Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko e Ngāue ʻi he Tui ke Maʻu ha Ngaahi Talí: Laka Ki Muʻa, Falala ki he ʻEikí

“Ko e Ngāue ʻi he Tui ke Maʻu ha Ngaahi Talí: Laka Ki Muʻa, Falala ki he ʻEikí,” Fuakava Motuʻá – Tohi Lēsoni ʻa e Faiako Seminelí (2026)

“Ko e Ngāue ʻi he Tui ke Maʻu ha Ngaahi Talí: Laka Ki Muʻa, Falala ki he ʻEikí,” Fuakava Motuʻá – Tohi Lēsoni ʻa e Faiako Seminelí

Fakataukei Fakatokāteliné: Lēsoni 163

Ko e Ngāue ʻi he Tui ke Maʻu ha Ngaahi Talí

Laka Ki Muʻa, Falala ki he ʻEikí

A young woman in a green striped shirt and black skirt leans down to hug her friend who is sitting in a wheelchair.

ʻE lava ke faingataʻa ke tatali ki he finangalo mo e taimi ʻa e Tamai Hēvaní ke maʻu ha tali ki heʻetau ngaahi fehuʻi ʻi he ongoongoleleí. ʻOku lahi ha ngaahi talanoa ʻi he Fuakava Motuʻá ʻoku nau fakatātaaʻi ʻa e founga naʻe hokohoko atu ai hono fakahoko ʻe he kau muimui ʻo e ʻOtuá ha ngaahi fili naʻe fakahaaʻi ai ʻenau tui mo e falala kiate Iá lolotonga ʻenau fekumi ki ha ngaahi talí. ʻE lava ke tokoni ʻa e lēsoni ko ʻení ke ngāue ʻa e kau akó ʻi he tui kia Sīsū Kalaisi ʻi heʻenau fekumi ki ha ngaahi tali ki heʻenau ngaahi fehuʻi ʻi he ongoongoleleí.

Teuteu ʻa e tokotaha akó: Fakaafeʻi e kau akó ke toe vakaiʻi ʻa e palakalafi 5–7 ʻo e konga “Ko Hono Maʻu ʻo e ʻIlo Fakalaumālié” ‘i he Fakamatala ki he ʻElito ʻo e Fakataukei Fakatokāteliné (2023). Te nau lava ʻo teuteu ke vahevahe ʻa e ʻuhinga ʻoku nau pehē ai ʻoku mahuʻinga ʻetau ngaahi ngāué ʻi he taimi ʻoku tau fekumi ai ki ha tali ki ha ngaahi fehuʻi pe hohaʻa fekauʻaki mo e ongoongoleleí.

Ngaahi ʻEkitivitī Ako ʻOku Ala Fakahokó

Ko e tatali ki he ʻEikí ke maʻu ha tali ki he ngaahi fehuʻí

Fakakaukau ke fakaʻaliʻali ha ngaahi fakatātā mei ha niʻihi ʻo e ngaahi talanoa mei he Fuakava Motuʻá ʻo ha kakai naʻa nau ngāue ʻi he tui ki he ʻEikí. Te ke lava ʻo vahe ki ha fanga kiʻi kulupu iiki ʻo e kau akó ha potufolofola ke nau ako ʻa ia ʻoku felāveʻi mo ha taha ʻo e ngaahi fakatātaá. Te ke lava ʻo fili ha ngaahi talanoa hangē ko e:

Ko e fefine faivelenga ʻo Salifatí lolotonga e hongé (1 Ngaahi Tuʻi 17:7–12).
Ko e fekumi ʻa Neamani ke fakamoʻui hono kiliá (2 Ngaahi Tuʻi 5:1–3, 9–10).
Ko e uiuiʻi ʻo ʻĪnoke ke malanga ʻaki ʻa e ongoongoleleí (Mōsese 6:26–28, 31).

ʻE lava ke lau ʻe he kau akó ʻa e konga ʻo e talanoá ʻokú ne fakafeʻiloaki ʻa e tūkunga faingataʻá (ngaahi fakamoʻoni fakafolofolá ʻoku haʻi atu ʻi ʻolungá) pea tali ʻa e ngaahi fehuʻi ko ʻení. (ʻI he konga kimui ʻo e lēsoní, ʻe ako ʻe he kau akó ʻa e founga naʻe ngāue ai ʻa e niʻihi fakafoʻituitui ko ʻení ʻi he tuí.)

Naʻe fiemaʻu fēfē ʻa e tui ki he ʻEikí ʻi he tūkunga ʻo e tokotaha ko ʻení?
Ko e hā ha ngaahi hohaʻa pe ngaahi tūkunga ʻe ala fehangahangai mo e toʻu tupú he ʻahó ni ʻe fiemaʻu ai ke nau ngāueʻi ʻenau tui ki he ʻEikí?

Kapau ʻe tokoni ki he kau akó ke nau feinga ke ʻiloʻi e ngaahi sīpinga ʻo e ngaahi fehuʻi ʻi onopōní, te ke lava ʻo huluʻi e vitiō “Act in Faith: The Stonemason” (4:57), mei he taimi 0:00 ki he 1:48, pea fakaafeʻi e kau akó ke nau kumi e ngaahi tūkunga faingataʻa ne fehangahangai mo e ongo toʻu tupu ko ʻení. Fakakaukau ke tokoni ke ʻiloʻi ʻe he kau akó ʻa e ngaahi fehuʻi naʻe maʻu ʻe he toʻu tupú. Te ke lava ʻo fakaafeʻi e kau akó ke hiki e ngaahi fehuʻí ʻi he konga ʻe taha ʻo e palakipoé.

4:56

Hili hono ʻilo ʻe he kau akó ha ngaahi fehuʻí, te ke lava ʻo fakaafeʻi kinautolu ke tali ʻi heʻenau tohinoa akó ʻa e ngaahi fehuʻí ni.
Ko e fē ha taimi kuó ke maʻu ai pe ko ha taha ʻokú ke ʻilo ha ngaahi fehuʻi pe hohaʻa fekauʻaki mo e ongoongoleleí?
Ko e hā ha ngaahi meʻa kuó ke fai pe te ke lava ʻo fai ke ongoʻi ofi ai ki he Fakamoʻuí ʻi he taimi ʻokú ke maʻu ai ha ngaahi hohaʻa pe fehuʻi fekauʻaki mo e ongoongoleleí?

ʻOku angamaheni pē ke ʻi ai ha ngaahi fehuʻi pe hohaʻa fekauʻaki mo e Tamai Hēvaní, Sīsū Kalaisi, pe ko ʻEna ongoongoleleí. ʻE lava ke tokoniʻi kitautolu ʻe he tefitoʻi moʻoni ʻe tolu ki hono Maʻu ʻo e ʻIlo Fakalaumālié ke tau fehangahangai mo e ngaahi fehuʻi pe hohaʻa faingataʻá. ʻE lava ke tokoni ʻa e ngaahi tefitoʻi moʻoni ko ʻení ke mahino kiate kitautolu ʻa e founga ke nofo ofi ai ki he Tamai Hēvaní mo Sīsū Kalaisi ʻi heʻetau fekumi ki he ngaahi talí.

Ko e tuí ko ha tefitoʻi moʻoni ia ʻo e ngāue

Te ke lava ʻo vahevahe mo e kau akó ʻe nofotaha ʻa e lēsoni ʻo e ʻaho ní ʻi he tefitoʻi moʻoni ʻuluakí: Ngāue ʻi he tui. Fakakaukau ke hiki ʻa e moʻoni taʻekakato ko ʻení ʻi he palakipoé: ʻI he taimi ʻoku tau fehangahangai ai mo ha ngaahi fehuʻi pe hohaʻa ʻi he ongoongoleleí, te tau lava ʻo ngāue ʻi he tui kia Sīsū Kalaisi ʻaki ʻetau…

Te ke lava ʻo hiki ʻa e saati ko ʻení ʻi he palakipoé, ʻo fakaafeʻi e kau akó ke nau kumi ha founga ʻe taha pe lahi ange ke fakakakato ai ʻa e foʻi moʻoni ʻoku fakaʻilongaʻi mataʻāʻā mei he palakalafi takitaha.

Lau ʻa e palakalafi 5, 6, mo e 7 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023), ʻo kumi ha ngaahi founga ke fakakakato ai ʻa e fakamatala ʻi he palakipoé.

	ʻI he taimi ʻoku tau fehangahangai ai mo ha ngaahi fehuʻi pe hohaʻa ʻi he ongoongoleleí, te tau lava ʻo ngāue ʻi he tui kia Sīsū Kalaisi ʻaki …
Palakalafi 5
Palakalafi 6
Palakalafi 7

ʻI hoʻo fakaʻaongaʻi e palakalafi takitaha, te ke fakakakato fēfē nai ʻa e fakamatala ʻi he palakipoé?
ʻOku ʻi ai nai ha ngaahi founga kehe ke ngāue ai ʻi he tui kia Sīsū Kalaisí te ke fie tānaki ki he lisi ko ʻení?

ʻE lava ke fakakakato ʻe he kau akó ʻa e fakamatalá ʻaki ha ngaahi kupuʻi lea hangē ko e:

… hokohoko atu hono tauhi e ngaahi fekaú. (palakalafi 5)

… falala ki he meʻa kuo tau ʻosi ʻilo ʻoku moʻoní. (palakalafi 6)

… falala ki he Tamai Hēvaní kae ʻoua kuo tau maʻu ha ngaahi tali. (palakalafi 7)

Te ke lava ʻo fakaʻaongaʻi ʻeni ke ʻoange ki he kau akó ha faingamālie ke vakaiʻi ʻa e tuʻunga ʻo ʻenau ongoʻi te nau lava ʻo fakaʻaongaʻi ʻa e ngaahi fakamatala takitaha ʻe tolu ko ʻení ke tali ʻaki ʻenau ngaahi fehuʻi pe hohaʻa ʻi he ongoongoleleí.

Fakaʻaongaʻi ha kiʻi taimi ke ke fakakaukau ai ki he ngaahi founga ko ʻeni ke ngāue ai ʻi he tui kia Sīsū Kalaisi ʻi he taimi ʻoku ʻi ai ai haʻo ngaahi fehuʻí. ʻI ha meʻafua 1 (siʻisiʻi) ki he 5 (ʻaupito), ʻokú ke ongoʻi loto-falala fēfē ʻi hoʻo ngāue ʻi he tui ki he Fakamoʻuí ʻi he ngaahi founga ko ʻení? Tokanga ki he ngaahi ueʻi mei he Laumālié ke tokoni ke fakatupulaki hoʻo loto-falala ʻi he ngaahi tafaʻaki ʻokú ke fakatokangaʻi te ke lava ʻo fakaleleiʻí.

Ngaahi ngāue ʻokú ne fakahaaʻi ʻetau tui kia Sīsū Kalaisí

Fakakaukauloto naʻe fakaafeʻi koe ke ke fai ha faleʻi ki ha taha naʻe ʻi ai haʻane ngaahi fehuʻi pe hohaʻa fekauʻaki mo e ongoongoleleí. Fili ha fehuʻi ʻe ua pe lahi ange ke fakakakato mei he ngaahi fehuʻí ni:

Feinga ke ʻiloʻi e ngaahi founga ʻe lava ke ngāue ai e tokotahá ni ʻi he tui kia Sīsū Kalaisí ʻaki hono tali e ngaahi fehuʻi ko ʻení:
- Ko e hā ha ngaahi fekau ʻe lava ke hokohoko atu ʻene tauhí?
- Ko e hā te ke ʻamanaki ʻe ʻilo pe manatuʻi ʻe he tokotahá ni fekauʻaki mo e Tamai Hēvaní mo Sīsū Kalaisí?
- Ko e hā te ne lava ʻo fai ke fakahaaʻi ʻaki ʻene falala kiate Kinauá?
Kumi ha fakataukei fakatokāteline pe potufolofola kehe ʻe taha pe lahi ange ʻe lava ʻo tokoni ki he tokotaha ko ʻení ke ngāue ʻi he tui kia Sīsū Kalaisí.
Kumi ha fakamatala mei ha taki ʻo e Siasí ʻe ala tokoni ki he tokotahá ni ke ngāue ʻi he tui kia Sīsū Kalaisí.

Hili ha taimi feʻunga, fakaafeʻi ʻa e kau akó ke vahevahe mo ha hoa ʻa e faleʻi te nau ala fakahokó. Te ke lava foki ʻo ʻoange ki he kau akó ha faingamālie ke vahevahe ha ngaahi aʻusia kuo nau maʻu ʻi haʻanau ngāue ʻi he tui kia Sīsū Kalaisi lolotonga ʻenau fekumi ki ha ngaahi tali pe tāpuaki ʻo e ongoongoleleí.

Faʻu ha palani ke ngāue ʻi he tui

Fakakaukau ke fakaafeʻi e kau akó ke faʻu ha palani ke ngāue ʻi he tui kia Sīsū Kalaisi ʻi he taimi ʻoku nau fehangahangai ai mo e ngaahi fehuʻi pe hohaʻa ʻi he ongoongoleleí. Ko e founga ʻe taha ke fai ai ʻení ko hono vahevahe ʻa e ngaahi fehuʻi ko ʻení ke tali ʻi heʻenau tohinoa akó. Fakatatau mo e taimí, te ke lava ʻo fakaafeʻi ha kau ako ʻe loto-fiemālie ke vahevahe ʻa e meʻa ne nau tohí.

Ko ha meʻa ʻoku ou fie manatuʻi fekauʻaki mo e ngāue ʻi he tui kia Sīsū Kalaisí ko e .
Ko e meʻa ʻe taha ʻoku ou fie fai ke ngāue ʻi he tui kia Sīsū Kalaisi ʻi he taimi hoko ʻoku ʻohake ai ha ngaahi fehuʻi pe hohaʻá ko e .

Ngaahi Maʻuʻanga Tokoni Kehé

Ko e hā ʻoku mahuʻinga ai ʻeku ngaahi angafaí ʻi he taimi ʻoku ʻi ai ai haʻaku ngaahi fehuʻi fekauʻaki mo e ongoongoleleí?

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

13:52

Hili iá, ʻoku fakaloloto ʻa e tuí ʻi heʻetau ngāue ʻi ha ngaahi founga ʻokú ne fokotuʻu maʻu kitautolu ʻia [Sīsū Kalaisí].

Naʻe mei lelei kapau ne tau lava ʻo fakamafola e tui ʻoku tupulakí ʻo hangē ko ia ʻoku [hoko] ʻi he toʻumahakí pe fofonú mo e taé. Ka pehē, ʻe mei lava pē ʻe ha kiʻi “mafatua fakalaumālie” ʻo fakatupu e tuí ʻi ha niʻihi kehe. Ka ʻoku ʻikai ke pehē. Ko e founga pē taha ʻoku tupulaki ai e tuí ke ngāue ai ha taha ʻi he tui. ʻOku faʻa hoko e ngaahi ngāué ni ʻi hano fakahoko ha fakaafe ʻe ha niʻihi kehe, ka he ʻikai ke tau lava ʻo “fakatupulaki” ha tui ʻa ha taha pe fakafalala pē ki he niʻihi kehé ke fakamālohia ʻetau tuí. Ke tupulaki ʻetau tuí, kuo pau ke tau fili ha ngaahi ngāue ʻokú ne langaki e tuí, hangē ko e lotú, ako folofolá, maʻu ʻo e sākalamēnití, tauhi ʻo e ngaahi fekaú, mo hono tokoniʻi ʻo e niʻihi kehé. (“Tukupā Taʻeueʻia kia Sīsū Kalaisi,” Liahona, Nōvema 2019, 23)

Te u fakafalala fēfē nai ki he meʻa kuó u ʻosi ʻiló?

Naʻe vahevahe ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:44

Ko e taimi ʻoku hoko ai e palopalemá pea mo e ngaahi fehuʻí, ʻoua e kamata hoʻo feinga ki he tuí ʻaki haʻo fakalau ʻa e lahi ʻo e meʻa ʻoku ʻikai ke ke maʻú, ʻo hangē leva ia ʻokú ke kamata ʻaki hoʻo “taʻe-tuí.” ʻOku hangē ia ha feinga ke pitoi ha pīpī ʻi hono ngutú! Tuku muʻa ke u fakamahino atu ʻeni: ʻOku ʻikai ko ʻeku kole atú ke mou fakangalingali ʻi ha tui ʻoku ʻikai ke mou maʻu. Ko ʻeku kole atú ke mou tuʻu maʻu he tui ʻoku mou ʻosi maʻú. ʻOku tau ʻai he taimi ʻe niʻihi ke hangē tokua ko hono fakahaaʻi moʻoni ʻo e veiveiuá ko hano fakahaaʻi māʻolunga ange ia ʻo e toʻa fakaʻulungāngá kae ʻikai ko hano fakahaaʻi totonu ʻo e tuí. ʻOku ʻikai! Ko ia, tau manatuʻi kotoa muʻa ʻa e pōpoaki mahino he fakamatala fakafolofola ko ʻení: Lea totonu ʻaki hoʻo ngaahi fehuʻí; ʻoku lahi fau ia ʻi he moʻuí ʻi ha ngaahi kaveinga kehekehe. Ka, kapau ʻokú ke loto mo ho fāmilí ke fakamoʻui kimoutolu, ʻoua naʻa tuku e veiveiua ko iá ke ne taʻofi hono fakahoko ʻe he tuí ʻa e maná. (“ʻEiki, ʻOku Ou Tui,” Liahona, Mē 2013, 94)

Naʻe vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

32:25

ʻOku ou saiʻia ʻi he lēsoni naʻe akoʻi ʻe Palesiteni ʻOakesi ki hono fohá ʻi he taimi naʻe ʻeke ange ai ʻe hono fohá ha fehuʻi naʻe ʻikai ke fakamatalaʻi mahino ia ʻi he tokāteline ʻo Kalaisí. Ko ʻene talí? “Foha, ʻoku ʻikai ke u ʻilo ʻa e tali ki he fehuʻi ko iá, kae tuku ke u tali atu ha fehuʻi ʻoku ou ʻilo ki ai.” Naʻá ne fakamoʻoni leva ki he Palōfita ko Siosefa Sāmitá pea mo e ʻUluaki Mata Meʻa-hā-maí. Tuku ke tau loto-fiemālie ke pehē, “ʻOku ʻikai ke u ʻilo fekauʻaki mo ia, ka ko e meʻa ʻeni ʻoku ou ʻiloʻí.” (“Ko e Mālohi ʻo Sīsū Kalaisí mo e Tokāteline Haohaoá,” [fakamafola ako fakataʻu ʻa e Potungāue Ako ʻa e Siasí, 11 Sune 2023], broadcasts.ChurchofJesusChrist.org).

Ngaahi ʻEkitivitī Fakalahi ki he Akó

Ngaahi sīpinga kehe ʻo e Fuakava Motuʻá ʻi he ngāue ʻi he tui kia Kalaisí

ʻE lava ke maʻu mo ha ngaahi sīpinga kehe ʻo e ngāue ʻi he tuí ʻi he Fuakava Motuʻá ʻi he ngaahi talanoa ko ʻení. Kuo fokotuʻutuʻu ʻa e ngaahi potufolofolá ke fakaʻaongaʻi ko ha fakalahi pe fetongi ʻaki e ngaahi talanoa ʻo e tuí ʻoku fakaʻaongaʻi ʻi he lēsoní.

Tūkunga faingataʻa	Ngāue ʻi he tui ki he ʻEikí
Tūkunga faingataʻa Ko e kolosi ʻa e kakai ʻIsilelí ʻi he vaitafe Soataní (Sōsiua 3:9–13)	Ngāue ʻi he tui ki he ʻEikí Sōsiua 3:14–17
Tūkunga faingataʻa Ko e teuteu ʻa Kitione ke tau mo e kau Mitiané (Fakamaau 7:2–8)	Ngāue ʻi he tui ki he ʻEikí Fakamaau 7:16–21
Tūkunga faingataʻa Ko e hū ʻa ʻĒseta ki he ʻao ʻo e tuʻí (ʻĒseta 4:7–14)	Ngāue ʻi he tui ki he ʻEikí ʻĒseta 4:15–17; 5:1–3

ʻOku fakaʻaongaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e talanoa ʻo Sōsiuá ke akoʻi fekauʻaki mo e fiemaʻu ke tau ngāue ʻi he tuí. Te ke lava ʻo huluʻi ki he kau akó ʻa e vitiō ʻo ʻene pōpoaki “Exercise Faith in Christ” (1:43).

1:52

Ko hono vahevahe ha ngaahi fakakaukau ʻo e founga ke ngāue ai ʻi he tuí

Ke tokoni ke faʻu ʻe he kau akó ha palani ke ngāue ʻi he tuí, ʻe ala tokoni ke faʻu ha fakatātā ʻi he palakipoé ke faingofua ai hono vahevahe ʻe he kau akó ha ngaahi fakakaukau mo e kaungāako kehé. Te ke lava ʻo tā ha saati hokohoko ʻi he palakipoé ʻo fokotuʻu ʻa e “Ngāue ʻi he Tuí” ko e tefitoʻi fakakaukaú mo ha ngaahi vaʻa ʻe tolu ʻoku fakahingoa ki he fakamatala takitaha ʻe tolú. Hili ʻa e ʻekitivitī akó, ʻe lava ke haʻu ʻa e kau akó ki he palakipoé ʻo hiki ha ngaahi fakakaukau ʻo e founga ʻe lava ke ngāue ai ha taha taʻu hongofulu tupu ʻi he tui ʻi he ngaahi tafaʻaki takitaha ko ʻení. Te ke lava foki ʻo ʻoange ha fanga kiʻi laʻipepa fakapipiki ke hiki ai ʻe he kau akó ʻenau ngaahi fakakaukaú pea fokotuʻu kinautolu ʻi lalo ʻi he fakamatala takitaha. Fakaafeʻi e kau akó ke nau omi ki he palakipoé ʻo toe vakaiʻi e ngaahi fakakaukau naʻe vahevahe ʻe honau kaungāakó kimuʻa pea faʻu ʻenau palaní.