Վարդապետության սերտման վարժություն 9

Բացել PDF-ը

• Սուրբ գրությունների այս գրքերից ո՞րը կարող էր ուսումնասիրել Փրկիչը Իր մանկության, երիտասարդության տարիներին և այն ժամանակ, երբ Նա ծառայում էր երկրի վրա:

Կարդացեք հետևյալ սուրբ գրություններից մեկը կամ երկուսը՝ փնտրելով, թե ինչպես է Փրկիչը օգտագործել Հին Կտակարանից մտապահված արտահայտությունները կամ հատվածները. Մատթեոս 4.2–4, 19․4–5, Մարկոս 7.9–10, Ղուկաս 24․27։

• Ի՞նչ գտաք:

  Ուսանողները կարող են նշել, որ Փրկիչը օգտագործել է մտապահված սուրբ գրությունները՝ հաղթահարելու գայթակղությունը, պատասխանելու մարդկանց հարցերին, ուղղելու թյուրըմբռնումները և ուսուցանելու մարդկանց: Եթե ուսանողները ցանկանան իմանալ, թե որ հատվածներն է մեջբերել Փրկիչը, կիսվեք, որ Մատթեոս 4.2–4 հատվածներում Փրկիչը մեջբերել է Բ Օրենք 8.3 հատվածից, Մատթեոս 19.4–5 հատվածներում՝ Ծնունդ 2.24 հատվածից, իսկ Մարկոս 7.9–10 հատվածներում Նա մեջբերել է Ելք 20․12 և Բ Օրենք 5․16 հատվածներից։

  Ուսանողներին օգնեք հասկանալ, որ մտապահելով վարդապետության սերտման սուրբգրային հատվածները կամ սուրբգրային հիմնական արտահայտությունները և դրանք օգտագործելով իրենց կյանքում, իրենք հետևում են Հիսուս Քրիստոսի օրինակին:

• Ինչպիսի՞ իրավիճակների եք բախվել կամ կարող եք բախվել ապագայում, երբ մտապահված սուրբ գրությունն օգտակար կլիներ կամ կարող է օգտակար լինել:

  Օրինակ՝ դաս ուսուցանելը կամ ելույթ ունենալը, ուրիշների հարցերին պատասխանելը, անձնական պատասխան փնտրելը և գայթակղությանը դիմակայելը:

• Ի՞նչ եք անում կամ կարող եք անել, որը կօգնի ձեզ մտապահել սուրբգրային հիմնական արտահայտությունները կամ հատվածները:

Մի քանի րոպե հատկացրեք՝ մտապահելու վարդապետության սերտման սուրբգրային հղումներն ու հիմնական արտահայտությունները: (Բացի հիմնական արտահայտությունից, ցանկության դեպքում կարող եք մտապահել մի ամբողջ հատված։)

• Ինչպե՞ս կարող է այս արտահայտությունը կամ հատվածն օգնել ձեզ ձեր կյանքում:

• Ինչպե՞ս կարող է դա օգնել ձեզ ավելի նմանվել Փրկչին:

Պատկերացրեք, որ ձեր ընկեր Միան ասում է. «Կիրակի օրերն անցկացնելու մեր տարբերակն այնքան ձանձրալի է և, ինձ թվում է, ժամանակի կորուստ է: Չե՞ս կարծում, որ մեր հանգստյան օրերն ավելի լավը կլինեին, եթե մենք չմտահոգվեինք Հանգստության օրը սուրբ պահելու մասին»։

• Ի՞նչ պատճառներով Միան կարող է դժվարանալ պահել այս պատվիրանը:

Մի քանի րոպե տրամադրեք՝ պատրաստելու այն, ինչն, ըստ ձեզ, կարող է օգնել Միային, օրինակ՝

• Սուրբ գրություններ, Եկեղեցու ղեկավարների ուղերձներ կամ աստվածային այլ աղբյուրներ: Դրանք կարող են ներառել․ վարդապետության սերտման հատվածներ, օրինակ՝ Ելք 20.8, Եսայի 58.13–14, Մոսիա 2.41 կամ այլ հատվածներ, օրինակ՝ Վարդապետություն և Ուխտեր 59.9, 13–15։

• Ձեր իմացած ճշմարտությունները կամ վարդապետությունները, որոնք կարող են օգնել Միային տեսնել այս իրավիճակը հավերժության հեռանկարից (օրինակ՝ ինչպես դա կարող է օգնել մեզ ավելի նմանվել Տիրոջը [տես Մովսես 3.3]):

• Սուրբ գրություններից, գերագույն համաժողովի ելույթից կամ անձնական փորձառությունից որևէ օրինակ, որը ցույց է տալիս, թե ինչպես կարող է մարդը հավատքով գործել առ Տեր Հիսուս Քրիստոս, որպեսզի պահի Հանգստության օրը, որը կարող է ներառել եկեղեցի այցելելը և հաղորդություն ստանալը: Կարող եք նաև նկարագրել, թե Տերն ինչպես օրհնեց նրանց, երբ նրանք հավատք դրսևորեցին: (Սուրբ գրությունների որոշ օրինակներ ներառում են Ելք 16.14–30 և Հարոմ 1.5–9։)

  Որպեսզի պատրաստեք ուսանողներին միմյանց հետ կիսվել իրենց գաղափարներով, կարող եք անել հետևյալը։

  1. Ուսանողներից յուրաքանչյուրին տվեք մեկական թերթիկ։ Խնդրեք նրանց բաժանել այն երեք մասի՝ ծալելով թերթիկը կամ գծեր քաշելու միջոցով:

  2. Խնդրեք նրանց յուրաքանչյուր բաժինը վերնագրել հոգևոր գիտելիքներ ձեռք բերելու որոշակի սկզբունքով:

  3. Ընտրեք որևէ սկզբունք և բոլոր ուսանողներին խնդրեք իրենց թերթիկի վրա գրել մի եղանակ, որով ընտրված սկզբունքի օգտագործումը կարող է օգնել Միային:

  4. Ուսանողները կարող են փոխանցել թերթիկը մեկ ուրիշ ուսանողի և գրել մեկ այլ սկզբունքի մասին ուրիշ թերթիկի վրա: Ուսանողներին հնարավորություն տվեք շարունակել փոխանցել թերթիկները միմյանց և գրել:

  5. Երբ յուրաքանչյուր թերթիկի վրա գրված լինի մի քանի գաղափար, ուսանողներին առաջարկեք պահել թերթիկը և կարդալ այն, ինչ գրված է:

  Պատրաստակամ ուսանողներից մի քանիսին առաջարկեք պատասխանել հետևյալ հարցերին՝ հիմնվելով իրենց կարդացածի վրա: Կարող եք խնդրել այն ուսանողներին, որոնք սովորաբար չեն մասնակցում քննարկմանը, պատասխանել այս հարցերից մեկին կամ մի քանիսին: Որոշ ուսանողների համար կարող է ավելի հարմար լինել կիսվել ուրիշի գրածով:

• Ըստ ձեզ, ձեր կարդացածից կամ գրածից ի՞նչը հատկապես օգտակար կլինի Միային: Ինչո՞ւ։

• Ի՞նչ կարող էիք ավելացնել:

Ձեր օրագրում գրեք, թե ինչ սովորեցիք այս փորձառությունից, որը կցանկանայիք հիշել, նաև այն, թե հոգևոր գիտելիքներ ձեռք բերելու սկզբունքների օգտագործումն ինչպես կարող է օգնել ձեզ ձեր ունեցած ցանկացած հարցի կամ մտահոգության դեպքում: