« និក្ខមនំ ២៥; ៣៥–៤០ ៖ ‹ សិរីល្អនៃព្រះមានពាសពេញរោងឧបោសថ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« និក្ខមនំ ២៥; ៣៥–៤០ ៖ ‹ សិរីល្អនៃព្រះមានពាសពេញរោងឧបោសថ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
និក្ខមនំ ៣៥–៤០; លេវីវិន័យ ១; ៤; ១៦; ១៩ ៖ មេរៀនទី ៥២
និក្ខមនំ ២៥; ៣៥–៤០
« សិរីល្អនៃព្រះមានពាសពេញរោងឧបោសថ »
ដោយគោរពតាមសេចក្ដីបង្គាប់របស់ព្រះអម្ចាស់ សាសន៏អ៊ីស្រាអែលបានសង់រោងឧបោសថ ឬព្រះវិហារបរិសុទ្ធនៅក្នុងទីរហោស្ថាន ។ រោងឧបោសថនេះជាទីសក្ការៈចល័តដែលព្រះអម្ចាស់អាចគង់នៅក្នុងចំណោមរាស្ត្ររបស់ទ្រង់ នៅពេលពួកគេធ្វើដំណើរ ។ មេរៀននេះអាចជួយសិស្សឲ្យមានបំណងប្រាថ្នាដើម្បីថ្វាយបង្គំព្រះអម្ចាស់នៅក្នុងព្រះវិហារបរិសុទ្ធរបស់ទ្រង់កាន់តែខ្លាំងឡើង ។
ការរៀបចំសិស្ស ៖ ពិចារណាអញ្ជើញសិស្សឲ្យប្រើបណ្ណាល័យដំណឹងល្អ ឬ temples.ChurchofJesusChrist.org ដើម្បីស្វែងរករូបភាពព្រះវិហារបរិសុទ្ធ ឬវីដេអូដែលទាក់ទងនឹងព្រះវិហារបរិសុទ្ធ ។ សុំឲ្យសិស្សគិតពីអារម្មណ៍របស់ពួកគេចំពោះព្រះវិហារបរិសុទ្ធរបស់ព្រះ ។ សូមអញ្ជើញពួកគេឲ្យពិចារណាអំពីរបៀបដែលព្រះវិហារបរិសុទ្ធសម័យទំនើបជួយពួកគេឲ្យចងចាំព្រះវរបិតាសួគ៌ និងព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
តើគោលបំណងនៃព្រះវិហារបរិសុទ្ធគឺជាអ្វី ?
សូមពិចារណាចាប់ផ្តើមមេរៀននេះដោយចែកចាយសាច់រឿងខាងក្រោមនេះ ៖ បន្ទាប់មក អ្នកអាចដាក់បង្ហាញសំណួរទាំងនេះក្បែរសាច់រឿង ហើយអញ្ជើញសិស្សឲ្យពិភាក្សាវាជាមួយដៃគូ ។
សូមស្រមៃថា ព្រះវិហារបរិសុទ្ធមួយនឹងត្រូវបានឧទ្ទិសឆ្លងក្នុងពេលឆាប់ៗនៅក្នុងតំបន់របស់អ្នក ។ អ្នកអញ្ជើញមិត្តភក្តិម្នាក់ឲ្យចូលរួមក្នុងពិធីសម្ពោធព្រះវិហារបរិសុទ្ធជាមួយអ្នក ។ មិត្តរបស់អ្នកទទួលយកការអញ្ជើញរបស់អ្នក ប៉ុន្តែនិយាយថា នាងមិនដឹងអ្វីអំពីព្រះវិហារបរិសុទ្ធទេ ។
-
តើអ្នកចង់ឲ្យមិត្តរបស់អ្នកយល់យ៉ាងណាអំពីព្រះវិហារបរិសុទ្ធ និងគោលបំណងរបស់វា ?
-
តើអ្នកអាចឆ្លើយតបយ៉ាងណា បើមិត្តរបស់អ្នកសួរអ្នកថាហេតុអ្វីបានជាព្រះវិហារបរិសុទ្ធសំខាន់ចំពោះអ្នក ?
បន្ទាប់ពីសិស្សបានពិភាក្សាអំពីចម្លើយរបស់ពួកគេជាមួយដៃគូរបស់ពួកគេមក សូមអញ្ជើញពួកគេឲ្យគិតអំពីចម្លើយរបស់ពួកគេចំពោះសំណួរខាងក្រោម ។
-
ដោយប្រើរង្វាស់ពី ១ ( ទាប ) ដល់ ៥ ( ខ្ពស់ ) តើអ្នកនឹងវាយតម្លៃបំណងប្រាថ្នារបស់អ្នកក្នុងការថ្វាយបង្គំព្រះអម្ចាស់ជានិច្ចនៅក្នុងព្រះវិហារបរិសុទ្ធយ៉ាងដូចម្តេច ?
សូមពិចារណាអញ្ជើញសិស្សឲ្យគិតអំពីមូលហេតុដែលពួកគេឆ្លើយតបតាមរបៀបដែលពួកគេបានធ្វើចំពោះសំណួរមុន ។
នៅពេលអ្នកសិក្សាថ្ងៃនេះ សូមយកចិត្តទុកដាក់លើអ្វីដែលព្រះវិញ្ញាណបរិសុទ្ធអាចបង្រៀនអ្នកអំពីព្រះវិហារបរិសុទ្ធ និងរបៀបដែលព្រះវិហារបរិសុទ្ធភ្ជាប់យើងទៅនឹងព្រះវរបិតាសួគ៌ និងព្រះយេស៊ូវគ្រីស្ទ ។ សូមស្វែងរកការបំផុសគំនិតដើម្បីជួយអ្នកឲ្យមានបំណងប្រាថ្នាកាន់តែខ្លាំងដើម្បីថ្វាយបង្គំព្រះអម្ចាស់នៅក្នុងព្រះវិហារបរិសុទ្ធរបស់ទ្រង់ ។
ព្រះអម្ចាស់បង្គាប់សាសន៏អ៊ីស្រាអែលឲ្យសង់រោងឧបោសថមួយ ។
ពេលកំពុងមានបន្ទូលជាមួយម៉ូសេនៅលើភ្នំស៊ីណាយ ព្រះអម្ចាស់បានសុំឲ្យសាសន៏អ៊ីស្រាអែលថ្វាយមាស ប្រាក់ និងសម្ភារដ៏មានតម្លៃផ្សេងទៀតរបស់ពួកគេ ដើម្បីសាងសង់ទីសក្ការៈ ឬរោងឧបោសថថ្វាយទ្រង់ ។ នៅសម័យរបស់យើង យើងក៏ត្រូវបានស្នើសុំឲ្យសាងសង់ព្រះវិហារបរិសុទ្ធ ដើម្បីធ្វើជាទីសក្ការៈ ឬជាទីកន្លែងនៃបរិសុទ្ធភាព ។
សូមអាន និក្ខមនំ ២៥:៨ ដោយរកមើលមូលហេតុដែលព្រះអម្ចាស់ចង់ឲ្យសាសន៏អ៊ីស្រាអែលសង់ទីសក្ការៈមួយឡើង ។
-
តើអ្នកបានរកឃើញអ្វីខ្លះ ?
-
តើហេតុផលរបស់ព្រះអម្ចាស់ចំពោះបទបញ្ញត្តិនេះបង្រៀនអ្នកអ្វីខ្លះអំពីទ្រង់ និងព្រះទ័យរបស់ទ្រង់ចំពោះយើង ?
និមិត្តរូបនៃរោងឧបោសថ
សូមរំឭកសិស្សថា មាននិមិត្តរូបជាច្រើននៅក្នុងព្រះគម្ពីរដែលអាចបង្រៀនយើងអំពីព្រះវរបិតាសួគ៌ និងព្រះយេស៊ូវគ្រីស្ទ ។ ការរៀនពីនិមិត្តរូបទាំងឡាយគឺជាជំនាញសិក្សាដែលអាចជួយពួកគេរៀនបន្ថែមពីព្រះគម្ពីរ ។
សម្រាប់ការបំពាក់បំប៉នបន្ថែមអំពីការប្រើប្រាស់និមិត្តរូប សូមមើល « ស្វែងរកនិមិត្តរូបនានាដែលធ្វើបន្ទាល់អំពីព្រះយេស៊ូវគ្រីស្ទ » នៅក្នុង ជំនាញអភិវឌ្ឍន៍គ្រូបង្រៀន ( ឆ្នាំ២០២២ ) ទំព័រ ៩ ។
វត្ថុ និងពិធីបរិសុទ្ធនៅក្នុងរោងឧបោសថគឺជានិមិត្តរូប ។ ពួកគេមានគោលបំណងបង្រៀនអ៊ីស្រាអែលអំពីព្រះវរបិតាសួគ៌ និងព្រះយេស៊ូវគ្រីស្ទ និងរបៀបធ្វើដំណើរឆ្លងកាត់ជីវិតត្រឡប់ទៅកាន់ទ្រង់ទាំងទ្វេវិញ ។
ដើម្បីជួយសិស្សរៀនអំពីនិមិត្តរូបនៃរោងឧបោសថ សូមពិចារណាចែកចាយសំណៅមេរៀនដែលមានចំណងជើងថា « រោងឧបោសថព្រះគម្ពីរសញ្ញាចាស់ » ។ អ្នកក៏អាចបិទស្កុត ឬខ្សែនៅលើឥដ្ឋនៃថ្នាក់រៀន ដើម្បីបង្កើតដ្យាក្រាមក្នុងសំណៅមេរៀនឡើងវិញ ។
សូមពិចារណាអញ្ជើញសិស្សឲ្យសិក្សាវត្ថុនៅក្នុងរោងឧបោសថជាក្រុមតូចៗ ។ ក្រុមនីមួយៗអាចត្រូវបានចាត់តាំងឲ្យនូវវត្ថុផ្សេងៗគ្នា ។ បន្ទាប់មក ក្រុមទាំងឡាយអាចចែកចាយការរកឃើញរបស់ពួកគេជាមួយសិស្សក្នុងថ្នាក់ ។ សូមរំឭកសិស្សឲ្យស្វែងរកការណែនាំពីព្រះវិញ្ញាណ នៅពេលពួកគេពិចារណាអំពីអ្វីដែលវត្ថុទាំងនោះបង្រៀនពួកគេអំពីព្រះវរបិតាសួគ៌ និងព្រះយេស៊ូវគ្រីស្ទ ។ អ្នកអាចផ្តល់ជំនួយតាមតម្រូវការ ប៉ុន្តែជាទូទៅ វាប្រហែលជាល្អបំផុតក្នុងការអនុញ្ញាតឲ្យសិស្សស្វែងរក និងបង្កើតទំនាក់ទំនងដោយខ្លួនឯង នៅពេលពួកគេរៀនដោយខ្លួនឯងតាមរយៈព្រះវិញ្ញាណបរិសុទ្ធ ។
ជំនួសឲ្យសំណៅមេរៀន អ្នកអាចឲ្យសិស្សសិក្សាអត្ថបទ « Journey through the Ancient Tabernacle » ( Ensign ខែមីនា ឆ្នាំ២០១៨ ទំព័រ ៥២–៥៣ ) ឬមើលវីដេអូ « The Tabernacle » ( ៧:១៨ ) មាននៅលើគេហទំព័រ ChurchofJesusChrist.org ។
បន្ទាប់ពីសិស្សមានពេលគ្រប់គ្រាន់ក្នុងការសិក្សាហើយ សូមអញ្ជើញពួកគេឲ្យចែកចាយអ្វីដែលពួកគេបានរៀន ។ អ្នកអាចសួរសំណួរដូចខាងក្រោមនេះ ជាផ្នែកមួយនៃការពិភាក្សានេះ ។
-
តើនិមិត្តរូបអ្វីខ្លះដែលមើលទៅមានអត្ថន័យជាពិសេស ឬគួរឲ្យចាប់អារម្មណ៍ចំពោះអ្នក ?
-
តើនិមិត្តរូបនៅក្នុងរោងឧបោសថនោះបានបង្រៀនអ្នកអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ?
ព្រះវិហារបរិសុទ្ធសម័យទំនើប
សូមពិចារណាដាក់បង្ហាញ រូបភាពព្រះវិហារបរិសុទ្ធសម័យទំនើបមួយ ។ សូមពន្យល់ថា ព្រះវិហារបរិសុទ្ធសព្វថ្ងៃនេះរួមបញ្ចូលពិធីបរិសុទ្ធនៃបព្វជិតភាពម៉ិលគីស្សាដែក ដែលព្រះបានដកចេញពីសាសន៏អ៊ីស្រាអែលពីបុរាណ ដោយសារតែការបះបោររបស់ពួកគេ ។ ទោះបីជាមានភាពខុសគ្នានេះក៏ដោយ ក៏ព្រះវិហារបរិសុទ្ធរបស់យើងមានភាពស្រដៀងគ្នាជាច្រើនដូចនឹងរោងឧបោសថពីបុរាណដែរ ។
-
តើអ្នកឃើញមានភាពស្រដៀងគ្នាអ្វីខ្លះ រវាងព្រះវិហារបរិសុទ្ធរបស់យើង និងរោងឧបោសថពីបុរាណ ?
-
តើអ្នករៀនសេចក្ដីពិតអ្វីខ្លះចេញពីភាពស្រដៀងគ្នាទាំងនេះ ?
សូមលើកទឹកចិត្តសិស្សឲ្យចែកចាយចម្លើយផ្សេងៗចំពោះសំណួរមុនៗ ។ អ្នកអាចសរសេរសេចក្តីពិតដែលសិស្សរកឃើញនៅលើក្តារខៀន ។ ដោយប្រើពាក្យសម្ដីផ្ទាល់ខ្លួនរបស់ពួកគេ សិស្សអាចបង្ហាញសេចក្ដីពិតមួយស្រដៀងគ្នានឹងសេចក្ដីពិតខាងក្រោមនេះ ៖
-
ព្រះអម្ចាស់ត្រាស់បង្គាប់យើងឲ្យសាងសង់ព្រះវិហារបរិសុទ្ធ ដើម្បីទ្រង់អាចគង់ជាមួយយើង ។
-
ពិធីបរិសុទ្ធ និងនិមិត្តរូបនៃព្រះវិហារបរិសុទ្ធបង្រៀនអំពីព្រះវរបិតាសួគ៌ និងព្រះយេស៊ូវគ្រីស្ទ ។
-
ព្រះវិហារបរិសុទ្ធជួយយើងរៀបចំខ្លួនត្រឡប់ទៅព្រះវរបិតាសួគ៌ និងព្រះយេស៊ូវគ្រីស្ទវិញ ។
សូមពន្យល់ថា ដូចជារោងឧបោសថពីបុរាណដែរ ព្រះវិហារបរិសុទ្ធសម័យទំនើបមាននិមិត្តរូបដែលបង្រៀនយើងអំពីព្រះវរបិតាសួគ៌ និងព្រះយេស៊ូវគ្រីស្ទ ។
-
តើព្រះវិហារបរិសុទ្ធសម័យទំនើបជួយអ្នកចងចាំព្រះវរបិតាសួគ៌ និងព្រះយេស៊ូវគ្រីស្ទតាមរបៀបណា ?
ជាផ្នែកមួយនៃការពិភាក្សារបស់អ្នកអំពីសំណួរមុនៗ សូមពិចារណាដាក់បង្ហាញរូបភាពនៃបន្ទប់ជាក់លាក់មួយនៅខាងក្នុងព្រះវិហារបរិសុទ្ធសម័យទំនើប ។ ឧទាហរណ៍ បន្ទាប់ពីបានចង្អុលបង្ហាញរូបភាពនៃពិធីបុណ្យជ្រមុជទឹកនៅក្នុងព្រះវិហារបរិសុទ្ធ អ្នកអាចសួរសិស្សអំពីអ្វីដែលពិធីបរិសុទ្ធនៃពិធីបុណ្យជ្រមុជទឹកសម្រាប់អ្នកស្លាប់អាចបង្រៀនយើងអំពីព្រះវរបិតាសួគ៌ និងព្រះយេស៊ូវគ្រីស្ទ ។ អ្នកគួរប្រើរូបភាពខាងលើ ឬរូបភាពដែលមាននៅក្នុងអត្ថបទ « Inside Temples » ដែលមាននៅគេហទំព័រ ChurchofJesusChrist.org ។
អ្នកក៏អាចមើលវីដេអូ « Welcome to the Washington D.C. Temple » ( ១១:៤៦ ) ដែលមាននៅលើគេហទំព័រ ChurchofJesusChrist.org ។ វីដេអូនេះគឺជាធនធានមួយដើម្បីជួយសិស្សមើលឃើញពីរបៀបដែលព្រះវិហារបរិសុទ្ធសម័យទំនើបបង្រៀនយើងអំពីព្រះវរបិតាសួគ៌ និងព្រះយេស៊ូវគ្រីស្ទ ។ ប្រសិនបើពេលវេលាមានកំណត់ សូមពិចារណាមើលផ្នែកមួយក្នុងចំណោមផ្នែកខាងក្រោម ៖ នាទីទី ០:០០ ដល់ ៣:៤៩ និងនាទីទី ៤:៣៧ ដល់ ៧:៤៤ ឬនាទីទី ៨:១៦ ដល់ ៩:០៤ ។
11:45 -
តើការដឹងថាព្រះវិហារបរិសុទ្ធបង្រៀនយើងអំពីព្រះវរបិតាសួគ៌ និងព្រះយេស៊ូវគ្រីស្ទអាចជះឥទ្ធិពលដល់បំណងប្រាថ្នារបស់យើងដើម្បីថ្វាយបង្គំនៅទីនោះដោយរបៀបណា ?
-
តើអ្នកធ្លាប់មានអារម្មណ៍ស្និទ្ធស្នាលជាមួយព្រះវរបិតាសួគ៌ និងព្រះយេស៊ូវគ្រីស្ទ ដោយសារតែព្រះវិហារបរិសុទ្ធ ឬដោយការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិនៅពេលណា ?
កត់ត្រាចំណាប់អារម្មណ៍របស់អ្នក
ដើម្បីជួយសិស្សជញ្ជឹងគិតពីអ្វីដែលពួកគេបានរៀន និងទទួលអារម្មណ៍ពីព្រះវិញ្ញាណបរិសុទ្ធនៅថ្ងៃនេះ សូមពិចារណាអញ្ជើញពួកគេឲ្យឆ្លើយសំណួរខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ។
-
តើអ្នកបានរៀន ឬមានអារម្មណ៍អ្វីខ្លះនៅថ្ងៃនេះពីព្រះវិញ្ញាណបរិសុទ្ធ ដែលជះឥទ្ធិពលលើបំណងប្រាថ្នារបស់អ្នកក្នុងការថ្វាយបង្គំព្រះអម្ចាស់នៅក្នុងព្រះវិហារបរិសុទ្ធ ?
អ្នកអាចអញ្ជើញសិស្សស្ម័គ្រចិត្តពីរបីនាក់ឲ្យចែកចាយអ្វីដែលពួកគេបានសរសេរ ។ សូមឲ្យសិស្សដឹងថា ពួកគេនឹងមានឱកាសដើម្បីជញ្ជឹងគិតអំពីបំណងប្រាថ្នារបស់ពួកគេក្នុងការថ្វាយបង្គំព្រះអម្ចាស់នៅក្នុងព្រះវិហារបរិសុទ្ធនៅក្នុងមេរៀនទី ៨០ ៖ « វាយតម្លៃការរៀនសូត្ររបស់អ្នកទី ៥ » ។
សូមថ្លែងទីបន្ទាល់អំពីសេចក្ដីពិតដែលអ្នកបានពិភាក្សានៅថ្ងៃនេះ ។