“Puleaina o le Atuatuvale ma le Popolevale: E Mafai e Iesu Keriso ona Fesoasoani ia i Tatou ia Pulea o Tatou Atuatuvalega ma Popolega,” Tusi Lesona a le Faiao’ga Seminare o le Feagaiga Tuai (2026)
“Puleaina o le Atuatuvale ma le Popolevale: E Mafai e Iesu Keriso ona Fesoasoani ia i Tatou ia Pulea o Tatou Atuatuvalega ma Popolega,” Tusi Lesona a le Faiao’ga Seminare o le Feagaiga Tuai
Soifua Maloloina Faaletino ma Faalelagona: Lesona 184
Puleaina o le Atuatuvale ma le Popolevale
E Mafai e Iesu Keriso ona Fesoasoani ia i Tatou ia Pulea o Tatou Atuatuvalega ma Popolega
Tatou te lagona uma lava le atuatuvale ma le popolevale.O nei lagona e mafai ona fesoasoani ia i tatou e faatino ai galuega i aso ta’itasi ma faafetauia ai luitau o le olaga.Peitai, o le faaumiumi o le atuatuvale ma lagona o le popole e mafai ona iai ni aafiaga le lelei ia i tatou.Ae faafetai, ua folafola mai e le Faaola ia i tatou Lana fesoasoani ma Lona filemu (tagai i le Ioane 14:27).O lenei lesona e mafai ona fesoasoani i tagata a’oga e faataitai tomai e maua mai ai le mana o le Faaola e pulea ai le atuatuvale ma le popolevale.
Sauniuniga a le tagata a’oga: Valaaulia tagata a’oga e mafaufau i tulaga latou te lagona ai le atuatuvale po o le popole, ma auala e mafai ai ona latou liliu atu i le Ali’i mo se fesoasoani.
Gaoioiga e Ono Mafai Ona Aoaoina Ai
Atuatuvale ma le Popolevale
Manatua: E le manaomia ona avea oe ma se tagata poto faapitoa tau le soifua maloloina ina ia aoao atu lenei lesona.Tatalo mo le taitaiga a le Tamā Faalelagi, mulimuli i mea e faaaoga mo le lesona, ma faalagolago i le Agaga Paia.Afai e faasoa mai e tagata a’oga ni o latou tauiviga patino o lo o latou feagai pe fai mai ni fesili e le mafai ona e taliina o se vaega o lenei lesona, faailoa atu le agaga faafetai mo lo latou talitonuina e faailoa atu ia oe.Ia faamautinoa atu ia i latou e alolofa le Tamā Faalelagi ma Iesu Keriso ia i latou.Uunaia i latou e saili fautuaga faaopoopo mai o latou matua, taitai o le Ekalesia, faufautua i le a’oga po o tagata tomai faapitoa i le soifua maloloina faalelagona.
Mafaufau e amata le lesona i se auala e fesoasoani ai i tagata a’oga ia mafaufau e uiga i le puleaina o le atuatuvale ma le popolevale.Mo se faataitaiga, o le ata faataitai lenei e mafai ona faaaoga pe fetuunai ina ia fesootai lelei atili i au tagata a’oga.
-
Afai e mafai e se tasi ona si’i tau lava o le 25 kg (55 lbs) ma na latou taumafai e si’i le 70 kg (154 lbs), o le a se mea e ono tupu?O a ni o latou lagona?
-
Ae faapefea pe afai e amata si’i e le tagata lava lea le 25 kg (55 lbs) ma faaopoopo malie ni vaega laiti o le mamafa i vaiaso taitasi?Faamata e faapefea ona aafia ai lo latou malosi?O a ni o latou lagona?
-
O le a se mea e ono tupu pe afai e le’i taumafai lava muamua lenei tagata e si’i le sili atu ma le 25 kg (55 lbs)?
-
E ono faapefea e le mamafa i nei tulaga ona faatusa i le puleaina o le atuatuvale ma le popolevale?
Ina ia fesoasoani i tagata a’oga ia malamalama i tulaga eseese o le atuatuvale ma le popolevale, e mafai ona e faasoa atu le pepa e tufa atu “Atuatuvale ma le Popolevale.”Valaaulia tagata a’oga e faitau le siata ma faatumu fesili mo iloiloga faale-tagata lava ia o loo i le koluma lona tolu.
A o e suesue i lenei lesona, saili le fesoasoani mai le Ali’i a o e aoaoina tomai e mafai ona fesoasoani ia te oe i le puleaina o lagona o le atuatuvale ma le popolevale.
Fautuaga mai se perofeta
Faitau le saunoaga lenei mai ia Peresitene Russell M. Nelson, ma vaavaai pe faapefea ona tatou faatoilaloina o tatou popolega.
Ua folafola mai e le Ali’i e faapea, e ui i luitau lemafaatusalia o nei aso, ae o i latou o ē atia’e o latou faavae i luga o Iesu Keriso, ma aoao i le auala e maua ai Lona mana, e le manaomia ona lolo atu i popolega uiga ese o lenei vaitaimi.(“O Le Malumalu ma Lou Faavae Faaleagaga,” Liahona, Nov. 2021, 94)
-
O le a se mea na e fiafia i ai pe aoaoina mai lenei faamatalaga?
E ono faailoa mai e tagata a’oga se mea moni e pei o le: A o tatou utuvai mai i le mana o Iesu Keriso, e mafai ona tatou pulea lo tatou popolevale.
-
O le a sou manatu, o le a le uiga o le utuvai mai i le mana o le Faaola?
-
E ono faapefea ona fesoasoani Lona mana ia i tatou i le pulea o o tatou atuatuvale ma le popolevale?O le fea o puna’oa faaopoopo e mafai ona fesoasoani Iesu Keriso ia o tatou iloaina?
O le vaega o totoe o lenei lesona e tuuina atu ai i tagata a’oga se avanoa e faataitai ai le faaaogaina o mataupu faavae o le talalelei, lea e mafai ona fesoasoani ia i latou e utuvai mai le mana o Iesu Keriso e pulea ai le popolevale.
Iloilo o tatou faamoemoega ma liliu atu i le Ali’i mo se fesoasoani
O se tasi o auala e taulima ai o tatou lagona atuatuvale po o le popolevale, o le iloaina lea o o tatou faamoemoega ma faaogatusa i latou ma mea ua finagalo ai le Ali’i mo i tatou.O faamoemoega le talafeagai pe faivavale, e mafai ona avea ma puna malosi o le le fiafia ma le atuatuvale.
Faitau le Mosaea 4:27, vaavaai po o le a se mea ua faamoemoeina e le Ali’i mai ia i tatou.
Afai e le faailoaina mai e tagata a’oga lenei mea, ia manatua e le faamoemoeina e le Ali’i i tatou ia tamomo’e saoasaoa atu nai lo le tatou malosi, ae e faamoemoe mai pea o Ia ia tatou filiga.E le manaomia ona tatou sii ni mea matua mamafa tele, ae e manaomia ona tatou taumafai faato’ato’a.
Mo se faataitaiga o se tasi e manaomia ona iloilo ona faamoemoega, faasoa atu i tagata a’oga e faapea a o ia taitaiina le fanauga a Isaraelu o se perofeta, na taumafai Mose ia faia mea e sili atu nai lo o mea na tatau ona ia faia.Na fesoasoani le Ali’i ia Mose e ala i fautuaga mai lona tamā faaletulafono, o Ietero.
Faitau le Esoto 18:13–18, vaavaai pe aisea na popole ai le tamā faaletulafono o Mose.
-
O a fasi fuaitau o lo o faailoa mai ai le mea e ono tupu ia Mose pe ana faaauau pea ona ia fautuaina tagata i le aso atoa i aso taitasi?
-
O a foliga o lenei tulaga i aso nei?
Faamatala
Faamatala atu i tagata a’oga e faapea, e mafai ona avea o se tomai aoga e iloilo ai o latou faamoemoega e ala i le faaaogaina o fesili nei e lua.Mafaufau e tusi nei [fesili] i luga o le laupapa.
-
Pe o o’u taumafai ea e faia mea e sili atu pe itiiti nai lo o mea e finagalo le Ali’i ou te faia (a le o le tamoe saoasaoa atu nai lo o loʻu malosi pe o le le filiga)?
-
E faapefea ona ou liliu atu i le Ali’i mo se fesoasoani?
Faataitaiga
-
Pe afai e te feagai ma se tulaga e pei o Mose, e ono faapefea ona e tali atu i fesili e lua ua i luga o le laupapa?
Afai e ono aoga faataitaiga faaopoopo faaonaponei, mafaufau e valaaulia tagata a’oga e faasoa mai nisi o o latou faamoemoega faivavale po o faamoemoega faivavale sa iai i nisi.E mafai ona latou faaaoga fesili o i luga o le laupapa e iloilo ai faamoemoega nei:
-
O le a ou faitau le Tusi a Mamona mo le 90 minute i aso taitasi.
-
O le a ou le toe faia soo se mea sese.
-
E le manaomia ona ou sauni mo se misiona.O le a na ona ou mafaufau iai a o ou iai iina.
Faataitai
Filifili se mea se tasi i lou olaga e mafua ai ona e atuatuvale ma popolevale ma faataitai le iloiloina o ou faamoemoega.Saili le taitaiga a le Agaga Paia a o e fai atu fesili o lo o i luga o le laupapa ia te oe lava ia, ma mafaufau pe faapefea ona e liliu atu i le Ali’i mo se fesoasoani.
Fefautuaa’i ma se tasi e te faatuatuaina ina ia iloa ai le isi laasaga
Faamatala le tomai
Fesoasoani i tagata a’oga ia malamalama pe a uma ona iloilo a latou faamoemoega, e finagalo le Ali’i e fesoasoani ia i latou ia iloa le isi laasaga.O se tasi o auala e fesoasoani ai le Ali’i ia i tatou e ala mai i isi; mo se faataitaiga, o le fefautuaa’i faatasi ma se tasi e te faatuatuaina.A o galulue tagata a’oga ma isi, e mafai ona latou talanoaina le mea e tatau ona faia i le taimi nei, mea e mafai ona faatali, po o mea e mafai ona lafoa’i pe faia e se isi.Faamautinoa atu i tagata a’oga e le aoga le lagonaina o le ta’usalaina mo le faatulagaina o ni tuaoi aoga po o le fai atu “leai” po o le “leai lava” i nisi o avanoa.
Faataitai le tomai
Na fesoasoani le Ali’i ia Mose e ala mai i lona tamā faaletulafono, o Ietero.A o fefautuaa’i Mose ma lona tamā faaletulafono, na fautuaina e Ietero se fofo i le faafitauli.
Faitau le Esoto 18:19–24, vaavaai po o le a se mea na fautuaina e Ietero ia Mose e faia i le isi laasaga.
-
Aisea e te manatu ai sa aoga le fautuaga a Ietero?
Nai lo o le feagai ai ma ona faafitauli uma i le taimi e tasi, sa mafai ona maua e Mose le fesoasoani na ia manaomia e faia ai le isi laasaga.
-
O ai nisi tagata e ono finagalo le Ali’i e tou te filifili faatasi pe a oo ina e lagona le atuatuvale ma le popolevale?O le a se fautuaga sa latou tuuina atu ia te oe?
-
E faapefea e fautuaga poto ona faaitiitia ai le atuatuvale po o le popolevale mo oe po o se isi e te iloa?
Fesoasoani i tagata a’oga ia iloa e mafai e le Ali’i ona fesoasoani ia i latou e ala mai i o latou matua, tei matutua, faia’oga, au faufautua, tagata tomai faapitoa i le soifua maloloina o le mafaufau, taitai o le Ekalesia, ma isi pe a latou lagona le popolevale po o le atuatuvale.
Faataitai le tomai
I totonu o lau api talaaga mo suesuega, toe manatu i se taimi na e lagona ai le lofituina, atuatuvale, po o le popolevale.Tusi i lalo po o ai e ono finagalo le Ali’i e te lua fefautuaa’i faatasi e uiga i le isi laasaga ma pe faapefea ona ono fesoasoani ia te oe le talanoa ma lena tagata.
Mafaufau e valaaulia tagata a’oga e toe iloilo le pepa e tufa atu ma faasoa mai mea na latou fiafia iai pe na aoaoina mai i lenei lesona.Faaopoopo atu ou manatu ma tuu atu se molimau i le moni o lenei lesona.