Seminary
Pagtakda og mga Tumong: Epektibong Pagtakda og mga Tumong ug Pagkab-ot Niini

“Pagtakda og mga Tumong: Epektibong Pagtakda og mga Tumong ug Pagkab-ot Niini,” Manwal sa Magtutudlo sa Seminary sa Daang Tugon (2026)

“Pagtakda og mga Tumong: Epektibong Pagtakda og mga Tumong ug Pagkab-ot Niini,” Manwal sa Magtutudlo sa Seminary sa Daang Tugon

Alang sa Kalig-on sa mga Kabatan-onan: Paghimo og mga Pagpili: Leksiyon 172

Pagtakda og mga Tumong

Epektibong Pagtakda og mga Tumong ug Pagkab-ot Niini

Illustration from August

Bisan pag daghang tawo ang napanalanginan tungod sa pagtakda ug pagkab-ot og mga tumong, naay uban nga gibalewala ang ilang mga tumong ug madismaya kon dili nila kini makab-ot. Gusto sa Ginoo nga mahimo kitang sama Niya ug sa Langitnong Amahan (tan-awa ang 3 Nephi 12:48). Tabangan kita Niya samtang naningkamot kitang makakat-on ug mouswag. Kini nga leksiyon makatabang sa mga estudyante nga mas maduol sa Ginoo samtang nagkat-on sa pagtakda ug pagkab-ot sa ilang personal nga mga tumong uban sa Iyang tabang.

Pagpangandam sa estudyante: Dapita ang mga estudyante sa pagpamalandong sa ilang dugay ug dali makab-ot nga mga tumong. Pwede usab nilang pangutan-on ang ilang mga kaila kon unsay ilang nakat-onan bahin sa pagtakda ug pagkab-ot og mga tumong.

Posibleng mga Kalihokan sa Pagkat-on

Mga tumong ug mga desisyon

Ikonsiderar ang pagsugod sa klase pinaagi sa pagdrowing sa mosunod nga diagram diha sa pisara. Dapita ang mga estudyante nga buhaton ang sama diha sa ilang mga journal sa pagtuon.

Pwedeng isulat sa mga estudyante ang ilang mga tubag sa mosunod nga mga pangutana tupad sa mga stick nga tawo sa tuo.

  • Unsay inyong gilaoman nga makab-ot tulo ka bulan gikan karon? sulod sa usa ka tuig? sulod sa lima ka tuig?

    Dapita ang mga estudyante sa pagpamalandong sa mosunod nga mga pangutana. Dayon pwedeng ipakigbahin sa mga andam nga estudyante ang ilang mga tubag ngadto sa klase.

  • Unsa ang inyong mgahunahuna o mga pagbati samtang inyong hunahunaon kini nga mga tumong? Ngano man?

Gusto sa Langitnong Amahan ug ni Jesukristo nga mahimo kamong labing maayo nga bersiyon sa inyong kaugalingon—nga sa kataposan mahimong sama Kanila (tan-awa ang 3 Nephi 12:48). Sa leksiyon karong adlawa, tinguhaa ang giya sa Espiritu aron makita kon sa unsang paagi kamo mahimong matabangan Nila sa pagtakda ug pagkab-ot sa imong personal nga mga tumong.

Ang tabang sa Ginoo

Basaha ang mosunod nga pamahayag ni Elder Ulisses Soares sa Korum sa Napulong Duha ka Apostoles, nga pangitaon kon unsay imong makat-onan bahin sa pagtakda ug pagkab-ot sa atong mga tumong:

Elder Ulisses Soares, Quorum of the Twelve Apostles official portrait.

Ang tabang nga atong madawat gikan sa Ginoo diha sa atong mga tumong ug matarong nga mga paningkamot walay kinutoban, ug Siya mosuporta kanato sa bisan unsang maayo ug matarong nga paningkamot. … Ako modapit kaninyo sa pagkonsiderar og mga paagi sa pagsunod sa matarong nga mga tinguha sa inyong kaugalingon nga kinabuhi, bisan unsa pa ang inyong kahimtang. Ipasalig ko kaninyo nga ang Ginoo nahigugma sa matag usa kanato ug Siya anaa kanunay sa pagtabang kanato, bisan unsa pa man ang sitwasyon nga atong giatubang. (“Mga Tumong, Paglambo, ug Pag-uswag—Bag-o nga mga Mensahe gikan sa mga Propeta ug Apostoles,” [digital lamang nga artikulo], Liahona, Ene. 2023, Librarya sa Ebanghelyo)

  • Sa unsang paagi ang mensahe ni Elder Soares magamit sa pagtakda ug pagkab-ot sa atong mga tumong?

    Samtang mogamit ang mga estudyante og lainlaing pulong, tabangi sila nga makita nga ang Ginoo motabang kanato sa pagtakda ug pagkab-ot sa atong matarong nga mga tumong. Ikonsiderar ang pagsulat niini nga kamatuoran diha sa pisara.

    Dayon isulat diha sa pisara ang Ang Ginoo, ibabaw sa diagram sa sinugdanan sa leksiyon, ug ipangutana ang mosunod.

  • Unsay kalahian alang kanimo ang pagkasayod nga tabangan kamo sa Ginoo samtang magtakda ug magtinguha kamo sa pagkab-ot sa inyong mga tumong?

    Makatabang tingali ang pagpasabot nga makatakda kita og mga tumong sa daghang bahin sa atong kinabuhi, apil ang tumong sa atong edukasyon, mga relasyon, ug pisikal nga kahimsog. Ang bisan unsang paningkamot sa pagtubo, paglambo, o pag-uswag sa paagi nga sama ni Kristo maoy matarong nga tumong.

    Madismaya tingali ang pipila ka estudyante bahin sa pagtakda og mga tumong tungod kay gibati nila nga sila mas daghang pakyas niini kay sa ilang makab-ot. Aron tabangan ang kini mga estudyante, ikonsiderar ang pagpangutana sa mosunod.

  • Dihang dili nato makab-ot ang atong mga tumong, nganong importanteng hinumdoman nga gimahal kita sa Ginoo ug naa Siya aron tabangan kita, sama sa gitudlo ni Elder Soares?

Pwede nimong dapiton ang mga estudyante sa pagbasa sa 2 Nephi 4:17–21, 26–28 ug pangitaa kon sa unsang paagi midangop sa Ginoo si Nephi dihang mibati siyang napakyas siya.

Alang sa usa ka ehemplo kon sa unsang paagi kita tabangan sa Ginoo sa pagkab-ot sa atong mga tumong—bisan kini daw imposible—ikonsiderar ang paggamit sa ehemplo ni Abraham. Tingali narebyo na kini nga istorya sa mga estudyante diha sa Leksiyon 22: “Abraham 1.” Kon mao, pwede nimong ipahaom ang kalihokan sa ubos base sa panginahanglan sa mga estudyante.

Pipila ka tuig sa wala pa siya gitawag isipn propeta sa Ginoo, nagdako si Abraham sa usa ka yuta nga puno og pagkadaotan ug idolatriya. Bisan ang kaugalingon niyang amahan determinado nga “hunoson ang iyang kinabuhi” (Abraham 1:30).

Basaha ang Abraham 1:1–2, 4, nga pangitaon ang mga tumong nga gitakda ni Abraham alang sa iyang kaugalingon.

  • Unsay imong nakaplagan?

  • Kon ikonsiderar ang mga kahimtang ni Abraham, unsa kaha kalisod kab-oton kini nga mga tumong?

Milagrosong giluwas sa Ginoo ang kinabuhi ni Abraham ug gisaaran nga tabangan siya sa pagkab-ot sa iyang matarong nga mga tumong (tan-awa ang Abraham 1:15–20).

Basaha ang Abraham 1:18–19, nga pangitaon kon sa unsang paagi tabangan sa Ginoo si Abraham.

  • Sa unsang paagi ang kasinatian ni Abraham makaimpluwensiya sa imong panghunahuna bahin sa imong mga tumong?

  • Sa unsang paagi gitabangan ka o ang imong kaila sa Langitnong Amahan ug ni Jesukristo sa pagtakda o pagkab-ot sa matarong nga tumong?

Proseso sa pagtakda og tumong

icon sa seminary Hatagi ang kada estudyante sa handout nga “Mga Baroganan alang sa Pagtakda ug Pagkab-ot sa mga Tumong.” Pwede nga iakses sa mga estudyante kini nga impormasyon pinaagi sa pag-adto sa panid 151 sa Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023).

Pwedeng tun-an sa mga estudyante ang handout sa indibidwal ug dayon hisgotan ang mga tubag sa mga pangutana sa ubos isip mga managpares o uban ang gagmayng grupo.

Rebyoha ang mga baroganan diha sa handout ug pangandam sa pagtubag sa mosunod nga mga pangutana:

  • Asang bahina niini nga proseso ang maayo ka? Asang bahina ang labing lisod para nimo? Ngano man?

  • Unsa kaha kon ilakip ang Ginoo ug ang pagtinguha sa Iyang tabang sa tibuok proseso?

Human sa igong panahon, pwedeng ipakigbahin sa pipila ka estudyante ang ilang mga tubag ngadto sa klase.

Pagpraktis sa pagtakda og tumong

Kon anaa pay panahon, ikonsiderar ang pagtabang sa imong mga estudyante sa pagpraktis sa pagtakda ug pagkab-ot og tumong gamit ang proseso. Pwede nilang himoon ang mosunod nga kalihokan uban ang ilang mga kapares o mga gamayng grupo. O pwede kang moadto dayon sa seksiyon nga “Imong Tumong.”

Ilista diha sa imong journal sa pagtuon ang pipila ka mga pananglitan sa matarong ug bililhong mga tumong nga pwedeng itakda sa mga tin-edyer para sa ilang kinabuhi.

Dayon pilia ang usa niini nga mga tumong ug, gamit ang mga baroganan sa handout, paghimog senaryo diin realistikong mahimo sa usa ka tawo ang kada lakang. Ikonsiderar kon unsaon nimo paglakip ang Ginoo niini nga proseso.

Pwede nimong gamiton ang mosunod nga senaryo ingon nga modelo:

  1. Mihangyo si Jayden sa Langitnong Amahan alang sa tabang sa pagtakda og tumong. Midesisyon siya sa pagtuon sa Basahon ni Mormon kada adlaw sulod sa 10 ka minuto.

  2. Midesisyon siya nga momata og mas sayo aron makatuon pa siya sa dili pa moeskuwela.

  3. Human sa usa ka semana, nabantayan ni Jayden nga permi siyang makatulog og balik. Nag-ampo siya alang sa tabang.

  4. Human sa duha ka semana, gibati ni Jayden nga napakyas siya sa iyang tumong. Gihangyo niya ang Langitnong Amahan nga tabangan siyang mabati ang gugma Niya ug ni Jesukristo para kaniya. Nadasig siya ug midesisyon nga mosulay pag-usab, nga masaligong tabangan siya sa Langitnong Amahan ug ni Jesukristo. Midesisyon siya nga matulog og mas sayo kada gabii aron mas dali siyang makamata.

Human ang igong panahon, dapita ang pipila ka estudyante nga ipakigbahin ang ilang mga senaryo.

Imong tumong

Ang mosunod nga kalihokan maoy usa ka paagi nga makaplano ang mag estudyante sa paglakip sa Ginoo diha sa ilang mga tumong. Pwede nilang isulat ang ilang mga tumong ug plano diha sa ilang journal sa pagtuon o sa handout.

Pamalandongi ang personal nimong mga tumong gamit ang unang lakang nga anaa sa handout. Aron mahimo na, pwede nimong pamalandongan ang imong drowing sa sinugdanan sa leksiyon.

Isulat ang usa o duha ka tumong nga gusto nimong kab-oton. Paghimo og detalyadong plano nga naglatid sa mga lakang nga imong himoon aron makab-ot kini. Seguroa nga iapil nimo sa imong plano kon unsaon nimo paglakip ang Ginoo sa imong mga tumong.

Dasiga ang mga estudyante sa ilang mga paningkamot sa pagkab-ot sa ilang mga tumong ug pahinumdomi sila sa tabang sa Langitnong Amahan ug ni Jesukristo. Ikonsiderar ang pagbasa pag-usab sa pamahayag ni Elder Soares ug sa pagpakigbhin imong pagpamatuod sa iyang gitudlo.