“Iloilo Lou A’oa’oina 10: Amosa-Malaki,” Tusi Lesona a le Faia‘oga Seminare o le Feagaiga Tuai 2026)
“Iloilo Lou A’oa’oina 10: Amosa-Malaki,” Tusi Lesona a le Faia‘oga Seminare o le Feagaiga Tuai
Malaki: Lesona 160
Iloilo Lou A’oa’oina 10
Amosa–Malaki
O le tomanatu ai ma le iloiloina o lo tatou a’oa’oina fa’aleagaga e mafai ona fesoasoani ia tatou fa’alatalata atili atu ai i le Tamā Faalelagi ma Iesu Keriso.O lenei lesona e mafai ona fesoasoani i tagata a’oga e tomanatu i sini na latou fa’atuina ma le tuputupu a’e na latou mauaina a’o faia a latou su’esu’ega talu ai nei o le Feagaiga Tuai.
Sauniuniga a le tagata a’oga: Vala’aulia tagata a’oga e o mai saunia i le vasega e fa’asoa se ata e fa’ailoa mai ai taleni ma tomai na latou atia’eina, auala na latou tuputupu a’e ai, ma ni aafiaga na latou oo iai i le tausaga ua te’a pe a. Afai latou te lē maua se ata, e mafai ona latou o mai ma se fa’ata’ita’iga e fa’asoa atu.
Gaoioiga e Ono Mafai Ona Aoaoina Ai
Atonu na taulai atu lau vasega i ni isi taunuuga i le tusi a Amosa e oo i le Malaki mai i ni taunuuga na iloiloina i lenei lesona. Afai o lea, fetu’unai gaoioiga e iloilo ai le tuputupu a’e na o’o iai tagata a’oga mai i taunuuga sa e filifilia. I le ma lenei, e lē o fa’amoemoe e te faia gaoioiga uma.E mafai ona e filifili ni gaoioiga e te lagona e matua talafeagai pe aogā mo au tagata a’oga.
O lenei lesona, o le a maua ai e tagata a’oga le avanoa e iloilo ai lo latou aga’i i luma i vala nei:
-
Fa’amatala le matafaioi a perofeta.(Manatua: O lenei gaoioiga e faavae i a’oa’oga mai le Lesona 138: Esekielu 3 ma le Lesona 149: “Amosa 3; 7.”)
-
Faamatala fa’alagiga, matafaioi, uiga, ma fa’atusa o Iesu Keriso.(Manatua: O lenei gaoioiga e maua mai i su’esu’ega aoao a tagata aoga o le Feagaiga Tuai.)
-
Tausia le poloa’iga o le usitai i le Upu o le Poto.(Manatua: O lenei gaoioiga e fa’avae i a’oa’oga mai le Lesona 142: “Tanielu 1.”)
E mafai ona e suia so’o se tasi o nei gaoioiga i se gaoioiga mo iloiloga mo lesona o Sauniuniga o le Olaga. O lo’o maua Iloiloga mo lesona o Sauniuniga o le Olaga i fa’amatalaga fa’aopoopo.
O auala ua e tuputupu a’e ai
Ina ia amataina le lesona, vala’aulia tagata a’oga e fa’aali ni ata e fai ma faailoaga o taleni po o tomai na latou atia’eina, auala ua latou tuputupu a’e ai, ma aafiaga na latou mauaina i le faagasologa o le tausaga ua te’a pe a. Afai e leai ni ata a tagata a’oga, atonu e faigofie ona latou fa’asoa mai se fa’ata’ita’iga. Mafaufau e fa’aali atu se ata e fa’apupula ai auala ua e tuputupu a’e ai i lou olaga.
-
Aisea e aoga ai le taofi mai lea taimi i lea taimi ia iloa mea ua tatou a’oa’oina ma pe o fa’apefea lo tatou tuputupu a’e?
Vala’aulia tagata a’oga e mafaufau loloto i auala ua latou tuputupu a’e ai i le itu fa’aleagaga ma fa’alatalata atu ai i le Tamā Fa’alelagi ma Iesu Keriso i le gasologa o le tausaga ua te’a. Vala’aulia tagata a’oga e tusi ata o ni pusa se lua e pei o nei i totonu o a latou api tala’aga mo suesuega:
I totonu o pusa ta’itasi, tusi se ata pe tusi se auala se tasi e te lagona na e tuputupu a’e ai pe na e latalata atu ai i le Tamā Fa’alelagi ma Iesu Keriso i le gasologa o le tausaga nei. E mafai ona avea o se “ata” o ou aafiaga. E mafai ona aofia ai:
-
Auala o lo’o e taumafai e avea atili ai e faapei o le Tamā Fa’alelagi ma Iesu Keriso.E mafai ona aofia ai sini ma fuafuaga na e faia i le tausaga atoa. Afai na fai sau fuafuaga a’o e su’esu’eina tusitusiga paia, mafaufau e faaaofia ai na tusitusiga.
-
O mau ma a’oa’oga na fesoasoani pe fa’amalosia ai oe.Atonu e te mana’o e fa’aaofia ai fuaiupu po’o mataupu e fa’asoa ai ma isi.
-
O ni aafiaga o le tuputupu a’e na e oo i ai, e pei o le mauaina o tali i tatalo, auauna atu i isi, lagonaina o le fesoasoani mai o le Ali’i i taimi o fa’afitauli, po’o le faagaeetia ai mai se fa’ata’ita’iga i totonu o tusitusiga paia po’o se isi fo’i o le vasega.
Vala’aulia nisi o tagata a’oga e fa’asoa mai mea sa latou tusia pe tusiataina.Ona o le fa’ai’uga lea o lenei kosi suesue, e mafai ona fesoasoani le faasoa mai o ni nai tagata a’oga.
A’o fefa’asoaa’i tagatai a’oga, vaava’ai mo auala e fesoasoani iā i latou e iloa ai lou fa’atāuaina o a latou tali.Ae le’i fa’asoa mai tagata a’oga, e mafai ona e fa’apea atu “Matou te fiafia e fa’alogo atu ia Olivia” po’o le “Ou te fiafia tele i manatu o Iosefa ma ona aafiaga.”E fesoasoani le fa’asaga i tagata a’oga ma tilotilo sa’o iai a’o latou fa’asoa mai.A mae’a ona latou fa’asoa mai, e mafai ona fesoasoani le faia o se fa’amatalaga fa’amaoni e pei o le “fa’afetai tele” po’o le “Ou te fiafia tele e fa’alogo atu i ou manatu”.Mo a’oa’oga fa’aopoopo i lenei mea, vaai le “Fai se si’osi’omaga lea e fa’aaloalogia ai tagata uma ma iloa ai e fa’atauaina o latou sao” i le Atina’ega o Tomai Fa’afaiaoga.
Afai e te lagona o lenei gaoioiga e lelei mo le fa’aaogaina tatau o le taimi i le vaega sili atu o le lesona, e mafai ona e tu’u i tagata a’oga taitasi se avanoa e fa’asoa ane ai se mea se tasi na latou tusiaina pe tusiataina. Mo se fa’ata’ita’iga, e mafai ona e fa’atulagaina laulau i se li’o ma fesili i se tasi e ofo atu e fa’asoa muamua. Ona fa’asolo lea i le li’o ma vala’aulia isi tagata a’oga e fa’asoa.Fa’ataga tagata a’oga e tu’u le avanoa i se isi pe a lē fia fa’asoa.A’o latou fefa’asoaai, vaava’ai ni auala e fa’afetai ai i tagata a’oga mo lo latou sao, molimau e fa’atatau i le Fa’aola, ma fa’amamafa atu le mana o tusitusiga pa’ia.
Fa’amatala le matafaioi a perofeta a le Alii
Atonu na a’oa’oina tagata a’oga e fa’atatau i le matafaioi o perofeta a le Alii i le Lesona 138: “Esekielu 1–3; 33” ma le Lesona 149: “Amosa 3; 7.”Mafaufau e tu’u atu i tagata a’oga ni nai minute e iloilo ai mea na latou a’oa’oina mai i nei lesona.E mafai ona latou faia lea e ala i le iloiloina o le Esekielu 3:10–11, 16–17; Amosa 3:7, fa’atasi ai ma ni fa’amaumauga na latou faia i totonu o a latou tusitusiga pa’ia po o api tala’aga e fa’atatau i matafaioi o perofeta.
Ina ia fa’ailoa le gaoioiga o soso’o mai, e mafai ona e fa’amatala atu e faapea, e tu’u e le Ekalesia ia fa’amatalaga aogā i luga o ‘upega tafa’ilagi mo tagata o lo’o manana’o e a’oa’o e fa’atatau i ni autū eseese. O se tasi o punaoa o le Autū ma Fesili i le Potutusi o le Talalelei.
Fa’aaoga fa’atonuga nei e tusi ai se faaupuga e tolu ni ona fuaiupu e fa’atatau i perofeta e ono mafai ona fa’aaoga i le Potutusi o le Talalelei.
-
Tusi lau fuaiupu muamua e fa’aaoga ai mea na e a’oa’oina e fa’atatau i le matafaioi o perofeta mai i le Esekielu 3:10–11, 16–17.
-
Tusi le fuaiupu lona lua e fa’atatau i mea na e a’oa’oina i le matafaioi o perofeta mai i le Amosa 3:7.
-
Tusi le fuaiupu lona tolu e fa’atatau i se isi mea na e a’oa’oina i lau su’es’uega o le Feagaiga Tuai e uiga i matafaioi o perofeta.
A mae’a ona tusi e tagata a’oga ni a latou faaupuga, e mafai ona e fa’aali atu le vaega la’itiiti lea o fa’amatalaga e fa’atatau i perofeta mai i Autū ma Fesili.Vala’aulia tagata a’oga e faitau iai ma va’ai pe iai ni mea latou te fia fa’aopoopoina i a latou fa’aupuga.
E faapei o perofeta o aso anamua, e molimau mai perofeta o aso nei iā Iesu Keriso ma a’oa’o atu lana talalelei.Latou te faalauiloa mai le finagalo o le Atua ma [Lona] uiga moni.Latou te saunoa mai ma le le fefe ma le manino, e tautino mai le leaga o le agasala ma lapatai mai i ona taunuuga.E i ai foi taimi, e musuia ai i latou e vavalo i mea o le a tutupu i le lumanai mo lo tatou manuia.(Autū ma Fesili, “Perofeta,” Potutusi o le Talalelei)
Mafaufau e tu’u tagata a’oga i ni vaega toalaiti e fa’asoa mea na latou tusia. E ono mafai ona e vala’aulia ni nai tagata a’oga e naunau e fa’asoa se tasi pe sili atu fo’i o ni a latou fuaiupu ma le vasega.
Fa’alagiga, matafaioi, ma fa’atusa o Iesu Keriso.
Fa’aali ni nai ata o ni mea na tutupu i tusitusiga pa’ia i le Feagaiga Tuai ia e fa’ailoa mai ai le Fa’aola ma Lona mana. O ata o lo’o soso’o mai o ni nai fa’ata’ita’iga:
-
O a mea o loo a’oa’o mai e nei ata ta’itasi e fa’atatau ia te Ia?
O ata nei o lo’o fa’aali mai ai le auala na foafoa ai e le Fa’aola le lalolagi; fa’amalōlō tagata na va’ai atu i le gata i luga o le to’oto’o; lagolagoina Sataraka, Mesako, ma Apeteniko i le ogaumu a’asa; ma tapuni gutu o leona. Afai e aoga, fa’amanatu i tagata a’oga o le gata sa i luga o le to’oto’o o le fa’atusa o le Fa’aola i luga o le satauro (taga’i i le Ioane 3:14).
I totonu o lau api tala’aga mo suesuega, tusi se tasi pe lua fo’i ni mea na e a’oa’oina e fa’atatau i le Fa’aola i lenei tausaga na matua’i tāua iā te oe.O nei mea e ono maua mai i se tala o le Feagaiga Tuai, po’o se tasi fo’i o fa’alagiga o le Fa’aola, se fa’atusa o Ia, po’o se tasi o Ana matafaioi. Afai e mafai, fa’aaofia ai se mau faasino ma sou malamalama’aga. Fa’amatala pe aisea e anoa ai lenei malamalama’aga iā te oe.
Vala’aulia ni nai tagata aoga e fa’asoa mai.Va’ai mo ni auala e fesoasoani ai i tagata a’oga e molimau e fa’atatau i le Fa’aola ma le tele o Ona matafaioi o lo’o Ia fa’ataunu’uina i o tatou olaga.
Usita’ia o le Upu o le Poto
Mafaufau e fa’aali atu le ata lenei ma fesili i tagata a’oga po’o a ni mea na latou manatuaina mai i tala o lo’o maua i le Tanielu 1.Pe e te ono vala’aulia tagata a’oga e toe iloilo pepa lautele o i ai ni savali e fa’atatau i le Upu o le Poto na latou fatuina i le Lesona 142: “Tanielu 1” pe taumafai e manatua mea na latou fa’aaofiaina ai.
-
O le a se mea e te manatuaina e uiga i lenei tala?
I le Lesona 142: “Tanielu 1,” na a’oa’oina e tagata a’oga o le usita’i i le Upu o le Poto a le Alii e maua ai fa’amanuiaga i le itu fa’aletino ma le fa’aleagaga. O se vaega o lena lesona, e ono mafai ai ona e vala’aulia tagata a’oga e fa’amae’a le fuaiupu lenei i totonu o latou api tala’aga mo su’esu’ega: “O se tasi o mea e mafai ona ou faia e fesoasoani iā te a’u e usita’i ai i le Upu o le Poto o le …”
Ina ia fesoasoani i tagata a’oga e iloilo a latou taumafaiga, e mafai ona e vala’aulia i latou e toe iloilo pe na fa’apefea ona latou fa’amae’aina lena fa’amatalaga. Ona fa’aali lea o se tasi pe sili atu fo’i o fesili nei.
Tali se tasi pe sili atu fo’i o fesili nei i lau api tala’aga mo su’esu’ega:
-
O a ni taumafaiga na e faia e usita’i ai i le Upu o le Poto?
-
O a ni aafiaga na e maua a’o e taumafai e usita’i i le Upu o le Poto?
-
Ua e iloaina ni fa’amanuiaga a le Atua iā te oe po’o isi fo’i i le itu fa’aletino pe fa’aleagaga e ala i le usita’i ai i le Upu o le Poto?
Mafaufau e valaaulia tagata e ofo mai e fa’asoa mai o latou manatu.E mafai ona e uunaia tagata a’oga e fetu’utu’una’i a latou taumafaiga pe toe tu’uto atu e usita’i i le Upu o le Poto pe a manaomia ai.