“Pagdumala sa Kaugtas ug Kabalaka: Makatabang Nato si Jesukristo nga Madumala ang Atong Kaugtas ug Kabalaka,” Manwal sa Magtutudlo sa Seminary sa Daang Tugon (2026)
“Pagdumala sa Kaugtas ug Kabalaka: Makatabang Nato si Jesukristo nga Madumala ang Atong Kaugtas ug Kabalaka,” Manwal sa Magtutudlo sa Seminary sa Daang Tugon
Pisikal ug Emosyonal nga Kahimsog: Leksiyon 184
Pagdumala sa Kaugtas ug Kabalaka
Makatabang Nato si Jesukristo nga Madumala ang Atong Kaugtas ug Kabalaka
Kitang tanan maugtas ug mabalaka. Kini nga mga emosyon makatabang nato nga mahimo ang inadlaw nga mga buluhaton ug sagubangon ang mga hagit sa kinabuhi. Bisan pa, ang dugay na nga kaugtas ug kabalaka adunay negatibong epekto kanato. Maayo na lang, ang Manluluwas misaad kanato sa Iyang tabang ug Iyang kalinaw (tan-awa ang Juan 14:27). Kini nga leksiyon makatabang sa mga estudyante nga praktison ang mga kahanas nga makagamit sa gahom sa Manluluwas aron madumala ang kaugtas ug kabalaka.
Pagpangandam sa estudyante: Dapita ang mga estudyante nga maghunahuna og mga sitwasyon dihang mibati sila nga naugtas o nabalaka ug mga paagi nga makadangop sila sa Ginoo alang sa tabang.
Posibleng mga Kalihokan sa Pagkat-on
Kaugtas ug kabalaka
Timan-i: Dili kinahanglan nga eksperto ka sa kahimsog sa panghunahuna aron itudlo kini nga leksiyon. Pag-ampo alang sa giya sa Langitnong Amahan, sunda ang mga materyal sa leksiyon, ug salig sa Espiritu Santo. Kon ipakigbahin sa mga estudyante ang ilang personal nga mga pakigbisog nga giatubang o kon mangutana nga dili nimo matubag isip kabahin niini nga leksiyon, ipahayag ang imong pasalamat sa ilang pagsalig sa pagtug-an kanimo. Ipasalig kanila nga gimahal sila sa Langitnong Amahan ug ni Jesukristo. Awhaga sila nga tinguhaon ang dugang tambag gikan sa mga ginikanan, mga lider sa Simbahan, mga magtatambag sa eskwelahan, o uban pang mga propesyonal sa emosyonal nga kahimsog.
Ikonsiderar ang pagsugod sa leksiyon sa paagi nga motabang sa mga estudyante sa paghunahuna bahin sa pagdumala sa kaugtas ug kabalaka. Pananglitan, alang sa musonod nga mga senaryo pwedeng gamiton o ipahaom aron mas makasabot ang imong mga estudyante:
-
Unsa kahay mahitabo kon ang usa ka tawo nga makaalsa ra og 25 kg (55 lbs) mosulay og alsa og 70 kg (154 lbs)? Unsa kahay ilang bation?
-
Unsa kaha kon ang maong tawo magsugod og alsa og 25 kg (55 lbs) ug anam-anam nga magdugang niini og ginagmay matag semana? Unsa kahay epekto niini diha sa ilang kusog? Unsa kahay ilang bation?
-
Unsay mahitabo kon kining tawhana wala gayod makasulay og alsa og kapin sa 25 kilos?
-
Sa unsang paagi ang gibug-aton niini nga mga situwasyon parehas sa pagdumala sa kaugtas ug kabalaka?
Aron tabangan ang mga estudyante nga masabtan ang lainlaing lebel sa kaugtas ug kabalaka, pwede nimong ipakigbahin ang handout nga “Kaugtas ug Kabalaka.” Dapita ang mga estudyante sa pagbasa sa tsart ug tubagon ang mga pangutana sa pagsukod sa kaugalingon diha sa ikatulong kolum.
Samtang inyong tun-an kini nga leksiyon, tinguhaa ang tabang gikan sa Ginoo samtang imong tun-an ang mga kahanas nga motabang ninyo sa pagdumala sa kaugtas ug kabalaka.
Tambag gikan sa usa ka propeta
Basaha ang mosunod nga pamahayag gikan ni Presidente Russell M. Nelson, nga pangitaon kon unsaon nato pagbuntog ang atong mga kabalaka.
Ang Ginoo namahayag nga bisan sa dili ordinaryo nga mga hagit, kadtong kinsa motukod sa ilang mga pundasyon diha ni Jesukristo, ug nakat-on unsaon sa paggamit sa Iyang gahom, dili kinahanglan nga magpadala sa talagsa nga mga kabalaka niining panahona. (“Ang Templo ug ang Inyong Espirituwal nga Pundasyon,” Liahona, Nob. 2021, 94)
-
Unsa ang imong nagustohan o nakat-onan gikan niini nga pamahayag?
Pwedeng isulti sa mga estudyante ang kamatuoran nga sama sa: Samtang atong gamiton ang gahom ni Jesukristo, atong madumala ang atong mga kabalaka.
-
Unsa kahay ipasabot sa paggamit sa gahom sa Manluluwas?
-
Sa unsang paagi kaha makatabang nato ang Iyang gahom aron madumala ang kaugtas ug kabalaka? Unsang dugang nga mga kapanguhaan ang atong mailhan sa tabang ni Jesukristo?
Ang nahibiling bahin niini nga leksiyon motabang sa mga estudyante og kahigayonan sa pagpraktis nga gamiton ang mga baroganan sa ebanghelyo nga motabang nila sa paggamit sa gahom ni Jesukristo aron madumala ang kabalaka.
Pagsusi sa atong mga gilaoman ug pagdangop sa Ginoo alang sa tabang
Ang usa ka paagi nga atong madumala atong kaugtas ug kabalaka mao ang pag-ila sa atong mga gilaoman ug pagpahiuyon niini sa unsay gitinguha sa Ginoo alang kanato. Ang dili makab-ot o wala makab-ot nga mga gilaoman makapadismaya ug makaugtas.
Basaha ang Mosiah 4:27, nga pangitaon kon unsay gilaoman sa Ginoo kanato.
Kon dili mahisgotan sa mga estudyante, timan-i nga wala magdahom ang Ginoo nga mas kusog kitang modagan kay sa atong makaya, pero nagdahom gihapon Siya nga maningkamot kita. Dili kita kinahanglang moalsa og sobra, pero kinahanglang kanunay kitang maningkamot.
Pananglitan sa usa ka tawo nga kinahanglang susihon ang iyang mga gilaoman, ipakigbahin nga samtang nangulo siya sa mga anak sa Israel isip propeta, gisulayan ni Moises nga himoon ang labaw sa iyang makaya. Gitabangan sa Ginoo si Moises pinaagi sa tambag sa iyang ugangan nga si Jetro.
Basaha ang Exodo 18:13–18, nga pangitaon kon nganong nabalaka ang ugangan ni Moises.
-
Asa nga hugpong sa mga pulong ang nagpakita unsay mahitabo ni Moises kon padayon niyang tambagan ang mga tawo sa tibuok adlaw kada adlaw?
-
Unsa kaha ang susama niini karon?
Hatagi og kahulogan
Ipasabot sa mga estudyante nga makatabang ang kahanas sa pagsusi sa ilang mga gilaoman pinaagi sa paggamit sa mosunod nga duha ka pangutana. Ikonsiderar ang pagsulat niini diha sa pisara.
-
Naningkamot ba ko sa pagbuhat og mas labaw o mas ubos kay sa gusto sa Ginoo nga buhaton nako (mas paspas ang akong pagdagan kay sa akong makaya o wala ko naningkamot)?
-
Unsaon nako pagdangop sa Ginoo alang sa tabang?
Modelo
-
Kon kamo ang anaa sa sitwasyon ni Moises, unsaon ninyo pagtubag ang duha ka pangutana diha sa pisara?
Kon makatabang ang dugang nga modernong mga ehemplo, ikonsiderar ang pagdapit sa mga estudyante sa pagpakigbahin og pipila ka dili makab-ot nga pagdahom nila o sa uban. Pwede nilang gamiton ang mga pangutana diha sa pisara aron timbangtimbangon ang mosunod nga mga gilaoman:
-
Mobasa ko sa Basahon ni Mormon sulod sa 90 minutos kada adlaw.
-
Dili na gyod ko masayop pag-usab.
-
Dili ko kinahanglang mangandam para sa misyon. Unya na lang nako hunahunaon kon tua na ko didto.
Praktis
Pagpili og usa ka butang sa imong kinabuhi nga nakamugna og kaugtas ug makapabalaka nimo ug pagpraktis sa pagtimbangtimbang sa imong mga gilaoman. Tinguhaa ang giya sa Espiritu Santo samtang imong isukna sa imong kaugalingon ang mga pangutana diha sa pisara ug hunahunaa kon unsaon nimo pagdangop sa Ginoo alang sa tabang.
Pakigtambag niadtong imong gisaligan aron mailhan ang sunod nga lakang
Hatagi og kahulogan ang kahanas
Tabangi ang mga estudyante nga masabtan nga human nila matimbangtimbang ang ilang mga gilaoman, gusto sa Ginoo nga mahibalo sila kon unsay sunod nga himoon. Usa ka paagi nga ang Ginoo motabang nato mao ang pinaagi sa uban; pananglitan, pakitambag niadtong atong gisaligan. Samtang magpatambag sa uban ang mga estudyante, pwede nilang hisgotan kon unsay kinahanglan nilang himoon karon, unsay makahulat, o unsay pwedeng hunongon o ipahimo sa uban. Ipasalig sa mga estudyante nga dili makatabang ang pagbati nga sad-an nga nagtakda og mga limitasyon aron protektahan ang imong kahimsog o pag-ingon og “dili” o “dili lang usa” sa pipila ka kahigayonan.
Imodelo ang kahanas
Gitabangan sa Ginoo si Moises pinaagi sa iyang ugangan nga si Jetro. Samtang nakigtambag si Moises sa iyang ugangan, si Jetro misugyot og solusyon sa problema.
Basaha ang Exodo 18:19–24, nga pangitaon kon unsay gitambag ni Jetro nga sunod buhaton ni Moises.
-
Sa imong hunahuna, nganong nakatabang ang tambag ni Jetro?
Imbes kausahon og atubang ang tanan niyang problema, nadawat ni Moises ang gikinahanglan niyang tabang aron himoon ang sunod nga lakang.
-
Kinsa nga mga tawo ang gusto sa Ginoo nga pangayoan nimog tambag dihang maugtas o mabalaka ka? Unsang tambaga ang ilang gihatag nimo?
-
Sa unsang paagi ang maalamong tambag makatabang aron makuhaan ang kaugtas o kabalaka nimo o sa imong kaila?
Tabangi ang mga estudyante sa pag-ila nga makatabang ang Ginoo kanila pinaagi sa ilang mga ginikanan, mga magulang nga igsoon, mga magtutudlo, mga magtatambag, mga propesyonal sa kahimsog sa panghunahuna, mga lider sa Simbahan, ug uban pa dihang mabalaka o maugtas sila.
Ipraktis ang kahanas
Sa inyong journal sa pagtuon, pamalandongi ang panahon dihang gibati ninyo nga nabug-atan, naugtas, o nabalaka. Isulat kon kinsay gusto sa Ginoo nga pangayoan nimo og tambag kon unsay sunod nga himoon ug kon sa unsang paagi kaha makatabang ang pagpakig-istorya sa maong tawo.
Ikonsiderar ang pagdapit sa mga estudyante nga rebyohon ang handout ug ipakigbahin ang ilang ganahan o nakat-onan niini nga leksiyon. Idugang ang kaugalingon ninyong mga hunahuna ug pamatuod sa kamatuoran niini nga leksiyon.