« ដើម្បីកម្លាំងនៃយុវជន ៖ ការភ្ជាប់ជម្រើសរបស់យើងជាមួយព្រះគ្រីស្ទ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ដើម្បីកម្លាំងនៃយុវជន ៖ ការភ្ជាប់ជម្រើសរបស់យើងជាមួយព្រះគ្រីស្ទ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ដើម្បីកម្លាំងនៃយុវជន ៖ ការធ្វើការជ្រើសរើស ៖ មេរៀនទី ១៧១
សេចក្តីណែនាំដើម្បីកម្លាំងនៃយុវជន
ការភ្ជាប់ជម្រើសរបស់យើងជាមួយព្រះគ្រីស្ទ
ពេញមួយជីវិតរបស់យើង យើងធ្វើការជ្រើសរើសឥតឈប់ឈរ ។ នៅពេលយើងមានអារម្មណ៍វិលវល់ក្នុងការធ្វើការសម្រេចចិត្តដ៏ត្រឹមត្រូវ ព្រះយេស៊ូវគ្រីស្ទ និងគោលលទ្ធិរបស់ទ្រង់អាចនាំមកនូវកម្លាំង និងការណែនាំដល់យើង ។ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស គឺជាកន្លែងមួយដែលយើងអាចទៅ ដើម្បីស្វែងរកសេចក្តីពិតអំពីព្រះយេស៊ូវគ្រីស្ទ និងគោលលទ្ធិរបស់ទ្រង់ ។ មេរៀននេះអាចជួយសិស្សឲ្យអនុវត្តការប្រើប្រាស់សៀវភៅណែនាំ ដើម្បីកម្លាំងនៃយុវជន ដើម្បីធ្វើការជ្រើសរើសដែលបំផុសគំនិត ដោយផ្អែកលើព្រះយេស៊ូវគ្រីស្ទ និងគោលលទ្ធិរបស់ទ្រង់ ។
ការរៀបចំសិស្ស ៖ អញ្ជើញសិស្សឲ្យពិនិត្យឡើងវិញនូវផ្នែកមួយនៃការជ្រើសរើសរបស់ពួកគេនៅក្នុង ដើម្បីកម្លាំងនៃយុវជន ។ សិស្សអាចពិចារណាពីរបៀបដែលការបង្រៀនរបស់ព្រះយេស៊ូវគ្រីស្ទនៅក្នុងផ្នែកនោះអាចជួយពួកគេធ្វើការសម្រេចចិត្តដែលបំផុសគំនិត ។
សកម្មភាពរៀនសូត្រដែលអាចមាន
ព្រះយេស៊ូវគ្រីស្ទគឺជាសិលារបស់ខ្ញុំ
ពីមុនចាប់ផ្ដើមមេរៀននេះ សូមចែកកូនសៀវភៅ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ដល់សិស្ស ឬជួយពួកគេមើលនៅលើកំណែអេឡិចត្រូនិច នៅក្នុងបណ្ណាល័យដំណឹងល្អ ។
សូមពិចារណាចាប់ផ្ដើមថ្នាក់ដោយការដាក់បង្ហាញរូបភាពបង្គោលភ្លើងនៅអំឡុងពេលមានព្យុះ ។
-
តើគោលការណ៍ដំណឹងល្អអ្វីខ្លះ ដែលអ្នកអាចបង្រៀននរណាម្នាក់ដោយប្រើរូបភាពនេះ ?
ប្រសិនបើសិស្សត្រូវការជំនួយ អ្នកអាចសួរពួកគេថាតើព្យុះ ឬសិលាអាចតំណាងឲ្យអ្វី ប្រសិនបើបង្គោលភ្លើងតំណាងឲ្យជីវិតរបស់យើង ។ សិស្សអាចនឹងចែកចាយគោលការណ៍ផ្សេងៗគ្នា ។ សូមអរគុណពួកគេសម្រាប់ការចូលរួមចំណែកក្នុងការពិភាក្សា ។
សូមអាន ទំនុកដំកើង ៦២:៥–៧ ដោយរកមើលពីរបៀបដែលពាក្យពេចន៍នៅក្នុងទំនុកដំកើងនេះទាក់ទងនឹងរូបភាពបង្គោលភ្លើង ។
-
ហេតុអ្វីបានជាសិលាជាការពិពណ៌នាដ៏ល្អសម្រាប់ព្រះយេស៊ូវគ្រីស្ទ ?
សូមអានសេចក្តីថ្លែងការណ៍ខាងក្រោមពីអែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ ដោយរកមើលពីរបៀបដែលយើងអាចធ្វើឲ្យព្រះយេស៊ូវគ្រីស្ទ ជាសិលារបស់យើង ។
រាល់ពេលដែលអ្នកធ្វើការជ្រើសរើសសុចរិតដោយផ្អែកលើសេចក្តីពិតដ៏នៅអស់កល្បជានិច្ចរបស់ព្រះអង្គសង្គ្រោះ នោះអ្នកបង្ហាញថា អ្នកចង់បានទ្រង់គង់នៅក្នុងជីវិតរបស់អ្នក ។ ការជ្រើសរើសទាំងនោះបានបើកទ្វារស្ថានសួគ៌ ហើយកម្លាំងរបស់ទ្រង់នឹងចូលមកក្នុងជីវិតរបស់អ្នក ។ …
… ស្រដៀងគ្នានេះដែរ ពេលយើងស្ថាបនាជីវិតរបស់យើង វាសំខាន់ក្នុងការធ្វើការជ្រើសរើសឲ្យបានល្អ ។ ហើយវាសំខាន់ដើម្បីយល់ពីសេចក្តីពិតដ៏នៅអស់កល្បរបស់ព្រះអង្គសង្គ្រោះ ។ ប៉ុន្តែកម្លាំងដែលយើងនឹងត្រូវការដើម្បីទប់ទល់នឹងព្យុះជីវិតកើតឡើង នៅពេលយើង ភ្ជាប់ ជម្រើសរបស់យើងជាមួយព្រះយេស៊ូវគ្រីស្ទ និងគោលលទ្ធិរបស់ទ្រង់ ។ នោះជាអ្វីដែល ដើម្បីកម្លាំងនៃយុវជន ជួយយើងធ្វើ ។ ( « ដើម្បីកម្លាំងនៃយុវជន ៖ សារលិខិតរបស់ព្រះអង្គសង្រ្គោះផ្ញើមកកាន់អ្នក » ដើម្បីកម្លាំងនៃយុវជន ខែមីនា ឆ្នាំ២០២៤ ទំព័រ ៣៨ )
-
តើយើងអាចរៀនអ្វីខ្លះចេញពីអែលឌើរ អុជដូហ្វ ?
នៅពេលសិស្សចែកចាយ សូមជួយពួកគេស្វែងរកសេចក្តីពិត ដូចជាសេចក្តីពិតមួយនេះ ៖ យើងទទួលបានកម្លាំងមកពីព្រះយេស៊ូវគ្រីស្ទ នៅពេលយើងភ្ជាប់ជម្រើសរបស់យើងជាមួយទ្រង់ និងគោលលទ្ធិរបស់ទ្រង់ ។ អ្នកប្រហែលជាចង់សរសេរសេចក្ដីពិតនេះនៅលើក្ដារខៀន ។
-
តើអ្នកគិតថា ការភ្ជាប់ជម្រើសរបស់យើងជាមួយព្រះយេស៊ូវគ្រីស្ទ និងគោលលទ្ធិរបស់ទ្រង់មានន័យដូចម្ដេច ?
សិស្សអាចនឹងចែកចាយរឿងដូចជាការធ្វើតាមគំរូរបស់ព្រះយេស៊ូវគ្រីស្ទ ធ្វើការជ្រើសរើសដោយផ្អែកលើការបង្រៀនរបស់ទ្រង់ ឬការអធិស្ឋានទូលសុំការណែនាំពីព្រះវរបិតាសួគ៌ពេលធ្វើការសម្រេចចិត្ត ។
សូមធានាថាសិស្សយល់ពី ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស គឺជាឧបករណ៍មួយដែលជួយយើងភ្ជាប់ជម្រើសរបស់យើងជាមួយព្រះយេស៊ូវគ្រីស្ទ ។
អ្នកក៏អាចចែកចាយសេចក្តីថ្លែងការណ៍ដូចខាងក្រោមមកពីអែលឌើរ អុជដូហ្វ ។
អែលឌើរ អុជដូហ្វ បានពន្យល់ពីសភាពដើម្បីភ្ជាប់ជម្រើសរបស់យើងជាមួយនឹងព្រះយេស៊ូវគ្រីស្ទ និងគោលលទ្ធិរបស់ទ្រង់ ។
មិត្តភក្តិរបស់អ្នកអាចនឹងដឹងថាអ្នកនឹងមិនបោកប្រាស់ ឬកុហកឡើយ ហើយថាអ្នកយកចិត្តទុកដាក់លើការអប់រំ ។ ប៉ុន្តែ តើពួកគេដឹងទេថា នេះគឺដោយសារព្រះយេស៊ូវគ្រីស្ទបានបង្រៀនថា « សេចក្តីពិតនោះនឹងប្រោសឲ្យអ្នករាល់គ្នាបានរួច » ? [ យ៉ូហាន ៨:៣២; « សេចក្ដីពិតនោះនឹងប្រោសឲ្យអ្នករាល់គ្នាបានរួច » ដើម្បីកម្លាំងនៃយុវជន ខែមីនា ឆ្នាំ២០២៤ ទំព័រ ៣០] ។ ( « ដើម្បីកម្លាំងនៃយុវជន ៖ សារលិខិតរបស់ព្រះអង្គសង្រ្គោះផ្ញើមកកាន់អ្នក » ដើម្បីកម្លាំងនៃយុវជន ខែមីនា ឆ្នាំ២០២៤ ទំព័រ ៣៨ )
-
តើការភ្ជាប់ជម្រើសរបស់យើងជាមួយព្រះយេស៊ូវគ្រីស្ទអាចពង្រឹងយើងដើម្បីទប់ទល់នឹងព្យុះជីវិតដោយរបៀបណា ?
គិតអំពីស្ថានភាពដែលអ្នកកំពុងប្រឈមមុខនាពេលបច្ចុប្បន្ន ឬគិតថានឹងប្រឈមមុខនាពេលអនាគត ដែលអាចតម្រូវឲ្យអ្នកធ្វើការជ្រើសរើសដ៏ពិបាក ។ សូមពិចារណាពីរបៀបដែលព្រះយេស៊ូវគ្រីស្ទ និងគោលលទ្ធិរបស់ទ្រង់អាចជួយអ្នក ។
ស្ដាប់តាមការបំផុសគំនិតនៃព្រះវិញ្ញាណនៅពេលអ្នកអនុវត្តការភ្ជាប់ជម្រើសរបស់អ្នកជាមួយព្រះយេស៊ូវគ្រីស្ទ ដោយមានជំនួយពីសៀវភៅណែនាំ ដើម្បីកម្លាំងនៃយុវជន ។
រចនាសម្ព័ន្ធនៃសៀវភៅណែនាំ
គោលបំណងនៃផ្នែកនេះគឺដើម្បីជួយសិស្សឲ្យស្គាល់ពីរបៀបសៀវភៅណែនាំ ដើម្បីកម្លាំងនៃយុវជន ត្រូវបានរៀបចំឡើង ។ ប្រសិនបើសិស្សរបស់អ្នកស្គាល់សៀវភៅណែនាំនេះរួចហើយ អ្នកអាចរំលងផ្នែកនេះ ហើយចូលទៅកាន់ផ្នែកគំរូ ។
សូមឲ្យសិស្សយោងទៅក្រាហ្វិកនៅខាងក្រោម « ធ្វើការជ្រើសរើសដែលបំផុសគំនិត » នៅក្នុងសៀវភៅណែនាំ ឬដាក់បង្ហាញព័ត៌មានខាងក្រោមនៅលើក្រាហ្វិក ។
« នៅក្នុង ដើម្បីកម្លាំងនៃយុវជន អ្នកនឹងរកឃើញការបង្រៀនជាច្រើនរបស់ព្រះយេស៊ូវគ្រីស្ទ និងព្យាការីទាំងឡាយរបស់ទ្រង់ ។ ដោយមានសេចក្តីពិតទាំងនេះជាមគ្គទេសក៍របស់អ្នក នោះអ្នកអាចធ្វើការជ្រើសរើសដែលបំផុតគំនិត ដែលនឹងផ្ដល់ពរដល់អ្នកឥឡូវនេះ និងរហូតដល់ភាពអស់កល្បជានិច្ច » ( « ធ្វើការជ្រើសរើសដែលបំផុសគំនិត » ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] ទំព័រ ៤ ) ។ សៀវភៅណែនាំនេះចែកចេញជាប្រធានបទផ្សេងៗគ្នា ហើយប្រធានបទនីមួយៗមានបីផ្នែក ៖
-
សេចក្តីពិតដ៏អស់កល្បជានិច្ច ឬគោលលទ្ធិនៃដំណឹងល្អរបស់ព្រះយេស៊ូវគ្រីស្ទដែលបានស្តារឡើងវិញ
-
ការអញ្ជើញ ឲ្យធ្វើសកម្មភាពតាមសេចក្តីពិតទាំងនោះ
-
ពរជ័យដែលបានសន្យា ដែលព្រះអម្ចាស់ប្រទានដល់អស់ អ្នកដែលរស់នៅតាមការបង្រៀនរបស់ទ្រង់
គំរូនៃដំណើរការ
ផ្នែកនេះប្រើឧទាហរណ៍ពីយ៉ូសែបនៅស្រុកអេស៊ីព្ទ រត់គេចចេញពីប្រពន្ធរបស់ប៉ូទីផារ និងផ្នែក « រូបកាយរបស់អ្នកគឺពិសិដ្ឋ » ពី ដើម្បីកម្លាំងនៃយុវជន ជាគំរូសម្រាប់របៀបប្រើប្រាស់សៀវភៅណែនាំនេះដើម្បីធ្វើការជ្រើសរើសដែលបំផុសគំនិត ។
អ្នកអាចនឹងដាក់បង្ហាញរូបភាពយ៉ូសែបដែលរត់គេចពីប្រពន្ធរបស់ប៉ូទីផារ ហើយសួរសិស្សពីអ្វីដែលពួកគេចងចាំអំពីរឿងនោះ ។ បើចាំបាច់ សូមពន្យល់ថា ពេលកំពុងបម្រើនៅក្នុងផ្ទះរបស់ប៉ូទីផារ យ៉ូសែបប្រឆាំងដោយស្មោះត្រង់ជាមួយប្រពន្ធរបស់ប៉ូទីផារអូសទាញឲ្យមានទំនាក់ទំនងផ្លូវភេទ ( សូមមើល លោកុប្បត្តិ ៣៩:១–៨ ) ។ ឬសិស្សគួរតែមើល « Joseph in Egypt » ( ២:៥១ ) ចាប់ពីនាទីទី ០:០០ ដល់ ០:៤១ ។
សូមអាន លោកុប្បត្តិ ៣៩:៩–១២ ដោយរកមើលពីរបៀបដែលយ៉ូសែបបានភ្ជាប់ជម្រើសរបស់លោកជាមួយព្រះយេស៊ូវគ្រីស្ទ និងគោលលទ្ធិរបស់ទ្រង់ ។
-
តើអ្នកបានរកឃើញអ្វីខ្លះ ?
សូមពិចារណាបង្កើតក្រុមដែលមានសិស្សបីនាក់ ។ អញ្ជើញសមាជិកក្រុមនីមួយៗឲ្យជ្រើសរើសលេខផ្សេងៗគ្នាពីមួយទៅបី ដែលនឹងឆ្លើយតបទៅនឹងសំណួរមួយក្នុងចំណោមសំណួរខាងក្រោម ។
សិក្សាផ្នែក « រូបកាយរបស់អ្នកគឺពិសិដ្ឋ » នៅក្នុង ដើម្បីកម្លាំងនៃយុវជន ជាមួយនឹងការផ្ដោតដូចខាងក្រោម ៖
-
តើ « សេចក្តីពិតដ៏អស់កល្បជានិច្ច » ដែលអ្នកគិតថាបានជួយយ៉ូសែបធ្វើការជ្រើសរើសដែលលោកបានធ្វើ ?
-
តើយ៉ូសែបបានធ្វើតាម « ការអញ្ជើញ » អ្វីខ្លះ ?
-
តើ « ពរជ័យដែលបានសន្យា » អ្វីដែលអ្នកគិតថា យ៉ូសែបបានដកពិសោធន៍ ?
សូមអញ្ជើញសិស្សឲ្យចែកចាយនឹងដៃគូរបស់ខ្លួនអំពីអ្វីដែលពួកគេបានរកឃើញ ។ អ្នកអាចចង្អុលបង្ហាញថា ទោះបីយ៉ូសែបត្រូវបានចាប់ដាក់ក្នុងគុកសម្រាប់ការសម្រេចចិត្តរត់គេចចេញពីប្រពន្ធរបស់ប៉ូទីផារក៏ដោយ ក៏ព្រះអម្ចាស់នៅតែគង់នៅជាមួយគាត់ដែរ ( សូមមើល លោកុប្បត្តិ ៣៩:២០–២១; ៤១:៣៨–៤៨ ) ។
អនុវត្ត
ផ្ដល់ឱកាសឲ្យសិស្សដើម្បីអនុវត្តប្រើប្រាស់គំរូដែលបានរៀបចំឡើងនៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ជាមួយនឹងស្ថានភាពរបស់ពួកគេផ្ទាល់ ។ សូមពិចារណាប្រើប្រាស់សំណៅមេរៀន « ការភ្ជាប់ជម្រើសរបស់យើងជាមួយព្រះយេស៊ូវគ្រីស្ទ និងគោលលទ្ធិរបស់ទ្រង់ » » ដើម្បីធ្វើដូច្នេះ ។
បន្ទាប់ពីសិស្សបានបំពេញសំណៅមេរៀននោះហើយ អ្នកអាចអញ្ជើញពួកគេឲ្យចែកចាយពីរបៀបដែលពួកគេត្រូវបានពង្រឹងដោយព្រះយេស៊ូវគ្រីស្ទ នៅពេលពួកគេបានភ្ជាប់ជម្រើសរបស់ពួកគេជាមួយទ្រង់ និងគោលលទ្ធិរបស់ទ្រង់ ។
អ្នកអាចយោងទៅម្តងទៀតនូវ ទំនុកដំកើង ៦២:៥–៧ ។ បន្ទាប់មក សូមពិចារណាសួរសំណួរសិស្សដូចតទៅនេះ ។
-
តើប្អូនបានរៀនអ្វីខ្លះនៅថ្ងៃនេះអំពីការភ្ជាប់ទំនាក់ទំនងជាមួយព្រះយេស៊ូវគ្រីស្ទ និងគោលលទ្ធិរបស់ទ្រង់នៅក្នុងការសម្រេចចិត្តរបស់ប្អូន ?
សូមពិចារណាចែកចាយទីបន្ទាល់របស់អ្នកពីព្រះយេស៊ូវគ្រីស្ទ ។ អ្នកអាចបញ្ចប់ថ្នាក់ដោយប្រើសេចក្តីថ្លែងការណ៍មកពីផ្នែក « ព្រះយេស៊ូវគ្រីស្ទនឹងជួយអ្នក » នៅក្នុង ដើម្បីកម្លាំងនៃយុវជន ។ លើកទឹកចិត្តសិស្សឲ្យភ្ជាប់ជម្រើសរបស់ពួកគេជាមួយទ្រង់ និងគោលលទ្ធិរបស់ទ្រង់ ។