“Исаиа 58:13–14: ‘Амралтын өдрийг баясгалант өдөр гэж нэрлэ,’” Хуучин Гэрээний семинарын багшийн гарын авлага (2026)
“Исаиа 58:13–14: ‘Амралтын өдрийг баясгалант өдөр гэж нэрлэ,’” Хуучин гэрээний семинарын багшийн гарын авлага
Хичээл 127: Исаиа 58–66
Исаиа 58:13–14
“Амралтын өдрийг баясгалант өдөр гэж нэрлэ”
Аврагч Өөрийн хүмүүсийг адислахын тулд Хүндэтгэлийн өдөр өгөгдсөн гэж заасан (Марк 2:27-г үзнэ үү). Та Хүндэтгэлийн өдрөөр Тэнгэрлэг Эцэг, Есүс Христ хоёрыг эрхэмлэн хүндэтгэснээр ирсэн ямар адислалыг харсан бэ? Хэрэв бид Эцэг, Хүү хоёрыг Тэдний ариун Хүндэтгэлийн өдөр эрхэмлэн хүндэтгэвэл тэр өдөр бидэнд адислал болох болно гэдгийг Исаиагийн түүхээс мэдэж авдаг. Энэ хичээл суралцагчдыг Хүндэтгэлийн өдрөөр Их Эзэнийг эрхэмлэн хүндэлж сурахад нь тусалж чадна.
Суралцагчийн бэлтгэл: Хүндэтгэлийн өдөр Тэнгэрлэг Эцэг, Есүс Христ хоёрыг шүтэн бишрэх талаар аль хэдийн мэддэг зүйлээ эргэцүүлэн бодоход суралцагчдыг урь. Тэд хүндэтгэлийн өдрийг ариун болгохын тулд сайн хийж байгаа гэж бодож байгаа зүйлүүдийнхээ жагсаалтыг гаргаж болно.
Боломжит суралцах үйл ажиллагаа
Та нар Хүндэтгэлийн өдрийн талаар ямар бодолтой байдаг вэ?
Суралцагчдад сайн мэдээний үнэний талаар санаа бодлоо тунгаан бодох цаг гаргаж өгөх нь тэдэнд сайн хийж байгаа зүйлсээ болон сайжруулах хэрэгтэй хэсгүүдээ олж тогтооход туслахад Ариун Сүнсийг урьж чадна.
Ням гарагт ямар сэтгэгдэлтэй байгаагаа хэсэг зуур бод. Хүндэтгэлийн өдрийн талаарх бодол мэдрэмжид тань нэмэр болох ням гарагт хийдэг зарим зүйлийг санахад тань туслах Ариун Сүнсийг урь. Дараа нь судлах тэмдэглэл дээрээ дараах асуултуудад хариул.
-
Хүндэтгэлийн өдрийн талаарх одоо мэдэрч буйгаа та хэрхэн дүрслэн хэлэх вэ?
-
Та хүндэтгэлийн өдөр юу хийхийг (эсвэл хийхгүй байхыг) хичээж байгаа вэ?
-
Таны ням гарагт хийдэг зүйл Тэнгэрлэг Эцэг, Есүс Христ хоёрт илүү сайн ойртоход тань тусалдаг гэж боддог уу?
Та өнөөдөр Исаиа 58:13–14-ийг судлахдаа таныг ариун өдрөөр Тэнгэрлэг Эцэг, Есүс Христ хоёрыг шүтэн бишрэх үед амлагдсан адислалуудыг таньж мэдэхэд тань туслах Ариун Сүнсийг урь.
Хүндэтгэлийн өдөр Их Эзэнийг эрхэмлэн хүндэтгэх
Исаиа 58:13–14 бол төгс эзэмших сургаалын судрын хэсэг юм. Төгс эзэмших сургаалын судрын хэсгийг амархан олохын тулд онцгойлон тэмдэглэхэд суралцагчдыг урьж болно.
Бүтээлтийн долоо дахь өдөр Тэнгэрлэг Эцэг, Есүс Христ хоёр өөрсдийн бүх хөдөлмөрөөс амарчээ. Тэд энэ өдрийг адисалж, дэлхийн “ажлаасаа” ариун амралтын цагийг бий болгосон (Мосе 3:3-ыг үзнэ үү). Тэнгэрлэг Эцэг, Есүс Христ хоёр бид бүгдийг энэ загварыг дагахад урьдаг (Гэтлэл 20:8–10, Дэд хууль 5:12–14-ийг үзнэ үү). Их Эзэн Өөрийн бошиглогч Исаиагаар дамжуулан Хүндэтгэлийн өдрийг Өөрт нь зориулахыг хүмүүстээ дахин зарлигласан.
Дараах дутуу өгүүлбэрийг самбар дээр бичээд, Их Эзэний Хүндэтгэлийн өдрийн талаар бидэнд өгсөн зарим урилгыг олж тогтооход суралцагчдад тусал: Бид … замаар хүндэтгэлийн өдрийг ариунаар нь хадгалдаг
Их Эзэн израилчуудад Арван зарлиг өгөхдөө Хүндэтгэлийн өдрийг Өөрийг нь шүтэн бишрэх ариун өдөр болгон онцгойлон адислахыг зарлигласан.
Исаиа 58:13-ыг уншаад, танд онцгой санагдсан үг хэллэгүүдийг тэмдэглэ.
-
Их Эзэн Түүний Хүндэтгэлийн өдрийг ариун өдөр болгохыг биднээс ямар арга замаар хүссэн бэ?
13-р шүлэг дэх үнэний мэдэгдлийг гүйцээсэн хэллэгүүдийг өөрсдийн үгээр тайлбарлахад суралцагчдад тусал. Та дараах үгсийг олж тогтооход нь тэдэнд тусалж болно:
-
хүсэл сонирхол, хүсэл тачаалдаа автахгүй байх
-
Хүндэтгэлийн өдрийг баяр хөөрийн (баясгалант) өдөр гэж үзэх нь
-
Хүндэтгэлийн өдөр болгоноор Тэнгэрлэг Эцэг, Есүс Христ хоёрыг эрхэмлэн хүндэтгэх
Дараах үйл ажиллагааг суралцагчид ганцаарчлан хийж болно.
13-р шүлэг дэх хэллэгийг сонго. Энэ хэллэгийг амьдралдаа хэрэгжүүлэх нь ямар байж болох талаар сайтар бод. Өөрт төрсөн зарим бодол санааг судлах тэмдэглэлдээ бичиж болох юм. Та тунгаан бодох үедээ хийж чадах зүйлсээ илүү сайн ойлгоход тань туслах Ариун Сүнсийг урь.
Хүндэтгэлийн өдрийг ариунаар сахих нь хувийн сонголтоор дүүрэн байдаг гэдгийг тайлбарлах нь тустай байж болно. Хүндэтгэлийн өдрийг ариунаар сахих зөв, буруу арга замуудын талаар ярилцахаас зайлсхийж, суралцагчдыг өөрсдийн сонголтын төлөө бусдыг шүүмжлэхээс зайлсхийхэд урамшуулан дэмж.
Их Эзэний өдрөөр Түүнийг эрхэмлэн хүндэтгэснээр олж авах адислалууд
Исаиа 58:14-ийг уншаад, Их Эзэний Хүндэтгэлийн өдөр Өөрийг нь хүндэлдэг хүмүүст амласан зарим адислалыг ойлгоход бидэнд туслах үг хэллэгүүдийг тэмдэглэ.
Та эдгээр адислалыг өөрийн үгээр юу гэж тайлбарлах вэ?
Их Эзэний амласан адислалуудыг олж тогтооход нь суралцагчдад туслахын тулд та дараах үг хэллэгүүдийн утгыг хуваалцах хэрэгтэй байж болох юм:
“Эзэний дотор баяр хөөрийг авна” – Эзэн дотор бид баярлана.
“Би чамайг дэлхийн өндөрлөгүүдээр аялуулан Эцэг Иаковын чинь өв хөрөнгөөр чамайг тэжээнэ” – Их Эзэн гэрээт хүмүүстээ адислалуудыг амладаг.
“Өндөрлөгүүд” гэдэг нь уул, толгод, бэхлэлт эсвэл ариун газруудыг хэлж байгааг хуваалцах нь тустай байж болох юм. Энэ үг хэллэг нь “Их Эзэн гэрээт хүмүүсээ бүх саад тотгорыг даван туулж, хамгаалагдаж, аюулаас хамгаалагдаж, дайснуудыг ялан дийлж (Дэд хууль 33:29-ийг үзнэ үү), Их Эзэнд илүү ойр бай хэмээн адислах болно” гэсэн утгатай байж болно. (“Line upon Line: Isaiah 58:13-14,” New Era, Feb. 2016)
Олж мэдсэн адислалаа самбарт нэмж бичихэд суралцагчдыг урьж болно. Хэрэв суралцагчдад Хүндэтгэлийн өдрийн шүтлэг бишрэлийн зарчмуудыг ойлгоход нэмэлт тусламж хэрэгтэй бол та тэднийг Езекиел 20:20, Сургаал ба Гэрээнүүд 59:9–13 дээрх нэмэлт адислалыг олж мэдэхэд урьж болно.
-
Хүндэтгэлийн өдрийг сахих нь “баясгалант” зүйл гэдгийг ойлгоход яагаад хэн нэгэнд хэцүү байж болох вэ?
-
Тэд ямар саад бэрхшээлтэй тулгарч болзошгүй вэ?
Ерөнхийлөгч Рассэлл М.Нэлсон Ням гарагт Тэнгэрлэг Эцэг болон Есүс Христ хэрхэн хүндлэл үзүүлэх тухай шийдвэр гаргахдаа тулгарсан саад бэрхшээлийг даван туулахад түүнд юу тусалсан талаар дараах зүйлийг хуваалцжээ.
Аврагч Өөрийгөө Хүндэтгэлийн өдрийн Эзэн хэмээн хэлжээ. Энэ бол Түүний өдөр! Тэрээр биднээс хүндэтгэлийн өдрийг сахихыг эсвэл хүндэтгэлийн өдрийг ариунаар сахихыг дахин дахин хүссэн. Бид үүнийг дагах гэрээ байгуулсан билээ.
Бид хүндэтгэлийн өдрийг хэрхэн ариун байлгадаг вэ? Би залуу байхдаа хүндэтгэлийн өдөр хийх ёстой болон хийх ёсгүй зүйлсийг жагсаан бичсэн хүмүүсийн үгийг судалдаг байв. Дараа нь би судруудаас хүндэтгэлийн өдөрт хэрхэн хандаж байгаа болон энэ өдөр хийдэг зүйлүүд маань Тэнгэрлэг Эцэг бид хоёрын хооронд тэмдэг болдог гэдгийг мэдэж авсан. Би үүнийг ойлгосноор, хийх ёстой болон хийж болохгүй зүйлсийн жагсаалт гаргах хэрэггүй болж билээ. Би ямар нэгэн үйл ажиллагааг хүндэтгэлийн өдөрт тохирох эсэх талаар шийдвэр гаргахдаа “Би Бурханд ямар тэмдэг үзүүлэхийг хүсэж байна вэ?” гэсэн энгийн асуултыг өөртөө тавьдаг бөгөөд энэ асуулт хүндэтгэлийн өдөртэй холбоотой хийх сонголтуудыг маань тодорхой болгодог. (“Хүндэтгэлийн өдөр нь баясгалант өдөр билээ,” 2015 оны 4-р сарын Ерөнхий чуулган, 122-123)
-
Исаиа 58:13–14 болон ерөнхийлөгч Нэлсоны захиас таны олж тогтоосон саад бэрхшээлтэй тэмцэж байгаа хэн нэгэнд хэрхэн тусалж болох вэ?
Суралцагчид ням гарагт Тэнгэрлэг Эцэг болон Есүс Христ дээр анхаарлаа төвлөрүүлэх хичээл зүтгэл гаргаснаараа адислагдсанаа мэдэрсэн үедээ зохих туршлагаасаа хуваалцаж болно. Дараах асуултууд нь суралцагчдад туршлагаа хуваалцахад тусална.
-
Хүндэтгэлийн өдөр Их Эзэнийг эрхэмлэн хүндэтгэх чадварыг тань юу сайжруулсан бэ? Ийнхүү хичээл зүтгэл гаргаснаараа та ямар ямар адислалыг олж харж байсан бэ?
Та Бурханд ямар тэмдэг үзүүлэхийг хүсэж байна вэ?
Хүндэтгэлийн өдрийн туршлагаа сайжруулах төлөвлөгөө гаргахад нь суралцагчдад туслахын тулд дараах зааврыг үзүүл.
Хувийн хүслээ хойш тавьж, хүндэтгэлийн өдөр Тэнгэрлэг Эцэг, Есүс Христ хоёрыг эрхэмлэн хүндэтгэхийн тулд Исаиа 58:13–14-т байдаг урилгын талаар өнөөдөр сурч мэдсэн, мэдэрсэн зүйлээ тунгаан бод. Судлах тэмдэглэлдээ дараах сүнслэг өдөөлтөд хариулахдаа тусламж авахаар Ариун Сүнсийг урь.
Хүндэтгэлийн өдөр Тэнгэрлэг Эцэг, Есүс Христ хоёрыг эрхэмлэн хүндэтгэхийн тулд би .
Цээжил
Та энэ хичээлийн турш төгс эзэмших сургаалын эшлэл, судрын гол үг хэллэгийг цээжлэхэд нь суралцагчдад тусалж, дараа дараагийн хичээлүүд дээр давтаж болно. “Миний ариун өдөр таашаалаа үйлдэхээс татгалзан, … Амралтын өдрийг баясгалант … гэж нэрлэ” гэдэг нь Исаиа 58:13–14 дээрх судрын гол үг хэллэг юм. “Төгс эзэмших сургаалыг давтах үйл ажиллагаа” хэсгийн хавсралт материалуудад цээжлэх үйл ажиллагаанд зориулсан санаанууд бий.