« និក្ខមនំ ២៤; ៣២–៣៤ ៖ សេចក្ដីយុត្តិធម៌ សេចក្តីមេត្តាករុណា និងសេចក្ដីអត់ធ្មត់របស់ព្រះអម្ចាស់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« និក្ខមនំ ២៤; ៣២–៣៤ ៖ សេចក្ដីយុត្តិធម៌ សេចក្តីមេត្តាករុណា និងសេចក្ដីអត់ធ្មត់របស់ព្រះអម្ចាស់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
និក្ខមនំ ១៩–២០; ២៤; ៣២–៣៤ ៖ មេរៀនទី ៥១
និក្ខមនំ ២៤; ៣២–៣៤
សេចក្ដីយុត្តិធម៌ សេចក្តីមេត្តាករុណា និងសេចក្ដីអត់ធ្មត់របស់ព្រះអម្ចាស់
តើសេចក្ដីយុត្តិធម៌ សេចក្តីមេត្តាករុណា និងសេចក្ដីអត់ធ្មត់របស់ព្រះអង្គសង្គ្រោះបានធ្វើការរួមគ្នា ដើម្បីប្រទានពរដល់ជីវិតរបស់អ្នកដោយរបៀបណា ? ពេលម៉ូសេត្រឡប់ពីវត្តមានរបស់ព្រះអម្ចាស់វិញ លោកបានឃើញថា សាសន៏អ៊ីស្រាអែលបានបំពានលើសេចក្ដីសញ្ញាដែលពួកគេបានធ្វើ ហើយកំពុងថ្វាយបង្គំរូបគោមាស ។ សាសន៏អ៊ីស្រាអែលទទួលរងផលវិបាកនៃអំពើបាបនេះ ប៉ុន្តែព្រះអម្ចាស់បង្ហាញសេចក្ដីយុត្តិធម៌ សេចក្ដីមេត្តាករុណា និងសេចក្ដីអត់ធ្មត់របស់ទ្រង់ចំពោះអស់អ្នកដែលប្រែចិត្ត ហើយត្រឡប់មករកទ្រង់វិញ ។ មេរៀននេះអាចជួយសិស្សឲ្យយល់ដឹងថា ព្រះអម្ចាស់មានយុត្តិធម៌ មេត្តាករុណា និងអត់ធ្មត់ ។
ការរៀបចំសិស្ស ៖ អញ្ជើញសិស្សឲ្យជញ្ជឹងគិតពីរបៀបដែលពួកគេធ្លាប់ឃើញសេចក្ដីយុត្តិធម៌ សេចក្ដីស្រឡាញ់ និងសេចក្ដីអត់ធ្មត់ ( សេចក្ដីអត់ធន់ ) របស់ព្រះអម្ចាស់នៅក្នុងជីវិតរបស់ពួកគេ ។ អ្នកអាចអញ្ជើញពួកគេឲ្យទៅលេងជាមួយសមាជិកគ្រួសារ ឬមិត្តភក្តិអំពីរបៀបដែលយុត្តិធម៌ និងសេចក្តីមេត្តាករុណារបស់ព្រះអម្ចាស់ធ្វើការរួមគ្នា ដើម្បីផ្ដល់ពរដល់បុត្រាបុត្រីទាំងអស់របស់ទ្រង់ ។
សកម្មភាពរៀនសូត្រដែលអាចមាន
ព្រះអម្ចាស់មានយុត្តិធម៌ មេត្តាករុណា និងអត់ធ្មត់ ។
សូមពិចារណាដាក់បង្ហាញរូបភាពព្រះអង្គសង្គ្រោះ ។ សូមពិភាក្សាសំណួរខាងក្រោម ។
-
តើអ្នកនឹងប្រើពាក្យអ្វីខ្លះដើម្បីរៀបរាប់ពីចរិកលក្ខណៈរបស់ព្រះអង្គសង្គ្រោះ ?
សូមអញ្ជើញសិស្សឲ្យសរសេរពាក្យរបស់ពួកគេនៅលើក្តារខៀន ។ សូមពិចារណាជ្រើសរើសឧទាហរណ៍មួយចំនួន ហើយអញ្ជើញសិស្សដែលបានសរសេរពាក្យឲ្យរៀបរាប់ពីហេតុផលដែលពួកគេបានជ្រើសរើសគុណលក្ខណៈនោះរបស់ព្រះអង្គសង្គ្រោះ ។
ដើម្បីជួយកូនចៅអ៊ីស្រាអែលឲ្យយល់ដឹងអំពីទ្រង់ ព្រះអម្ចាស់បានបើកសម្ដែងធាតុសំខាន់មួយចំនួននៃចរិកលក្ខណៈរបស់ទ្រង់ ។
សូមអាន និក្ខមនំ ៣៤:៦–៧ ដោយរកមើលគុណលក្ខណៈរបស់ព្រះអង្គសង្គ្រោះ ។
-
តើអ្នកបានរកឃើញអ្វីខ្លះ ?
ក្នុងចំណោមគុណលក្ខណៈដែលសិស្សអាចស្គាល់ សូមគូសបញ្ជាក់សេចក្ដីពិតនោះថា ព្រះអម្ចាស់មានយុត្តិធម៌ មេត្តាករុណា និងអត់ធ្មត់ ។ អ្នកអាចជួយសិស្សឲ្យយល់ដឹងថាពាក្យ « យឺតនឹងខ្ញាល់ » ( ខទី ៦ ) ពិពណ៌នាអំពីការអត់ធ្មត់របស់ព្រះអម្ចាស់ចំពោះយើង ។
អ្នកអាចចែកចាយជាមួយនឹងសិស្សថា ពួកគេនឹងសិក្សាពីរបៀបដែលកូនចៅអ៊ីស្រាអែលបានដកពិសោធន៍នូវសេចក្ដីយុត្តិធម៌ សេចក្ដីមេត្តាករុណា និងសេចក្ដីអត់ធ្មត់របស់ព្រះអម្ចាស់ ។ ពួកគេក៏នឹងសិក្សាពីហេតុផលដែលវាមានសារៈសំខាន់ចំពោះយើងដើម្បីយល់ដឹងនូវសេចក្ដីពិតទាំងនេះអំពីព្រះអម្ចាស់ដែរ ។
សាសន៏អ៊ីស្រាអែលគឺជារាស្ត្រនៃសេចក្ដីសញ្ញារបស់ព្រះអម្ចាស់
សាច់រឿងខាងក្រោមត្រូវបានប្រើនៅក្នុងមេរៀននេះទាំងស្រុង ដើម្បីជួយសិស្សឲ្យយល់ពីរបៀបដែលដំណើររឿងនៃសាសន៏អ៊ីស្រាអែលអាចទាក់ទងនឹងយុវវ័យនាសព្វថ្ងៃនេះ ។ សាច់រឿងនេះប្រើឈ្មោះ « ខាយលី » ប៉ុន្តែអ្នកអាចអញ្ជើញសិស្សឲ្យជ្រើសយកឈ្មោះមួយ ហើយបន្ថែម ឬផ្លាស់ប្ដូរព័ត៌មានលម្អិតនៃដំណើររឿងនេះ ។
ខាយលី ជាយុវនារីម្នាក់ក្នុងសាលារៀនរបស់នាង បានរៀនអំពីដំណឹងល្អរបស់ព្រះអង្គសង្គ្រោះ ហើយបានសម្រេចចិត្តធ្វើការផ្លាស់ប្ដូរដែលចាំបាច់ដើម្បីជ្រមុជទឹកចូលទៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ នាងមានបំណងប្រាថ្នាចង់ធ្វើសេចក្ដីសញ្ញាជាមួយនឹងព្រះដើម្បីគោរពតាមព្រះបញ្ញត្តិរបស់ទ្រង់ ។
សូមជួយសិស្សឲ្យនឹកចាំថា បន្ទាប់ពីការរំដោះរបស់ពួកគេចេញពីសាសន៍អេស៊ីព្ទ ព្រះអម្ចាស់បាននាំកូនចៅអ៊ីស្រាអែលទៅភ្នំស៊ីណាយដើម្បីធ្វើសេចក្ដីសញ្ញាមួយជាមួយនឹងទ្រង់ ។
សូមអាន និក្ខមនំ ២៤:៣–៨ ដោយរកមើលរបៀបដែលសាសន៏អ៊ីស្រាអែលបានទទួលអារម្មណ៍ស្រដៀងគ្នានឹងខាយលី ។
-
តើអ្វីខ្លះដែលលេចធ្លោចំពោះអ្នក ?
វាប្រហែលជាមានអត្ថប្រយោជន៍ដើម្បីពន្យល់ទៅកាន់សិស្សថា ការប្រោះឈាមនៅលើអាសនា និងលើប្រជាជននោះ ( សូមមើល និក្ខមនំ ២៤:៦, ៨ ) គឺជានិមិត្តសញ្ញាតំណាងមួយថាសាសន៏អ៊ីស្រាអែលយល់ព្រមធ្វើជារាស្ត្រនៃសេចក្ដីសញ្ញារបស់ព្រះអម្ចាស់ ។
ព្រះអម្ចាស់មានព្រះរាជបំណងចង់ប្រទានពរដល់កូនចៅអ៊ីស្រាអែលជាមួយនឹងពិធីបរិសុទ្ធនៃបព្វជិតភាពម៉ិលគីស្សាដែក ( សូមមើល គោលលទ្ធិ និងសេចក្តីសញ្ញា ៨៤:១៩–២៣ ) ។ ម៉ូសេបានត្រឡប់ទៅភ្នំស៊ីណាយវិញដើម្បីទទួលសេចក្ដីបង្គាប់របស់ព្រះអម្ចាស់ចំពោះពិធីបរិសុទ្ធទាំងនេះ និងផែនការសម្រាប់រោងឧបោសថ ។
ការបំពានសេចក្ដីសញ្ញារបស់យើង និងលទ្ធផល
សូមអាន និក្ខមនំ ៣២:១–៨ ដោយរកមើលអ្វីដែលសាសន៏អ៊ីស្រាអែលបានធ្វើ ខណៈដែលម៉ូសេនៅលើភ្នំដើម្បីទទួលសេចក្ដីបង្គាប់មកពីព្រះ ។
-
តើអ្នកបានរកឃើញអ្វីខ្លះ ?
-
ហេតុអ្វីអ្នកគិតថា ការសង់ និងការថ្វាយបង្គំរូបគោមាសគឺជាអំពើបាបដ៏ធ្ងន់ធ្ងរ ? ( សូមមើល និក្ខមនំ ២០:២–៧ ) ។
សូមធ្វើឲ្យប្រាកដក្នុងការជួយសិស្សយល់ថាសាសន៏អ៊ីស្រាអែលបានបំពានសេចក្ដីសញ្ញាដែលពួកគេទើបតែបានធ្វើជាមួយនឹងព្រះអម្ចាស់ ។
អ្នកអាចចែកចាយផ្នែកមួយទៀតនៃសាច់រឿងនេះ ដែលវាស្របនឹងអ្វីដែលបានកើតឡើងជាមួយនឹងកូនចៅអ៊ីស្រាអែល ហើយទាក់ទងខ្លាំងបំផុតទៅនឹងយុវវ័យ ។ សិស្សអាចផ្ដល់ឧទាហរណ៍អំពីអ្វីដែលខាយលីអាចធ្វើដើម្បីបំពានលើសេចក្ដីសញ្ញាដែលនាងបានធ្វើនៅឯពិធីបុណ្យជ្រមុជទឹកដើម្បីគោរពតាមព្រះបញ្ញត្តិរបស់ព្រះ ។
បន្ទាប់ពីពិធីបុណ្យជ្រមុជទឹករបស់នាង ខាយលីបានចាប់ផ្ដើមចំណាយពេលច្រើនជាមួយនឹងមិត្តភក្តិចាស់ៗរបស់នាង ហើយវាបានដឹកនាំទៅរកទម្លាប់ចាស់ៗវិញ ។ ដំបូងឡើយ កំហុសដែលនាងបានធ្វើហាក់ដូចជារឿងតូចតាច ។ ប៉ុន្តែមិនយូរប៉ុន្មាន នាងបានត្រឡប់ទីរកផ្លូវចាស់វិញ ។ នាងបានបំពានសេចក្ដីសញ្ញាដែលនាងបានធ្វើនៅឯពិធីបុណ្យជ្រមុជទឹក ។
-
តើអ្វីទៅដែលអាចជះឥទ្ធិពលដល់ការសម្រេចចិត្តរបស់ខាយលី ?
ក្រឹត្យវិន័យនៃសេចក្ដីយុត្តិធម៌របស់ព្រះអម្ចាស់
សូមអាន និក្ខមនំ ៣២:១៥–២០ ដោយរកមើលផលវិបាកដែលសាសន៏អ៊ីស្រាអែលបានរកទុក្ខដោយសារតែអំពើបាបរបស់ពួកគេ ។
-
តើអ្នកបានរកឃើញអ្វីខ្លះ ?
សូមជួយសិស្សឲ្យយល់ថា ទោះជាយើងអាចប្រើសិទ្ធិជ្រើសរើសរបស់យើងដើម្បីធ្វើអំពើបាបក្ដី ក៏ព្រះអម្ចាស់មានយុត្តិធម៌ដែរ ។ ដូច្នេះហើយ យើងមិនអាចគេចផុតពីលទ្ធផលនៃអំពើបាបរបស់យើងបានឡើយ ។ វាប្រហែលជាមានប្រយោជន៍ដើម្បីពន្យល់ថា ម៉ូសេបានកាច់ផ្ទាំងថ្មដែលមាននូវសេចក្ដីបង្គាប់សម្រាប់ពិធីបរិសុទ្ធនៃបព្វជិតភាពម៉ិលគីស្សាដែក ( សូមមើល និក្ខមនំ ៣២:១៥–១៩; ការបកប្រែដោយ យ៉ូសែប ស្ម៊ីធ, និក្ខមនំ ៣៤:១–២ [ នៅក្នុង the Bible appendix ] ) ។ ដោយសារតែការសម្រេចចិត្តរបស់ពួកគេ កូនចៅអ៊ីស្រាអែលខ្វះភាពស័ក្ដិសមដើម្បីទទួលបានពរជ័យទាំងនេះមកពីព្រះអម្ចាស់ ។ ម៉ូសេបានត្រឡប់ទៅទីវត្តមានរបស់ព្រះអម្ចាស់វិញ ។ ព្រះអម្ចាស់បានបង្គាប់ឲ្យម៉ូសេបង្កើតពិធីបរិសុទ្ធនៃបព្វជិតភាពអើរ៉ុនជំនួសវិញ ( សូមមើល គោលលទ្ធិ និងសេចក្តីសញ្ញា ៨៤:២៤–២៦ ) ។ អ្នកក៏អាចលើកឡើងថា ម៉ូសេបានដាក់រោងឧបោសថនៅក្រៅជំរំ ( សូមមើល និក្ខមនំ ៣៣:៧ ) ជានិមិត្តរូបដែលសាសន៏អ៊ីស្រាអែលបាត់បង់វត្តមានរបស់ព្រះអម្ចាស់ ។
-
តើមានផលវិបាកខាងវិញ្ញាណ និងខាងសាច់ឈាមអ្វីខ្លះ ដែល ខាយលី អាចប្រឈមនឹងការបំពានលើសេចក្ដីសញ្ញានៃពិធីបុណ្យជ្រមុជទឹករបស់នាង ?
-
តើផលវិបាកនានាបង្ហាញពីសេចក្ដីយុត្តិធម៌ សេចក្ដីមេត្តាករុណា និងសេចក្ដីអត់ធ្មត់របស់ព្រះអម្ចាស់យ៉ាងដូចម្ដេច ?
អ្នកគួរចង្អុលបង្ហាញថា ដូចជាសាសន៏អ៊ីស្រាអែលដែរ ខាយលីប្រហែលជាខកខានទទួលពរជ័យដែលកើតចេញពីពិធីបរិសុទ្ធនៃបព្វជិតភាព ។ នាងក៏អាចបាត់បង់ភាពជាដៃគូដ៏ខ្ជាប់ខ្ជួននៃព្រះវិញ្ញាណរបស់ព្រះអម្ចាស់ដែរ ។
ច្បាប់នៃសេចក្ដីមេត្តាករុណារបស់ព្រះអម្ចាស់
សូមជួយសិស្សយល់ថា ព្រះអម្ចាស់បានធានាដល់អ៊ីស្រាអែលថាពួកគេនៅតែជារាស្ដ្ររបស់ទ្រង់ ( សូមមើល និក្ខមនំ ៣៣:១២–១៩ ) ។
សូមពិនិត្យមើល និក្ខមនំ ៣៤:៦–៧ ហើយគិតអំពីមូលហេតុដែលវាអាចជារឿងសំខាន់ចំពោះព្រះអម្ចាស់ក្នុងការរំឭកដល់កូនចៅអ៊ីស្រាអែលថា ទ្រង់មានយុត្តិធម៌ មេត្តាករុណា និងអត់ធ្មត់ ។
-
តើព្រះអម្ចាស់បានបង្ហាញសេចក្ដីមេត្តាករុណា និងសេចក្ដីអត់ធ្មត់របស់ទ្រង់យ៉ាងណាជាមួយនឹងកូនចៅអ៊ីស្រាអែល ?
-
តើខាយលីអាចឃើញសេចក្ដីមេត្តាករុណា និងសេចក្ដីអត់ធ្មត់របស់ព្រះអម្ចាស់នៅក្នុងជីវិតរបស់នាងដោយរបៀបណា ?
អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកទាំងដប់ពីរនាក់បានពន្យល់ពីរបៀបដែលសេចក្តីមេត្តាករុណារបស់ព្រះអង្គសង្រ្គោះបំពេញតាមក្រឹត្យវិន័យនៃសេចក្ដីយុត្តិធម៌ ៖
ប្រសិនបើគ្មានដង្វាយធួនរបស់ព្រះអង្គសង្រ្គោះទេ នោះគោលការណ៍ដ៏អស់កល្បជានិច្ចនៃសេចក្តីយុត្តិធម៌ នឹងតម្រូវឲ្យមានការដាក់ទណ្ឌកម្ម ។ ដោយសារតែដង្វាយធួនព្រះអង្គសង្គ្រោះ នោះសេចក្ដីមេត្តាករុណាអាចឈ្នះ ដល់អស់អ្នកដែលបានប្រែចិត្ត ហើយអាចអនុញ្ញាតឲ្យពួកគេត្រឡប់ទៅទីវត្តមានរបស់ព្រះវិញ ។ វាជាការណ៍ល្អដល់យើង ដើម្បីពិចារណាពីគោលលទ្ធិដ៏អស្ចារ្យនេះ ។
គ្មាននរណាម្នាក់អាចត្រឡប់ទៅព្រះវិញបាន ដោយសារតែកិច្ចការល្អរបស់ខ្លួនផ្ទាល់នោះទេ យើងទាំងអស់គ្នាត្រូវការអត្ថប្រយោជន៍នៃការពលិកម្មរបស់ព្រះអង្គសង្គ្រោះ ។ មនុស្សទាំងអស់មានបាប ហើយមានតែតាមរយៈដង្វាយធួនរបស់ព្រះយេស៊ូវគ្រីស្ទប៉ុណ្ណោះ ដែលយើងអាចទទួលបានសេចក្ដីមេត្តាករុណា ហើយរស់នៅជាមួយព្រះ ។ ( « ចូរស្មោះត្រង់ចំពោះព្រះ និងកិច្ចការរបស់ទ្រង់ » លីអាហូណា ខែវិច្ឆិកា ឆ្នាំ២០២២ ទំព័រ ១១៩ )
-
តើផ្នែកណាខ្លះនៃសេចក្តីថ្លែងការណ៍នេះដែលអ្នកអាចចែកចាយជាមួយខាយលី ?
ការសួរសំណួរដែលជួយសិស្សយល់ពីរបៀបដែលព្រះអម្ចាស់បង្ហាញពីសេចក្ដីស្រឡាញ់ ព្រះចេស្ដា និងសេចក្ដីមេត្តាករុណារបស់ទ្រង់ក្នុងជីវិតរបស់ពួកគេអាចបង្កើនទំនាក់ទំនងរបស់ពួកគេជាមួយនឹងទ្រង់ ។ របៀបមួយដែលអាចធ្វើកិច្ចការនេះបានគឺត្រូវអញ្ជើញសិស្សឲ្យឆ្លើយសំណួរខាងក្រោម ។
សម្រាប់ការបំពាក់បំប៉នបន្ថែម សូមមើល« ជួយសិស្សឲ្យស្គាល់សេចក្តីស្រឡាញ់ ព្រះចេស្តា និងសេចក្តីមេត្តាករុណារបស់ព្រះអម្ចាស់នៅក្នុងជីវិតរបស់ពួកគេ »នៅក្នុងជំនាញការអភិវឌ្ឍគ្រូបង្រៀន ។
-
តើភស្ដុតាងអ្វីខ្លះដែលអ្នកបានឃើញអំពីសេចក្ដីយុត្តិធម៌ សេចក្ដីមេត្តាករុណា និងសេចក្ដីអត់ធ្មត់របស់ព្រះអង្គសង្គ្រោះក្នុងជីវិតរបស់អ្នក ឬក្នុងជីវិតរបស់មនុស្សម្នាក់ដែលអ្នកស្គាល់ ?
បង្ហាញពីការយល់ដឹង
សកម្មភាពនេះអាចជួយសិស្សសង្ខេបពីអ្វីដែលពួកគេបានរៀននៅថ្ងៃនេះ ។ អ្នកអាចអញ្ជើញពួកគេឲ្យបញ្ចប់ដំណើររឿងរបស់ខាយលី ។ សូមពិចារណាដាក់បង្ហាញការដាស់តឿនខាងក្រោមនេះដើម្បីឲ្យសិស្សបំពេញ ។
-
ដោយសារតែបទពិសោធន៍របស់នាង ខាយលីបានរៀនអំពី ព្រះវរបិតាសួគ៌ និងព្រះយេស៊ូវគ្រីស្ទ ។
-
ដោយសារតែអ្វីដែលបានរៀនអំពីព្រះវរបិតាសួគ៌ និងព្រះយេស៊ូវគ្រីស្ទ ខាយលី បានសម្រេចចិត្ត ។
សូមពិចារណាអញ្ជើញសិស្សពីរបីនាក់ដែលស្ម័គ្រចិត្តឲ្យ ចែកចាយពីរបៀបដែលពួកគេអាចបញ្ចប់ដំណើររឿងរបស់ ខាយលី ជាមួយនឹងសិស្សក្នុងថ្នាក់ ។ បន្ទាប់ពីសិស្សមានឱកាសចែកចាយចម្លើយរបស់ពួកគេ អ្នកអាចចែកចាយពីរបៀបដែលអ្នកបានឃើញនូវសេចក្ដីយុត្តិធម៌ សេចក្ដីមេត្តាករុណា និងសេចក្ដីអត់ធ្មត់របស់ព្រះអម្ចាស់ក្នុងជីវិតរបស់អ្នក ។