« សាស្តា ៖ ‹ ព្រះទ្រង់នឹងនាំគ្រប់ការទាំងអស់មកដើម្បីជំនុំជម្រះ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« សាស្ដា ៖ ‹ ព្រះទ្រង់នឹងនាំគ្រប់ការទាំងអស់មកដើម្បីជំនុំជម្រះ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សុភាសិត ១–៤; ១៥–១៦; ២២; ៣១; សាស្ដា ១–៣; ១១–១២ ៖ មេរៀនទី ១១១
សាស្តា
« ព្រះទ្រង់នឹងនាំគ្រប់ការទាំងអស់មកដើម្បីជំនុំជម្រះ »
ពេលខ្លះ វាអាចជាការងាយស្រួលក្នុងការផ្ដោតលើអ្វីដែលកើតឡើងក្នុងជីវិតនេះ ខណៈពេលដែលភ្លេចមើលជីវិតរបស់យើងពីទស្សនវិស័យដ៏អស់កល្បមួយ ។ នៅក្នុងសាស្ដា គ្រូប្រដៅរំឭកយើងថា អ្វីៗក្នុងលោកនេះ គឺបណ្តោះអាសន្នទេ ។ ទ្រង់ទូន្មានយើងឲ្យរៀបចំសម្រាប់ពេលដែលព្រះនឹងវិនិច្ឆ័យបុត្រាបុត្រីទាំងអស់របស់ទ្រង់ ។ មេរៀននេះមានគោលបំណងជួយសិស្សយល់ពីរបៀបដែលការផ្ដោតលើការជួបព្រះនៅឯការជំនុំជម្រះចុងក្រោយ អាចជួយពួកគេឲ្យធ្វើការជ្រើសរើសដ៏ឈ្លាសវៃ ។
ការរៀបចំសិស្ស ៖ អញ្ជើញសិស្សឲ្យសន្ទនាជាមួយឪពុកម្តាយ ឬអ្នកដឹកនាំដែលគួរឲ្យទុកចិត្ត អំពីរបៀបដែលពួកគេបានឃើញពីផលប៉ះពាល់រយៈពេលវែងនៃការសម្រេចចិត្តដែលពួកគេបានធ្វើកាលពីក្មេង ។
សកម្មភាពរៀនសូត្រដែលអាចមាន
ការសម្រេចចិត្ត
សូមពិចារណាអំពីការចាប់ផ្តើមថ្នាក់ដោយជួយសិស្សឲ្យដឹងពីរបៀបដែលទស្សនវិស័យដ៏អស់កល្បមួយអាចមានឥទ្ធិពលលើការសម្រេចចិត្តដែលពួកគេធ្វើ ។ ដើម្បីធ្វើដូច្នេះ អ្នកអាចសរសេរដូចខាងក្រោមនៅលើក្ដារខៀន ។ សូមអញ្ជើញសិស្សឲ្យពិភាក្សាអំពីរបៀបដែលការសម្រេចចិត្តនីមួយៗនៅពេលពួកគេនៅក្មេងអាចជះឥទ្ធិពលដល់អនាគតរបស់ពួកគេ ។
-
របៀបដែលខ្ញុំប្រព្រឹត្តចំពោះរូបកាយរបស់ខ្ញុំ
-
របៀបដែលខ្ញុំចំណាយពេលទំនេររបស់ខ្ញុំ
-
របៀបដែលខ្ញុំប្រព្រឹត្តចំពោះមនុស្ស
បន្ទាប់មក សូមចែកចាយសេចក្ដីថ្លែងការណ៍ខាងក្រោម ហើយអញ្ជើញសិស្សឲ្យភ្ជាប់ទំនាក់ទំនងរវាងការសម្រេចចិត្តខាងលើ និងអ្វីដែលប្រធាន ណិលសុន បានបង្រៀន ។
ប្រធាន រ័សុល អិម ណិលសុន បានបង្រៀនដូចខាងក្រោមអំពីការជ្រើសរើសរបស់យើង ។
រាល់ការជ្រើសរើសសុចរិតដែលក្មួយៗធ្វើនៅទីនេះ នឹងទទួលបានរង្វាន់ក្នុងជីវិតនេះ ។ ប៉ុន្តែការជ្រើសរើសសុចរិតក្នុងជីវិតរមែងស្លាប់ក៏នឹងទទួលបានរង្វាន់ដ៏នៅអស់កល្បជានិច្ចដែលនឹកស្មានមិនដល់ផងដែរ ។ …
ជាការពិតណាស់ មារសត្រូវមិនចង់ឲ្យក្មួយៗគិតសូម្បីតែអំពីថ្ងៃស្អែក ចុះទម្រាំជីវិតដ៏នៅអស់កល្បជានិច្ចទៀតនោះ ។ ( « ការជ្រើសរើសដែលជះឥទ្ធិពលលើភាពអស់កល្បជានិច្ច » [ ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ ថ្ងៃទី១៥ ខែឧសភា ឆ្នាំ២០២២ ] នៅលើបណ្ណាល័យដំណឹងល្អ )
-
តើការមិនមើលការជ្រើសរើសរបស់យើងដោយទស្សនវិស័យដ៏អស់កល្បមួយអាចមានឥទ្ធិពលលើយើងយ៉ាងដូចម្ដេច ?
សរសេរការសម្រេចចិត្តដែលអ្នកកំពុងប្រឈមមុខដែលអាច « ទទួលបានរង្វាន់ដ៏នៅអស់កល្បជានិច្ចដែលនឹកស្មានមិនដល់ » ។
វាអាចជាការល្អក្នុងការផ្តល់ឲ្យសិស្សនូវគំនិតមួយចំនួនអំពីប្រភេទនៃការសម្រេចចិត្តដែលពួកគេអាចសរសេរដូចជា ៖
-
ថាតើត្រូវបន្តចំណាយពេលជាមួយក្រុមមិត្តភក្តិជាក់លាក់ឬអត់ ។
-
ថាតើត្រូវប្រែចិត្តពីអំពើបាបដែលមានក្នុងគំនិតរបស់ពួកគេឬអត់ ។
-
អ្វីដែលពួកគេជ្រើសរើសធ្វើនៅថ្ងៃឈប់សម្រាក ។
សូមជញ្ជឹងគិតពីមូលហេតុដែលព្រះវរបិតាសួគ៌ប្រហែលជាចង់ឲ្យអ្នកគិតអំពីអនាគត ពេលដែលអ្នកធ្វើការសម្រេចចិត្តនេះ ។ តើមានអ្វីកើតឡើងប្រសិនបើអ្នកមិនបានធ្វើ ?
នៅពេលអ្នកសិក្សាសាស្ដានៅថ្ងៃនេះ សូមស្វែងរកការយល់ដឹងពីសេចក្ដីពិតទាំងឡាយ ហើយទទួលវិវរណៈផ្ទាល់ខ្លួនពីព្រះអម្ចាស់ ដែលអាចជួយអ្នកក្នុងការសម្រេចចិត្តនេះ ។
ផ្តោតលើរឿងខាងសាច់ឈាម
នៅក្នុងគម្ពីរសាស្ដា អ្នកនិពន្ធបានសំដៅលើខ្លួនគាត់ថាជា « គ្រូប្រដៅ » ( សាស្ដា ១:១ ) ។ គ្រូប្រដៅបានធ្វើឲ្យឃើញពីភាពផ្ទុយគ្នានៃភាពទទេនៃការផ្ដោតលើជីវិតរបស់យើងលើរឿងខាងសាច់ឈាម ជាមួយនឹងសារៈសំខាន់នៃការរៀបចំខ្លួនដើម្បីជួបព្រះ ។
សូមពិចារណាបង្កើតក្រុមតូចៗ ហើយអញ្ជើញក្រុមនីមួយៗឲ្យអានវគ្គបទគម្ពីរមួយខាងក្រោម ។ ដើម្បីជួយសិស្សឲ្យយល់ពីវគ្គបទគម្ពីរនេះឲ្យបានច្បាស់ នោះអ្នកអាចដាក់បង្ហាញនិយមន័យដូចខាងក្រោម ។ សូមអញ្ជើញសិស្សឲ្យជំនួសពាក្យ និងឃ្លាខាងក្រោមជាមួយនឹងនិយមន័យរបស់ពួកគេ នៅពេលពួកគេអាន ៖
-
« ការឥតប្រយោជន៍ » មានន័យថា ទទេ ឬមួយភ្លែត ។
-
« នៅក្រោមមេឃ » ឬ « នៅក្រោមថ្ងៃ » មានន័យថានៅក្នុងជីវិតរមែងស្លាប់នេះ ។
-
« ជាអសារឥតការ » មានន័យថា ធ្វើមិនបានសម្រេច ។
សូមអានវគ្គបទគម្ពីរខាងក្រោម ដោយរកមើលអ្វីដែលគ្រូប្រដៅបានរកឃើញ បន្ទាប់ពីបានស្វែងរកនូវអ្វីមួយចំនួនដែលមនុស្សខ្លះគិតថានឹងធ្វើឲ្យពួកគេសប្បាយចិត្ត និងនាំមកនូវការបំពេញ ៖
-
ប្រាជ្ញានៃលោកិយ ។ សាស្ដា ១:១៣–១៨
-
ភាពរីករាយខាងសាច់ឈាម និងទ្រព្យសម្បត្ដិខាងសម្ភារ ។ សាស្ដា ២:១, ៤–១១
អ្នកប្រហែលជាចង់បញ្ជាក់ថា ប្រាជ្ញារបស់លោកិយ និងទ្រព្យសម្បត្តិមិនចាំបាច់ថាអាក្រក់ ឬខុសនោះទេ ។ ប៉ុន្តែនៅពេលដែលរឿងទាំងនេះក្លាយជាការផ្តោតអារម្មណ៍របស់យើង ជាពិសេសជាងការគាប់ព្រះហឫទ័យព្រះអម្ចាស់ នោះវាក្លាយជាគ្រោះថ្នាក់ខាងវិញ្ញាណវិញ ។ សូមអញ្ជើញក្រុមឲ្យពិភាក្សានូវសំណួរដូចខាងក្រោម ។ បន្ទាប់មកសមាជិកក្រុមអាចចែកចាយការយល់ដឹងរបស់ក្រុមជាមួយថ្នាក់ ។
-
តើតាមរបៀបណាដែលការទទួលបានរបស់ទាំងនេះ នៅទីបំផុតធ្វើឲ្យយើងមានអារម្មណ៍ទទេ ឬតានតឹង ?
ការប្រជុំចុងក្រោយរបស់យើងជាមួយព្រះ
បន្ទាប់ពីស្វែងរកចំណេះដឹង និងទ្រព្យសម្បត្តិខាងសាច់ឈាម គ្រូប្រដៅបញ្ចប់សៀវភៅរបស់គាត់ជាមួយនឹងមេរៀនដែលគាត់បានរៀន ។ សូមអាន សាស្ដា ១២:៧, ១៣–១៤ ដោយរកមើលអ្វីដែលគាត់បានបង្រៀនដែលអាចជួយយើងរក្សាទស្សនវិស័យដ៏អស់កល្បមួយ ។
ទស្សនវិស័យនេះមានសារៈសំខាន់ណាស់ ដែលព្រះបានបំផុសគំនិតអ្នកបម្រើរបស់ទ្រង់ជាច្រើននាក់ឲ្យបង្រៀនវា ។ សូមយោងបទគម្ពីរនៅក្នុងព្រះគម្ពីរ ឬភ្ជាប់ សាស្ដា ១២:៧, ១៣–១៤ ជាមួយនឹង អាលម៉ា ៣៤:៣២ និង មរមន ៣:២០, ២២ ។ សូមអានវគ្គបទគម្ពីរទាំងនេះ ដោយរកមើលពីរបៀបដែលអាមូលេក និងមរមនបានបង្រៀននូវសារលិខិតស្រដៀងគ្នាមួយ ។
-
តើអ្នកនឹងសង្ខេបអ្វីដែលខគម្ពីរទាំងនេះបង្រៀននៅក្នុងសេចក្តីថ្លែងការណ៍នៃសេចក្តីពិតនេះដោយរបៀបណា ?
សូមជួយសិស្សស្វែងរកសេចក្តីពិតមួយដូចជា ៖ ការជ្រើសរើសរបស់យើងនៅក្នុងជីវិតនេះនឹងកំណត់ថាតើយើងត្រៀមខ្លួនយ៉ាងណាដើម្បីឈរនៅចំពោះព្រះនៅឯសេចក្តីជំនុំជម្រះចុងក្រោយ ។ មុនពេលសិស្សឆ្លើយសំណួរបន្ទាប់ អ្នកអាចអញ្ជើញពួកគេឲ្យបិទភ្នែក ហើយស្រមៃថាបានជួបព្រះបន្ទាប់ពីជីវិតនេះ ។ សូមលើកទឹកចិត្តពួកគេឲ្យពិចារណាអំពីអ្វីដែលពួកគេដឹងអំពីទ្រង់ និងគុណលក្ខណៈរបស់ទ្រង់ ។
-
តើគុណលក្ខណៈពិសេសអ្វីខ្លះរបស់ព្រះដែលធ្វើឲ្យទ្រង់មានលក្ខណសម្បត្តិគ្រប់គ្រាន់ធ្វើជាអង្គជំនុំជម្រះរបស់យើង ?
អ្នកអាចរំឭកសិស្សអំពីតួនាទីរបស់ព្រះយេស៊ូវគ្រីស្ទក្នុងការជួយយើងរៀបចំសម្រាប់ការជំនុំជម្រះចុងក្រោយ ដោយការចែកចាយបទគម្ពីរ និងសំណួរខាងក្រោម
សូមអាន នីហ្វៃទី៣ ២៧:១៦, ១៩ ដោយរកមើលពីរបៀបដែលយើងអាចរៀបចំខ្លួនដើម្បីជួបព្រះយេស៊ូវគ្រីស្ទនៅឯការជំនុំជម្រះចុងក្រោយ ។
-
ហេតុអ្វីបានជាវាសំខាន់ដើម្បីយល់ថា យើងមិនអាចរៀបចំខ្លួនសម្រាប់ការជំនុំជម្រះចុងក្រោយដោយគ្មានព្រះយេស៊ូវគ្រីស្ទ ?
គោលដៅសេឡេស្ទាលរបស់យើង
សូមជួយសិស្សមើលឃើញពីរបៀបដែលការដឹងថាជម្រើសរបស់យើងរៀបចំយើងសម្រាប់ភាពអស់កល្បជានិច្ច អាចជះឥទ្ធិពលដល់ការសម្រេចចិត្តប្រចាំថ្ងៃដែលយើងធ្វើ ។ របៀបមួយដើម្បីធ្វើការណ៍នេះគឺដោយការអនុញ្ញាតឲ្យសិស្សអនុវត្តនូវអ្វីដែលប្រធាន ណិលសុន បានបង្រៀននៅក្នុងសេចក្ដីថ្លែងការណ៍ខាងក្រោម ។
ប្រធាន រ័សុល អិម ណិលសុន បានថ្លែងទីបន្ទាល់ពីសារៈសំខាន់នៃការចាប់ផ្ដើម « ពិចារណាពីគោលដៅដ៏ខ្ពស់បំផុត » ៖
នៅក្នុងសារលិខិតដំបូងរបស់ខ្ញុំក្នុងនាមជាប្រធាននៃសាសនាចក្រនេះ ខ្ញុំបានលើកទឹកចិត្តបងប្អូនឲ្យពិចារណាពីគោលដៅដ៏ខ្ពស់បំផុតរបស់បងប្អូន ។ ការណ៍នេះមានន័យថាដាក់នគរសេឡេស្ទាលជាគោលដៅដ៏អស់កល្បជានិច្ចរបស់បងប្អូន ហើយបន្ទាប់មកពិចារណាដោយប្រុងប្រយ័ត្នថា ការសម្រេចចិត្តនីមួយៗរបស់បងប្អូនខណៈនៅលើផែនដីនេះ នឹងនាំបងប្អូនទៅកន្លែងណានៅពិភពលោកបន្ទាប់ទៀត ។ ( « គិតដល់សេឡេស្ទាល ! » លីអាហូណា ខែវិច្ឆិកា ឆ្នាំ២០២៣ ទំព័រ ១១៨ )
-
តើតាមរបៀបណាខ្លះដែលការបង្រៀន និងគំរូរបស់ព្រះយេស៊ូវគ្រីស្ទបង្ហាញថាទ្រង់បានធ្វើការសម្រេចចិត្តតាម « ពិចារណាពីគោលដៅដ៏ខ្ពស់បំផុត » ?
សូមពន្យល់ថា សិស្សនឹងអនុវត្តនូវអ្វីដែលប្រធាន ណិលសុន បង្រៀន ។ មុនពេលពួកគេចាប់ផ្តើម អ្នកអាចសុំឲ្យពួកគេគិតអំពីការសម្រេចចិត្តដែលនឹងជះឥទ្ធិពលដល់ពួកគេក្នុងជីវិតបន្ទាប់ ។ បន្ថែមការសម្រេចចិត្តទាំងនេះទៅក្នុងបញ្ជីនៃការសម្រេចចិត្តនៅលើក្ដារខៀនចាប់ពីពេលចាប់ផ្តើមថ្នាក់ ។
បន្ទាប់មកសិស្សអាចពិភាក្សានូវអ្វីខាងក្រោមនៅក្នុងក្រុមតូចៗ ។
ជ្រើសរើសការសម្រេចចិត្តមួយនៅលើក្តារខៀន ហើយឆ្លើយសំណួរខាងក្រោម ៖
-
តើការសម្រេចចិត្តអ្វីខ្លះដែលក្មេងវ័យជំទង់អាចធ្វើអំពីការណ៍នេះដែលនឹងជះឥទ្ធិពលដល់ការរៀបចំខ្លួនរបស់ពួកគេដើម្បីជួបព្រះ ?
-
តើអ្នកបានរៀនអ្វីខ្លះពីដំណឹងល្អនៃព្រះយេស៊ូវគ្រីស្ទ ដែលអាចជួយក្មេងវ័យជំទង់ម្នាក់ធ្វើការសម្រេចចិត្តអំពីការណ៍នេះ ?
សូមអញ្ជើញក្រុមឲ្យចែកចាយការយល់ដឹងរបស់ពួកគេជាមួយថ្នាក់ ។ អ្នកអាចនឹងលើកទឹកចិត្តសិស្សឲ្យស្វែងរក និងចែកចាយបទគម្ពីរ ឬសេចក្ដីថ្លែងការណ៍ពីថ្នាក់ដឹកនាំសាសនាចក្រ ដែលគាំទ្រអ្វីដែលពួកគេចែកចាយ ។
សេចក្តីសន្និដ្ឋាន
មុនពេលសិស្សបញ្ចប់សកម្មភាពខាងក្រោម អ្នកអាចរំឭកពួកគេអំពីការសម្រេចចិត្តដែលពួកគេបានសរសេរនៅពេលចាប់ផ្ដើមថ្នាក់ ។
ស្រមៃថាឈរនៅចំពោះព្រះនៅឯការជំនុំជម្រះចុងក្រោយ ហើយស្តាប់ទ្រង់ប្រាប់អ្នកថា « ប្រពៃហើយ បាវល្អស្មោះត្រង់អើយ » ( ម៉ាថាយ ២៥:២៣ ) ។
ឥឡូវនេះ សូមស្រមៃថា ខណៈពេលដែលឈរនៅចំពោះព្រះ នោះអ្នកមានឱកាសផ្ញើសារត្រឡប់ទៅអតីតកាលវិញ ទៅកាន់ខ្លួនអ្នកបច្ចុប្បន្ន ។ សរសេរសារដែលផ្តល់ដំបូន្មានដល់ខ្លួនអ្នកបច្ចុប្បន្ន ដែលនឹងជួយអ្នករៀបចំខ្លួនសម្រាប់ការជំនុំជម្រះចុងក្រោយ ។ អ្នកអាចរួមបញ្ចូលអ្វីដែលអ្នកបានរៀន និងមានអារម្មណ៍នៅថ្ងៃនេះអំពី ៖
-
របៀបដែលជម្រើសនៅពេលអ្នកនៅក្មេងមានឥទ្ធិពលលើការរៀបចំខ្លួនរបស់អ្នកដើម្បីជួបព្រះ ។
-
ការកែតម្រូវអ្វីខ្លះដែលអ្នកនឹងលើកទឹកចិត្តខ្លួនឯងឲ្យធ្វើអំពីការសម្រេចចិត្តដែលអ្នកកំពុងប្រឈមមុខនាពេលបច្ចុប្បន្ន ។
សូមពិចារណាអំពីការថ្លែងទីបន្ទាល់អំពីសារៈសំខាន់នៃការសម្រេចចិត្តដោយផ្តោតលើថ្ងៃដែលយើងនឹងឈរនៅចំពោះព្រះដើម្បីទទួលការជំនុំជម្រះ ។