“Malaki 3: O le Totogiina o le Sefuluai E Toina Ai Pupuni o le Lagi,” Tusi Lesona a le Faia’oga Seminare o le Feagaiga Tuai (2026)
“Malaki 3: O le Totogiina o le Sefuluai E Toina Ai Pupuni o le Lagi,” Tusi Lesona a le Faia’oga Seminare o le Feagaiga Tuai
Malaki: Lesona 158
Malaki 3
O le Totogiina o le Sefuluai E Toina Ai Pupuni o le Lagi
Talu mai taimi anamua, na fa’amanuiaina ai e le Tamā Fa’alelagi Lana fanau ona o lo latou naunau e usita’i i Lana tulafono o le sefulua’i.O afioga a le Alii e auala mai i le perofeta o Malaki e fesoasoani iā i tatou e iloa ai le ala o le a Ia fa’amanuia ai i tatou ona o lo tatou usita’i i Lana tulafono.O lenei lesona e mafai ona fesoasoani i tagata a’oga e maua le naunauta’iga e usita’i i le tulafono o le sefulua’i a le Alii.
Sauniuniga a le tagata a’oga: Vala’aulia tagata a’oga e sauni e fa’asoa se tala i se tagata na faamanuiaina ona o le usita’i i le poloa’iga a le Alii e totogi le sefulua’i.Pe a fesoasoani ai, e mafai ona fesili tagata a’oga i o latou matua po’o ta’ita’i o le Ekalesia pe va’ai fo’i i ni tala o loo i le Potutusi o le Talalelei.
Gaoioiga e Ono Mafai Ona Aoaoina Ai
Totogiina o le sefulua’i
Ina ia amata le lesona, e mafai ona e fa’asoa atu se vaega o se tala e fa’ailoa ai tulaga atonu e fa’afaigatā ai ona totogi le sefulua’i. E mafai ona e fa’asoa atu le aafiaga o Elder Cordon po’o se tasi fo’i o sau lava tala.
Afai e mana’omia, fa’amatala atu o le sefulua’i o le foa’i atu o le “tasi vaesefulu o au tupe maua i le Ekalesia” (Tala’i La’u Talalelei: O le Ta’iala i le Fa’asoaina Atu o le Talalelei a Iesu Keriso [2023], 85; taga’i fo’i i le Mataupu Faavae ma Feagaiga 119:3–4).
Faitau le aafiaga lenei mai iā Elder Valeri V. Cordón o le Fitugafulu, vaava’ai pe aisea sa ono faafaigatā ai i ona mātua ona usita’ia le tulafono a le Alii o le sefulua’i.
Ina ua mavae ni mea na tutupu e fesootai i se taua o tagatanuu lava o Amerika Tutotonu, na gau le pisinisi a lo’u tama.Na faaitiitia mai le tusa o le 200 tagata faigaluega tumau i le itiiti ifo ma le lima tagata su’isu’i o e na galulue pe a manaomia i le faletaavale o lo matou fale.I se tasi aso i na taimi faigata, sa ou faalogo o talanoa o’u matua pe tatau ona totogi le sefuluai pe faatau meaai mo tamaiti.(“O le Gagana o le Talalelei,” Liahona, Me 2017, 56)
-
O a nisi tulaga e tatou te ono feagai e fa’afaigatā ai ona totogi le sefulua’i?
O le kalafi o lo’o i lalo e fesoasoani i tagata a’oga e fa’avasega o latou manatu i le faagasologa o le lesona atoa. Vala’aulia tagata a’oga e tusi se ata o le kalafi, po’o se mea e talitutusa, i luga o se itulau avanoa o a latou ‘api tala’aga mo su’esu’ega.E mafai fo’i ona e tusia se ata talitutusa i luga o le laupapa.
Fa’asino atu i le li’o “O’u Lagona”.Fa’ailoa atu i tagata a’oga e faapea, i le fa’ai’uga o le lesona, o le a latou maua ai le avanoa e tusi ai o latou lagona e fa’atatau i le sefulua’i.Atonu latou te fia mafaufau i le taimi nei e fa’atatau i ni popolega po’o ni luitau latou te feagai i le totogiina o le sefulua’i.E mafai fo’i ona latou mafaufau loloto i ni auala e mafai ona manuia ai i le fa’ailoaina o fa’amanuiaga a le Alii na folafola i tagata e totogi sefulua’i.
A’o e su’esu’eina le tulafono o le sefulua’i a le Alii, e mafai ona fesoasoani le Agaga Pa’ia iā te oe e malamalama i fa’amanuiaga e mafai ona e maua ma fa’amalosia lou naunau e mulimuli i lenei tulafono.
Liligiina atu o fa’amanuiaga
Ina ia fesoasoani i tagata a’oga e malamalama i le faatatauga o le Malaki 3, fa’asoa atu i au oe lava upu le aotelega lenei o le Malaki 1–2.
E ui lava na fa’aauau pea ona osi taulaga atu tagata o vaitaimi o Malaki i le Alii, na latou fa’alumaina o Ia e ala i “areto leaga” ma manu tauaso, pipili, ma mama’i (taga’i i le Malaki 1:7–8, 13) o ni taulaga sa tatau ona fa’atusaina ia Iesu Keriso.Na aoa’i e le Alii le ‘au ositaulaga, o ē na “ō ese i fafo ma le ala o le [Alii]” ma “māfua ai ona tautevateva le to’atele” (Malaki 2:8) ona o a latou fa’ata’ita’iga leaga.I le Malaki 3, na a’oa’o mai ai e le Alii se auala se tasi e mafai ai ona tatou faia se taulaga ma le loto iai iā te Ia.
O leMalaki 3:8–10 o se fuaitau o le atamai i a’oa’oga fa’avae.Mafaufau e vala’aulia tagata a’oga e fa’ailoga fuaitau o le atamai i a’oa’oga fa’avae i se auala iloga ina ia faigofie ona latou mauaina.
Faitau le Malaki 3:7–12, ma vaava’ai mo fa’amanuiaga na folafola mai e le Alii mo tagata e avatu la latou sefulua’i ia te Ia.Tusi fa’amanuiaga na e mauaina faataamilo i “Fa’amanuiaga a le Alii” i luga o lau kalafi.
Atonu e fesoasoani i tagata a’oga le iloaina o le fuaitau “ia outou [faamaonia] mai [nei] ia te a’u” pe ono uiga ua fa’apea mai le Atua, “Tofotofo mai A’u i le mea nei.”
-
O a ni upumoni e te a’oa’oina e fa’atatau i le sefulua’i mai i afioga a le Alii i le Malaki 3:7–12?
Tuu atu i tagata a’oga e fa’asoa mai mea na latou faailoaina.Vala’aulia tagata a’oga e tusi se upumoni e pei o le A’o tatou usita’ia le tulafono o le sefulua’i a le Alii, o le a Ia fa’amanuia tele i tatou o se fasifa’amatalaga i totonu o a latou tusitusiga pa’ia i autafa o fuaiupu nei.
Ina ia fesoasoani i tagata a’oga e malamalama i lenei upumoni, mafaufau e aumai se ‘apa, ipu inu, ma se fagu o lo’o iai se vai i le vasega. Tu’u le ipu inu i totonu o le ‘apa.Fa’amatala atu e faapea, o le vai e fa’atusa i fa’amanuiaga o le a tuu mai e le Alii iā i tatou a’o tatou totogiina le sefulua’i.Vala’aulia se tagata a’oga e ligi le vai mai le fagu i totonu o le ipu inu se’ia tumu masuasua ifo i le ‘apa.Feso’ota’i atu lenei mea i folafolaga a le Alii i le Malaki 3:10.
O le tulafono o le sefulua’i a le Alii
O le pepa e tufa atu o lo’o aumai fa’atasi ai, “O le Tulafono o le Sefulua’i a le Alii,” e mafai ona fa’alolotoina ai le malamalama o tagata a’oga e fa’atatau i fa’amanuiaga e aumai e le Alii mo i tatou a o tatou usita’i ai i Lana tulafono.Mafaufau e vavae tagata a’oga i ni vaega toalaiti ma saunia mo vaega taitasi se kopi o le pepa e tufa atu.E mafai ona feauaua’i tagata a’oga e faitau leotele upusii nei.A mae’a ona faitau upusii ta’itasi, e mafai e tagata a’oga ona fa’aopoop isi fa’amanuiaga i kalafi o lo’o i latou ‘api tala’aga o suesuega.
A mae’a ona fa’aopoopo e vaega fa’amanuiaga iā latou kalafi, e mafai ona mafaufau loloto tagata a’oga i ni mea na latou va’aia ai le Alii o fa’amanuia i latou po’o isi fo’i ona o le usita’i i Lana tulafono o le sefulua’i. Ona mafai lea e tagata a’oga ona fa’asoa nisi o fa’amanuiaga na latou maua po’o isi fo’i e ala i le usita’i ai i lenei tulafono.
Mafaufau e matamata le “The Language of the Gospel,” o lo’o maua i le ChurchofJesusChrist.org, mai i le faailo taimi 6:42 i le 7:40.I lenei vitio, e mafai ona faalogo ai tagata a’oga i le toega o le aafiaga o Elder Cordón mai i le amataga o le vasega.
-
O le a se mea tatou te a’oa’oina e fa’atatau i le Tamā Fa’alelagi a’o Ia fa’amanuiaina i tatou mo le totogiina o le sefulua’i?
A mae’a ona talanoa i fa’amanuiaga o le totogiina o le sefulua’i, atonu e te mana’o e ta’ua e faapea, e iai nisi tagata na latou totogiina sefulua’i ae le’i maua lava fa’amanuiaga na latou fa’amoemoe iai ma o lo’o fetaia’i pea ma fa’afitauli tau tupe. Atonu latou te ono taumafaufau pe aisea e ao ai ina faaauau pea le totogiina o la latou sefulua’i.E mafai ona e faitau le Malaki 3:14, 16–17, vaava’ai i mea o lo’o folafola mai e le Alii mo i latou e fa’aauau pea ona fa’atuatua ma usita’i iā te Ia.
Usita’ia ai o le tulafono o le sefulua’i a le Alii.
I tala ane o le “O’u Lagona” i luga o lau kalafi, tusi e fa’atatau [i mea nei]:
-
O a ni ou lagona e fa’atatau i le usita’ia o le tulafono o le sefulua’i a le Alii.
-
So’o se mea e te su’esu’eina pe lagona nei e fa’alauteleina ai lou naunau e totogi le sefulua’i.E mafai ona aofia ai fa’amanuiaga na folafola mai e le Alii e te mana’o e te mauaina.
Vala’aulia ni nai tagata a’oga o lo’o naunau e fa’asoa o latou lagona e fa’atatau i le Alii ma Lana tulafono o le sefulua’i.Atonu e te fia fa’asoa foi i fa’amanuiaga ua e maua ona o lou usita’ia o lenei tulafono.
Tauloto
Atonu e te mana’o e fesoasoani i tagata a’oga e tauloto le mau fa’asino o le atamai i a’oa’oga fa’avae, ma le fasifuaitau autū i le taimi o lenei lesona ma toe iloilo i latou i lesona i le lumana’i.O le fasifuaitau autū mai tusitusiga pa’ia mo le Malaki 3:8–10 o le “O fa’amanuiaga o le totogiina o le sefulua’i.”O manatu mo gaoioiga o le taulotoina o lo’o i ai i anomea fa’aopoopo i lalo o le “Gaoioiga Toefa’amanatu o le Atamai i A’oa’oga Faavae.”