomoná kapau ʻokú ke tui ki he Tohi Tapú?” Fakakau ai ʻa e ngaahi veesi mei he Tohi Tapú mo e Tohi ʻa Molomoná naʻá ke akó. Fakamatalaʻi ʻa e meʻa mahuʻinga ʻokú ke maʻú mo e founga ʻokú na fakatou akoʻi ai fekauʻaki mo Sīsū Kalaisi mo ʻEne ongoongoleleí.

Vahevahe ʻa e meʻa kuó ke akó

Te ke lava ʻo fakapipiki takai e ʻū tohi pe pousitā ʻa e kau akó ʻi he holisí ʻi he lokí pe tuku kinautolu ʻi he ʻū funga tesí. Fakaafeʻi leva ʻa e kau akó ke nau lue takai ʻi he lokí pea toe vakaiʻi e ngāue ʻa honau kaungāakó. ʻOange ha fanga kiʻi laʻipepa iiki pe fanga kiʻi laʻipepa pipiki ke fakaʻaongaʻi ʻe he kau akó ʻi heʻenau fakakakato ʻa e ngaahi fakahinohino ko ʻení.

Hiki ha “tali” ki ha taha ʻo e ngaahi tohi ʻi he mītia fakasōsialé pe ko ha ngaahi tohi lahi ange. ʻI hoʻo talí, fakakakato ha taha ʻo e ngaahi meʻa ko ʻeni ke fili mei aí:

Tānaki atu ha fakamoʻoni fakafolofola lahi ange mei he Tohi Tapú pe Tohi ʻa Molomoná ʻe lava ʻo tokoni ke mahino lahi ange ki ha taha fekauʻaki mo e Fakamoʻuí mo e tefito ko ʻení. Fakakau ha ngaahi fakakaukau ʻe niʻihi fekauʻaki mo e mahuʻinga ʻo e potufolofola naʻá ke vahevahé.
Vahevahe ʻa e founga kuo tokoni ai ʻa e Tohi Tapú mo e Tohi ʻa Molomoná ke mahino kiate koe ʻa e Fakamoʻuí mo e akonaki ko ʻení.
Hiki haʻo aʻusia ʻo ha taimi naʻe tokoni ai ʻa e folofola mei he Tohi Tapú pe Tohi ʻa Molomoná ke fakatupulaki hoʻo fakamoʻoni ki he Fakamoʻuí mo ʻEne ongoongoleleí.
Vahevahe ha meʻa kuó ke ako ʻi he ʻahó ni fekauʻaki mo e Fakamoʻuí mo ʻEne ngaahi akonaki ʻo e ongoongoleleí ʻi hoʻo ʻakauni mītia fakasōsiale fakatāutahá, kae ʻoua ʻe hiki hoʻo ngaahi fakakaukaú ʻi ha laʻipepa. Fakakau ʻa e ngaahi potufolofolá mo e founga kuo tokoniʻi ai koe ʻe he Tohi Tapú mo e Tohi ʻa Molomoná ke mahino lelei ange ʻa e ongoongolelei ʻo Sīsū Kalaisí.

Te ke lava ʻo fakaʻosi ʻa e kalasí ʻaki hano fakaafeʻi e kau akó ke hokohoko atu hono fakaʻaongaʻi ʻo e Tohi Tapú mo e Tohi ʻa Molomoná ke fakatupulaki ʻenau mahino kia Sīsū Kalaisi mo ʻEne ongoongoleleí.

Ako Ma‘uloto

Te ke ala tokoni ki he kau akó ke nau ako maʻuloto ʻa e fakamoʻoni folofola ki he fakataukei fakatokāteliné mo e kupuʻi lea mahuʻinga ʻo e potufolofolá, lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻinga ki he “ʻIsikieli 37:15–17” ko e “ʻE hoko fakataha ʻa e Tohi Tapú mo e Tohi ʻa Molomoná ʻo taha pē ʻi ho nimá.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Ko e hā e ʻuhinga ʻoku mahuʻinga ai ke fakatou maʻu ʻa e Tohi Tapú mo e Tohi ʻa Molomoná?

Naʻe akoʻi ʻe ʻEletā Teti R. Kalisitā lolotonga ʻene ngāue ʻi he Kau Palesitenisī ʻo e Kau Fitungofulú ʻo pehē:

10:15

ʻOkú ke faʻa fifili nai pe ko e hā ʻoku fuʻu lahi pehē ai e ngaahi siasi faka-Kalisitiané ʻi māmani he ʻaho ní pea maʻu kotoa pē ʻenau tokāteliné mei he Tohi Tapu tatau pē? Ko hono ʻuhingá he ʻoku kehekehe ʻenau fakaʻuhingaʻi e Tohi Tapú. Kapau naʻa nau fakaʻuhingaʻi tatau, ne nau mei kau ki he siasi tatau pē. ʻOku ʻikai ko e tūkunga ʻeni naʻe fakaʻamu ki ai e ʻEikí, he naʻe fakahā ʻe he ʻAposetolo ko Paulá ʻoku ʻi ai ʻa e “ʻEiki pē taha, ko e tui pē taha, ko e papitaiso pē taha” (ʻEfesō 4:5). Naʻe fokotuʻu ʻe he ʻEikí ha fono fakalangi ʻo e [kau] fakamoʻoní kae lava ʻo maʻu ʻa e [faaitaha] ko ʻení. Naʻe akoʻi ʻe Paula, “ʻI he ngutu ʻo e fakamoʻoni ʻe toko ua pe toko tolu ʻe fakamoʻoni ʻa e lea kotoa pē” (2 Kolinitō 13:1).

Ko e Tohi Tapú ko e taha ia ʻo e fakamoʻoni kia Sīsū Kalaisí; pea ko e Tohi ʻa Molomoná ʻa e fakamoʻoni ʻe tahá. (“Ko e Tohi ʻa Molomoná—ko ha Tohi mei he ʻOtuá,” Liahona, Nōvema 2011, 75).

Naʻe pehē ʻe ʻEletā L. Tomu Peuli (1922–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:28

ʻOku ʻikai feʻunga ʻānoa pē ʻa e Tohi Tapú pe ko e Tohi ʻa Molomoná. ʻOku fakatou fiemaʻu pē kinaua ke tau akoʻi mo ako ai ki he tokāteline kakato ʻo Kalaisí. ʻOku ʻikai hanga ʻe hono fiemaʻu ʻo e tohi ʻe tahá ʻo holoki ai ʻa hono fiemaʻu ʻo e tahá. ʻOku fakatou fiemaʻu e Tohi Tapú mo e Tohi ʻa Molomoná ki hotau fakamoʻuí mo e hakeakiʻí. Hangē ko e ako mālohi ne fai mai ʻe Palesiteni ʻEselā Tafi Penisoní, “ʻOku hanga ʻe he Tohi Tapú mo e Tohi ʻa Molomoná ʻo fakaʻauha e ngaahi tokāteline halá ʻi he taimi ʻoku fakaʻaongaʻi fakataha ai kinauá” (“A New Witness for Christ,” Ensign, Nov. 1984, 8). (“Ko e Mālohi ʻo e Fakahaofí,” Liahona, Mē 2012, 96).

Ngaahi ʻEkitivitī Fakalahi ki he Akó

Ko e pōpoaki ʻo e Tohi ʻa Molomoná

ʻI he lēsoní, kimuʻa pea faʻu ʻe he kau akó ha tohi mītia fakasōsiale mei he meʻa kuo nau akó, ʻe ala tokoni ke ʻoange ha sīpinga kimuí ni mei ha ʻakauni mītia fakasōsiale ʻa ha taki ʻo e Siasí. Pe ko hoʻo huluʻi ʻa e foʻi vitiō “What Is the Book of Mormon?” (0:57) mei he ChurchofJesusChrist.org, ʻa ia ʻokú ne fakatātaaʻi e founga ʻoku hoko ai e Tohi ʻa Molomoná ko ha hoa fakamoʻoni ki he Tohi Tapu ʻa Sīsū Kalaisí.

0:58

Ko e tāpuaki ʻo ha fakamoʻoni ʻe uá

ʻE lava ke fakaʻaongaʻi ha lēsoni fakataumuʻa ke akoʻi ʻa e mahuʻinga ʻo hono maʻu ha fakamoʻoni hono ua ki he ngaahi moʻoni mahuʻingá. ʻI he kamataʻanga ʻo e lēsoní, tuku ha laʻipepa ʻi he palakipoé ʻoku ʻi ai ha makinito ʻe taha ʻi lotomālie. Fakaafeʻi ʻa e kau akó ke fakakaukau pe ko e hā e lahi ʻo e ngaahi founga kehekehe ke vilohi ai ʻa e laʻipepá mo ha foʻi makinito pē ʻe taha ʻokú ne puke maʻu iá. Fakapipiki atu leva ha makinito hono ua ʻi he laʻipepá pea fakaafeʻi e kau akó ke vahevahe ʻa e ngaahi faikehekehe ʻoku nau sio ki aí. Ko e founga ʻe taha ke fakatātaaʻi ai ʻení ko hono tā ha foʻi toti ʻi he palakipoé pea fehuʻi ange pe ko e laine hangatonu ʻe fiha ʻe lava ke tā ʻo fou ʻi he foʻi totí (taʻefaʻalaua). Hili iá, te ke lava ʻo tā ha foʻi toti ʻe ua ʻi he palakipoé pea fehuʻi ki he kau akó pe ko e laine hangatonu ʻe fiha ʻe lava ke taá (taha).

Ko e mālohi ʻo hono tānaki fakataha ʻo e ongo vaʻa ʻo Siuta mo Siosefá

ʻI hono aleaʻi ʻe he kau akó ʻa e tānaki fakataha ʻo e “ongo vaʻa” ʻo Siuta mo Siosefá, te ke lava ʻo fakaafeʻi kinautolu ke nau fakafekauʻaki pe fakafehokotaki ʻa e ʻIsikieli 37:15–17 mo e 2 Nīfai 3:12. Te ke lava ʻo hiki ʻi he palakipoé ha foʻi moʻoni fakakonga hangē ko e, “ʻE lava ʻe he Tohi Tapú mo e Tohi ʻa Molomoná ʻi hono fakatahaʻí ʻo …” Fakaafeʻi ʻa e kau akó ke nau fakakakato e fakamatalá mei he 2 Nīfai 3:12. ʻE lava ke lisi ʻe he kau akó ha ngaahi sīpinga hangē ko ʻení:

Veuveuki ʻa e tokāteline halá.
Fakaleleiʻi ʻa e fakakikihí.
Fokotuʻu ʻa e melinó.
Tokoni ki he hako ʻo Līhaí ke ʻiloʻi ʻenau ngaahi kuí.
Tokoniʻi e kakai kotoa ʻo e ʻEikí ke nau ʻilo ki Heʻene ngaahi fuakavá.

ʻE lava ke vahevahe ʻe he kau akó ʻa e founga kuo nau mamata ai pe ko ha taha ʻoku nau ʻilo ki he tāpuaki ko ʻení koeʻuhí ko e Tohi Tapú mo e Tohi ʻa Molomoná.

“Taha pē ʻi ho nimá” (ʻIsikieli 37:17)

Ke tokoni ke mahino ki he kau akó ʻa e founga ʻoku hokohoko atu ai e kikite ʻa ʻIsikielí ke fakahoko ʻi hotau kuongá, te ke lava ʻo fakaafeʻi ʻa e kau akó ke nau toe vakaiʻi ha niʻihi ʻo e ngaahi liliu fakamuimuitaha ʻo e Gospel Library. ʻE lava ke kumi ʻe he kau akó ha niʻihi ʻo e ngaahi founga kuo hoko ai ʻa e Tohi Tapú mo e Tohi ʻa Molomoná ʻo taha ʻi hotau nimá he ʻaho ní. Te ke lava ʻo fakahinohino ange ʻa e ngaahi vitiō mo e ngaahi ʻata ʻoku maʻú. Fakaafeʻi e kau akó ke vakai ki he ngaahi potufolofola fakafekauʻaki ʻo e Tohi Tapú mo e Tohi ʻa Molomoná ʻoku tuhu kia “Sīsū Kalaisi” ʻi he fakahokohoko fakamotuʻaleá.

Hili hono toe vakaiʻi ʻe he kau akó ʻa e founga kuo hokohoko atu ai hono fakahoko ʻo e kikite ko ʻení, te ke lava ʻo vahevahe ha niʻihi ʻo e talanoa ʻo hono paaki ʻo e Tohi Tapú mo e Tohi ʻa Molomoná ʻi he 1982. Naʻe kau ʻi he pulusinga ko ʻení ʻa hono fuofua faʻu ʻo e ngaahi futinouti naʻá ne fakafehokotaki ʻa e ngaahi veesi ʻo e Tohi Tapú ki he ngaahi potufolofola fekauʻaki ʻi he Tohi ʻa Molomoná. Naʻe vahevahe ʻe Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e talanoa ki hono paaki ʻo e ngāue faingataʻa ko ʻení (“Scriptures,” Ensign, Nov. 1982). Te ke lava ʻo ʻoange ha fehokotakiʻanga ki he kouti QR maʻá e kau akó ke nau lava ʻo hū ki he lea ko ʻení ʻi heʻenau meʻangāue fakaʻilekitulōniká. ʻE lava ke toe vakaiʻi ʻe he kau akó ʻa e fakamatalá pea aleaʻi ʻa e ngaahi faingataʻa ʻo e pulusinga ʻo e 1982 pea mo e ngaahi mana fakatekinolosia kuo iku ai ki he Gospel Library ʻi he ʻaho ní.

Te ke lava ʻo fakamahinoʻi ange naʻe ʻikai lava ke maʻu ʻa e ngaahi potufolofola fakafekauʻaki naʻa nau vakaiʻi ʻi he “Sīsū Kalaisí” kae ʻoua kuo ʻosi ʻa e pulusinga folofola ʻo e 1982.

Te ke lava foki ʻo huluʻi ʻa e foʻi vitiō ʻo e pōpoaki ʻa Palesiteni Peeka ʻoku fakamatalaʻi ai e foungá ni ʻi he vitiō “Scriptures” (taimi 3:17–10:09).

18:30