Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĪsaia 54: “ʻI he Ngaahi ʻAloʻofa Lahi Te u Tānaki Koe”

“ʻĪsaia 54: ‘ʻI he Ngaahi ʻAloʻofa Lahi Te u Tānaki Koe,’” Fuakava Motuʻá – Tohi Lēsoni ʻa e Faiako Seminelí (2026)

“ʻĪsaia 54: ‘ʻI he Ngaahi ʻAloʻofa Lahi Te u Tānaki Koe,’” Fuakava Motuʻá – Tohi Lēsoni ʻa e Faiako Seminelí

ʻĪsaia 50–57: Lēsoni 125

ʻĪsaia 54

“ʻI he Ngaahi ʻAloʻofa Lahi Te u Tānaki Koe”

Mahalo ʻe ongoʻi liʻekina mo tuenoa ʻa e kakaí he taimi ʻe niʻihi. ʻI he taimi ʻe niʻihi, mahalo ʻe fakakaukau ʻa e kakaí ʻoku ʻikai ke ʻi ai ʻa e ʻOtuá maʻanautolu. Koeʻuhí naʻe maumauʻi ʻe he fale ʻo ʻIsilelí ʻa e fuakava naʻa nau fai mo Sihová, naʻe fakamoveteveteʻi ai kinautolu. Mahalo ne nau ongoʻi kuo liʻaki kinautolu ʻe he ʻOtuá. Ka neongo ia, naʻe fakamanatu ʻe he ʻEikí ki Hono kakai ʻo e fuakavá ʻo fakafou ʻi he palōfita ko ʻĪsaiá, ʻi he taimi ko iá mo e taimí ni fakatouʻosi, te Ne tānaki kinautolu ʻaki ha ngaahi ʻaloʻofa lahi pea foaki kiate kinautolu ʻa e melinó. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e ʻofa mo e tokanga mai ʻa e Fakamoʻuí kiate kinautolú.

Teuteu ʻa e tokotaha akó: Fakaafeʻi e kau akó ke nau lau ʻa e ʻĪsaia 54, ʻo kumi e ngaahi foʻi lea mo e kupuʻi lea te nau vahevahe mo ha taha ʻokú ne ongoʻi tuenoa pe liʻekina.

Ngaahi ʻEkitivitī Ako ʻOku Ala Fakahokó

Ongoʻi liʻekiná

Fakakaukau ke kamata ʻa e kalasí ʻaki ʻa e tūkunga ko ʻení. ʻE lava ke fili ʻe he kau akó ha tatau ʻo e tūkungá ke nofotaha fakafoʻituitui ki ai pe ko ha tūkunga maʻá e kalasí fakakātoa. ‘E maʻu ʻe he kau akó ha faingamālie ke tali ki he tūkunga ne nau filí ʻi he fakaʻosinga ʻo e lēsoní.

ʻOku ongoʻi tuenoa mo liʻekina ʻa Kālosi koeʻuhí …

Kuó ne faiangahala pea ʻoku ʻikai ke ne tui ʻe fakamolemoleʻi ia ʻe he ʻOtuá ʻi he meʻa kuó ne faí.
Naʻá ne toki hiki kimuí ni ki ha feituʻu foʻou pea ʻoku faingataʻa ke ʻi ai hano ngaahi kaungāmeʻa.
ʻOku ʻikai ke ne ongoʻi ʻoku tali ʻene ngaahi lotú.

Fakakaukau ki ha meʻa te ke ala lea ʻaki kia Kālosi ke tokoni kiate ia. Fakakaukau ki he meʻa te ke fiemaʻu ke ne ʻilo fekauʻaki mo Sīsū Kalaisí.

Lolotonga e moʻui ʻa ʻĪsaiá, naʻá ne mamata tonu ki hono fakamoveteveteʻi ʻo e Puleʻanga Fakatokelau ʻo ʻIsilelí koeʻuhí ko ʻenau faiangahalá (vakai, 2 Ngaahi Tuʻi 17:6–23). Naʻá ne kikiteʻi foki koeʻuhí ko e faiangahala ʻa e Puleʻanga Fakatonga ʻo Siutá, ʻe ikunaʻi foki mo ia (vakai, ʻĪsaia 39:5–7). Koeʻuhí ko e meʻá ni, mahalo naʻe ongoʻi ʻe ha tokolahi ʻi he fale ʻo ʻIsilelí kuo liʻaki kinautolu ʻe he ʻOtuá.

Naʻe kikiteʻi ʻe ʻĪsaia ʻi he ʻĪsaia 54, ʻa e meʻa ʻe fai ʻe he ʻEikí maʻa Hono kakai ʻo e fuakavá. Naʻe fakaʻaongaʻi kimui ʻe he Fakamoʻuí ʻa e vahe ko ʻení ke akoʻi ki he kau Nīfaí ʻa e founga te Ne tānaki ai ʻa ʻIsileli ʻi he ngaahi ʻaho fakaʻosí (vakai, 3 Nīfai 22).

ʻI hoʻo ako ʻa e ʻĪsaia 54, fakafanongo ki he ngaahi ueʻi mei he Laumālie Māʻoniʻoní ke tokoni atu ke ke ʻiloʻi ʻa e ongo ʻoku maʻu ʻe he Tamai Hēvaní mo Sīsū Kalaisi fekauʻaki mo Hona vā fetuʻutaki mo koé.

Ko e ngaahi talaʻofa ʻa e ʻEikí ki Hono kakaí

Mahalo te ke fie fakamanatu ki he kau akó naʻe faʻa fakaʻaongaʻi ʻe ʻĪsaia ha fakatātā ʻi heʻene ngaahi tohí. ʻI heʻetau kiʻi tuʻu ʻo fakakaukau ki he ngaahi lēsoni ne ako mei he fakatātā naʻá ne fakakaú, ʻe lava ke ne fakaafeʻi e Laumālie Māʻoniʻoní ke ne akoʻi mai e pōpoaki ʻa e ʻEikí ʻi he ngaahi potufolofola ko ʻení. ʻI he ʻĪsaia 54, naʻe fakaʻaongaʻi ʻe ʻĪsaia ʻa e fakatātā ʻo ha vā fetuʻutaki ʻo e nofo-malí ke akoʻi fekauʻaki mo e vā fetuʻutaki fuakava ʻa e ʻEikí mo e fale ʻo ʻIsilelí. ʻOku fakafofongaʻi ʻe he husepānití ʻa e Fakamoʻuí, pea fakafofongaʻi ʻe he uaifí ʻa e fale ʻo ʻIsilelí. Mahalo te ke fie vahevahe ʻa hono lau ʻo e ngaahi veesi hokó ki ha ngaahi konga iiki ange, hangē ko e veesi 1–4, 5–8, 9–10, 13, 17. Ke tokoni ke mahino lelei ange ki he kau akó ʻa e meʻa ʻoku nau laú, te ke lava ʻo kiʻi taʻofi hili e kulupu veesi takitaha pea fakaafeʻi e kau akó ke nau fai ha ngaahi fehuʻi.

Te ke lava ʻo maʻu ha fakamatala ʻi ha ngaahi foʻi lea mo ha ngaahi kupuʻi lea pau ʻi he ngaahi veesi ko ʻení ʻi he konga Ngaahi Maʻuʻanga Tokoni Kehé.

Lau fakalelei ʻa e ʻĪsaia 54:1–10, 13, 17, ʻo kumi e meʻa naʻe talaʻofa ʻe Sīsū Kalaisi ki Hono kakai ʻo e fuakavá.

Ko e hā ʻoku akoʻi atu ʻe he fakatātā ʻo ha husepāniti mo ha uaifi fekauʻaki mo e vā fetuʻutaki ʻa e ʻEikí mo e fale ʻo ʻIsilelí?
Ko e hā ʻoku akoʻi mai ʻe he ngaahi huafa ʻo e Fakamoʻuí ʻi he veesi 5 fekauʻaki mo Iá?

Mahalo te ke fie vaheʻi ha taimi ke tuku ki he kau akó ke nau vahevahe ha ngaahi foʻi lea mo ha ngaahi kupuʻi lea mahuʻingamālie mei he ngaahi veesi ko ʻení pea aleaʻi e meʻa ʻoku nau akoʻi fekauʻaki mo e ʻEikí. Te nau lava ʻo fakahoko ʻeni ko ha kalasi pe ʻi ha fanga kiʻi kulupu iiki.

Tohiʻi ʻi he palakipoé ʻa e Ko Sīsū Kalaisi hotau Huhuʻí … pea fakaafeʻi e kau akó ke fakakakato ʻa e fakamatalá ʻo fakaʻaongaʻi ʻa e meʻa ʻoku nau maʻu ʻi he ʻĪsaia 54:4–10, 13, 17.
Ko e hā ha ngaahi founga te ke lava ai ʻo fakaʻosi e fakamatala, Ko Sīsū Kalaisi hotau Huhuʻí …?
ʻE lava ke fakaʻosi ʻe he kau akó ʻa e fakamatalá ʻi ha ngaahi founga lahi, kau ai ʻa e:

Ko Sīsū Kalaisi hotau Huhuʻí …
- te ne tānaki Hono kakaí ʻi he ʻaloʻofa.
- ʻokú Ne maʻu ha angaʻofa taʻengata maʻa Hono kakaí.
- te Ne fakahoko ʻa e fuakava naʻá Ne fai mo Hono kakaí.
- ʻokú Ne talaʻofa mai ʻa e nongá.
ʻI he taimi ʻe vakai ai ʻa e kau akó ʻoku felāveʻi ʻa e folofolá mo ʻenau moʻuí, ʻoku ngalingali ʻe mahino ange kiate kinautolu ʻa e founga ʻoku fakaʻaongaʻi fakataautaha ai ʻa e tokāteline ʻa e Fakamoʻuí kiate kinautolú. ʻE lava ke tokoni ʻa e ngaahi fehuʻi ko ʻení, pe ngaahi fehuʻi kehe te ke fakakaukau ki aí, ke nau aleaʻi ʻa e mahuʻinga ʻo e ngaahi moʻoni naʻa nau ʻiló.
ʻOkú ke pehē ko e fē ʻi he ngaahi moʻoni ko ʻení ʻe lava ʻo tokoni lahi taha ki he toʻu tupú he ʻaho ní? Ko e hā hono ʻuhingá?

Fakakaukau pe ko fē ʻi he ngaahi moʻoni ko ʻení ʻoku mahuʻingamālie taha kiate koe fakafoʻituituí.

ʻOkú ke pehē ʻoku fakahoko fēfē ʻe Sīsū Kalaisi ʻa e ngaahi talaʻofa ko ʻení he ʻaho ní?

Naʻe fakamoʻoni ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

… ʻI ha māmani ʻoku “vilingia ʻi he matangí, pea taʻefiemālie,” ʻo hangē ko ia ne folofola ʻaki ʻe Sihova ʻe hokó, te tau maʻu fēfē ʻa e meʻa ʻokú Ne ui ko e “fuakava ʻo [e] … melinó”? ʻOku tau maʻu ia ʻi heʻetau tafoki kiate Ia naʻá Ne folofola te Ne ʻaloʻofa mai kiate kitautolu “ʻi he ʻofa taʻengatá” pea foaki mai ʻa e melinó ki heʻetau fānaú. (“ʻOku ʻIkai Hangē ko e Foaki ʻa Māmaní,” Liahona, Mē 2021, 36)

Ko e hā ʻokú ke ako fekauʻaki mo e ongo ʻoku maʻu ʻe he Tamai Hēvaní mo Sīsū Kalaisi kiate koé?

Ko hono fakatātaaʻi ʻa e akó

ʻOku fakataumuʻa ʻa e ʻekitivitī ko ʻení ke tokoni ki he kau akó ke fakatātaaʻi ʻa e meʻa naʻa nau ako mo ongoʻi fekauʻaki mo e Tamai Hēvaní mo Sīsū Kalaisi mei hono ako ʻo e ʻĪsaia 54. Fili ha founga ʻo e tali te ne feau lelei taha e ngaahi fiemaʻu hoʻo kalasí. ʻOku kau ʻi he ngaahi sīpinga ʻo e meʻa te ke lava ʻo faí hono fakaafeʻi e kau akó ke tulamaʻi ʻa e tūkungá, tohi ha pōpoaki telefoni ʻo ʻave, pe faʻu ha fanga kiʻi fakatātā fepōtalanoaʻaki fakaoli mo Kālosi.

Fakamanatuʻi e ʻuhinga ʻoku ongoʻi liʻekina mo tuenoa ai ʻa Kālosí. Fakakaukau ki he meʻa te ke lava ʻo vahevahe mo ia mei he meʻa naʻá ke ako ʻi he ʻĪsaia 54. ʻOku ʻi ai nai ha ngaahi aʻusia fakataautaha te ke lava ʻo vahevahe mo ia?

Ko e hā ʻokú ke fie manatuʻi fekauʻaki mo e Fakamoʻuí mei hoʻo ako ʻa e ʻĪsaia 54?

Mahalo te ke fie vahevahe foki hoʻo fakamoʻoni ki he Fakamoʻuí mo hoʻo ngaahi fakakaukaú mo e ongó lolotonga hoʻo ako ʻa e ʻĪsaia 54.

Ngaahi Maʻuʻanga Tokoni Kehé

Ko e hā e ʻuhinga ʻo e niʻihi ʻo e ngaahi foʻi lea mo e kupuʻi lea ʻi he ʻĪsaia 54?

ʻI he ʻĪsaia 54:3 naʻá ne tala ki ʻIsileli te nau “ʻalu atu ki he nima toʻomataʻu, pea ki he toʻohemá” pea “ʻe fakakakai ʻa e ngaahi kolo naʻe lalá.” ʻOku fakafofongaʻi ʻe he meʻá ni ʻa e kakai tokolahi ʻe tānakí, ko e ʻuhinga ia ʻoku fiemaʻu ai ke “fakalahi ʻa e potu ʻo ho fale fehikitakí” (ʻĪsaia 54:2).

Naʻe fakamanatu ʻe he ʻEikí ki ʻIsileli ʻi he ʻĪsaia 54:9, ʻa ʻEne talaʻofa ke ʻoua ʻe toe ʻufiʻufi ʻa e māmaní ʻaki ha lōmakí (vakai, Sēnesi 9:15–17). Hangē pē ko e ʻosi ʻa e tāfeá pea talaʻofa ʻa e ʻEikí he ʻikai te Ne toe tuku mai ha tāfeá, he ʻikai taʻengata ʻa e houhau ʻa e ʻEikí ki he fale ʻo ʻIsilelí koeʻuhí ko ʻenau ngaahi angahalá.

ʻI he ʻĪsaia 54:10, naʻe fakaʻaongaʻi ai ʻe ʻĪsaia ha fakatātā ʻo e ngaahi moʻunga mo e ngaahi tafungofunga, ʻa ia ʻoku lau ʻoku tuʻuloa. ʻOku talaʻofa mai ʻe he ʻEikí ʻoku tuʻuloa ange ʻEne angaʻofá mo e “fuakava ʻo [ʻEne] melinó” ʻi he ngaahi moʻungá mo e ngaahi tafungofungá.

ʻĪsaia 54:2. Ko e hā ʻoku mahuʻinga fekauʻaki mo e fakatātā ʻa ʻĪsaia ki ha tēnití?

ʻOku fakamatalaʻi ʻi he Tohi Tuʻutuʻuni Fakakātoá ʻo pehē:

Naʻe fakamatalaʻi ʻe ʻĪsaia ʻa e Saione ʻo e ngaahi ʻaho kimui ní ko ha fale fehikitaki pe ko ha tāpanekale ʻoku fakamaʻu ʻe ha ngaahi pou tukituki (siteiki) (vakai, ʻĪsaia 33:20; 54:2). ‘Oku fokotuʻutuʻu e Siasí he ‘ahó ni ki ha ngaahi siteiki. Ko e siteiki kotoa pē ʻoku ʻi ai ha ngaahi uooti pea ʻoku taki ia ʻe ha palesiteni fakasiteiki. ‘Oku fokotuʻu ‘e he ʻEikí ‘a e ngaahi siteikí ki hono “tānaki fakataha” ʻa Hono kakaí pea hoko “ko ha malu‘anga, pea ko ha ungaʻanga” mei he māmaní (Tokāteline mo e Ngaahi Fuakava 115:6). ‘E ngāue fakataha ʻa e kāingalotu mo e kau taki ‘i he siteikí ke kau ʻi he ngāue ʻa e ʻOtuá ki he fakamo‘uí mo e hakeakiʻí (vakai, 1.2). (Tohi Tuʻutuʻuni Fakakātoá: 6.1)

Ko e hā e ongo ʻoku maʻu ʻe he ʻEikí ki Heʻene kakai ʻo e fuakavá?

Naʻe fakamoʻoni ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Neongo ne ʻi ai e tuenoá pea mo e taʻe anganofó he taimi ʻe niʻihi, ka ʻe toe maʻu pea huhuʻi pē ʻe he husepānití (Kalaisi) ʻa hono uaifí (ʻIsileli). …

… Ne tonu pē e houhau ʻa Kalaisi he taimi ʻe niʻihi ki he kau ʻIsileli ne fakaholomuí, ka ne taimi nounou mo fakataimi maʻu pē ia—“ko ha kiʻi momeniti siʻi pē.” ʻOku toe maʻu pē ʻa e ʻofa mamahi mo e ʻaloʻofá pea ikuna maʻu pē ʻi ha founga pau moʻoni. ʻE mole ʻa e ngaahi moʻungá pea puli atu mo e ngaahi tafungofungá. ʻE maha pakupaku ʻa e vai ʻo e ngaahi tahi lahí. ʻE lava ke hoko e ngaahi meʻa ne ʻikai fai ki ai ha ʻamanaki he māmaní, ka he ʻikai toʻo ʻa e angaʻofa mo e nonga ʻa e ʻEikí mei Hono kakai ʻo e fuakavá. Kuó Ne fakapapau mai ʻi ha fuakava fakalangi he ʻikai ke Ne houhau ai pē kiate kinautolu ʻo taʻengata.” (Christ and the New Covenant[1997], 290)

Kuo fakahaaʻi fēfē ʻe Sīsū Kalaisi ʻoku ʻAʻana ʻa kitautolú?

Naʻe fakamoʻoni ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:40

ʻOku ʻikai ha tālaʻa ko e hoko ko ia ʻo taha mo e Tamaí, ʻAló mo e Laumālie Māʻoniʻoní ko e taupotu taha ia ʻo e kau maí.

Ko ia, ko e tokāteline ʻo e kau maí ʻoku makatuʻunga ia ʻi heni—te tau lava kotoa ʻo fakapapauʻi: naʻe pekia ʻa Sīsū Kalaisi maʻaku; naʻá Ne ʻafioʻi ʻoku ou taau mo Hono taʻataʻá. ʻOkú Ne ʻofa ʻiate au pea ʻokú Ne lava ʻo fai ha liliu mahuʻinga ʻi heʻeku moʻuí. ʻI heʻeku fakatomalá; ʻe liliu au ʻe Heʻene ʻaloʻofá. ʻOku ou taha mo Ia ʻi he fuakava ʻo e ongoongoleleí; ʻoku ou kau ki Hono Siasí mo e puleʻangá; pea ʻoku ou kau ki Heʻene ngāue ke ʻomi e huhuʻí ki he fānau kotoa ʻa e ʻOtuá. (“Ko e Tokāteline ʻo e Kau Maí,” Liahona, Nōvema 2022, 56)

Ngaahi ʻEkitivitī Fakalahi ki he Akó

“Fakalahi ʻa e potu ʻo ho fale fehikitakí … pea tutuki ke maʻu hoʻo ngaahi tuki poupoú” (ʻĪsaia 54:2)

ʻE lava ke tokoni ʻa e ʻekitivitī ko ʻení ke mahino ki he kau akó ʻa hono fakaʻaongaʻi ʻe ʻĪsaia e fakatātā ʻo ha tēnití pea mo e ʻuhinga ʻoku fokotuʻutuʻu ai ʻa e Siasí ki ha ngaahi siteikí. Te ke lava ʻo ʻomi ha tēniti ki he kalasí pea fakaafeʻi e kau akó ke fokotuʻu ia pe fakaʻaliʻali ha fakatātā ʻo ha tēniti. Kole ange ke nau fakamatalaʻi ʻa e taumuʻa ʻo ha tēniti pea mo e founga ke fokotuʻu ai iá kae lava ke ne matuʻuaki ʻa e havilí mo e ʻuhá.

Fakakaukau ke fakaʻaliʻali ʻa e fakatātā ko ʻeni ʻo ha tēnití pea fakaafeʻi e kau akó ke fakahingoa ʻa e ngaahi konga kehekehe ʻo e tēnití ʻo fakaʻaongaʻi ʻa e meʻa ʻoku nau maʻu ʻi he veesi 2.

Lau ʻa e ʻĪsaia 54:2, ʻo kumi e meʻa naʻe akoʻi ʻe ʻĪsaia fekauʻaki mo ha tēnití. Fakakaukau ke ʻeke ha niʻihi ʻo e ngaahi fehuʻi ko ʻení ke tokoni ke mahino ki he kau akó ʻa e founga ʻoku fekauʻaki ai ʻa e ngaahi veesi ko ʻení mo e Siasi ʻo e Fakamoʻuí ʻi hotau kuongá.

ʻOkú ke pehē ʻoku tatau fēfē ʻa e Siasi ʻo e Fakamoʻuí mo ha tēniti?
ʻOku poupouʻi fēfē ʻe he ngaahi siteikí ha tēniti? Ko e hā ʻe lava ke akoʻi mai ʻe he meʻá ni fekauʻaki mo e fatongia ʻo e ngaahi siteiki ʻo Saioné ʻi he Siasi ʻo e Fakamoʻuí kuo fakafoki maí?
Ko e hā ha ngaahi founga ʻokú ke mamata ai ki hano fakalahi ʻo e tēnití ʻi hotau kuongá?

Fakakaukau ke vahevahe ʻa e fakamatala mei he Tohi Tuʻutuʻuni Fakakātoá fekauʻaki mo e ngaahi siteikí ʻi he Ngaahi Maʻuʻanga Tokoni Kehé. Te mou lava foki ʻo lau ʻa e Tokāteline mo e Ngaahi Fuakava 115:6 pea aleaʻi e founga ʻoku ʻomi ai ʻe he ngaahi siteiki ʻo Saioné ha maluʻanga mo ha ungaʻanga mei he ngaahi matangi ʻo e moʻuí. Te ke lava foki ʻo lau ʻa e Molonai 10:31 pe Tokāteline mo e Ngaahi Fuakava 82:14; 133:9 pea aleaʻi ʻa e meʻa ʻoku kole mai ʻe he ʻEikí ke tau fai ʻi heʻetau hoko ko ha kāingalotu ʻo Hono Siasí.

Ko e ngaahi talaʻofa ʻa e ʻEikí ki ʻIsileli ʻo e fuakavá

ʻI hono fakafeʻiloaki e laukonga ʻĪsaia 54:1–10, 13, 17, mahalo te ke fie vahevahe ʻa e fakaafe ko ʻeni meia Palesiteni Lāsolo M. Nalesoní.

ʻI hoʻo ako ko ia e folofolá … ʻoku ou tapou atu ke ke ʻai ha lisi ʻo e meʻa kotoa kuo ʻosi talaʻofa ʻe he ʻEikí te Ne fakahoko maʻa ʻIsileli ʻo e fuakavá. ʻOku ou tui te ke ʻohovale! Fakalaulauloto ki he ngaahi talaʻofá ni. Talanoa ki ai mo ho fāmilí mo ho ngaahi kaungāmeʻá. Peá ke moʻui mo fakatokangaʻi hono fakahoko ʻo e ngaahi talaʻofá ni ʻi hoʻo moʻuí. (“Tuku ke Lāngilangiʻia ʻa e ʻOtuá,” Liahona, Nōvema 2020, 95)

Fakaafeʻi e kau akó ke hiki e ngaahi talaʻofa ʻa e ʻEikí ki ʻIsileli ʻo e fuakavá ʻi he ʻĪsaia 54. Te mou lava ʻo aleaʻi ʻa e meʻa ʻoku akoʻi mai ʻe he ngaahi talaʻofa ko ʻení fekauʻaki mo e ʻEikí mo e founga e vakai ʻa e kau akó ki hono fakahoko kinautolu ʻi heʻenau moʻuí. Te ke lava ʻo poupouʻi e kau akó ke hokohoko atu ʻenau fekumi ki he ngaahi talaʻofa ʻa e ʻEikí ki ʻIsileli ʻo e fuakavá ʻi heʻenau ako e folofolá.