« វាយតម្លៃការរៀនសូត្ររបស់អ្នកទី ៧ ៖ យ៉ូប—សាស្ដា » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« វាយតម្លៃការរៀនសូត្ររបស់អ្នកទី ៧ ៖ យ៉ូប—សាស្ដា » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សុភាសិត ១–៤; ១៥–១៦; ២២; ៣១; សាស្ដា ១–៣; ១១–១២ ៖ មេរៀនទី ១១២
វាយតម្លៃការរៀនសូត្ររបស់អ្នកទី ៧
យ៉ូប—សាស្ដា
ការពិចារណា និងការវាយតម្លៃពីការរៀនសូត្រខាងវិញ្ញាណរបស់យើង អាចជួយយើងឲ្យខិតទៅកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។ មេរៀននេះអាចជួយសិស្សគិតពិចារណាពីគោលដៅដែលពួកគេបានដាក់ និងការរីកចម្រើនដែលពួកគេបានដកពិសោធន៍ក្នុងអំឡុងពេលការសិក្សាថ្មីៗរបស់ពួកគេអំពីព្រះគម្ពីរសញ្ញាចាស់ ។
ការរៀបចំសិស្ស ៖ សូមអញ្ជើញសិស្សឲ្យមករៀនដោយត្រៀមខ្លួនចែកចាយដំណើររឿងនៃព្រះគម្ពីរសញ្ញាចាស់ ឬការបង្រៀនដែលមានឥទ្ធិពលលើការរីកចម្រើនខាងវិញ្ញាណរបស់ពួកគេ ។
សកម្មភាពរៀនសូត្រដែលអាចមាន
ការសិក្សារបស់សិស្សរបស់អ្នកអំពីយ៉ូបទៅដល់សាស្ដា អាចផ្តោតលើលទ្ធផលខុសៗគ្នា ជាងអ្វីដែលបានវាយតម្លៃនៅក្នុងមេរៀននេះ ។ បើដូច្នេះ សូមបត់បែនសកម្មភាពនេះដើម្បីវាយតម្លៃពីការរីកចម្រើនដែលសិស្សបានដកពិសោធន៍ចេញពីលទ្ធផលដែលពួកគេផ្តោតលើក្នុងថ្នាក់របស់អ្នក ។
នៅក្នុងមេរៀននេះ សិស្សនឹងមានឱកាសវាយតម្លៃការរីកចម្រើនរបស់ពួកគេដូចខាងក្រោម ៖
-
ពន្យល់ពីការរស់ឡើងវិញដែលជាផ្នែកមួយនៃផែនការរបស់ព្រះវរបិតាសួគ៌ ។ ( ចំណាំ ៖ សកម្មភាពនេះគឺផ្អែកលើការបង្រៀនពីមេរៀនទី ៩៨ ៖ « យ៉ូប ១៤, ១៩ » ) ។
-
មាននូវបំណងប្រាថ្នាដែលកើនឡើងដើម្បីថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទ ។ ( ចំណាំ ៖ សកម្មភាពនេះគឺផ្អែកលើមតិយោបល់មកពីមេរៀនទី ១០១ ៖ « បុព្វកថាទៅកាន់ទំនុកដំកើង ផ្នែកទី ២ » ។ មេរៀនផ្សេងទៀតពីទំនុកដំកើង និងគម្ពីរផ្សេងៗនៅក្នុងព្រះគម្ពីរសញ្ញាចាស់ ក៏អាចជួយសិស្សបង្កើនបំណងប្រាថ្នាចង់ថ្វាយបង្គំព្រះអម្ចាស់ផងដែរ ) ។
-
សិក្សាព្រះគម្ពីរជាទៀងទាត់ដោយខ្លួនឯង ។ ( ចំណាំ ៖ សកម្មភាពនេះគឺផ្អែកលើការបង្រៀនពីមេរៀនទី ១០៧ ៖ « ទំនុកដំកើង ១១៩ » ។ ទោះបីជាថ្នាក់រៀនមិនបានសិក្សាមេរៀនជាក់លាក់នោះក្តី ក៏ការអញ្ជើញសិស្សយូរៗម្តងឲ្យវាយតម្លៃការសិក្សាព្រះគម្ពីរផ្ទាល់ខ្លួនរបស់ពួកគេ អាចជួយពួកគេឲ្យរីកចម្រើនខាងវិញ្ញាណរបស់ពួកគេផងដែរ ) ។
ការត្រួតពិនិត្យជាប្រចាំ
ដើម្បីចាប់ផ្តើមមេរៀននេះ សូមពិចារណាជួយសិស្សឲ្យមើលឃើញពីតម្លៃនៃការធ្វើការត្រួតពិនិត្យជាប្រចាំលើកិច្ចការសំខាន់ៗ ជាជាងផ្តោតលើវាតែបន្ទាប់ពីមានបញ្ហាកើតឡើង ។ អ្នកអាចបង្ហាញរូបភាពនៃរបស់របរដែលត្រូវការការត្រួតពិនិត្យជាប្រចាំ ។ ឬអ្នកអាចប្រាប់រឿងផ្ទាល់ខ្លួនអំពីរបៀបដែលអ្នកត្រូវបានផ្ដល់ពរដោយការចំណាយពេលដើម្បីពិនិត្យមើលអ្វីមួយ ។
-
ហេតុអ្វីបានជាការពិនិត្យមើលជាទៀងទាត់នូវកិច្ចការខាងក្រោមនេះមានសារៈសំខាន់ ? តើមានអ្វីអាចកើតឡើង ប្រសិនបើយើងមិនចំណាយពេលពិនិត្យមើលវាទេ ?
-
យានយន្ត
-
ដំណើរឆ្ពោះទៅបញ្ចប់ការសិក្សានៅវិទ្យាល័យ
-
សុខភាពរាងកាយ ( ឧទាហរណ៍ ភ្នែក ត្រចៀក ធ្មេញ និងសុខភាពទូទៅ )
អ្នកអាចផ្លាស់ប្តូរការពិភាក្សាក្នុងថ្នាក់ទៅជាកិច្ចការខាងវិញ្ញាណ ដោយសួរសំណួរដូចជា ៖
-
តើអ្នកគិតថាហេតុអ្វីវាសំខាន់ក្នុងការពិនិត្យមើលការរីកចម្រើនខាងវិញ្ញាណរបស់យើងជាទៀងទាត់ ?
-
តើវាអាចមានប្រយោជន៍ក្នុងការកត់សម្គាល់ការរីកចម្រើនដែលយើងកំពុងធ្វើ ក៏ដូចជាការកែតម្រូវដែលយើងអាចធ្វើបានដោយរបៀបណា ?
សូមចំណាយពេលដើម្បីពិនិត្យមើលពីរបៀបដែលការសិក្សារបស់អ្នកអំពីព្រះគម្ពីរសញ្ញាចាស់បានជួយអ្នកឲ្យរីកចម្រើនខាងវិញ្ញាណនៅឆ្នាំនេះ ។ នៅពេលអ្នកពិនិត្យមើលការរីកចម្រើនរបស់អ្នក អ្នកអាចជញ្ជឹងគិត ឬសរសេរចម្លើយរបស់អ្នកចំពោះសំណួរមួយ ឬច្រើនខាងក្រោម ៖
-
តើអ្នកបានរៀនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទដែលមានសារៈសំខាន់ចំពោះអ្នក ?
-
តើមានដំណើររឿងព្រះគម្ពីរ ឬការបង្រៀនជាក់លាក់ដែលមានឥទ្ធិពលដល់អ្នកដែរឬទេ ? ប្រសិនបើដូច្នេះ តើតាមរបៀបណា ?
-
តើអ្នកសប្បាយចិត្តនឹងការរីកចម្រើនដែលអ្នកកំពុងធ្វើដែរឬទេ ? តើអ្វីបាននាំឲ្យមានវា ឬតើអ្នកអាចធ្វើអ្វីដើម្បីជួយអ្នកទទួលបានលទ្ធផលដែលអ្នកស្វែងរក ?
បន្ទាប់ពីពេលវេលាជញ្ជឹងគិត និងសរសេររួចហើយ សូមអញ្ជើញអ្នកស្ម័គ្រចិត្តឲ្យចែកចាយគំនិតនិងចំណាប់អារម្មណ៍ខ្លះៗរបស់ពួកគេ ។
ពន្យល់ពីការរស់ឡើងវិញដែលជាផ្នែកមួយនៃផែនការរបស់ព្រះវរបិតាសួគ៌
សូមពិចារណាសរសេរសំណួរដូចខាងក្រោមនៅលើក្ដារខៀន ។ ជំនួសឲ្យការឲ្យសិស្សឆ្លើយសំណួរនោះ សូមអញ្ជើញពួកគេឲ្យចែកចាយអ្នកដែលអាចនឹងសួរពីវា ឬក្នុងស្ថានភាពអ្វីដែលនរណាម្នាក់អាចសួរពីវា ។
-
តើយើងនឹងរស់នៅម្តងទៀតបន្ទាប់ពីយើងស្លាប់ឬ ?
សូមជួយសិស្សឲ្យយល់ថា ចំណេះដឹងរបស់យើងអំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ អាចជួយយើងឆ្លើយសំណួរនេះ ។
សកម្មភាពខាងក្រោមអាចជួយសិស្សឲ្យពន្យល់អ្វីដែលពួកគេយល់អំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ។ នៅក្នុងមេរៀនទី ៩៨ ៖ « យ៉ូប ១៤, ១៩ » សិស្សអាចសរសេរកថាខណ្ឌមួយជាការឆ្លើយតបទៅនឹងសំណួររបស់យ៉ូប ៖ « បើមនុស្សស្លាប់ទៅ តើនឹងមានជីវិតរស់ឡើងទៀតឬ ? » ( យ៉ូប ១៤:១៤ ) ។ សូមអញ្ជើញសិស្សឲ្យពិនិត្យមើលកថាខណ្ឌនោះនៅក្នុងសៀវភៅកំណត់ហេតុរបស់ពួកគេ ហើយអានសេចក្តីយោងបទគម្ពីរទាំងឡាយដែលពួកគេអាចនឹងមានបញ្ចូលក្នុងការឆ្លើយតបរបស់ពួកគេ ។
ប្រសិនបើសិស្សមិនបានសរសេរការឆ្លើយតបចំពោះសំណួររបស់យ៉ូបទេ សូមពិចារណាផ្តល់សេចក្តីយោងបទគម្ពីរខាងក្រោមសម្រាប់ពួកគេអាន ។
-
កូរិនថូស ទី១ ១៥:២០–២២
បន្ទាប់ពីសិស្សមានពេលពីរបីនាទីដើម្បីពិនិត្យមើលនូវអ្វីដែលពួកគេបានសរសេរ ឬបទគម្ពីរខាងលើហើយ សូមអញ្ជើញពួកគេម្នាក់ៗឲ្យជ្រើសរើសលេខមួយចន្លោះពីមួយទៅបួន ។ ដាក់សិស្សជាក្រុមតូចៗជាមួយមនុស្សដែលជ្រើសរើសលេខខុសៗគ្នា ។ សូមអញ្ជើញពួកគេឲ្យចែកចាយជាមួយក្រុមរបស់ពួកគេអំពីរបៀបដែលពួកគេនឹងពន្យល់អំពីការមានព្រះជន្មរស់ឡើងវិញ និងតួនាទីរបស់ព្រះយេស៊ូវគ្រីស្ទនៅក្នុងនោះ នៅក្នុងស្ថានភាពខាងក្រោម ដែលត្រូវគ្នាទៅនឹងលេខដែលពួកគេជ្រើសរើស ។
-
មិត្តរួមថ្នាក់ម្នាក់នៅសាលារៀន ដែលចង់ដឹងអំពីអ្វីដែលព្រះវិហារបស់យើងបង្រៀនអំពីជីវិតបន្ទាប់ពីសេចក្តីស្លាប់
-
មិត្តភក្តិម្នាក់នៅកន្លែងធ្វើការ ដែលទើបតែដឹងថាបងប្អូនរបស់ពួកគេមានជំងឺប្រចាំកាយ
-
កុមារនៅក្នុងថ្នាក់អង្គការបឋមសិក្សា
-
ឡើងនិយាយនៅក្នុងពិធីបុណ្យសពលោកតាម្នាក់
បន្ទាប់ពីសិស្សមានឱកាសចែកចាយជាមួយគ្នាទៅវិញទៅមក អ្នកអាចសុំសិស្សពីរបីនាក់ដែលស្ម័គ្រចិត្តចែកចាយអ្វីដែលពួកគេបានរៀនពីបទពិសោធន៍នេះ ។ ការណ៍នេះអាចរួមបញ្ចូលការយល់ដឹងថ្មីមួយដែលពួកគេបានរៀនអំពីព្រះយេស៊ូវគ្រីស្ទ និងការរស់ឡើងវិញ ឬអ្វីមួយដែលពួកគេបានរៀនដោយការពន្យល់ដល់អ្នកដទៃ ។
មាននូវបំណងប្រាថ្នាដែលកើនឡើងដើម្បីថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទ
ដោយជាផ្នែកនៃមេរៀនទី ១០១ ៖ « បុព្វកថាទៅកាន់ទំនុកដំកើង ផ្នែកទី ២ » សិស្សប្រហែលជាបានចាប់ផ្តើមបង្កើតវីដេអូ កំណាព្យ ការគូររូប meme ឬការបង្ហាញពីគំនិត និងអារម្មណ៍ផ្សេងទៀតរបស់ពួកគេអំពីព្រះវរបិតាសួគ៌ និងព្រះយេស៊ូវគ្រីស្ទ ។ សូមអញ្ជើញសិស្សឲ្យស្វែងរក ឬចងចាំគម្រោងរបស់ពួកគេ ។ សូមដាក់បង្ហាញសេចក្តីណែនាំ និងសំណួរខាងក្រោមសម្រាប់សិស្សឆ្លើយតបនៅក្នុងសៀវភៅកំណត់ហេតុការសិក្សារបស់ពួកគេ ។ អ្នកអាចនឹងចាក់ភ្លេងតិចៗខ្លះៗ ខណៈសិស្សធ្វើសកម្មភាពនេះ ។
ចំណាយពេលបន្តិចដើម្បីគិតអំពីបទពិសោធន៍ដែលអ្នកបានបង្កើតកិច្ចការនេះ ។ សូមយាងអញ្ជើញព្រះវិញ្ញាណបរិសុទ្ធឲ្យជួយអ្នករំឭកពីអារម្មណ៍ដែលអ្នកបានបង្ហាញ ។
-
តើអ្នកបានរៀន ឬមានអារម្មណ៍អ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ចាប់តាំងពីអ្នកបានបង្កើតការបង្ហាញអារម្មណ៍នៃការថ្វាយបង្គំនេះ ?
-
តើមានការផ្លាស់ប្ដូរអ្វីខ្លះ ដែលអ្នកបានកត់សម្គាល់ពីរបៀបដែលអ្នកគិត ឬមានអារម្មណ៍ចំពោះព្រះវរបិតាសួគ៌ និងព្រះយេស៊ូវគ្រីស្ទ ចាប់តាំងពីអ្នកបានបង្កើតវាមក ? តើអ្នកមានអារម្មណ៍បែបណានៅថ្ងៃនេះ ?
-
ការមើលគម្រោងរបស់អ្នក តើអ្នកនឹងបន្ថែមអ្វី ? តើអ្នកនឹងផ្លាស់ប្តូរអ្វី ?
អ្នកអាចផ្តល់ឲ្យសិស្សដែលស្ម័គ្រចិត្តដែលមិនទាន់បានចែកចាយគម្រោងរបស់ពួកគេនូវឱកាសមួយដើម្បីចែកចាយនូវអ្វីដែលពួកគេបានបង្កើត អ្វីដែលមានន័យសម្រាប់ពួកគេអំពីបទពិសោធន៍ ឬអារម្មណ៍ដែលពួកគេមាន ។
សិក្សាព្រះគម្ពីរជាទៀងទាត់ដោយខ្លួនរបស់អ្នក
នៅក្នុងមេរៀនទី ១០៧ ៖ « ទំនុកដំកើង ១១៩ » អ្នកប្រហែលជាបានបង្កើតមេរៀនមួយដែលមានប្រើវត្ថុ ដោយបន្ថយពន្លឺនៅក្នុងបន្ទប់ ហើយបើកចង្កៀង ឬពិល ។ បើដូច្នេះមែន សូមពិចារណាធ្វើមេរៀនដែលមានប្រើវត្ថុនេះឡើងវិញ ហើយសុំឲ្យសិស្សអាន ទំនុកដំកើង ១១៩:១០៥ ។ សូមអញ្ជើញពួកគេឲ្យចែកចាយអ្វីដែលពួកគេចងចាំពីមេរៀននោះ រួមទាំងរបៀបដែលព្រះបន្ទូលរបស់ព្រះប្រៀបដូចជាពន្លឺក្នុងជីវិតរបស់យើង ។
សិស្សអាចនឹងត្រូវបានអញ្ជើញក្នុងមេរៀននោះដើម្បីបង្កើតគោលដៅសិក្សាព្រះគម្ពីរផ្ទាល់ខ្លួន ឬដើម្បីជញ្ជឹងគិតពីរបៀបដែលពួកគេកំពុងធ្វើជាមួយនឹងគោលដៅដែលពួកគេបានកំណត់រួចហើយ ។ អញ្ជើញពួកគេឲ្យវាយតម្លៃពីរបៀបដែលពួកគេបានធ្វើជាមួយនឹងគោលដៅសិក្សារបស់ពួកគេ និងរបៀបដែលវាកំពុងជួយពួកគេ ។ ដើម្បីធ្វើដូច្នេះ អ្នកអាចដាក់បង្ហាញសេចក្តីណែនាំដូចខាងក្រោម ។
នៅក្នុងសៀវភៅកំណត់ហេតុការសិក្សារបស់អ្នក សូមសរសេរពីរបៀបដែលការសិក្សាព្រះគម្ពីររបស់អ្នកកំពុងដំណើរការ ។ អ្នកអាចរួមបញ្ចូលចម្លើយចំពោះសំណួរដូចខាងក្រោមមួយចំនួន ៖
-
តើអ្នកកំពុងធ្វើយ៉ាងណាក្នុងការអនុវត្តគោលដៅរបស់អ្នកឲ្យជាប់លាប់ ?
-
តើអ្នកមានអារម្មណ៍ថាព្រះអម្ចាស់កំពុងដឹកនាំអ្នកនៅពេលអ្នកសិក្សាព្រះគម្ពីរដែរឬទេ ? ហេតុអ្វីកំពុងដឹកនាំ ឬហេតុអ្វីមិនដឹកនាំ ?
-
តើអ្នកប្រឈមមុខនឹងឧបសគ្គអ្វីខ្លះ បើមាន ?
-
តើអ្នកអាចចង់បន្តកែលម្អការសិក្សាព្រះគម្ពីររបស់អ្នកដោយរបៀបណា ?
សូមអញ្ជើញសិស្សឲ្យចែកចាយគំនិតរបស់ពួកគេ ។ ប្រសិនបើពួកគេចែកចាយភាពជោគជ័យ សូមពិចារណាសួរសំណួរដូចជា « តើវាមានឥទ្ធិពលដល់ជីវិតរបស់អ្នកយ៉ាងដូចម្តេច ? » ឬ « តើអ្នកបានធ្វើអ្វីដែលបានជួយនាំឲ្យមានលទ្ធផលនេះ ? » ប្រសិនបើពួកគេចែកចាយការលំបាកដែលពួកគេកំពុងមាន សូមពិចារណាអំពីការអញ្ជើញសិស្សក្នុងថ្នាក់ឲ្យរកមើលបទគម្ពីរ សេចក្តីថ្លែងការណ៍ពីថ្នាក់ដឹកនាំសាសនាចក្រ ឬចែកចាយបទពិសោធន៍ផ្ទាល់ខ្លួនដែលអាចជួយបាន ។ ព្យាយាមបង្កើតបរិយាកាសដែលសិស្សខិតខំជួយ និងគាំទ្រគ្នាទៅវិញទៅមក ។
សូមពិចារណាចែកចាយគោលដៅសិក្សាព្រះគម្ពីររបស់អ្នក និងបទពិសោធន៍ផងដែរ ។