Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Isaia 44–47: “Ka tsy misy Andriamanitra hafa-tsy Izaho”

“Isaia 44–47: -Ka tsy misy Andriamanitra hafa-tsy Izaho-”, Testamenta Taloha: Boky torolalana ho an’ny mpampianatra seminera (2026)

“Isaia 44–47: -Ka tsy misy Andriamanitra hafa-tsy Izaho-”, Testamenta Taloha: Boky torolalana ho an’ny mpampianatra seminera

Isaia 40–49: Lesona 120

Isaia 44–47

“Ka tsy misy Andriamanitra hafa-tsy Izaho”

Isan’andro isika dia miatrika fitaomana izay mizaha toetra ny fanolorantenantsika amin’ny Ray any An-danitra sy i Jesoa Kristy. Rehefa niatrika fakam-panahy mitovy amin’izany ny Isiraelita sasany tamin’ny andron’i Isaia dia lasa nitodika tamin’ny fitsaohana loharano hafa izy ireo. Ho setrin’izany dia nampitandrina tamim-pitiavana nefa mazava tsara ny Isiraelita ny Tompo ny amin’ny tsy tokony hitsaohana andriamani-kafa. Ity lesona ity dia afaka manampy ny mpianatra hametraka ny Ray any An-danitra sy i Jesoa Kristy ho lohalaharana alohan’ny olona na zavatra hafa eo amin’ny fiainan’izy ireo.

Fanomanana ny mpianatra: Asao ny mpianatra hieritreritra ny zavatra nianarany nandritra ny fandalinany ny Testamenta Taloha. Avy eo dia asao izy ireo hisaintsaina hoe: “Ahoana no nahafahan’ny zavatra nianarako momba ny Ray any An-danitra sy i Jesoa Kristy nampitombo ny faniriako hametraka Azy Ireo ho lohalaharana eo amin’ny fiainako?”

Sahanasa fianarana azo atao

Fitsaohana maherifo

Hevero ny hanomboka ny fotoam-pianarana amin’ny fametrahana ireto fanontaniana manaraka ireto.

Raha toa ianao ka hasaina hanadihady zatovo ao amin’ny faritra misy antsika momba ny hoe iza ireo maherifo an’izy ireo, dia iza araka ny eritreritrao no mety ho tafiditra ao anatin’izany?

Avy eo dia asao ny mpianatra hanao ity zavatra manaraka ity ao amin’ny diary fandalinan’izy ireo.

Ataovy lisitra ireo maherifonao manokana. Asio kintana eo akaikin’ireo izay toa manana fiantraikany tsara indrindra eo amin’ny fiainanao.

Ny Eveka W. Christopher Waddell ao amin’ny Episkôpà Mpiahy dia nizara izao torohevitra manaraka izao momba ny maherifo antsika.

10:8

Fony aho zazalahy kely dia mpanao fanatanjahan-tena no maherifoko voalohany. Ny zavatra tsaroako voalohany tamin’ny fahazazako dia ny nanangona karatra baseball misy sary sy antontan’isa momba ireo mpilalao baseball tao amin’ireo ligy lehibe. Ny “fiderana olona maherifo” amin’ny fahazazana dia mety hahafinaritra sy madio, toy ny ataon’ny ankizy rehefa manao ny fitafin’ireo maherifo tiany indrindra izy ireo amin’ny Halloween. Na dia mankamamy sy manaja lehilahy sy vehivavy maro manan-talenta sy miavaka aza isika noho ny fahaizana ananan’izy ireo sy ny anjara biriky entiny, ny halehiben’ny fiderana azy ireo, raha toa ka diso tafahoatra, dia mety hitovy amin’ny zanak’ Isiraely nidera zanakomby volamena tany an-tany foana tao Sinay. …

Ny maherifo, ny maherifontsika amin’izao fotoana izao sy mandrakizay, dia i Jesoa Kristy, ary ny zava-drehetra, na ny olon-drehetra, izay misarika antsika hiala amin’ny fampianarany, araka ny hita ao amin’ny soratra masina sy amin’ny alalan’ny tenin’ireo mpaminany velona, dia afaka misy akony ratsy amin’ny fandrosoantsika eo amin’ny lalan’ny fanekempihavanana. (“Mihoatra lavitra noho ny maherifo”, Liahona, nôv. 2023, 90)

Inona no hitanao ho niavaka indrindra tamin’ny hafatry ny Eveka Waddell?

Mba hanampiana ny mpianatra hanombantombana ny toerana hametrahan’izy ireo ny Ray any An-danitra sy i Jesoa Kristy eo amin’ny fiainan’izy ireo dia azonao atao ny manasa azy ireo hijery ny lisitry ny maherifo nataon’izy ireo rehefa misaintsaina amim-pahanginana ireto fanontaniana manaraka ireto izy ireo.
Moa ve misy maherifo ao amin’ny lisitrao manelingelina anao amin’ny fitsaohanao ny Ray any An-danitra sy i Jesoa Kristy?
Moa ve misy zavatra mahaliana na atao, na zavatra mety hanelingelina anao tsy hitsaoka Azy Ireo?

Rehefa miomana handalina ny fampianaran’i Isaia ireo mpianatra androany dia asao izy ireo hihaino ireo fahatsapana avy amin’ny Fanahy Masina mikasika ireo fomba ahafahan’izy ireo mametraka ny Ray any An-danitra sy i Jesoa Kristy ho lohalaharana eo amin’ny fiainan’izy ireo.

Tsy manana andriamani-kafa

Hazavao fa mafy tamin’ny zanak’ Isiraely tamin’ny andron’i Isaia ny nametraka ny Tompo ho lohalaharana teo amin’ny fiainan’izy ireo. Naleon’izy ireo kosa nitodika tany amin’ireo andriamani-kafa toy ny sampy mba hahazoana fanampiana.

Hevero ny hanasa mpiara-mianatra na vondrona kely hamaky ireto andinin-tsoratra masina manaraka ireto ary hamoaka fehezan-teny tokana izay hamintina ny zavatra nianarany.

Vakio ny Isaia 44:6, 8 sy 46:9, ka tadiavo ny zavatra tian’ny Tompo ho takatry ny zanak’ Isiraely momba ny fifantohan’ny fitsaohan’izy ireo.

Manasà mpianatra maromaro hizara ny famintinana ny zavatra nianaran’ny vondrona misy azy ireo. Raha tsy tonga dia mizara izany ho azy izy ireo dia ampio ny mpianatra hamantatra fahamarinana iray mitovitovy amin’ity manaraka ity: Tsy misy na iza na iza ary tsy misy na inona na inona eto an-tany afaka mitaha amin’i Jesoa Kristy.

Ao anatin’ny fifanakalozan-kevitra ataonareo dia azonao atao ny manamarika fa ny Isaia 44:6 dia ahitana anarana maromaro iantsoana an’i Jesoa Kristy. Azonao atao ny manasa ny mpianatra hizara ny zavatra ampianarin’ireo fiantsoana ireo momba an’i Jesoa Kristy.

Ao amin’ny Isaia 44–46, ny Tompo dia mamariparitra ny fitsaohan’ny Isiraelita andriamani-kafa. Mampahatsiahy ny olona Izy fa izy ireo dia namorona sy nitsaoka ary nivavaka tamin’ireo sampy natao tamin’ireo hazo izay fampiasain’izy ireo hanaovana afo sy fahandroana sakafo. Ary rehefa nentina tany amin’ny fahababoana ny Isiraelita dia sahirana ny biby fiompin’izy ireo nilanja ny sarety niaraka tamin’ireo sampy mavesatr’izy ireo.

Vakio ny Isaia 44:14–19 sy ny Isaia 46:1–2, dia tadiavo ny famariparitan’ny Tompo ny sampy fahiny izay azo ampitahaina amin’ireo zavatra izay manalavitra ny olona amin’ny Tompo amin’izao androntsika izao. (Mety hanampy ny mahafantatra fa ny roa tamin’ireo sampy izay nitsaohan’izy ireo dia nantsoina hoe Bela sy Nebo.)

Inona no hitanao?

Azonao atao ny manoratra eny amin’ny solaitrabe ilay andian-teny hoe “Hiankoho[ka] eo anatrehan’izay vatan-kazo [ve aho]?” (Isaia 44:19). Angataho ny mpianatra hanazava ny dikan’izany amin’ny teniny manokana.

Avy eo dia fafao ilay andian-teny hoe “izay vatan-kazo” amin’ilay fanontaniana ka avelao ny hoe “Hiankoho[ka] [ve aho] ?”

Asao ny mpianatra ho eny amin’ny solaitrabe ary hameno ilay fehezan-teny amin’ny fomba izay mihatra amin’ny olona amin’izao androntsika izao.
Inona no loza ateraky ny fametrahana ireo olona na zavatra ireo ho eo alohan’ny Ray any An-danitra sy i Jesoa Kristy?
Nahoana no mety ho sarotra ny mametraka mandrakariva ny Ray any An-danitra sy i Jesoa Kristy ho lohalaharana eo amin’ny fiainantsika?

Mametraka an’i Jesoa Kristy ho lohalaharana

Mba hanampiana ny mpianatra hametraka ny Mpamonjy ho lohalaharana eo amin’ny fiainan’izy ireo dia azonao atao ny mampiseho sarin’i Jesoa Kristy, toy ilay iray tany am-piandohan’ny lesona, eo afovoan’ny solaitrabe. Rehefa manao ity sahanasa manaraka ity ny mpianatra dia azon’izy ireo atao ny manoratra ireo toetra hitan’izy ireo manodidina ilay sary.

Halalino ny roa farafahakeliny amin’ireto andinin-tsoratra masina manaraka ireto. Rehefa mamaky miadana sy amim-pitandremana ireo andininy ireo ianao dia tadiavo ny zavatra azontsika ianarana momba an’i Jesoa Kristy izay manome antsika fahatokian-tena hametraka Azy ho lohalaharana eo amin’ny fiainantsika.

Isaia 44:1–4
Isaia 44:21–23
Isaia 44:24–25
Isaia 45:20–22
Isaia 46:3–5

Azonao atao ny mangataka ny mpianatra hanampy toetra hafa eny amin’ny solaitrabe izay fantatr’izy ireo momba an’i Jesoa Kristy avy amin’ny zavatra niainany na avy amin’ny soratra masina hafa.

Mba hanampiana ny mpianatra hizara ny eritreriny momba ny hery tsy manam-paharoa an’i Jesoa Kristy dia azonao atao ny manontany ireto manaraka ireto.
Ahoana no mety hanampian’ny fahatakarana ireo fahamarinana momba an’i Jesoa Kristy ireo ny olona iray izay mahita fa sarotra ny mametraka Azy ho lohalaharana eo amin’ny fiainany?
Inona avy ireo zavatra niainanao ka nanampy anao hametraka ny Ray any An-danitra sy i Jesoa Kristy ho lohalaharana eo amin’ny fiainanao?

Manao drafitra hametraka ny Ray any An-danitra sy i Jesoa Kristy ho lohalaharana

Loharanom-pitaovana fanampiny

Amin’ny fomba ahoana no hitahian’ Andriamanitra ahy rehefa mametraka Azy ho lohalaharana eo amin’ny fiainako aho?

Nampianatra izao ny Filoha Russell M. Nelson:

Hamafisiko indray ny fampianarana lalina nataon’ny Filoha Ezra Taft Benson manao hoe: “Ireo lehilahy sy vehivavy izay mampitodika ny fiainany amin’ Andriamanitra dia hahita fa Izy dia afaka manao zavatra bebe kokoa avy amin’ny fiainan’izy ireo mihoatra izay azon’izy ireo atao. Hahatonga ny fifalian’izy ireo ho lalim-paka Izy, hanitatra ny fahitan’izy ireo, hampavitrika ny sain’izy ireo, … hampahery ny fanahin’izy ireo, hampitombo ny fitahiana ho azy ireo, hampitombo ireo fahafahana manao zavatra azon’izy ireo araraotina, hampitony ny fanahin’izy ireo, hanome namana ary handrotsaka fiadanana.”

… Rehefa mamela an’ Andriamanitra hanjaka eo amin’ny fiainanao ianao, dia mampanantena fiadanana bebe kokoa, fahatokiana bebe kokoa, fifaliana bebe kokoa, ary eny, fitsaharana bebe kokoa ho anao aho. (“Mandresy izao tontolo izao dia mahita fitsaharana”, Liahona, nôv. 2022, 97)

Inona avy ireo vokatra sasantsasany ateraky ny fisafidianana andriamani-kafa noho ny Ray any An-danitra sy i Jesoa Kristy?

Nizara izao ny Loholona Quentin L. Cook ao amin’ny Kôlejin’ny Apôstôly Roambinifolo:

14:34

Ny fialana amin’ny fitsaohana an’ilay Andriamanitra marina sy velona ary ny fanompoana andriamanitra tsy izy toy ny harena sy ny laza ary ny firotsahana amin’ny fitondrantena maloto sy tsy marina dia mitondra amin’ny fanandevozana amin’ny endriny ratsy rehetra. Tafiditra amin’izany ny fanandevozana ara-panahy sy ara-batana ary ara-tsaina, ary indraindray afaka mitondra any amin’ny faharavana. (“Fitomaniana [nosoratan’i Jeremia]: Mitandrema amin’ny fanandevozana”, Liahona, nôv. 2013, 89)

Nampianatra izao ny Filoha Russell M. Nelson:

Izay mety ho fiankinan-doha—na fanaovana kilalao an-jotra izany, na filokàna, na trosa, na zava-mahadomelina, toaka, fahatezerana, pôrnôgrafia, firaisana ara-nofo, na sakafo koa aza, dia manafintohina an’ Andriamanitra. Nahoana? Satria lasa andriamanitrao ny zavatra mibahana ao an-tsainao. Any amin’izany ianao no mitady fampiononana fa tsy any Aminy. (“Saino amin’ny fomba selestialy!”, Liahona, nôv. 2023)

Sahanasa fianarana fanampiny

Rafi-tantara fampiharana

Mba hanampiana ny mpianatra hampihatra ny fametrahana ny Ray any An-danitra sy i Jesoa Kristy ho lohalaharana eo amin’ny fiainan’izy ireo dia azonao atao ny mizara ny iray amin’ireto trangan-javatra manaraka ireto na mamorona iray ho anao manokana.

Tia lamaody i Anna. Mandany ny fotoanany malalaka handalinana ny lamaody farany izy ary miasa amin’ny alina sy amin’ny faran’ny herinandro mba hahazoana vola hividianana kojakojan-damaody betsaka kokoa. Matetika i Anna no reraka loatra ka tsy afaka mivavaka na mandalina ny soratra masina ary indraindray dia tsy tonga any am-piangonana izy fa miasa na matory.
Matetika i Jaron no miresaka momba ny fomba fijery ara-pivavahana samihafa amin’ny namana iray izay mandan-danja aminy ny heviny. Indraindray ilay namany dia tsy manaiky ny fampianaran’ireo mpaminany sy apôstôlin’ Andriamanitra. Manomboka manontany tena i Jaron hoe inona avy ireo fampianaran’ny mpaminany izay tokony hekeny sy harahiny.

Azon’ny mpianatra atao ny mifanakalo hevitra momba ireo fanontaniana etsy ambany ao anatina vondrona kely alohan’ny hizarany ny heviny amin’ny iray kilasy.

Inona no mety hampananosarotra ny fametrahan’ireo olona ireo ny Ray any An-danitra sy i Jesoa Kristy ho lohalaharana eo amin’ny fiainan’izy ireo?
Inona no mety ho dingana tsara voalohany azon’ireo olona ireo atao mba hametrahana ny Ray any An-danitra sy i Jesoa Kristy ho lohalaharana eo amin’ny fiainany?

Rafi-tantara hafa azo ampiasaina

Azonao atao ny mizara ity tantara manaraka ity amin’ny mpianatra ho solon’ilay safidy hoe “Rafi-tantara fampiharana” etsy ambony. Azonao atao ny manasa azy ireo hiasa ao anaty vondrona kely mba hifanakalo hevitra momba ireo olana mitovy amin’izany izay mety hatrehin’izy ireo sy handinika vahaolana isan-karazany izay azon’izy ireo heverina.

I Dale dia dokotera izay matetika no mila miasa isaky ny alahady ao anatin’ny asany. Inona araka ny eritreritrao no azony atao mba handresena ireo fanamby sasany izay atrehany amin’ny fametrahana ny Ray any An-danitra sy i Jesoa Kristy ho lohalaharana eo amin’ny fiainany?

Avy eo dia asehoy ity horonan-tsary manaraka misy ny Loholona Dale G. Renlund ity manomboka eo amin’ny mari-potoana 0:44 ka hatramin’ny 02:43.

3:1

Inona no nianaranao avy amin’ny zavatra niainan’ny Loholona Renlund ka afaka manampy anao hametraka ny Ray any An-danitra sy i Jesoa Kristy ho lohalaharana eo amin’ny fiainanao?

Nahoana no tsy izao ankehitriny izao?

Mba hanampiana ny mpianatra hahatsapa ny maha-zava-dehibe ny fisafidianana ny hametraka ny Ray any An-danitra sy i Jesoa Kristy ho lohalaharana eo amin’ny fiainan’izy ireo ankehitriny dia asao izy ireo handalina ny Isaia 45:23. Azon’ny mpianatra atao ny mitady ny fomba nilazan’ny Tompo ny hamalian’ny olona rehetra Azy any am-parany any. Asehoy ity teny manaraka ity izay nolazain’ny Loholona Neal A. Maxwelll (1926–2004) tao amin’ny Kôlejin’ny Apôstôly Roambinifolo.

… Raha toa ka mino ianao fa indray andro any dia handohalika ny lohalika rehetra ary hanaiky ny lela rehetra fa i Jesoa Kristy no Tompo, dia nahoana no tsy atao izao ankehitriny izao izany? (“Why Not Now?,” Ensign, Nov. 1974, 13)

Toy ny ahoana izany hoe mandohalika sy miaiky fa i Jesoa no Tompo eo amin’ny fiainantsika ankehitriny izany?
Nahoana no mety ho zava-dehibe ny mametraka ny Ray any An-danitra sy i Jesoa Kristy ho lohalaharana eo amin’ny fiainantsika amin’izao fotoana izao fa tsy manemotra?