Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĪsaia 53: Kuo hanga ʻe Sīsū Kalaisi ʻo “toʻo kiate ia ʻa ʻetau ngaahi vaivaí, ʻo ne fua ʻetau ngaahi mamahí”

“ʻĪsaia 53: Kuo hanga ʻe Sīsū Kalaisi ʻo ‘toʻo kiate ia ʻa ʻetau ngaahi vaivaí, ʻo ne fua ʻetau ngaahi mamahí,’” Fuakava Motuʻá – Tohi Lēsoni ʻa e Faiako Seminelí (2026)

“ʻĪsaia 53: Kuo hanga ʻe Sīsū Kalaisi ʻo ‘toʻo kiate ia ʻa ʻetau ngaahi vaivaí, ʻo ne fua ʻetau ngaahi mamahí,’” Fuakava Motuʻá – Tohi Lēsoni ʻa e Faiako Seminelí

ʻĪsaia 50–57: Lēsoni 124

ʻĪsaia 53

Kuo hanga ʻe Sīsū Kalaisi ʻo “toʻo kiate ia ʻa ʻetau ngaahi vaivaí, ʻo ne fua ʻetau ngaahi mamahí”

Jesus Christ Carries His Cross through the streets on His way to be crucified on Calvary Hill. An angel shows this experience to Nephi after he inquires about Lehi's vision.

ʻE lava ke fakatupu ʻe hotau ngaahi faingataʻaʻia fakamatelié ke tau fifili pe ʻoku mahino nai ki ha taha ʻa e meʻa ʻoku tau aʻusiá pea ʻe lava nai ha taha ʻo tokoniʻi kitautolu pe ʻikai. Naʻe ongoʻi ʻe Sīsū Kalaisi ʻi Heʻene feilaulau fakaleleí, ʻa e meʻa kotoa pē te tau ala aʻusia ʻi he moʻui fakamatelié. Koeʻuhí ko e Fakalelei ʻa Sīsū Kalaisí, te Ne lava ʻo tokoniʻi kitautolu ʻi heʻetau mamahí. ʻE lava ke tokoni ʻa e lēsoni ko ʻení ke ongoʻi houngaʻia ʻa e kau akó ʻi he meʻa kuo fai ʻe he Fakamoʻuí maʻanautolu ʻo fakafou ʻi Heʻene Fakaleleí.

Teuteu ʻa e tokotaha akó: Fakaafeʻi e kau akó ke nau ngāue ki hono ako maʻuloto ʻo e fakamoʻoni folofola fakataukei fakatokāteline ko e ʻĪsaia 53:3–5 pea mo e kupuʻi lea fakafolofola mahuʻinga “Ko e moʻoni kuo toʻo [ʻe Sīsū Kalaisi] ʻa ʻetau ngaahi vaivaí, ʻo ne fua ʻetau ngaahi mamahí.”

Ngaahi ʻEkitivitī Ako ʻOku Ala Fakahokó

Ngaahi aʻusia ʻo e moʻuí

Ke tokoni ke fakakaukau ʻa e kau akó ki he meʻa naʻe aʻusia ʻe Sīsū Kalaisi maʻanautolu ko ha konga ʻo ʻEne Fakaleleí, fakakaukau ke tohi “ʻOku ʻikai ʻilo ʻe ha taha pe ʻoku fēfē ia. ʻOku ʻikai mahino ki ha taha,” ʻi he palakipoé.

Ko e hā ha ngaahi aʻusia ʻe ala maʻu ʻe he kakaí te ne lava ʻo fakatupu ke nau fakakaukau pehení?

Fakakaukau ke hiki e ngaahi tali ʻa e kau akó ʻi he palakipoé. Fakaʻatā ha taimi ke vahevahe ai ha kau ako.

Hili iá, pea fakaʻaliʻali ʻa e fakakaukau mo e ngaahi fehuʻi ko ʻení.

Fakalaulauloto ki hoʻo tali ki he ngaahi fehuʻi ko ‘ení:

Ko e hā ha ngaahi aʻusia kuó u maʻu pe te u maʻu te ne lava ʻo fakatupu ke u fakakaukau peheni?
Ko e hā ʻoku ou fai ʻi heʻeku ongoʻi pehení? Ko e hā hono ʻuhingá?

Poupouʻi e kau akó ke fakaafeʻi e Laumālie Māʻoniʻoní ki heʻenau akó ʻi heʻenau ako fekauʻaki mo e meʻa kuo aʻusia ʻe he Fakamoʻuí mo e founga te Ne lava ʻo tokoniʻi ai kinautolú.

Ko e Fakalelei ʻa e Fakamoʻuí

ʻOku ʻafioʻi mo mahino lelei kia Sīsū Kalaisi ʻetau ngaahi aʻusia ʻi he moʻuí, ʻo fakafou ʻi Heʻene Fakaleleí. Naʻe akonaki ʻa e palōfita ko ʻĪsaiá ʻi he ʻĪsaia 53, fekauʻaki mo e feilaulau fakalelei ʻa Sīsū Kalaisí.

Ko ha potufolofola fakataukei fakatokāteline ʻa e ʻĪsaia 53:3–5. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

ʻE lava ke maʻu ʻe he kau akó ha fiemālie mo fakaloloto honau vā fetuʻutaki mo e Tamai Hēvaní mo Sīsū Kalaisí ʻo fakafou ʻi he ako fakataautaha ʻo e ʻĪsaia 53. Ko e ʻekitivitī ko ʻení ko ha founga ia ʻe taha te ke lava ai ʻo ʻai ke ako ʻe he kau akó ʻa e ʻĪsaia 53.

Lau ʻa e ʻĪsaia 53:1–12 mo e ʻAlamā 7:11–13, ʻo kumi ʻa e:

Ko e meʻa naʻe aʻusia ʻe he Fakamoʻuí ko ha konga ʻo ʻEne Fakaleleí, mo e
Meʻa ʻe lava ke fai ʻe he Fakamoʻuí maʻaku koeʻuhí ko ʻEne Fakaleleí.

Mahalo te ke fie faʻu ha kōlomu ʻe ua ʻi ha peesi ʻoku ʻatā ʻi hoʻo tohinoa akó ke lekooti e meʻa ʻokú ke maʻú.

Ko e meʻa naʻe aʻusia ʻe he Fakamoʻuí	Ko e meʻa ʻe lava ʻe he Fakamoʻuí ʻo fakahoko maʻakú

Hili hono ʻoange ha taimi feʻunga ki he kau akó ke nau akó, vahe kinautolu ki ha fanga kiʻi kulupu iiki. Fakaafeʻi kinautolu ke aleaʻi pea fakanounouʻi ʻa e meʻa naʻa nau ʻilo mei heʻenau akó. ʻE lava ke vahevahe ʻe ha ngaahi kulupu ʻe niʻihi ʻenau ngaahi fakamatala fakanounoú mo e kalasí. ʻE lava ke ʻiloʻi ʻe he kau akó ha ngaahi moʻoni hangē ko e:

Naʻe toʻo ʻe Sīsū Kalaisi kiate Ia ʻetau ngaahi mamahí, mahamahakí, faingataʻaʻiá, mo e tēngihiá, ko ha konga ʻo ʻEne Fakaleleí, pea mamahi koeʻuhí ko ʻetau ngaahi angahalá.
ʻE lava ke fakamolemoleʻi kitautolu mo fakamoʻui ʻo fakafou ʻia Sīsū Kalaisi mo ʻEne Fakaleleí.

Ko e Fakalelei ʻa e Fakamoʻuí maʻaku

Toe lau fakalongolongo ʻiate koe pē ʻa e ʻĪsaia 53:3–6 ka ʻi he taimi ní, fakahū ho hingoá, naʻá ku/te u/ou/ke u, pe ʻeku/hoku ʻi he ngaahi lea taú, ʻetaú, mo e ʻatautolú.

Ko e hā naʻá ke ako pe ko e hā naʻá ke fakatokangaʻi naʻe ʻikai ke ke fakatokangaʻi kimuʻa ʻi hoʻo ʻai ke fakataautaha ange kiate koe ʻa e ngaahi veesi ko ʻení?

Kapau ʻe ʻaonga ki he kau akó ha ako lahi ange fekauʻaki mo e founga naʻe aʻusia fakataautaha ai ʻe he Fakamoʻuí ʻetau faingataʻaʻiá ko ha konga ʻo ʻEne Fakaleleí, te ke lava foki ʻo ʻai ke ako ʻe he kau akó ʻa e fakamatala ko ʻeni meia ʻEletā Petinaá. Fakakaukau ke fakaʻaliʻali ʻa e lea meia ʻEletā Petinaá pea fakaafeʻi ʻa e kau akó ke kumi ha ngaahi foʻi lea pe kupuʻi lea ʻi he fakamatalá ʻoku tokoni ke mahino kiate kinautolu ʻa e Fakamoʻuí mo ʻEne Fakaleleí.

Naʻe akonaki ʻa ‘Eletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e mātuʻaki fakataautaha ʻa e feilaulau ʻa e Fakamoʻuí:

16:23

ʻOku ʻikai ha mamahiʻia fakaesino, kafo fakalaumālie, faingataʻaʻia ʻo e lotó pe loto-mamahi, mahaki pe vaivai te tau fehangahangai mo ia ʻi he matelié ne teʻeki ai tomuʻa aʻusia ʻe he Fakamoʻuí. Mahalo pē ʻi ha momeniti ʻo e loto-foʻí te tau kaila ai ʻo pehē, “ʻOku ʻikai ʻiloʻi ia ʻe ha taha. ʻOku ʻikai mahino ia ki ha taha.” Ka ʻoku ʻafioʻi mo mahino lelei ia ki he ʻAlo ʻo e ʻOtuá he naʻá Ne tomuʻa ongoʻi pea fuesia ʻetau ngaahi kavenga fakafoʻituituí. Pea koeʻuhí ko ʻEne feilaulau taʻefakangatangata mo taʻengatá (vakai, ʻAlamā 34:14), ʻoku mahino lelei kiate Ia pea lava ke mafao mai Hono toʻukupu ʻaloʻofá kiate kitautolu. Te Ne lava ʻo ala atu, ueʻi, tokoniʻi, fakamoʻui, pea fakamālohia kitautolu ke tau lava ʻo fai ha meʻa lahi ange he meʻa te tau malavá pea tokoniʻi kitautolu ke tau lava ʻo fai ha meʻa he ʻikai ke tau teitei lava ʻo fai kapau te tau fakafalala ʻataʻatā pē ki hotau mālohí. (“Ke Nau Lava ʻo Fua Faingofua ʻEnau Kavengá,” Liahona, Mē 2014, 90)

Ko e hā te ke talaange ki ha taha ʻokú ne ongoʻi ʻoku ʻikai mahino ki ha taha ʻa e meʻa ʻokú ne fouá? ʻAhiʻahi fakaʻaongaʻi e ngaahi foʻi lea pe kupuʻi lea mei he ʻĪsaia 53, ʻAlamā 7:11–13, pea mo e fakamatala meia ʻEletā Petinaá.

Fakakaukau ki he Fakalelei ʻa e Fakamoʻuí

ʻE lava ke tokoni ʻa e ngaahi fehuʻi ko ʻení ke fakakaukau e kau akó ki heʻenau houngaʻia ʻi he Fakalelei ʻa e Fakamoʻuí. Tokoni ke tali ʻe he kau akó e ngaahi fehuʻí ʻaki hano ʻoange ha ngaahi miniti siʻi ke nau fakalaulauloto pe hiki ai ʻenau ngaahi talí.

ʻE lava ke tokoni hono ʻoange ha taimi ki he kau akó ke nau fakalaulauloto aí ke nau fakakaukau ki honau vā fetuʻutaki mo Sīsū Kalaisí. Fakakaukau ke tā ha fasi lōngonoa mo toputapu ʻi he fakalaulauloto pe hiki ʻe he kau akó ʻenau ngaahi fakakaukaú.

ʻI hoʻo fakaʻaongaʻi e meʻa naʻá ke ako he ʻahó ni fekauʻaki mo e Fakamoʻuí mo ʻEne Fakaleleí, te ke tali fēfē ʻa e ngaahi fehuʻi ko ʻení:

Ko e hā ʻoku hoko ai ʻa Sīsū Kalaisi ko e tokotaha lelei taha ke tafoki ki ai ʻi he taimi ʻokú ke mamahi aí?
Kuó ke ongoʻi fēfē nai pe ko ha taha ʻokú ke ʻiloʻi ʻa e fakafiemālie ʻa e Fakamoʻuí lolotonga hoʻo aʻusia ha mamahí?

Ako Ma‘uloto

Te ke ala tokoni ki he kau akó ke nau ako maʻuloto ʻa e fakamoʻoni fakataukei fakatokāteliné mo e kupuʻi lea fakafolofola mahuʻingá, lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻinga ki he ʻĪsaia 53:3–5 ko e “Ko e moʻoni kuo toʻo ʻe [Sīsū Kalaisi] kiate ia ʻa ʻetau ngaahi vaivaí, ʻo ne fua ʻetau ngaahi mamahí.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

ʻE lava fēfē ke tokoniʻi au ʻe Sīsū Kalaisí?

Naʻe fakamoʻoni ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

11:10

ʻOku … ʻomi ʻe he Fakamoʻuí e fakafiemālie mo e nonga ʻi heʻetau fehangahangai mo e mamahí, ʻahiʻahí mo e ngaahi vaivai ʻo e moʻui fakamatelié. …

Te u lava ke fakapapauʻi atu ʻoku ʻafioʻi maʻu pē ʻe Kalaisi e ngaahi faingataʻa ʻoku tau aʻusia ʻi he moʻui matelié. ʻOku mahino kiate Ia e koná, mamahí, mo e mamahiʻia fakatuʻasinó kae pehē ki he ngaahi pole fakaeloto mo fakalaumālie ʻoku tau fehangahangai mo iá. ʻOku fonu e loto ʻo e Fakamoʻuí ʻi he ʻaloʻofá, pea ʻokú Ne mateuteu maʻu pē ke tokoniʻi kitautolu. ʻOku malava ʻení koeʻuhí he naʻá Ne aʻusia fakataautaha pea toʻo kiate Ia ʻi he kakanó ʻa e faingataʻa ʻo hotau vaivaí mo e mamahí.

Naʻá Ne hifo ʻo maʻulalo ange ʻi he meʻa kotoa pē ʻi he loto-vaivai mo e angamalū, pea talia hono fehiʻanekiná, fakafisingaʻí, mo ngaohikovia ʻe he tangatá, pea fakalaveaʻi koeʻuhi ko ʻetau ngaahi angahalá mo e ngaahi hiá. Naʻá Ne mamahiʻia ʻi he ngaahi meʻá ni maʻatautolu kotoa, ʻo toʻo kiate Ia e ngaahi angahala kotoa ʻa e māmaní. … (“Sīsū Kalaisi: Ko e Tauhi ʻo Hotau Laumālié,” Liahona, Mē 2021, 83–84)

Ko e hā te u lava ʻo fai ʻi he taimi ʻoku ou fifili ai pe ko e hā ʻoku fuʻu faingataʻa ai ʻa e moʻuí?

Naʻe pehē ʻe Sisitā Mīseli D. Keleki, ko ha mēmipa mālōlō ʻo e Kau Palesitenisī Lahi ʻo e Kau Finemuí:

11:15

ʻI he taimi ʻoku ʻahiʻahiʻi ai hoʻo tuí, fāmilí pe ko ho kahaʻú—ʻi hoʻo fifili pe ko e hā ʻoku fuʻu faingataʻa ai e moʻuí ʻi hoʻo fai ho lelei tahá ke moʻui ʻaki e ongoongoleleí—manatuʻi ne fakahā mai he ʻEikí ke ʻamanaki ki ha ngaahi faingataʻa. ʻOku hoko ʻa e ngaahi faingataʻá ko ha konga ʻo e palaní pea ʻoku ʻikai ʻuhinga kuo liʻekina koe; ko e konga ia ʻo e ʻuhinga ʻo e ʻoku ʻAʻana koé. Ko hono moʻoní naʻá Ne hoko, “ko e tangata ʻo e ngaahi mamahí, pea maheni ai mo e loto-mamahí” (ʻĪsaia 53:3). (“Lotó Kotoa,” Liahona, Nōvema 2022, 60)

ʻĪsaia 53:2. Ko e hā te u lava ʻo ako fekauʻaki mo e Fakamoʻuí mei he ongo kupuʻi lea “ʻakau mate ngofuá” mo e “ʻikai ha sino lelei pe ha toulekeleká”?

Naʻe akonaki ʻa Palesiteni Siosefa Filitingi Sāmita (1876–1972) ʻo pehē:

ʻIkai naʻe tupu hake ʻa Kalaisi ko ha fuʻu ʻakau mate ngofua? Naʻe ʻikai ha meʻa fekauʻaki mo ia ke ne ʻai ʻa e kakaí ke tauteaʻi ia. Naʻá ne hangē pē ko e tangatá; pea ko ia ʻoku fakahaaʻi heni ʻe he palōfitá naʻe ʻikai Hano sino lelei pe ha toulekeleka, ko hono ʻuhingá, naʻe ʻikai ke fuʻu makehe, ʻo kehe mei he niʻihi kehé ke ʻiloʻi ai Ia ʻe he kakaí ko e ʻAlo ʻo e ʻOtuá. Naʻá Ne fotu ko ha tangata fakamatelie. (Doctrines of Salvation, comp. Bruce R. McConkie [1954], 1:23)

Ngaahi ʻEkitivitī Fakalahi ki he Akó

ʻĪsaia 53:10: “Hono hakó”

Naʻe kikiteʻi ʻe ʻĪsaia ʻe hanga ʻe Sīsū Kalaisi ʻo “ngaohi hono laumālié ko e feilaulau koeʻuhí ko e hiá” pea “te ne mamata ki hono hakó” (ʻĪsaia 53:10). Ke tokoni ke mahino ki he kau akó ʻa e ʻuhinga ʻo e hoko ko Hono hakó, fakamatalaʻi ange ʻoku ʻuhinga ʻa e “hakó” ki he “fānau.” Te ke lava ʻo vahevahe ʻa e ngaahi fakamoʻoni fakafolofola ko ʻení ʻi he kau akó pea fakaafeʻi kinautolu ke kumi pe ko hai ʻa e hako ʻo e Fakamoʻuí pea mo e ngaahi tāpuaki ʻoku fakatatali maʻanautolú:

Tokoni lahi ange ke mahino ʻa e ʻĪsaia 53:3–5

Ke tokoni ki he kau akó ʻi heʻenau ako ʻa e ʻĪsaia 53:3–5, te ke lava ʻo fakaafeʻi kinautolu ke kumi ʻa e fakamatala “Ko e Fakamoʻui ne Mamahí” ʻi he makasini Ki Hono Fakamālohia ʻo e Toʻu Tupú ʻi ʻEpeleli 2022.

Ngaahi fakamoʻoni ʻoku ʻafioʻi fakataautaha ʻe he Fakamoʻuí hotau ngaahi faingataʻaʻiá

Ke tokoni ke mahino ki he kau akó ʻoku ʻafioʻi fakataautaha ʻe he Fakamoʻuí ʻa e ngaahi faingataʻa ʻoku tau aʻusia ʻi he moʻui fakamatelié, te ke lava ʻo vahevahe ha taha ʻo e ngaahi vitiō ko ʻení. ʻE lava ke fakaʻaongaʻi fakataha ʻa e ngaahi vitiō ko ʻení, pe ko hano fetongi ʻo e fakamatala ʻa ʻEletā Soālesi ʻi he lēsoní. Te ke lava ʻo fakaafeʻi e kau akó ke vahevahe ha taha ʻo e ngaahi vitiō ko ʻení mo ha taha ʻoku nau ʻilo ʻokú ne foua ha taimi faingataʻa.

ʻI he foʻi vitiō “The Savior Understands Me” mei he taimi 1:45 ki he 3:37, ʻoku vahevahe ai ʻe Palesiteni Sefilī R. Hōlani ʻo e Kōlomu ʻo e Toko Hongofulu Mā Uá ʻa ʻene fakamoʻoni ʻoku mahino ki he Fakamoʻuí ʻetau moʻuí.

3:37

ʻOku vahevahe ʻe ʻEletā Niila L. ʻEnitaseni ʻo e Kōlomu ʻo e Toko Hongofulu Mā Uá ʻi he vitiō “The Wounded Shall Be Healed” (5:46), ʻa e founga ʻoku fakamoʻui ai ʻe he Fakamoʻuí hotau ngaahi kafó.

5:45