Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Isaia 1: “Na dia tahaka ny jaky aza ny fahotanareo, dia ho fotsy tahaka ny oram-panala”

“Isaia 1: —Na dia tahaka ny jaky aza ny fahotanareo, dia ho fotsy tahaka ny oram-panala–”, Testamenta Taloha: Boky torolalana ho an’ny mpampianatra seminera (2026)

“Isaia 1: –Na dia tahaka ny jaky aza ny fahotanareo, dia ho fotsy tahaka ny oram-panala–”, Testamenta Taloha: Boky torolalana ho an’ny mpampianatra seminera

Isaia 1–12: Lesona 114

Isaia 1

“Na dia tahaka ny jaky aza ny fahotanareo, dia ho fotsy tahaka ny oram-panala”

Na dia manota sy mila famelan-keloka daholo aza isika rehetra dia mety hino isika indraindray fa tsy afaka ny ho voavela heloka. Mazava ny hafatry ny Mpamonjintsika: “Na dia tahaka ny jaky aza ny fahotanareo, dia ho fotsy tahaka ny oram-panala” (Isaia 1:18). Ity lesona ity dia afaka manampy ny mpianatra hahatsapa fahatokian-tena fa afaka manadio azy ireo amin’ny fahotany ny Mpamonjy.

Fanomanana ny mpianatra: Asao ny mpianatra hamaky ny andinin-tsoratra masina fifehezana fotopampianarana Isaia 1:18 ary hitady izay sarinteny nampiasain’i Isaia. Amporisiho ny mpianatra hisaintsaina sy hiomana hizara ny dikan’izany andininy izany amin’izy ireo. Azon’ny mpianatra atao koa ny manao fanazaran-tena mba hitadidy ilay andian-teny manan-danja ao amin’ny soratra masina hoe: “na dia tahaka ny jaky aza ny fahotanareo dia ho fotsy tahaka ny orampanala” (Isaia 1:18).

Sahanasa fianarana azo atao

Ny tasin’ny fahotana

Hevero ny hanomboka ny fotoam-pianarana amin’ny alalan’ny fampisehoana ity sary manaraka ity na akanjo iray misy tasy.

Stain spot on the clothes, white t-shirt

Eritrereto ny fotoana izay nisian’ny tasy tsy nety niala teo amin’ny akanjonao.

Nahoana no azo oharina amin’ny tasy ny fahotantsika?
Inona no mety ho antony mahatonga ny olona mety hihevitra fa tsy azo diovina amin’ny fahotany izy ireo?

Azonao atao ny mampiseho ity tari-dresaka manaraka ity mba hahafahan’ny mpianatra misaintsaina ny zavatra tsapan’izy ireo.

Saintsaino hoe iza amin’ireto teny ambara manaraka ireto no tena mahalaza ny momba anao. Mety hanontany tena ianao hoe nahoana ianao no mahatsapa toy izany.

Mahatoky tena aho fa afaka manadio ahy amin’ny fahotako rehetra ny Mpamonjy.
Mino aho fa afaka manadio ny fahotako sasantsasany ny Mpamonjy, fa tsy izy rehetra.
Mino aho fa afaka manadio ny fahotan’ny olona hafa ny Mpamonjy fa tsy ny ahy.
Tsy mino aho fa afaka manadio fahotana ny Mpamonjy.

Iray amin’ireo anjara asa maron’ny Fanahy Masina ny mijoro ho vavolombelona momba an’i Jesoa Kristy (jereo ny 3 Nefia 28:11). Eo am-pandalinanao ny Isaia 1 dia jereo tsara izay tian’ny Ray any An-danitra hianaranao amin’ny alalan’ny Fanahy Masina mikasika an’i Jesoa Kristy sy ny fahefana ananany mba hanadiovana fahotana.

Firenena mpanota

Vakio ny Isaia 1:2–4 ka jereo ny fiainam-panahin’ny Israelita.

Asao ny mpianatra hitatitra ny zavatra hitan’izy ireo.

Ity manaraka ity dia afaka manampy ny mpianatra hianatra fomba manan-danja handalinana ny Isaia.

Raha mandalina ny fampianaran’i Isaia ianao dia tsara ny mahalala fa matetika izy no manoratra ny tenin’ny Tompo amin’ny endrika tononkalo antsoina hoe mirazotra. Miseho ny mirazotra rehefa maneho hevitra iray ny mpanoratra ary mamerina na mampifanohitra ilay hevitra amin’ny fampiasana teny hafa avy eo. Ohatra tadiavo ny fehezan-teny mifandray ao amin’ny andininy 2.

Azonao ampiana ny mpianatra hitady ireo fehezan-teny natambatra hoe “Mandrenesa, ry lanitra” sy ny hoe “mihainoa, ry tany” (Isaia 1:2). Ohatra iray mampiseho ny atao hoe mirazotra izany.

Nampiasa sarinteny koa i Isaia mba hanehoana ny fampianarany. Vakio ohatra ny andininy 3 ary jereo ireo sary samihafa nampiasain’i Isaia hampianarana ireo Isiraelita.

Azonao anontaniana ny mpianatra ny zavatra nampianarin’i Isaia ny Israelita tamin’ny alalan’ny fampiasana sary, dia omby sy boriky izany. Hazavao raha ilaina fa, tsy mba toy ny omby sy ny boriky, ny Israelita dia tsy nahalala ny Tompony.

Hevero ny hamintina ny andininy 5–15 amin’ny alalan’ny fizarana ity andiam-pehezan-teny manaraka ity.

Nampitandrina ny Israelita ny Tompo fa misy voka-dratsiny eo amin’izy ireo ny fahotany (jereo ny Isaia 1:5–9). Nanazava koa Izy fa tsy faly tamin’ny fomba fitsaohana ara-pivavahana nataon’izy ireo satria tsy tamin-kitsimpo no nanaovan’izy ireo izany (jereo ny Isaia 1:10–15).

Jaky lasa fotsy

Vakio ny Isaia 1:16–17, ka tadiavo ny fanasana natolotry ny Tompo ny vahoaka.

Inona no nanasan’ny Tompo azy ireo mba hataony?

Vakio ny Isaia 1:18, ka tadiavo ny fampanantenana omen’ny Tompo raha mibebaka isika. Jereo fa sady nampiasa mirazotra no nampiasa sarinteny mba hanehoana ilay fampanantenana i Isaia.

Ny Isaia 1:18 dia andinin-tsoratra masina fifehezana fotopampianarana. Hevero ny hanasa ny mpianatra hanisy marika amin’ny fomba miavaka ireo andinin-tsoratra masina fifehezana fotopampianarana mba ho mora amin’izy ireo ny mahita ny toerana misy azy.

Mba hanampiana ny mpianatra hahatakatra kokoa ny sarinteny nampiasaina tao amin’ny andininy 18 dia hevero ny hampiseho ireto sary manaraka ireto.

Inona no ampianarin’ireo sary, dia ny jaky sy ny volon’ondry, antsika mikasika ny fahotana?

Rahavavy Sharon Eubank, izay efa tao amin’ny Fiadidian’ny Fikambanana Ifanampiana Maneran-tany tany aloha dia nanazava izao:

11:29

Ny fandokoana volon’ondry ao amin’ny Testamenta Taloha dia tsy nidorehitra fotsiny fa niraikitra koa, izay midika hoe nijanona teo amin’ny volon’ondry ilay loko midorehitra ka tsy nihavasoka izany na nosasana matetika aza. Mampiasa izao fomba fisainana izao i Satana mba hanampenam-bava: ny volon’ondry fotsy nolokoina jaky mena dia tsy hiverina ho fotsy intsony na oviana na oviana. Nanambara anefa i Jesoa Kristy hoe: “Fa tahaka ny hahavon’ny lanitra noho ny tany no hahavon’ny lalako noho ny lalanareo” ary ny famindram-pony mahagaga dia ny hoe rehefa mibebaka amin’ny fahotantsika isika, dia hampiverina antsika amin’ny fahadiovana ny rany jaky mena. Tsy tonga dia miharihary izany, kanefa marina. (“I Kristy: Ilay hazavana izay mamiratra ao anaty haizina”, Liahona, mey 2019, 75)

Inona no ampianarin’ireo sary, dia ny oram-panala sy ny volon’ondry, antsika mikasika ny fampanantenan’ny Mpamonjy raha mibebaka isika?
Ahoana no hamintinanao ny andininy 16–18 ao anatina fehezan-teny manambara fahamarinana iray?

Na dia mety hampiasa teny hafa aza ny mpianatra dia ampio izy ireo hahita ity fahamarinana manaraka ity: Raha mibebaka amin-kitsimpo isika dia hanadio antsika amin’ny fahotantsika i Jesoa Kristy.

Inona no zavatra niainan’ny Mpamonjy mba hahafahantsika mibebaka

Ity soratra masina manaraka ity dia afaka manampy ny mpianatra hisaintsaina ny zavatra niainan’ny Mpamonjy mba hahafahan’izy ireo ho voadio amin’ny fahotany. Hevero ny hizara ny mpianatra ho tsiroaroa. Ny vondron’olon-droa tsirairay dia afaka mamaky ireto soratra masina manaraka ireto ary mifanakalo hevitra mikasika ny zavatra nianarany. Mety hanampy ireo fanontaniana miaraka amin’izany. Afaka mizara amin’ny iray kilasy avy eo ny mpianatra izay vonona.

Vakio ny Almà 7:13–14 sy ny Fotopampianarana sy Fanekempihavanana 19:16–19, ka tadiavo ny zavatra niainan’ny Mpamonjy mba hahafahanao mibebaka sy ho voadio amin’ny fahotanao.

Inona no hitanao?
Inona no nianaranao mikasika ny Ray any An-danitra sy i Jesoa Kristy avy amin’ireo andininy ireo izay afaka manampy olona iray hisafidy ny hibebaka?

ChurchofJesusChrist.org

5:37

Fomba iray hanasana ny Fanahy Masina ny manome fahafahana ny mpianatra hizara ny zavatra tsapany, ny fijoroana ho vavolombelona ananany ary ny zavatra niainany. Fomba iray ahafahan’ny mpianatra manao izany ity fanontaniana manaraka ity. Hevero ny hanasa ny mpianatra hamaly ilay fanontaniana ao amin’ny diary fandalinany aloha ary avy eo dia afaka mizara izay nosoratany amin’ny iray kilasy ny mpianatra izay vonona. Rehefa mizara ny mpianatra dia lazao izy ireo tsy hizara anarana na zavatra tena mikasika loatra ny tena manokana.
Inona no tsapanao mikasika an’i Jesoa Kristy sy ny fahafahany manadio anao amin’ny fahotanao?

Hevero ny hamarana izany amin’ny fizaranao ny zavatra tsapanao mikasika ny Mpamonjy sy ny fahefana ananany mba hanadiovana antsika rehefa mibebaka isika.

Manao tsianjery

Mety ho tianao ny hanampy ireo mpianatra hanao tsianjery ilay andinin-tsoratra masina fifehezana fotopampianarana sy ilay andian-teny manan-danja ao amin’ny soratra masina nandritra ity lesona ity ary hamerina hijery izany amin’ny lesona manaraka. Ny andian-teny manan-danja ao amin’ny soratra masina ho an’ny Isaia 1:18 dia ny hoe “Na dia tahaka ny jaky aza ny fahotanareo, dia ho fotsy tahaka ny oram-panala.” Hita ao amin’ny votoatin’ny tovana eo ambanin’ny “Sahanasa famerenana ny fifehezana fotopampianarana” ireo hevitra hanaovana ny sahanasa fitadidiana.

Loharanom-pitaovana fanampiny

Inona no afaka manampy ahy hibebaka?

Nampianatra izao ny Filoha Dieter F. Uchtdorf fony izy tao amin’ny Fiadidiana Voalohany:

19:7

Na ratsy manao ahoana na lavitra manao ahoana ny fihatahanareo tamin’ilay lalana dia azo antoka sy mazava ny lalana hiverenana. Manatòna, mianara avy amin’ny Ray ary manolora fo torotoro sy fanahy manenina ho fanatitra. Manàna finoana ary minoa an’ilay hery manadion’ny Sorompanavotan’i Jesoa Kristy izay tsy misy fetra. Raha mibaboka amin’ny fahotantsika isika ary mibebaka dia hanadio antsika amin’ny tsy fahamarinana ilay Andriamanitra mahatoky sy marina. “Na dia tahaka ny jaky aza ny fahotanareo, dia ho fotsy tahaka ny oram-panala.” (“A Matter of a Few Degrees,” Liahona, mey 2008, 60)

Ahoana raha sarotra amiko ny mamela ny tenako?

Nampianatra izao ny Rahalahy Tad R. Callister, fony izy Filohan’ny Fiadidian’ny Sekoly Alahady Maneran-tany tamin’izany:

11:46

Nisy fotoana aho tafahaona tamina Olomasina tsara, izay nanana olana tamin’ny famelana ny tenany, izay nanisy tao anatin’ny fahatsoram-po saingy tamin’ny fomba diso fetra ny hery manavotry ny Mpamonjy. Novain’izy ireo tsy nahy ho lasa misy fetra ilay Sorompanavotana tsy misy fetra ary toa tsy miantraika amin’ny fahotany na ny fahalemen’izy ireo manokana. Saingy Sorompanavotana tsy misy fetra izany voalohany indrindra noho izany mandrakotra sy mamaritra ny fahotana sy ny fahalemena rehetra, ary koa ny herisetra na fanaintainana rehetra izay nataon’ny hafa. (“Ny Sorompanavotan’i Jesoa Kristy”, Liahona, mey 2019, 86)

Ahoana no ahafahan’ny fibebahana mitahy ny fiainako?

Nizara izao manaraka izao ny Filoha Russell M. Nelson:

14:57

Iaino ilay hery mampatanjaka avy amin’ny fibebahana isan’andro, ilay manao zavatra tsara kely kokoa sy mihatsara kely kokoa isan’andro.

Rehefa misafidy ny hibebaka isika, dia misafidy ny hiova! Omentsika fahafahana ny Mpamonjy mba hanova antsika ho lasa ilay tsara indrindra ao amintsika. Misafidy ny hivoatra ara-panahy isika sy hahazo fifaliana, ilay fifalian’ny fanavotana ao Aminy. Rehefa misafidy ny hibebaka isika dia misafidy ny hitovy kokoa amin’i Jesoa Kristy! (“Afaka manao tsaratsara kokoa sy ho lasa tsaratsara kokoa isika”, Liahona, mey 2019, 67)

Sahanasa fianarana fanampiny

Mampianatra ny mpianatra ny fomba fibebahana

Isaia 1:10–15: Fanati-poana

Mba hanampiana ny mpianatra hahatakatra ny maha-zava-dehibe ny mitsaoka ny Tompo amin-kitsimpo dia hevero ny hitondra kaopy na vera izay madio ny ety ivelany fa maloto kosa ny ao anatiny. Azonao anontaniana ny mpianatra raha hisotro amin’izany kaopy izany izy ireo. Hazavao fa maneho ny Israelita ilay kaopy.

Avy eo dia asao ny mpianatra hamaky ny Isaia 1:11–15 ka hitady ny fahatsapan’ny Tompo momba ny fanatitra natolotry ny Israelita.

Avy eo dia apetraho ireto fanontaniana manaraka ireto:

Nahoana araka ny eritreritrao no nandà ny fanatitra natolotr’izy ireo ny Tompo?
Ahoana no ifandraisan’ireo andininy ireo amin’ilay lesona nampiasana zavatra azo tsapain-tanana?
Inona no ianaranao avy amin’ireo andininy ireo mikasika ny fitsaohana an’ Andriamanitra?

Afaka manampy ny mpianatra ianao mba hahita ity fahamarinana manaraka ity: Ny fihetsika ety ivelany izay maneho fanolorantena amin’ Andriamanitra dia manan-danja Aminy kokoa rehefa madio ny fikasantsika.

Afaka misaintsaina ny fikasany manokana ny mpianatra rehefa manao fihetsika ety ivelany izay maneho fanolorantena amin’ny Tompo izy ireo.

Isaia 2:1–5: Ny tendrombohitra misy ny tranon’i Jehovah

Raha tsapanao fa afaka mahazo tombontsoa avy amin’ny fandalinana faminaniana iray mikasika ny tranon’i Tompo ny mpianatra dia hevero ny hampianatra ny Isaia 2:1–5. Ampahatsahivo ny mpianatra fa matetika i Isaia no nampianatra tamin’ny alalan’ny fampiasana sarinteny. Entano ny mpianatra avy eo hanao sary ny zavatra nosoritsoritan’i Isaia ao amin’ny Isaia 2:1–5. Rehefa avy nomena fotoana ampy ny mpianatra dia asao izy ireo hanazava ny sary nataony amin’ny mpianatra iray hafa. Avy eo dia apetraho ireto fanontaniana manaraka ireto:

Amin’ny fomba ahoana no maha-tandindon’ny tempoly ny fehezan-teny hoe “ny tendrombohitra misy ny tranon’i Jehovah” (Isaia 2:2)?
Inona avy ireo fitahiana nampanantenaina sasantsasany amin’ny fandehanana any amin’ny tempoly?

Ampio ny mpianatra hahita ity fitsipika manaraka ity: Rehefa mandeha any amin’ny tranon’ny Tompo isika ary mankatò Azy dia hampianatra antsika ny lalany Izy. Apetraho ity fanontaniana manaraka ity avy eo:

Tamin’ny fomba ahoana no nahitanao ny fahatanterahan’ny tenin’i Isaia?