« ទំនុកដំកើង ១១៩ ៖ ‹ ព្រះបន្ទូលនៃទ្រង់ជាចង្កៀងដល់ជើងទូលបង្គំ ហើយជាពន្លឺបំភ្លឺផ្លូវទូលបង្គំផង › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ទំនុកដំកើង ១១៩ ៖ ‹ ព្រះបន្ទូលនៃទ្រង់ជាចង្កៀងដល់ជើងទូលបង្គំ ហើយជាពន្លឺបំភ្លឺផ្លូវទូលបង្គំផង › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ទំនុកដំកើង ១០២–១០៣; ១១០; ១១៦–១១៩; ១២៧–១២៨; ១៣៥–១៣៩; ១៤៦–១៥០ ៖ មេរៀនទី ១០៧
ទំនុកដំកើង ១១៩
« ព្រះបន្ទូលនៃទ្រង់ជាចង្កៀងដល់ជើងទូលបង្គំ ហើយជាពន្លឺបំភ្លឺផ្លូវទូលបង្គំផង »
តើអ្នកមានអារម្មណ៍ថាការសិក្សាព្រះគម្ពីររបស់អ្នកនាំទៅរកការដឹកនាំពីព្រះអម្ចាស់ដែរឬទេ ? ទំនុកដំកើង ១១៩ បង្ហាញការដឹងគុណចំពោះព្រះបន្ទូលនៃព្រះ ហើយថ្លែងទីបន្ទាល់អំពីអំណាចរបស់ខ្លួន ។ មេរៀននេះអាចជួយសិស្សបង្កើតផែនការដើម្បីសិក្សាព្រះបន្ទូលរបស់ព្រះ ។
ការរៀបចំសិស្ស ៖ សូមអញ្ជើញសិស្សឲ្យសិក្សាព្រះគម្ពីរផ្ទាល់ខ្លួនមុនថ្នាក់បន្ទាប់ទៀត ។ សូមឲ្យពួកគេជញ្ជឹងគិតថាតើពួកគេមានអារម្មណ៍ថាមានការដឹកនាំរបស់ព្រះអម្ចាស់តាមរយៈការសិក្សាព្រះគម្ពីររបស់ពួកគេឬអត់ ។ បើដូច្នេះ តើពួកគេអាចគិតពីឧទាហរណ៍ណាមួយបានដែរឬទេ ?
សកម្មភាពរៀនសូត្រដែលអាចមាន
ការដឹកនាំ និងព្រះគម្ពីរទាំងឡាយ
ដើម្បីរៀបចំសិស្សឲ្យសិក្សាអំពីព្រះគម្ពីរ សូមអញ្ជើញពួកគេឲ្យជញ្ជឹងគិតអំពីរបៀបដែលមនុស្សផ្សេងគ្នាមានអាកប្បកិរិយាខុសៗគ្នាចំពោះព្រះគម្ពីរ ។ សូមឲ្យសិស្សពិចារណាអំពីរបៀបដែលមនុស្សផ្សេងគ្នាទាំងនេះអាចបញ្ចប់សេចក្តីថ្លែងការណ៍ដូចខាងក្រោម ។ អ្នកក៏អាចប្រើសកម្មភាពនេះជាការរៀបចំសិស្សផងដែរ ។ អ្នកអាចចែកចាយសេចក្តីថ្លែងការណ៍ពីមុនចូលរៀន ហើយអញ្ជើញសិស្សឲ្យយកវត្ថុមួយដែលនឹងជួយបញ្ចប់សេចក្តីថ្លែងការណ៍នេះ ។
ព្រះគម្ពីរគឺដូចជា ពីព្រោះ ។
ប្រសិនបើសិស្សត្រូវការឧទាហរណ៍មួយ អ្នកអាចនិយាយថា « ព្រះគម្ពីរគឺដូចជាផែនទី ឬ GPS ពីព្រោះវាណែនាំយើង » ។
សូមអញ្ជើញសិស្សឲ្យចែកចាយគំនិតរបស់ពួកគេ ។ អ្នកអាចសួរថា ហេតុអ្វីបានជាមនុស្សមួយចំនួនចូលចិត្តសិក្សាព្រះគម្ពីរ ប៉ុន្តែអ្នកខ្លះទៀតមិនចូលចិត្តសិក្សាព្រះគម្ពីរ ។
សូមពិចារណាអំពីការអញ្ជើញសិស្សឲ្យជញ្ជឹងគិតពីរបៀបដែលពួកគេអាចបំពេញសេចក្ដីថ្លែងការណ៍នេះដើម្បីឆ្លុះបញ្ចាំងពីអាកប្បកិរិយារបស់ពួកគេចំពោះព្រះគម្ពីរ ។
នៅចុងបញ្ចប់នៃមេរៀននេះ អ្នកនឹងវាយតម្លៃគោលដៅសិក្សាព្រះគម្ពីររបស់អ្នក ឬបង្កើតគោលដៅថ្មីមួយ ។ សូមពិចារណាអធិស្ឋានស្ងាត់ៗទូលសូមព្រះវរបិតាសួគ៌ឲ្យដឹកនាំអ្នកនៅថ្ងៃនេះ ពេលអ្នកសិក្សា ទំនុកដំកើង ១១៩ ។ ស្វែងរកការបំផុសគំនិតដើម្បីធ្វើឲ្យគោលដៅនោះអាចជួយអ្នកបានល្អបំផុត ។
ព្រះបន្ទូលនៃព្រះគឺដូចជា …
អ្នកនិពន្ធនៃ ទំនុកដំកើង ១១៩ បានប្រើទីសម្គាល់ដើម្បីពិពណ៌នាពីព្រះបន្ទូលរបស់ព្រះ ។ ទីសម្គាល់ទាំងនេះបានសង្កត់ធ្ងន់លើសេចក្តីស្រឡាញ់របស់អ្នកតែងទំនុកដំកើងចំពោះព្រះបន្ទូលរបស់ព្រះ និងពរជ័យដែលមកតាមរយៈការសិក្សាដោយឧស្សាហ៍ព្យាយាម និងគោរពតាមព្រះបន្ទូលរបស់ទ្រង់ ។
ឧទាហរណ៍ សូមអាន ទំនុកដំកើង ១១៩:១០៥–១០៦ ដោយរកមើលអ្វីដែលអ្នកតែងទំនុកដំកើងប្រៀបធៀបទៅនឹងព្រះបន្ទូលរបស់ព្រះ ។
សូមពិចារណាធ្វើឲ្យមានភាពស្រអាប់ ឬបិទភ្លើងនៅក្នុងបន្ទប់ ហើយបើកចង្កៀង ឬពិល ។ សូមអនុញ្ញាតឲ្យសិស្សចែកចាយអ្វីដែលពួកគេបានរកឃើញ ។
-
តើព្រះបន្ទូលរបស់ព្រះដូចជាពន្លឺ ឬចង្កៀងយ៉ាងដូចម្តេច ?
ប្រសិនបើសិស្សចែកចាយអ្វីមួយដែលដូចជាគោលការណ៍ខាងក្រោម សូមសរសេរវានៅលើក្ដារខៀន ៖ នៅពេលយើងសិក្សាព្រះបន្ទូលរបស់ព្រះ ទ្រង់ប្រទានពរជាការដឹកនាំដល់យើង ។
ប្រសិនបើសិស្សត្រូវការជំនួយបន្ថែមដើម្បីស្វែងរកគោលការណ៍នេះ សូមពិចារណាសួរថា « តើការដើរនៅក្នុងពន្លឺ និងនៅក្នុងទីងងឹតខុសគ្នាដោយរបៀបណា ? » ឬ « តើព្រះគម្ពីរជួយយើងដើរនៅក្នុងពន្លឺដោយរបៀបណា ? » ឬអ្នកអាចសរសេរគោលការណ៍នេះ ហើយសួរថា « តើខគម្ពីរទាំងនេះបង្ហាញពីគោលការណ៍នៅលើក្ដារខៀននេះដោយរបៀបណា ? »
បើកភ្លើងក្នុងបន្ទប់មកវិញ ។ សូមពិចារណាអញ្ជើញសិស្សឲ្យយោង ឬភ្ជាប់ ទំនុកដំកើង ១១៩:១០៥ ទៅ នីហ្វៃទី២ ៣២:៣ ។ សូមឲ្យសិស្សកត់ចំណាំពីរបៀបដែលខគម្ពីរទាំងនេះស្រដៀងគ្នា ។ ឬមើល « How I #HearHim: Elder David A. Bednar » ( ១:១៥ ) នៅលើបណ្ណាល័យដំណឹងល្អ ។
1:16អាន ឬដាក់បង្ហាញសំណួរខាងក្រោម ហើយអញ្ជើញសិស្សពីរបីនាក់ឲ្យម្នាក់ៗជ្រើសរើសសំណួរមួយ ហើយឆ្លើយវា ៖
-
តើអ្នកគិតថាហេតុអ្វីបានជាព្រះចង់ដឹកនាំយើង ?
-
តើការដឹងថាព្រះអាចដឹកនាំយើងតាមរយៈព្រះគម្ពីរ អាចជំរុញចិត្តនរណាម្នាក់ឲ្យសិក្សាព្រះគម្ពីរយ៉ាងដូចម្ដេច ?
-
តើនៅពេលណាដែលព្រះបន្ទូលរបស់ព្រះអម្ចាស់ដូចជាចង្កៀង ឬពន្លឺដល់អ្នក ឬនរណាម្នាក់ដែលអ្នកស្គាល់ ?
នៅពេលសិស្សចែកចាយចម្លើយរបស់ពួកគេ អ្នកអាចសួរថាតើគំនិត និងបទពិសោធន៍ទាំងនេះជះឥទ្ធិពលដល់ទំនាក់ទំនងរបស់ពួកគេជាមួយព្រះយ៉ាងដូចម្តេច ។
ទីសម្គាល់ផ្សេងទៀត
អ្នកតែងទំនុកដំកើងបានធ្វើការប្រៀបធៀបផ្សេងទៀត ។ ( ចំណាំ ៖ អ្នកតែងទំនុកដំកើងបានសំដៅទៅលើព្រះបន្ទូលនៃព្រះតាមពាក្យផ្សេងៗដូចជា សេចក្ដីបន្ទាល់ ច្បាប់ ក្រឹត្យវិន័យ សេចក្ដីបញ្ញត្តិ សេចក្តីបង្គាប់ និងផ្លូវ ) ។
ដើម្បីជួយសិស្សសិក្សា ទំនុកដំកើង ១១៩ សូមសរសេរសេចក្តីយោងដូចខាងក្រោមនៅលើក្ដារខៀន ៖
ទំនុកដំកើង ១១៩:១៤–១៦, ៧២, ១២៧
ទំនុកដំកើង ១១៩:២២–២៤
ទំនុកដំកើង ១១៩:៣៣–៣៥
ទំនុកដំកើង ១១៩:៥០–៥២, ៥៤
ទំនុកដំកើង ១១៩:១០២–១០៤
សូមបែងចែកសិស្សជាប្រាំក្រុម ហើយចាត់តាំងក្រុមនីមួយៗនូវបទគម្ពីរយោងនៅលើក្ដារខៀន ។ ដាក់បង្ហាញវត្ថុ ឬរូបភាពនៃវត្ថុទាំងនេះ ៖ សៀវភៅទំនុកតម្កើង កាក់ ( ឬអ្វីមួយដែលតំណាងឲ្យទ្រព្យសម្បត្តិ ) ទឹកឃ្មុំ ( ឬអ្វីមួយដែលផ្អែម ) រូបភាពផ្លូវមួយ និងរូបភាពទីប្រឹក្សា ( ឧទាហរណ៍ ទីប្រឹក្សាក្នុងគណៈប្រធានទីមួយនៃសាសនាចក្រ ឬទីប្រឹក្សាសាលារៀន ) ។
សូមដាក់បង្ហាញសេចក្តីណែនាំដូចខាងក្រោម ៖
-
អានវគ្គបទគម្ពីរដែលបានចាត់ឲ្យអ្នក ដោយរកមើលអ្វីដែលអ្នកតែងទំនុកដំកើងប្រៀបធៀបទៅនឹងព្រះបន្ទូលរបស់ព្រះ ។
-
យកវត្ថុ ឬរូបភាពដែលត្រូវនឹងវគ្គបទគម្ពីរដែលបានចាត់ឲ្យអ្នក ។
-
ពិភាក្សាអំពីរបៀបដែលវត្ថុ ឬរូបភាពនោះអាចជួយនរណាម្នាក់ឲ្យយល់អំពីសារៈសំខាន់នៃព្រះបន្ទូលរបស់ព្រះ ។
-
ចែកចាយឧទាហរណ៍ ឬបទពិសោធន៍ពីជីវិតរបស់អ្នក ជីវិតរបស់អ្នកដទៃ ឬបទគម្ពីរដែលបង្ហាញពីរបៀបដែលវត្ថុ ឬរូបភាពនោះគឺដូចជាព្រះបន្ទូលរបស់ព្រះ ។
អញ្ជើញសិស្សឲ្យបង្ហើយគោលការណ៍ខាងក្រោមស្របតាមអ្វីដែលពួកគេបានសិក្សា ៖ នៅពេលយើងសិក្សាព្រះបន្ទូលនៃព្រះ ទ្រង់ប្រទានពរដល់យើង …
ចម្លើយដែលអាចមានមួយចំនួនគឺ អំណរ ( សូមមើល ខទី ១៤, ១៦, ៣៥, ១០៣ ) លួងលោម ( សូមមើល ខទី ៥០, ៥២ ) ប្រឹក្សា ( សូមមើល ខទី ២៤ ) និងការយល់ដឹង ( សូមមើល ខទី ១០៤ ) ។
-
តើគោលការណ៍ដែលអ្នករកឃើញអាចជួយនរណាម្នាក់ដែលចង់សិក្សាព្រះបន្ទូលរបស់ព្រះយ៉ាងដូចម្ដេច ?
-
តើព្រះបានប្រទានពរដល់អ្នក ឬមនុស្សដែលអ្នកស្គាល់ដោយអំណរ ការលួងលោម ការប្រឹក្សា ឬការយល់ដឹង ពេលអ្នក ឬពួកគេបានសិក្សាព្រះបន្ទូលទ្រង់យ៉ាងដូចម្ដេច ?
នៅពេលសិស្សចែកចាយចម្លើយរបស់ពួកគេចំពោះសំណួរមុន អ្នកអាចសួរពីរបៀបដែលបទពិសោធន៍ទាំងនេះបានជះឥទ្ធិពលដល់ទំនាក់ទំនងរបស់ពួកគេជាមួយព្រះ ។
គោលដៅរបស់អ្នក
យាងអញ្ជើញព្រះវិញ្ញាណ នៅពេលអ្នកជញ្ជឹងគិតអំពីការសិក្សាព្រះគម្ពីររបស់អ្នក ។ ប្រសិនបើអ្នកមានគោលដៅសិក្សាព្រះគម្ពីររួចហើយ សូមកត់ត្រានៅក្នុងសៀវភៅកំណត់ហេតុការសិក្សារបស់អ្នកអំពីអ្វីដែលបានដំណើរការល្អ និងអ្វីដែលអ្នកអាចនឹងចង់បន្ត ។ អ្នកអាចរួមបញ្ចូលមូលហេតុដែលអ្នកជ្រើសរើសគោលដៅនេះ និងរបៀបដែលវាជួយអ្នកឲ្យមានអារម្មណ៍កាន់តែខិតជិតព្រះអម្ចាស់ ។ សូមទូលសួរព្រះវរបិតាសួគ៌ដោយការអធិស្ឋាន ប្រសិនបើទ្រង់ចង់ឲ្យអ្នកធ្វើការកែសម្រួលគោលដៅណាមួយរបស់អ្នក ។
ប្រសិនបើអ្នកមិនមានគោលដៅសិក្សាព្រះគម្ពីរបច្ចុប្បន្នទេ សូមស្វែងរកការណែនាំពីព្រះវិញ្ញាណបរិសុទ្ធ នៅពេលអ្នកបង្កើតគោលដៅមួយ ។ អ្នកអាចរួមបញ្ចូលដូចខាងក្រោម ៖
-
រយៈពេលដែលអ្នកនឹងសិក្សា
-
តើអ្នកនឹងសិក្សាញឹកញាប់ប៉ុនណា ( បើអាច សូមខិតខំសិក្សារាល់ថ្ងៃ )
-
អ្វីដែលអ្នកនឹងធ្វើដើម្បីស្វែងរកជំនួយរបស់ព្រះអម្ចាស់ជាមួយនឹងការសិក្សារបស់អ្នក ( ឧទាហរណ៍ សូមអធិស្ឋានមុនពេលអ្នកសិក្សា ឬស្វែងរកវិវរណៈអំពីអ្វីដែលអ្នកសិក្សា )
-
របៀបដែលអ្នកអាចចងចាំ ជញ្ជឹងគិត ឬអនុវត្តអ្វីដែលអ្នករៀន ( ឧទាហរណ៍ រក្សាកំណត់ហេតុនៃអ្វីដែលអ្នកកំពុងរៀនពីការសិក្សាព្រះគម្ពីររបស់អ្នក រក្សាកំណត់ត្រាអំពីអ្វីដែលអ្នកកំពុងព្យាយាមអនុវត្ត ឬពិភាក្សាជាមួយអ្នកផ្សេងអំពីអ្វីដែលអ្នកកំពុងរៀនម្តងក្នុងមួយសប្តាហ៍ )
អញ្ជើញអ្នកស្ម័គ្រចិត្តឲ្យចែកចាយគោលដៅសិក្សាព្រះគម្ពីររបស់ពួកគេ ព្រមទាំងកង្វល់ទាំងឡាយដែលពួកគេអាចមាន ។ ប្រសិនបើសិស្សចែកចាយកង្វល់នានា សូមអញ្ជើញសិស្សក្នុងថ្នាក់ឲ្យចែកចាយបទគម្ពីរ សេចក្តីថ្លែងការណ៍ពីថ្នាក់ដឹកនាំសាសនាចក្រ ឬបទពិសោធន៍ផ្ទាល់ខ្លួនដែលអាចជួយបាន ។
សូមប្រាប់សិស្សថានៅក្នុង « វាយតម្លៃការរៀនសូត្ររបស់អ្នកទី ៧ » ពួកគេនឹងមានឱកាសដើម្បីរាយការណ៍ពីគោលដៅរបស់ពួកគេ ។ ពួកគេនឹងចែកចាយពីរបៀបដែលការសិក្សាព្រះគម្ពីររបស់ពួកគេកំពុងដំណើរការ និងពរជ័យអ្វីខ្លះដែលពួកគេមានអារម្មណ៍ថា ព្រះអម្ចាស់កំពុងប្រទានដល់ពួកគេដោយសារការសិក្សាព្រះគម្ពីរ ។
ប្រសិនបើនៅមានពេលក្នុងថ្នាក់ សូមអញ្ជើញសិស្សឲ្យសិក្សាព្រះគម្ពីរដោយស្ងាត់ស្ងៀម ។ សូមអញ្ជើញពួកគេឲ្យស្វែងរកសេចក្តីពិតដែលព្រះប្រទានដល់យើង ដែលអាចដឹកនាំពួកគេក្នុងជីវិតរបស់ពួកគេសព្វថ្ងៃនេះ ។ សូមអញ្ជើញសិស្សពីរបីនាក់ឲ្យចែកចាយអ្វីដែលពួកគេបានរកឃើញ ។
សូមចែកចាយទីបន្ទាល់របស់អ្នកអំពីគោលការណ៍ទាំងឡាយដែលបានបង្រៀននៅក្នុងមេរៀននេះ ។