Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĪsaia 60–66: Ko e Pule ʻa e Fakamoʻuí ʻi he Nofo Tuʻí

“ʻĪsaia 60–66: Ko e Pule ʻa e Fakamoʻuí ʻi he Nofo Tuʻí,” Fuakava Motuʻá – Tohi Lēsoni ʻa e Faiako Seminelí (2026)

“ʻĪsaia 60–66: Ko e Pule ʻa e Fakamoʻuí ʻi he Nofo Tuʻí,” Fuakava Motuʻá – Tohi Lēsoni ʻa e Faiako Seminelí

ʻĪsaia 58–66: Lēsoni 129

ʻĪsaia 60–66

Ko e Pule ʻa e Fakamoʻuí ʻi he Nofo Tuʻí

One oil on paper painting. Shows the figure of Christ in white robes, hands extended to the sides. Clouds, sun and moon in the background. Figure is rising from brown tomb. Green tree on right side.

ʻI he moveuveu ʻa e māmaní, ʻoku tau fakaʻamua kotoa ha ngaahi mōmeniti ʻo e nongá. ʻE liuaki mai ʻa e Fakamoʻui ko Sīsū Kalaisí ki he māmaní ʻo pule ʻi ha taʻu ʻe tahaafe, ʻo kamataʻi ha taimi ʻo e melinó. Naʻe kikiteʻi ʻe ʻĪsaia ʻa e vahaʻataimi ko ʻení, ʻa ia ʻoku ui ko e Nofo Tuʻí. ʻE lava ke tokoni ʻa e lēsoni ko ʻení ke ongoʻi ʻe he kau akó ha fiefia lahi ange ki he Hāʻele ʻAnga Ua Mai ʻa e Fakamoʻuí mo e pule ʻi he nofo tuʻí.

Teuteu ʻa e tokotaha akó: Fakaafeʻi e kau akó ke nau fakakaukau ki he meʻa ʻoku nau ʻilo fekauʻaki mo e Hāʻele ʻAnga Ua Mai ʻa e Fakamoʻuí pea mo e pule ʻi he Nofo Tuʻí. Fakaafeʻi kinautolu ke fakalaulauloto pe ʻoku nau hanganaki fiefia atu ki ai pea mo hono ʻuhingá. Mahalo te nau fehuʻi ki ha mātuʻa pe tokotaha lahi falalaʻanga pe ko e hā ʻenau ongo fekauʻaki mo e liuaki mai ʻa e Fakamoʻuí.

Ngaahi ʻEkitivitī Ako ʻOku Ala Fakahokó

Ko e Nofo Tuʻí

Ke tokoni ke mahino ki he kau akó ʻa e ʻuhinga ʻe hoko ai e liuaki mai ʻa e Fakamoʻuí ko ha tāpuaki ʻi heʻetau moʻuí, fakakaukau ke kamata ʻaki hano fai ange ʻa e fehuʻi ko ʻení:

Ko e hā ha ngaahi palopalema ʻi he māmaní ʻokú ke fakaʻamu ʻe liliu?

Te ke lava ʻo hiki ha niʻihi ʻo e ngaahi kupuʻi lea ko ʻení ʻi he palakipoé ke tokoni ki he kau akó ke fakakaukau ki he ngaahi talí:

Ngaahi ʻuhinga ʻoku tangi pe mamahi ai ʻa e kakaí
Ngaahi sīpinga ʻo e fetāʻakí, taʻetotonú, pe fakaʻauhá
Ko e ivi tākiekina ʻa Sētané

Fakaʻaongaʻi ha kiʻi taimi ke ke fakalaulauloto ai ki ha faʻahinga palopalema ʻi hoʻo moʻuí pe ʻi he moʻui ʻa kinautolu ʻokú ke ʻofa aí ʻa ia ʻokú ke fakaʻamu ʻe liliu. ʻI hoʻo ako he ʻaho ní, fekumi ki he fakahinohino ʻa e Laumālie Māʻoniʻoní ʻi hoʻo fekumi ki ha ngaahi moʻoni ʻe ala tokoni kiate kitautolu mo e māmaní.

Ko e ngaahi vahe fakaʻosi ʻo ʻĪsaiá

Fakaʻaliʻali ha fakatātā ʻo e Hāʻele ʻAnga Ua Mai ʻa e Fakamoʻuí pea fakamatalaʻi ange ʻoku akoʻi ʻe he folofolá, ʻe liuaki mai ʻa e Fakamoʻuí ki māmani ʻi he kahaʻú pea pule ʻi ha taʻu ʻe tahaafe. ʻOku ui ʻa e vahaʻataimi ko ʻení ko e Nofo Tuʻí.

ʻOku ʻi he ngaahi vahe fakaʻosi ʻo e tohi ʻa ʻĪsaiá ʻa e ngaahi akonaki mo e ngaahi kikite ʻa ʻĪsaia fekauʻaki mo e Hāʻele ʻAnga Ua Mai ʻa e Fakamoʻuí pea mo e Nofo Tuʻí.

Lau ʻa e ngaahi veesi ko ʻení, fakaʻilongaʻi ʻa e ngaahi kupuʻi lea ʻoku tokoni atu ke ke ongoʻi fiefia ʻi he liuaki mai ʻa e Fakamoʻuí:

ʻĪsaia 60:18–20
ʻĪsaia 62:11–12
ʻĪsaia 65:17–25
Fakaafeʻi e kau akó ke vahevahe ha niʻihi ʻo e ngaahi kupuʻi lea ne nau maʻú pea mo e ʻuhinga ʻoku nau hanganaki atu ai ki hono foaki ʻe he Fakamoʻuí ʻa e tāpuaki ko ʻení. ʻE lava ke vahevahe ʻe he kau akó ha ngaahi kupuʻi lea ʻoku nau fakahaaʻi ʻe ikunaʻi ʻe he Fakamoʻuí ʻa e ngaahi palopalema ʻo e māmaní. Ko ha ngaahi sīpinga ʻeni ʻe niʻihi:
- “ʻE ʻikai toe fanongo ki ha fakamālohi ʻi ho fonuá” (ʻĪsaia 60:18)
- “ʻE ngata ʻa e ngaahi ʻaho ʻo hoʻo mamahí” (ʻĪsaia 60:20)
- “ʻE ʻikai ha toe fanongo ki ha leʻo ʻo e tangí ʻiate ia” (ʻĪsaia 65:19)
- “ʻE ʻikai te nau fakamamahi pe fakaʻauha” (ʻĪsaia 65:25)
ʻE ala ʻaonga foki hono poupouʻi e kau akó ke fakaʻilongaʻi e ngaahi kupuʻi lea ʻi he folofolá ʻoku vahevahe ʻe honau kaungāakó.
Te ke fakamatalaʻi fakanounou fēfē ʻa e meʻa ʻe fai ʻe he Fakamoʻuí maʻa Hono kakaí ʻi Heʻene liuaki maí?

ʻE lava ke vahevahe ʻe he kau akó ha ngaahi moʻoni kehekehe. Mahalo ʻe faitatau ha moʻoni mo ʻeni: Koeʻuhí ko e Fakamoʻuí, ʻe fiefia Hono kakaí ʻi he fiefiá, melinó, mo e koloaʻia lolotonga e Nofo Tuʻí. Fakakaukau ke hiki ʻa e tefitoʻi moʻoni ko ʻení, pe ko ha tefitoʻi moʻoni hangē ko iá, ʻi he palakipoé ʻo fakaʻaongaʻi e ngaahi lea ʻa e kau akó.

Ko hono fakaloloto ʻo e mahinó

Vakai ki he fakatātā ʻo e Hāʻele ʻAnga Ua Mai ʻa e Fakamoʻuí. Fakaafeʻi ʻa e kau akó ke nau manatuʻi ʻa e meʻa ʻoku nau ʻilo mo ongoʻi fekauʻaki mo Sīsū Kalaisí.

ʻOkú ke pehē ko e hā ʻe fakaiku ai hono maʻu ʻa Sīsū Kalaisi ʻi he māmaní ki he fiefiá, melinó, mo e nēkeneká?

Fakaʻaongaʻi ha kiʻi taimi ke ke fakalaulauloto ai ki ha faʻahinga fehuʻi pē ʻokú ke maʻu fekauʻaki mo e Nofo Tuʻí pea mo e ngaahi tāpuaki ʻo e liuaki mai ʻa e Fakamoʻuí. Kuo fakahā mai ʻe he ʻEikí ha meʻa lahi ange fekauʻaki mo e kaveingá ni.

Fakakaukau ke fakaʻaliʻali ange ʻa e ngaahi fehuʻi ko ʻení.

Fili ha fehuʻi ʻe taha pe ua ʻaʻau pē fekauʻaki mo e Nofo Tuʻí pe mei he ngaahi fehuʻi ko ʻení ʻokú ke mahuʻingaʻia taha aí. Fakaʻaongaʻi ha ngaahi miniti ke kumi e ngaahi talí ʻi he folofolá mo e ngaahi maʻuʻanga tokoni kuo fokotuʻu fakalangí. ʻE ala ʻaonga ʻa e konga ʻoku ui ko e “Nofo Tuʻí” ʻi he Fakahinohino ki he Ngaahi Folofolá mo e Ngaahi Tefitó mo e Ngaahi Fehuʻí ʻi he ChurchofJesusChrist.org.

Ko e ʻuhinga ki he hā ʻa e pehē ʻe hanga ʻe he ʻEikí ʻo “fakatupu ʻa e ngaahi langi foʻou pea mo e fonua foʻou.” (ʻĪsaia 65:17). Lau ʻa e Tokāteline mo e Ngaahi Fuakava 88:25–26 mo e Ngaahi Tefito ʻo e Tui 1:10. Fakakaukau ki he meʻa ʻoku akoʻi mai ʻe he ngaahi veesi ko ʻení fekauʻaki mo e mālohi ʻo e Fakamoʻuí mo ʻEne ngaahi ongo ki he kau māʻoniʻoní.
ʻE ʻi ai nai ha mate lolotonga ʻa e Nofo Tuʻí? ʻOku ʻuhinga ki he hā ʻa e pehē koeʻuhí ko e Fakamoʻuí, “ʻe mate [ha tamasiʻi] ʻi hono taʻu teaú?” (ʻĪsaia 65:20). Lau ʻa e Tokāteline mo e Ngaahi Fuakava 101:29–31 pea fakalaulauloto ki he meʻa ʻoku akoʻi atu ʻe he ngaahi veesi ko ʻení fekauʻaki mo e mālohi ʻa e Fakamoʻuí.
Ko e hā ʻe hoko kia Sētane koeʻuhí ko e liuaki mai ʻa e Fakamoʻuí? Lau ha niʻihi ʻo e ngaahi veesi ko ʻení: Tokāteline mo e Ngaahi Fuakava 45:55, 101:28, 1 Nīfai 22:26, mo e Fakahā 20:1–3. Fakakaukau ki he meʻa ʻoku akoʻi atu ʻe he ngaahi veesi ko ʻení fekauʻaki mo e ʻEikí.
Ko e hā ha ngaahi fatongia ʻe maʻu ʻe he Fakamoʻuí lolotonga e Nofo Tuʻí? Ko e hā te ne faí? Lau ʻa e Tokāteline mo e Ngaahi Fuakava 29:11 mo e 45:59 mo e Ngaahi Tefito ʻo e Tui 1:10.
Ko e hā mo ha toe meʻa kuo fakahā mai ʻe he ʻEikí fekauʻaki mo e Nofo Tuʻí? Lau ha niʻihi ʻo e ngaahi meʻá ni: Tokāteline mo e Ngaahi Fuakava 45:54, 56–58; 101:26–29; mo e “Nofo Tuʻí” ʻi he Ngaahi Tefitó mo e Ngaahi Fehuʻí ChurchofJesusChrist.org.

Fakaafeʻi ʻa e kau akó ke vahevahe ʻa e meʻa naʻa nau akó. Fakakaukau ke fehuʻi ange pe ʻoku tokoni fēfē ʻa e meʻa ne nau akó ke fakatupulaki ʻenau fiefia ʻi he liuaki mai ʻa e Fakamoʻuí pea mo e Nofo Tuʻí.

Kapau ʻe fehuʻi ʻe he kau akó pe ko e hā hono ʻuhinga ʻo e pehē ʻe “veteange [ʻa Sētane] ʻi ha kiʻi kuonga siʻi” (Fakahā 20:3) ʻi he fakaʻosinga ʻo e Nofo Tuʻí, fakaafeʻi kinautolu ke nau lau ʻa e Tokāteline mo e Ngaahi Fuakava 88:111–115.

Ko e fakakaukauloto ki he meʻa kuó ke akó

ʻE lava ke ola lelei he taimi ʻe niʻihi hoʻo fakakaukauloto ki he meʻa ʻokú ke akó. Kuikui pea fakakaukauloto ki he meʻa kuó ke ako fekauʻaki mo e Fakamoʻuí pea mo e taimi ʻokú Ne pule ai ʻi he māmaní lolotonga e Nofo Tuʻí. Lotua e tokoni ʻa e Laumālie Māʻoniʻoní ke ʻai e ʻekitivitī ko ʻení ke mahuʻingamālie kiate koe. Fakakaukau ki he toe hāʻele mai ʻa e Fakamoʻuí mo e founga te Ne tāpuekina ai koe, ko ho ngaahi ʻofaʻangá, mo e faʻahinga kotoa ʻo e tangatá.

Te ke lava ʻo lau ʻa e lea ko ʻeni meia ʻEletā ʻEnitasení, ʻo fakaafeʻi e kau akó ke fakakaukauloto ki he meʻa ʻoku nau fanongo ki aí.

Naʻe fakamoʻoni ʻa ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku hanga ʻe heʻeku fakakaukau ki Heʻene hāʻele maí ʻo ueʻi hoku laumālié. ʻE fakaofo moʻoni ia! ʻE laka hake ʻene makehé mo e ngeiá, hono lahí mo e fakaʻofoʻofá, ʻi ha toe meʻa kuo aʻusia pe mamata ai ʻa e mata fakamatelié.

… Te Ne hā mai “ʻi he ngaahi ʻao ʻo e langí, [kuo] kofu ʻaki ʻa e mālohi mo e nāunau lahi; fakataha mo e kau ʻāngelo māʻoniʻoní kotoa pē” (Tokāteline mo e Ngaahi Fuakava 45:44).

… Te tau tūʻulutui ʻi he loto-ʻapasia, “pea ʻe fakaongo atu ʻe he ʻEikí ʻa hono leʻó, pea ʻe fanongo ki ai ʻa e ngaahi ngataʻanga kotoa pē ʻo e māmaní” (Tokāteline mo e Ngaahi Fuakava 45:49) …

ʻE ʻi ai e ngaahi fakataha fakangalongataʻa mo e kau ʻāngelo ʻo e langí mo e Kāingalotu ʻi he māmaní (vakai, Mōsese 7:63). Ka ko e mahuʻinga tahá, ʻo hangē ko e fakahā ʻe ʻĪsaiá, “Pea ʻe mamata ʻe he ngaahi ngataʻanga kotoa pē ʻo māmani ki he fakamoʻui ʻa hotau ʻOtuá,” (ʻĪsaia 52:10) pea te Ne “pule ki he kakano kotoa pē” (Tokāteline mo e Ngaahi Fuakava 133:25). (“Ke Hoko Mai Ho Puleʻangá,” Liahona, Mē 2015, 122)

Kole ki he kau akó ke hiki ʻi heʻenau tohinoa akó ʻa e meʻa ne nau ako fekauʻaki mo e Fakamoʻuí he ʻaho ní pea mo e ongo ʻoku nau maʻu fekauʻaki mo ʻEne liuaki maí. Fakaafeʻi ha niʻihi ʻe loto-fiemālie ke vahevahe ʻenau ngaahi fakakaukaú mo e ngaahi ongó. Fakakaukau ke vahevahe foki hoʻo ngaahi fakakaukaú mo e ngaahi ongó.

Ngaahi Maʻuʻanga Tokoni Kehé

Ko e hā kuo akoʻi ʻe he kau palōfitá mo e kau ʻaposetoló fekauʻaki mo e Nofo Tuʻí?

Naʻe akoʻi ʻe Palesiteni Lāsolo M. Nalesoni ‘o pehē:

Manatuʻi ʻe toki fakakakato ʻa e ngāue fakafaifekau ʻa Kalaisí he kahaʻú. Kuo teʻeki fakakakato e ngaahi kikite ʻo ʻEne Hāʻele ʻAnga Ua Maí. ʻOku tau kei langa pē ki he tumutumu ʻo e kuonga fakakosipeli fakaʻosi ko ʻení—ʻi he taimi ʻe hoko moʻoni ai ʻa e Hāʻele ʻAnga Ua Mai ʻa e Fakamoʻuí….

ʻE liuaki e ʻEikí ki he fonua naʻá Ne fakamāʻoniʻoniʻi ʻi Heʻene ngāue fakafaifekau ki ai ʻi he māmaní. Te Ne toe hāʻele mai ʻi he ikuna ki Selusalema. Te Ne toe liuaki ki he Kolo Māʻoniʻoní ʻi he ngaahi kofu kulokula fakaʻeiʻeiki ke fakataipe Hono taʻataʻá, ʻa ia naʻe tafe mei he ava kotoa pē (vakai, Tokāteline mo e Ngaahi Fuakava 133:46–48). ʻI he feituʻu ko iá mo e ngaahi feituʻu kehe “ʻe fakahā ʻa e nāunau ʻo [e ʻEikí], pea ʻe mamata ki ai ʻa e kakai kotoa pē” (ʻĪsaia 40:5; vakai foki, Tokāteline mo e Ngaahi Fuakava 101:23). ʻE ui Hono “huafá ko Fakaofo, ko Akonaki, ko e ʻOtua Māfimafi, ko e Tamai Taʻengata, ko e ʻEiki ʻo e Melinó” (ʻĪsaia 9:6).

Te Ne pule mei ha ongo kolo lalahi ʻe ua: taha ʻi Selusalema motuʻa (vakai, Sakalaia 14) pea ko e taha ʻi he Selusalema Foʻou ʻe “langa ia ʻi he konitinēniti ʻo ʻAmeliká” (Ngaahi Tefito ʻo e Tui 1:10). Mei he ongo senitā ko ʻení te Ne puleʻi mei ai e ngaahi ngāue ʻa Hono Siasí mo e puleʻangá. ʻE langa mo ha temipale ʻe taha ʻi Selusalema. Mei he temipale ko iá, te Ne ʻafio ai ʻo taʻengata ko e ʻEiki ʻo e Ngaahi ʻEikí.

Te Ne maʻu ʻi he ʻaho ko iá ha ngaahi huafa foʻou pea ʻe takatakaiʻi Ia ʻe ha Kāingalotu makehe. ʻE ʻiloa ia ko e “ʻEiki ʻo e Ngaahi ʻEikí mo e Tuʻi ʻo e ngaahi tuʻí: pea ko kinautolu [ʻe] ʻiate iá [ko kinautolu ia ʻoku] ui, mo fili, mo angatonu” (Fakahā 17:14) ki heʻenau falalá ʻi he māmaní. Pea te Ne “pule ia ʻo taʻengata pea taʻengata” (Fakahā 11:15).

ʻE toe fakafoki e māmaní ki hono tuʻunga fakapalataisí pea hoko ʻo foʻou. ʻE ʻi ai ha langi mo ha māmani foʻou (vakai, Fakahā 21:1; ʻEta 13:9; Tokāteline mo e Ngaahi Fuakava 29:23–24).

Ko hotau fatongiá ia—ko hotau faingamālie ia—ke tokoni ki hono teuteuʻi ʻo e māmaní ki he ʻaho ko iá. (“Ko e Kahaʻu ʻo e Siasí: Ko Hono Teuteu ʻo e Māmaní ki he Hāʻele ʻAnga Ua Mai ʻa e Fakamoʻuí,” Liahona, ʻEpeleli 2020, 8, 10–11)

Naʻe fakaʻaliʻali ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e tā valivali ʻoku ʻoatu ʻi he lēsoni ʻi ʻolungá peá ne fakamoʻoni:

15:34

ʻOku ou saiʻia ʻi he tā valivali ko ia ʻa Heuli ʻEnitasoni ʻo e Hāʻele ʻAngaua mai ʻa e Fakamoʻuí. ʻOkú ne fakamanatu mai kiate au te Ne hāʻele mai ʻi he fakaʻeiʻeiki mo e mālohi. ʻE hoko ha ngaahi meʻa fakaofo ʻi he māmaní pea ʻi he langí (vakai, Tokāteline mo e Ngaahi Fuakava 43:18; 45:40).

Ko kinautolu ʻoku tatali ki he hāʻele mai ʻa e Fakamoʻuí, te nau “kumi kiate [Ia].” Pea kuó Ne talaʻofa, “Te u haʻu”! ʻE mamata ʻa e kau māʻoniʻoní kiate Ia “ʻi he ngaahi ʻao ʻo e langí [mo e kau ʻāngelo māʻoniʻoni kotoa pē], kuó u kofu ʻaki ʻa e mālohi mo e nāunau lahi” (Tokāteline mo e Ngaahi Fuakava 45:44). “ʻE ifiʻi ʻe ha ʻāngelo ʻa ʻene talupité, pea ʻe ʻalu hake ʻa e kau māʻoniʻoní … mei he ngaahi vahe ʻe fā ʻo e māmaní” (Tokāteline mo e Ngaahi Fuakava 45:45–46) “ke fakafetaulaki kiate ia” (Tokāteline mo e Ngaahi Fuakava 88:96). Ko kinautolu “naʻe mohé,” ko e ʻuhinga ki he Kau Māʻoniʻoni moʻui taau ne pekiá, te nau “ʻalu atu [foki] ke fakafetaulaki kiate [Ia]” (Tokāteline mo e Ngaahi Fuakava 45:45; vakai foki, Tokāteline mo e Ngaahi Fuakava 29:13; 88:96–97).

ʻOku pehē ʻe he folofolá: “ʻE fokotuʻu leva ʻe he ʻEikí ʻa hono vaʻé ki he moʻungá,” (Tokāteline mo e Ngaahi Fuakava 45:48) pea “te Ne fakaongo atu ʻa hono leʻó, pea ʻe fanongo ki ai ʻa e ngaahi ngataʻanga kotoa pē ʻo e māmaní” (Tokāteline mo e Ngaahi Fuakava 45:49).

… ʻOku ou fakamoʻoni ki hono fakaʻeiʻeikí, kae tautautefito ki hono pau ʻo e meʻa fakaofo ko ʻeni ʻe hokó. ʻOku moʻui ʻa e Fakamoʻuí. Te Ne toe foki mai ki he māmaní. Pea ʻe tatau pē pe te tau ʻi he tafaʻaki ko ʻení pe tafaʻaki ʻe taha ʻo e veilí, ka te tau fiefia ʻi Heʻene hāʻele maí (“Ko Hono Teuteuʻi ʻo e Māmaní ki he Hāʻele ʻAngaUa Maí,” Liahona, Mē 2011, 52)

Ngaahi ʻEkitivitī Fakalahi ki he Akó

Ko e fakataipe ʻo e vala ʻo e Fakamoʻuí ʻi Heʻene liuaki maí

Fakaafeʻi e kau akó ke nau lau ʻa e ʻĪsaia 63:1–3 mo e Tokāteline mo e Ngaahi Fuakava 133:46–53 kapau ʻokú ke ongoʻi te nau tokoniʻi hoʻo kau akó ke mahino kiate kinautolu ʻa e founga ʻe fakamaʻa ai ʻe he ʻEikí ʻa e māmani ʻo e faiangahalá ʻi Heʻene liuaki maí.

Ko e hā ʻokú ke ako fekauʻaki mo e Fakamoʻuí mei he meʻa te Ne tuí?

Tokoni ke mahino ki he kau akó ʻoku fakafofongaʻi ʻe he lanu kulokula ʻa e kofu ʻo e Fakamoʻuí ʻa e toto ʻo e kau faiangahalá ʻa ia ʻe fakaʻauha ʻi he lilingi hifo ʻa e fakamaau totonú kiate kinautolu ʻi he Hāʻele ʻAnga Ua Maí. Te ne lava foki ʻo fakamanatu ki he kau māʻoniʻoní ʻa e taʻataʻa naʻe lilingi ʻe Sīsū maʻanautolú.

Ko e hā ʻoku mahuʻinga ai ke mahino fakatouʻosi e ʻaloʻofa mo e fakamaau totonu ʻa e Fakamoʻuí?

Ko e angaʻofa ʻa e ʻEikí

Kapau ʻe ʻaonga ke tokanga taha ki he ʻofa mo e ʻaloʻofa ʻa e ʻEikí ki Hono kakaí, fakakaukau ki he meʻá ni: Fakamatalaʻi ange lolotonga hono akoʻi ʻe liuaki mai ʻa e ʻEikí ke tauteaʻi ʻa e angahalá, naʻe kiʻi tuʻu ʻa ʻĪsaia ʻo fakamoʻoni ki he ʻofa, Fakalelei, mo e ʻaloʻofa ʻa e Fakamoʻuí. Fakaafeʻi e kau akó ke lau ʻa e ʻĪsaia 63:7–9. Mahalo ʻe tokoni ke fakamatalaʻi ange ʻoku ʻuhinga ʻa e foʻi lea ʻoku liliu ko e angaʻofá (veesi 7) ki ha “faʻahinga ʻofa mo ha ʻaloʻofa makehe ia ʻoku ongoʻi ʻe he ʻOtuá pea ʻoku fakaaʻu atu ia kiate kinautolu kuo nau fakahoko ha fuakava mo Iá” (Russell M. Nelson, “Ko e Fuakava Taʻengatá,” Liahona, ʻOkatopa 2022, 6).

Ko e hā ha ngaahi sīpinga ʻo e “ngaahi ʻaloʻofa [ʻa e ʻEikí]?” (ʻĪsaia 63:7)
Ko e hā e ngaahi kupuʻi lea naʻa nau fakamoʻoni ki he Fakalelei ʻa e Fakamoʻuí?
Ko e hā hoʻo ngaahi ongo fekauʻaki mo e ʻEikí mo ʻEne ʻofa kiate kitautolú?

Ko e teuteu ki Heʻene liuaki maí

Kapau ʻe ʻaonga ki hoʻo kau akó, vahevahe ʻa e fakamatala meia Palesiteni Nalesoni ʻi he Ngaahi Maʻuʻanga Tokoni Kehé. Hili iá, ʻe lava ke vahevahe ʻe he kau akó ʻa e founga te nau lava ai ʻo tokoni ke teuteuʻi ʻa e māmaní ki he liuaki mai ʻa e Fakamoʻuí. Te nau lava foki ʻo fakatotolo ʻi he konga ʻo e lea ʻa Palesiteni Nalesoni, “Ko Hono Tānaki ʻo ʻIsileli ʻi he Tafaʻaki Fakatouʻosi ʻo e Veilí” ki ha ngaahi founga ke teuteuʻi ai ʻa e māmaní.