Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

2 Ngaahi Tuʻi 17; 24–25: Ko Hono Fakamoveteveteʻi ʻo ʻIsilelí

“2 Ngaahi Tuʻi 17; 24–25: Ko Hono Fakamoveteveteʻi ʻo ʻIsilelí,” Fuakava Motuʻá – Tohi Lēsoni ʻa e Faiako Seminelí (2026)

“2 Ngaahi Tuʻi 17; 24–25: Ko Hono Fakamoveteveteʻi ʻo ʻIsilelí,” Fuakava Motuʻá – Tohi Lēsoni ʻa e Faiako Seminelí

2 Ngaahi Tuʻi 16–25: Lēsoni 88

2 Ngaahi Tuʻi 17; 24–25

Ko Hono Fakamoveteveteʻi ʻo ʻIsilelí

A group of youth reading scriptures together in Florida.

ʻOku faʻa lea ʻa e kau palōfitá mo e niʻihi kehé fekauʻaki mo hono tānaki ʻo ʻIsilelí. Ke mahino ʻa e tānaki fakatahá, ʻe lava ʻo tokoni ke mahino ʻa e ʻuhinga naʻe fakamoveteveteʻi ai ʻa ʻIsileli ʻi he kamataʻangá. ʻE lava ke tokoni ʻa e lēsoni ko ʻení ke fakaʻaongaʻi ʻe he kau akó ʻa hono fakamoveteveteʻi ʻo ʻIsilelí ke ʻiloʻi e ngaahi ʻulungaanga ʻo e Tamai Hēvaní mo Sīsū Kalaisí.

Teuteu ʻa e tokotaha akó: Fakaafeʻi e kau akó ke lau ʻa e Ngaahi Fakakaukau ke Manatuʻí: “ʻE Folofola ʻa Sīsū ki ʻIsileli Kotoa, ʻFoki ki ʻApi’” mei he Haʻu, ʻo Muimui ʻIate Au—Maʻá e ʻApí mo e Lotú: Fuakava Motuʻá 2026. Kole ange ke nau omi mateuteu ke vahevahe ha ngaahi fakakaukau pe ngaahi fehuʻi fekauʻaki mo hono fakamoveteveteʻi ʻo ʻIsilelí.

Ngaahi ʻEkitivitī Ako ʻOku Ala Fakahokó

Ko hono fakamoveteveteʻi ʻo ʻIsilelí

Kimuʻa pea kamata e kalasí, mahalo te ke fie fakahingoa ha ngaahi feituʻu kehekehe ʻi he loki akó ko e Puleʻanga Fakatokelaú (ʻIsileli), Puleʻanga Fakatongá (Siuta), ʻAsīlia, ko e Ongo ʻAmeliká, mo Papilone/Pēsia.

ʻE hoko fēfē pea ko e taimi fē ʻe lava ke hoko ai hono fakatonutonuʻi ha fānau ko ha fakaʻilonga ʻo e ʻofa mei heʻenau mātuʻá?

Lau ʻa e Tokāteline mo e Ngaahi Fuakava 95:1, ʻo kumi e ongo ʻoku maʻu ʻe he Tamai Hēvaní mo Sīsū Kalaisi ki he kakai ʻoku fiemaʻu ke Na fakatonutonu pe tauteaʻí.

Naʻe toutou angatuʻu ʻa ʻIsileli ʻi he Fuakava Motuʻá ki he Tamai Hēvaní mo Sīsū Kalaisi pea naʻe fiemaʻu ke fakatonutonu kinautolu. Naʻe iku ʻeni ki he meʻa ʻoku ui ko hono fakamoveteveteʻi ʻo ʻIsilelí. ʻI hoʻo ako ki hono fakamoveteveteʻi ʻo ʻIsilelí, kumi e founga naʻe fakahaaʻi ai ʻe he Tamai Hēvaní mo Sīsū Kalaisi ʻEna ʻofá.

Puleʻanga Fakatokelau ʻo ʻIsilelí

ʻI he 975 BC nai, hili e pekia ʻa Solomoné, naʻe hoko hono foha ko Lehopoamí ko e tuʻi. Naʻe fakamafasiaʻi lahi ʻe Lehopoami ʻa e kakaí. Naʻe angatuʻu ha toko hongofulu ʻo e ngaahi hakó kia Lehopoami pea nau muimui ʻia Selopoami (vakai, 1 Ngaahi Tuʻi 12:6–11, 19–20). Naʻe fakatupu ʻe he māvahevahe ko ʻení ʻa e Ongo Puleʻanga ʻi he Tokelaú mo e Tongá.

Lau ʻa e 2 Ngaahi Tuʻi 17:7–18, 22–23, ʻo kumi e meʻa naʻe hoko ki he Puleʻanga Fakatokelau ʻo ʻIsilelí.

Ko e hā e meʻa naʻe hoko kiate kinautolú pea ko e hā e ʻuhinga naʻe hoko aí?

Fakamatalaʻi ange ko e taimi naʻe ikunaʻi ai ʻe ʻAsīlia ʻa e Puleʻanga Fakatokelau ʻo ʻIsilelí pea nau foki mo ha tokolahi ʻo e kau ʻIsilelí ki ʻAsīliá, naʻe kamata heni hono fakamoveteveteʻi ʻo ʻIsilelí. Kole ki he tokolahi taha ʻo e kau ako ʻoku nau tuʻu ʻo ofi ki he Puleʻanga Fakatokelaú (ʻIsileli) ke nau hiki ki he konga ʻo e lokí ʻoku fakahingoa ko ʻAsīliá. Fakamahinoʻi ange ʻoku tau faʻa ui e ngaahi faʻahinga ko ʻení ko e faʻahinga ʻo ʻIsileli ne molé. Te ke lava ʻo ʻoange ki he kau ako naʻe hiki ki ʻAsīliá ha fakaʻilonga ʻoku pehē Ko e Faʻahinga Naʻe Molé. Te ke lava ʻo ʻoange ki he kau ako ʻoku nofo ʻi ʻIsilelí ha fakaʻilonga ʻoku pehē ko e Kau Samēliá. Mahalo te ke fie fakamatalaʻi ange ko e kau Samēliá naʻa naukonga ʻIsileli mo konga Senitaile (vakai, Fakahinohino ki he Ngaahi Folofolá, “Samēliá, Kakai,” Gospel Library).
Te ke fakamatalaʻi fakanounou fēfē ʻa e ʻuhinga naʻe fakamoveteveteʻi ai ʻa ʻIsilelí?

Mahalo ʻe ʻiloʻi ʻe he kau akó ha moʻoni hangē ko ʻení: Koeʻuhí naʻe fakafisingaʻi ʻe ʻIsileli ʻa e kau palōfitá pea maumauʻi ʻenau fuakava mo e ʻEikí, naʻá Ne fakamoveteveteʻi kinautolu ʻi he lotolotonga ʻo e ngaahi puleʻangá.

Puleʻanga Fakatonga ʻo Siutá

Ko e hā ha meʻa kuó ke ako fekauʻaki mo e Puleʻanga Fakatonga ʻo Siutá, kau ai e ngaahi tuʻi naʻe pule aí?

Fakaafeʻi e kau akó ke vahevahe ha ngaahi talanoa ʻoku nau manatuʻi. Hangē ko ʻení, mahalo te nau talanoa ki he Tuʻi ko Hesekaiá pe Tuʻi ko Sōsaiá. Kapau te nau fai ia, te ke lava ʻo faʻu ha hingoa maʻá e tuʻi takitaha pea ʻai ke puke hake ia ʻe he kau akó. Poupouʻi e kau akó ke vahevahe ʻa e founga naʻe tāpuekina ai ʻe he ʻEikí ʻa e ongo tuʻi ko ʻení mo e kakaí koeʻuhí ko ʻena tui kiate Iá. Naʻe fakatou pule ʻa e ongo tuʻi angatonu ko ʻení hili hono ikunaʻi ʻe ʻAsīlia ʻa e Puleʻanga ʻo ʻIsilelí.

ʻE lava foki ke lave ʻa e kau akó kia Līhai mo hono fāmilí. Kapau te nau lave ki ai, fakaafeʻi ke nau vahevahe ʻa e meʻa ʻoku nau ʻiló. Kapau he ʻikai, te ke lava ʻo ʻai ke nau fai e ngaahi meʻa ko ʻení. Te ke lava ʻo faʻu ha hingoa maʻa Līhai mo hono fāmilí ke pukepuke ʻe ha kau ako ʻe niʻihi.

Lau ʻa e 1 Nīfai 1:4, ʻo kumi pe ko hai naʻe toe nofo ʻi he Puleʻanga ʻo Siutá.

Lau ʻa e 1 Nīfai 2:1–4; 18:22–23, ʻo kumi e meʻa ne hoko ki hono fāmilí.

Ko e hā ha ngaahi tāpuaki mei he Tamai Hēvaní kuo tau maʻu koeʻuhí naʻe tataki ʻe he ʻEikí ʻa Līhai mo hono fāmilí mei Selusalema ko ha konga ʻo e fakamoveteveteʻí?

Kole ki he kau ako ʻoku nau puke hake e hingoa ʻo Līhai mo hono fāmilí ke nau ʻunu mei he Puleʻanga ʻo Siutá ki he konga ʻo e kalasí ʻoku ui ko e Ongo ʻAmeliká.

Lau ʻa e 2 Fakamatala Meʻa Hokohoko 36:17–20, ʻo kumi e meʻa naʻe fai ʻe Nepukanesa, ko e tuʻi ʻo Pāpiloné, ki he kakai ʻo Selusalemá hili pē ha taimi nounou mei he mavahe ʻa Līhai mo hono fāmilí.

Kole ki he toenga ʻ o e kau ako ʻi he Puleʻanga Siutá ke nau ʻunu ki he feituʻu ʻo e loki akó ʻokú ne fakafofongaʻi ʻa Pāpilone/Peasiá. Fakafuofua ki he vahaʻa ʻo e 605 mo e 587 BC, naʻe ʻave ʻe he kau Pāpiloné ha kau Siu tokolahi ki Pāpilone pea naʻa nau ʻākoloʻi pea faifai ʻo nau fakaʻauha ʻa Selusalema (vakai, 2 Ngaahi Tuʻi 24:8–16; 25:1–12, 21; Selemaia 52).

Mahalo te ke fie kole ki he kau akó ke nau tala atu ha niʻihi fakafoʻituitui ne nau iku ʻo nofo ʻi Pāpilone. Kapau te nau fiemaʻu tokoni, te ke lava ʻo ʻoange ki ha kau ako ʻe niʻihi ha ngaahi hingoa hangē ko Taniela, Setaleki, Mēsake, ʻApitenikō (vakai, Taniela 1:1–7), mo ʻIsikeli (vakai, Fakahinohino ki he Ngaahi Folofolá, “ʻIsikeli,” Gospel Library).

Lau ʻa e fakamatala fakanounou ko ʻení. Fakamatalaʻi ange naʻe nofo pē ha kau Siu ʻe niʻihi ʻi Peasia (vakai, ʻĒseta 2:5–7). Kole ki ha niʻihi ʻo e kau ako ʻi Pāpilone/Peasiá ke nau foki ki he feituʻu ʻo e loki akó ʻokú ne fakafofongaʻi ʻa e Puleʻanga ʻo Siutá. Te ke lava ʻo faʻu ha ngaahi hingoa maʻa ʻĒsela mo Nehemaia ke toʻo ʻe ha kau ako ʻe niʻihi ʻoku nau hiki ki he Puleʻanga ʻo Siutá. ʻE ako lahi ange ʻa e kau akó fekauʻaki mo ʻĒsela mo Nehemaia ʻamui ange.

ʻI he pule ʻa e Tuʻi ko Sailosí, naʻe ikunaʻi ai ʻe he kau Peasiá ʻa Pāpilone. Fakafuofua ki he 537 BC, naʻe ueʻi ʻe he ʻEikí ʻa e Tuʻi ko Sailosi ʻo Peasiá ke fakangofua e kau Siú ke nau foki ki Selusalema ʻo toe langa e temipalé (vakai, 2 Fakamatala Meʻa Hokohoko 36:22–23; Selemaia 29:10–14; ʻĒsela 1:1–3). ʻI he ngaahi taʻu ne hoko atu aí, naʻe foki ʻa ʻĒsela, Nehemaia, mo ha niʻihi kehe ki Selusalema ke tokoni ki hono toe langa ʻo e koló mo fakaʻosi ʻa e temipalé (vakai, ʻĒsela 7:6–8; Nehemaia 2:1–11).

ʻOku ʻikai teitei hē ʻa e fānau ʻa e Tamai Hēvaní kiate Ia

Mahalo te ke fie fakamahinoʻi ange naʻe ʻikai ʻilo ʻe he tokolahi ʻo e ngaahi kulupu ko ʻení ʻa e meʻa naʻe hoko ki he ngaahi kulupu kehé. Mei he anga ʻenau vakaí, naʻe mole ʻa e ngaahi kulupu kehé.

Lau ʻa e 3 Nīfai 17:4, ʻo kumi e meʻa naʻe vahevahe ʻe he Fakamoʻuí mo e kau Nīfaí lolotonga ʻEne ngāue fakafaifekau ʻi honau lotolotongá.

Ko e hā e meʻa ʻoku makehe kiate koe ʻi he veesi ko ʻení?

Te ke lava ʻo fakamahinoʻi ange neongo naʻe fakamoveteveteʻi ʻa ʻIsileli, ka naʻe fakaʻaongaʻi ʻe he ʻEikí ʻa hono fakamoveteveteʻi ʻa Hono kakai ʻo e fuakavá ke tāpuekina ʻa e ngaahi puleʻanga naʻe fakamoveteveteʻi kinautolu ki aí (vakai, “Ko hono fakamoveteveteʻi ʻo ʻIsilelí” ʻi he Fakahinohino ki he Ngaahi Folofolá, “ʻIsileli,” Gospel Library). Mahalo te ke fie fakamahinoʻi ange ko e “ʻofa” ʻi he ʻĪsaia 54:8 ko ha liliu ia ʻo e hesed. Ke maʻu ha fakamatala lahi ange ki he mahuʻinga ʻo e hesed vakai ki he fakamatala ʻa Palesiteni Nalesoni “Fuakava Taʻengatá,” Liahona, ʻOkatopa 2022, 5–6.

Lau ʻa e Teutalōnome 4:27–31 mo e ʻĪsaia 54:7–10, ʻo kumi e meʻa naʻe talaʻofa ʻe he ʻEikí te Ne fai maʻa ʻIsileli kuo fakamoveteveteʻí.

Ko e hā ha ngaahi ʻulungaanga ʻokú ke vakai ki ai ʻi he Tamai Hēvaní mo Sīsū Kalaisi ʻi hoʻo ako fekauʻaki mo hono fakamoveteveteʻi ʻo ʻIsilelí?

Fakakaukau ke vahevahe hoʻo fakamoʻoni ki he ʻofa ʻa e Tamai Hēvaní ki Heʻene fānaú kotoa pea mo ʻEne talaʻofa ke tānaki fakataha ʻa ʻIsileli kuo fakamoveteveteʻí.

Ngaahi Maʻuʻanga Tokoni Kehé

Ko e hā e ʻuhinga ʻoku mahuʻinga ai hono fakamoveteveteʻi ʻo ʻIsilelí ʻi hotau kuongá?

Naʻe fakamatala ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

14:33

ʻOku kau ʻa hono puke pōpula ʻo e kau Siú mo hono fakamovetevete ʻo e faʻahinga ʻo ʻIsilelí, kau ai e faʻahinga ʻe hongofulú, ʻi he ngaahi meʻa fakatokāteline ʻoku fai ki ai e tokanga ʻi he ongoongolelei Kuo Toe Fakafoki Maí. Ne kau ʻi he Puleʻanga Fakatokelau ʻo ʻIsilelí ʻa e faʻahinga ʻe hongofulu kuo pulí pea naʻe ʻave pōpula kinautolu ki ʻAsīlia ʻi he 721 B.C. Naʻa nau ʻalu ki he ngaahi fonua [ʻi he tokelaú]. ʻOku pehē ʻe heʻetau tefito ʻo e tui hono hongofulú, “ʻOku mau tui ki hono tānaki fakataha moʻoni ʻo ʻIsilelí pea ki hono fakafoki mai ʻo e Faʻahinga ʻe Hongofulú” [Ngaahi Tefito ʻo e Tuí 1:10]. ʻOku tau tui foki ko e konga ʻo e fuakava ne fai ʻe he ʻEikí mo ʻĒpalahamé, ne ʻikai ngata ʻi hono faitāpuekina e hako ʻo ʻĒpalahamé ka ʻe tāpuekina e kakai kotoa ʻo e māmaní. Hangē ko e lea ʻa [Palesiteni] Lāsolo M. Nalesoní, ko e tānakí “ʻoku ʻikai ko ha feituʻu pē; ka ko ha tukupā fakafoʻituitui. ʻE lava ke ʻʻomi ʻa kinautolu ki he ʻilo ʻo e ʻEikí’ [3 Nīfai 20:13] ʻo ʻikai mavahe mei honau fonua tupuʻangá” [Russell M. Nelson, “The Book of Mormon and the Gathering of Israel” (lea ne fai ʻi he seminā maʻá e kau palesiteni fakamisiona foʻoú, 26 Sune 2013)].

ʻOku mahino ʻetau tokāteliné: “Naʻe hanga ʻe he ʻEikí ʻo fakamoveteveteʻi mo fakamamahiʻi ʻa e faʻahinga ʻe hongofulu mā ua ʻo ʻIsilelí koeʻuhí ko ʻenau taʻe angatonú mo e angatuʻú. Ka neongo iá, naʻe [fakaʻaongaʻi] ʻe he ʻEikí ʻa hono fakamoveteveteʻi ko ʻeni ʻo Hono kakai kuo filí ʻi he ngaahi puleʻanga ʻo e māmaní ke tāpuakiʻi ai ʻa e ngaahi puleʻanga ko iá” [Fakahinohino ki he Ngaahi Folofolá, “ʻIsileli” scriptures.lds.org]. (“Ngaahi Tangilāulau ʻa Selemaiá: Vakai Telia e Nofo Pōpulá,” Liahona, Nōvema 2013, 89)

Naʻe fakaʻaongaʻi fēfē ʻe he ʻEikí ʻa ʻIsileli kuo fakamoveteveteʻí ke tāpuekina ʻaki e māmaní?

Naʻe akonaki ʻa ʻEletā Seni M. Poueni ʻo e Kau Fitungofulú ʻo pehē:

ʻOku tāpuekina kitautolu ʻi hono fakamoveteveteʻi ʻo ʻIsileli ki he ngaahi puleʻanga kotoa pē ʻa ia naʻe afuhi ai ʻa e toto ʻo ʻIsilelí ʻi he ngaahi puleʻangá, pea ʻoku maʻu leva ai ʻe he ngaahi puleʻangá ʻa e meʻa fakatupu [lēvani] ʻo e māʻoniʻoní, ʻo makatuʻunga ʻi heʻenau fakatomalá, pea ʻoku ʻi ai ʻenau totonu ki he ngaahi talaʻofa naʻe fai ki he fānau ʻa ʻĒpalahamé. (“Out of the Wilderness into the Light” [Brigham Young University–Idaho devotional, March 1, 2011], byui.edu)

Naʻe fakamatala ʻa ʻEletā Sēmisi E. Talamesi (1862–1933) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Naʻe fakamoveteveteʻi ʻaupito ʻa e kakai ʻIsilelí ʻi he ngaahi puleʻangá ke foaki ki he kakai ko ʻeni kuo fakamoveteveteʻí ha feituʻu mahuʻinga ko ha ʻuhinga ia ʻo e tupulaki mo e fakalakalaka ʻa e meimei konga lahi kotoa pē ʻo e fāmili ʻo e tangatá. Naʻe fakahoko e ngāue ko ʻeni ʻo e fakamoveteveteʻí ʻi ha ngaahi tuʻunga kehekehe, pea naʻe fakamafao ia ʻi ha ngaahi taʻu ʻe lauafe. Naʻe tomuʻa mamata ki ai ʻa e kau palōfita ʻo e kuonga muʻá; pea naʻe kikiteʻi ʻe he kau taki fakalaumālie ʻo e toʻu tangata kotoa pē kimuʻa pea ʻi he hili pē ʻa e kuonga ʻo e Mīsaiá, ʻa hono fakamoveteveteʻi ʻo e kakaí, ko ha nunuʻa ʻo e fakautuutu ʻenau faiangahalá. (Articles of Faith, 12th ed. [1924], 316)

Naʻe hoko fēfē ʻa hono fakamoveteveteʻi ʻo ʻIsilelí ko ha tautea naʻe ʻaonga ke fai ʻe ha ʻOtua ʻofa?

Naʻe fakamatala ʻa ʻEletā Sēmisi E. Talamesi (1862–1933) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e ngaahi mamahi ʻo ʻIsilelí ko ha tautea ia naʻe ʻaonga pē ke fakahoko ʻe ha Tamai naʻe mamahi kae ʻofa, ʻa ia naʻá Ne palaniʻi ʻo fakafou ʻi he ngaahi founga lelei ko ʻení ke fakamaʻa ʻEne fānau kuo ʻuliʻi ʻe he angahalá. …

Neongo naʻe teʻia ʻe he tangatá, mole honau tokolahi mei he ʻilo ʻo e māmaní, ka ʻoku ʻikai mole ʻa ʻIsileli ki honau ʻOtuá. ʻOkú Ne ʻafioʻi ʻa e feituʻu kuo tataki pe ʻave ʻa kinautolu ki aí; ʻoku kei hōifua ʻa Hono finangaló kiate kinautolu ʻi he ʻofa fakaetamaí; pea ko e moʻoni te Ne ʻomi ʻa kinautolu, ʻi hono taimi totonu pea ʻi he ngaahi founga kuo fokotuʻú, ki ha tuʻunga ʻo e tāpuaki mo e ivi tākiekina ʻoku feʻunga mo Hono kakai ʻo e fuakavá. Neongo ʻenau angahalá pea neongo ʻa e ngaahi faingataʻa ne nau fakatupu maʻanautolu peé, ka naʻe folofola ʻa e ʻEikí: “Ka neongo ʻa ʻeni kotoa pē, ʻo ka nau ka ʻi he fonua ʻo honau filí, ʻe ʻikai te u liʻaki ʻa kinautolu, pea ʻe ʻikai te u fehiʻa kiate kinautolu, ke fakaʻosi ʻaupito ʻa kinautolu, pea ke liʻaki ʻeku fuakava mo kinautolú: he ko au ko [e ʻEikí] ko honau ʻOtuá.” Hangē pē ko e kakato ʻo hono fakamoveteveteʻí, ʻe pehē pē mo e kakato ʻo hono tānaki fakataha ʻo ʻIsilelí. (The Articles of Faith, 12th ed. [1924], 328–29)

Ngaahi ʻEkitivitī Fakalahi ki he Akó

Naunau tokoni ki he ʻekitivitī ʻo e fakamoveteveteʻí

ʻOku fakahaaʻi ʻe he ʻīmisi ko ʻení ha sīpinga ʻo e founga te ke lava ai ʻo fokotuʻutuʻu e ngaahi hingoá ʻi he loki akó:

Te mou lava ʻo sio ʻi he “Tānaki ke Malu ki ʻApi” (14:48) mei he taimi 5:37 ki he 6:26. Naʻe fakamatalaʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he vitioó ʻa hono fakamoveteveteʻi ʻo ʻIsilelí.

14:48

Ko e Kakai Mūlekí

Lolotonga e ʻekitivitī fakamoveteveteʻí, te ke lava ʻo lave ki he kau Mūlekí ʻi he Tohi ʻa Molomoná. Fakamatalaʻi ange ko e Tuʻi ko Setikiá ʻa e tuʻi fakamuimui taha ʻo Siuta kimuʻa pea puke pōpula kinautolu ʻe Pāpiloné. ʻOku pehē ʻi he 2 Ngaahi Tuʻi 25:7 naʻe fakapoongi hono ngaahi fohá. Ka neongo ia, ʻoku tau ʻilo ʻi he Tohi ʻa Molomoná naʻe hola ha taha ʻo e ngaahi foha ʻo Setikiá, ko Mūleki. Naʻe tataki ʻe he ʻEikí ʻa Mūleki ki he Ongo ʻAmeliká (vakai, ʻAmenai 1:15–16; Hilamani 6:10; 8:21). Kole ki ha niʻihi ʻo e kau akó ke nau hiki mei he Puleʻanga Fakatongá (Siuta) ki he konga ʻo e kalasí ʻoku nau fakafofongaʻi ʻa e Ongo ʻAmeliká.

ʻOua naʻa ngalo ʻa e fuakavá

ʻI hono aleaʻi ʻe he kau akó ʻa e founga naʻe fakamoveteveteʻi ai ʻa ʻIsileli koeʻuhí ko ʻenau maumauʻi ʻenau fuakava mo e ʻOtuá, fakakaukau ke lau ʻa e 2 Ngaahi Tuʻi 17:38–40. Fakaafeʻi e kau akó ke kumi e fakatokanga ʻa e ʻEikí. Aleaʻi ha ngaahi founga ʻe ala ngalo ai ʻi ha niʻihi fakafoʻituitui he ʻahó ni ʻenau ngaahi fuakava mo e ʻOtuá. Kole ki he kau akó ke vahevahe ʻa e meʻa te tau lava ʻo fai ke manatuʻi maʻu ai pē ʻetau ngaahi fuakava mo e ʻOtuá. ʻI hono vahevahe ʻe he kau akó ha ngaahi founga ke manatuʻi ai ʻenau ngaahi fuakavá, mahalo te ke fie vakai ki he ongo lotu tāpuakiʻi ʻo e sākalamēnití (vakai, Tokāteline mo e Ngaahi Fuakava 20:77, 79).