Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

Exodo 24; 32–34: Ang Kaangayan, Kaluoy, ug Pagkamainantoson sa Ginoo

“Exodo 24; 32–34: Ang Kaangayan, Kaluoy, ug Pagkamainantoson sa Ginoo,” Manwal sa Magtutudlo sa Seminary sa Daang Tugon (2026)

“Exodo 24; 32–34: Ang Kaangayan, Kaluoy, ug Pagkamainantoson sa Ginoo,” Manwal sa Magtutudlo sa Seminary sa Daang Tugon

Exodo 19–20; 24; 31–34: Leksiyon 51

Exodo 24; 32–34

Ang Kaangayan, Kaluoy, ug Pagkamainantoson sa Ginoo

Mural depicting prophets and events from the Old Testament and the Book of Mormon. This part of the mural depicts Moses holding the stones of the Ten Commandments. The Israelites can be seen in the background with the golden calf.

Sa unsang paagi ang kaagayan, kaluoy, ug pagkamainantoson sa Manluluwas nagtinabangay sa pagpanalangin sa imong kinabuhi? Sa dihang si Moises mibalik gikan sa presensiya sa Ginoo, iyang nasayran nga ang mga Israelita nakalapas sa ilang mga pakigsaad nga ilang gihimo ug nagsimba sa bulawang nating baka. Ang mga Israelita nag-antos sa mga sangpotanan niini nga sala, apan ang Ginoo nagpakita sa Iyang kaangayan, kaluoy ug pagkamainantoson ngadto sa maghinulsol ug mobalik ngadto Kaniya. Kini nga leksiyon makatabang sa mga estudyante nga makasabot nga ang Ginoo patas, maluluy-on, ug mainantoson.

Pagpangandam sa estudyante: Dapita ang mga estudyante nga mamalandong sa unsang paagi sila nakakita sa kaangayan, gugma ug kamapailobon sa sa Ginoo diha sa ilang mga kinabuhi. Pwede nimo silang dapiton sa pagbisita sa usa ka sakop sa pamilya o higala mahitungod sa unsang paagi ang kaangayan ug kaluoy sa Ginoo nagtinabangay aron sa pagpanalangin sa tanan Niyang mga anak.

Posibleng mga Kalihokan sa Pagkat-on

Ang Ginoo patas, maluluy-on, ug mainantoson

Ikonsiderar ang pagpakita og usa ka litrato sa Manluluwas. Hisgoti ang mosunod nga pangutana.

Unsa nga pulong ang imong gigamit sa paghulagway sa karakter sa Manluluwas?

Dapita ang mga estudyante sa pagsulat sa ilang pulong diha sa pisara. Ikonsiderar ang pagpili sa pipila ka ehemplo ug dapita ang mga estudyante kinsa misulat sa mga pulong sa paghulagway nganong ilang gipili ang maong hiyas sa Manluluwas.

Aron sa pagtabang sa mga anak sa Israel nga makasabot Kaniya, ang Ginoo mipadayag sa pipila ka gikinahanglang mga elemento sa Iyang karakter.

Basaha ang Exodo 34:6–7, nga mangita sa mga hiyas sa Manluluwas.

Unsay imong nadiskobrehan?

Sa mga hiyas nga tingali nailhan sa mga estudyante, hatagi og gibug-aton ang kamatuoran nga ang Ginoo patas, maluluy-on, ug mainantoson. Mahimo ka nga motabang sa mga estudyante nga makasabot nga ang “pagkamainantoson” sa (bersikulo 6) naghulagway sa pailob sa Ginoo kanato.

Mahimo kang mopakigbahin sa mga estudyante nga sila magtuon sa unsang paagi ang mga anak sa Israel nakasinati sa kaangayan, kaluoy, ug pagkamainantoson sa Ginoo. Sila usab magtuon nganong kini importante alang kanato nga makasabot niini nga mga kamatuoran mahitungod sa Ginoo.

Ang mga Israelita mao ang katawhan sa pakigsaad sa Ginoo

Ang mosunod nga mga senaryo mao ang gigamit sa tibuok leksiyon aron sa pagtabang sa mga estudaynte nga makasabot sa unsang paagi ang istorya sa mga Israelita adunay kalabotan sa kabatan-onan karon. Ang senaryo naggamit sa ngalan nga “Kylie,” apan makadapit ka sa mga estudyante sa pagpili og usa ka ngalan nga idugang o usbon ang mga detalye sa istorya.

Si Kaylie, usa ka batan-ong babaye sa imong eskwelahan, nagkat-on mahitungod sa ebanghelyo sa Manluluwas ug nakahukom nga mohimo og mga kausaban nga gikinahanglan aron mabunyagan sa Ang Simbahan ni Jesukristo sa mga Santos sa Ulahing mga Adlaw. Siya nagtinguha sa paghimo og pakigsaad uban sa Dios aron sa pagtuman sa Iyang mga kasugoan.

Tabangi ang mga estudyante nga makahinumdom nga human sa pagluwas gikan sa Ehipto, ang Ginoo midala sa mga anak sa Israel ngadto sa Bukid sa Sinai aron mohimo og pakigsaad uban Kaniya.

Basaha ang Exodo 24:3–8, nga mangita kon sa unsang paagi ang mga Israelita tingali mibati sama ni Kylie.

Unsay labing makahuloganon alang kanimo?

Tingali makatabang ang pagpasabot sa mga estudyante nga ang pagsablig sa dugo diha sa altar ug ngadto sa mga tawo (tan-awa sa Exodo 24:6, 8) usa ka simbolikanhon, pisikal nga representasyon nga ang mga Israelita andam nga mahimong katawhan sa pakigsaad sa Ginoo.

Ang Ginoo nagtinguha sa pagpanalangin sa mga anak sa Israel sa mga ordinansa sa Melchizedek nga Pagkapari (tan-awa sa Doktrina ug mga Pakigsaad 84:19–23). Si Moises mibalik sa Bukid sa Sinai aron modawat sa mga instruksiyon sa Ginoo alang niini nga mga ordinansa ug sa mga plano alang sa tabernakulo.

Ang paglapas sa atong mga pakigsaad ug ang mga sangpotanan

Basaha ang Exodo 32:1–8, nga mangita kon unsa ang gibuhat sa mga Israelita samtang si Moises didto sa bukid nagdawat sa direksiyon sa Ginoo.

Unsay imong nadiskobrehan?

Composite of images of Moses, the golden calf and the Israelites in the wilderness.

Sa imong hunahuna ngano nga ang paghimo ug pagsimba sa bulawang nating baka usa ka seryoso nga sala? (Tan-awa sa Exodo 20:2–7.)

Seguroha nga ang mga estudyante makasabot nga ang mga Israelita milapas sa ilang pakigsaad nga bag-o lang nilang gihimo uban sa Ginoo.

Mahimo ka nga mopakigbahin sa laing bahin sa senaryo nga parehas sa nahitabo sa mga anak sa Israel ug mas importante ngadto sa kabatan-onan. Ang mga estudyante makahatag og mga ehemplo kon unsa tingali ang mabuhat ni Kylie aron sa paglapas sa pakigsaad nga iyang gihimo diha sa bunyag aron sa pagsunod sa mga sugo sa Dios.

Human sa iyang bunyag, si Kylie nagsugod sa paggahin sa iyang panahon uban sa iyang karaan nga mga higala, ug kini midangat sa karaang mga pamatasan. Sa una, ang sala nga iyang nabuhat morag ginagmay ra. Hinoon, wala magdugay, siya mibalik sa karaan, naandan nga mga paagi. Iyang gilapas ang pakigsaad nga iyang gihimo sa bunyag.

Unsa kaha ang nakaimpluwensiya sa desisyon ni Kylie?

Ang balaod sa kaangayan sa Ginoo

Basaha ang Exodo 32:15–20, nga mangita sa mga sangpotanan nga giantos sa Israelita tungod sa ilang mga sala.

Unsay imong nakaplagan?

Tabangi ang mga estudyante nga makasabot nga bisan tuod kita makagamit sa atong kabubut-on sa pagpakasala, ang Ginoo patas. Apan, kita dili makalingkawas sa mga sangpotanan sa atong mga sala. Tingali makatabang ang pagpasabot nga si Moises mibuak sa mga papan nga naglangkob sa mga instruksiyon sa ordinansa sa Melchizedek nga Pagkapari (tan-awa sa Exodo 32:15–19; Hubad ni Joseph Smith, Exodo 34:1–2 [diha sa Giya ngadto sa mga Kasulatan]). Tungod sa ilang mga desisyon, ang mga anak ni Israel dili takos aron modawat sa mga panalangin gikan sa Ginoo. Si Moises mibalik ngadto sa presensiya sa Ginoo. Ang Ginoo mitudlo ni Moises nga ipahigayon hinoon ang mga ordinansa sa Aaronic nga Pagkapari (tan-awa sa Doktrina ug mga Pakigsaad 84:24–26). Pwede usab nimong hisgotan nga gibutang ni Moises ang tabernakulo sa gawas sa kampo (tan-awa sa Exodo 33:7), nga nagsimbolo sa pagkawala sa Israel sa presensiya sa Ginoo.
Unsa ang pipila ka sangpotanan sa espirituwal ug temporal nga tingali atubangon ni Kylie tungod sa iyang paglapas sa pakigsaad sa bunyag?
Sa unsang paagi ang mga sangpotanan nagpakita sa kaangayan, kaluoy ug pagkamainantoson sa Ginoo?

Mahimo nimong hatagan og gibug-aton nga, sama sa mga Israelita, si Kylie mahimong adunay dili madawat nga mga panalangin nga maggikan sa mga ordinansa sa pagkapari. Siya usab mahimong mawad-an sa kanunayng pakig-uban sa Espiritu sa Ginoo.

Ang balaod sa Ginoo sa kaluoy

Tabangi ang mga estudyante nga makasabot nga ang Ginoo mihatag og kasegurohan pag-usab sa Israel nga sila Iya gihapon nga katawhan (tan-awa sa Exodo 33:12–19).

Rebyoha ang Exodo 34:6–7, ug maghunahuna ngano kaha nga importante alang sa Ginoo ang pagpahinomdom sa anak ni Israel nga Siya patas, maluluy-on ug mapailobon.

Sa unsang paagi gipakita sa Ginoo ang Iyang kaluoy ug kamapailobon uban sa mga anak ni Israel?
Sa unsang paagi tingali si Kylie makakita sa kaluoy, ug kamapailobon sa Ginoo sa iyang kinabuhi?

Si Elder Quentin L. Cook sa Kurom sa Napulog Duha ka Apostoles mipasabot sa unsang paagi ang kaluoy sa Manluluwas makatagbaw sa balaod sa kaangayan:

13:53

Kon wala ang Pag-ula sa Manluluwas, ang mahangtoron nga baroganan sa kaangayan magkinahanglan og silot. Tungod sa Pag-ula sa Manluluwas, ang kaluoy makapatigbabaw alang niadtong nakahinulsol, ug kini magtugot nga sila makabalik sa presensiya sa Dios. Makaayo alang kanato ang pagpamalandong niining talagsaon nga doktrina.

Walay makabalik sa Dios pinaagi sa iyang kaugalingong mga buhat lamang; tanan kita nagkinahanglan sa benipisyo sa sakripisyo sa Manluluwas. Tanan nakasala, ug pinaagi lamang sa Pag-ula ni Jesukristo nga kita makaangkon og kaluoy ug makapuyo uban sa Dios. (“Magmatinud-anon ngadto sa Dios ug sa Iyang Buhat,” Liahona, Nob. 2022, 119)

Unsa nga bahin niini nga pamahayag nga tingali imong ipakigbahin ni Kylie?

Ang pagsukna og mga pangutana nga makatabang sa mga estudyante nga makasabot sa unsang paagi ang Ginoo nagpakita sa Iyang gugma, gahom, ug kaluoy sa ilang mga kinabuhi makapalambo sa ilang koneksiyon ngadto Kaniya. Usa ka paagi sa pagbuhat niini mao ang pagdapit sa mga estudyante sa pagtubag sa mosunod.

Alang sa Dugang nga pagbansay, tan-awa sa “Tabangi ang mga Estudyante sa Pag-ila sa Gugma, Gahom, ug Kaluoy sa Ginoo diha sa Ilang mga Kinabuhi” diha sa Pagpalambo sa mga Kahanas sa Magtutudlo.
Unsa nga ebidensiya ang imong nakita sa kaangayan, kaluoy ug pagkamainantoson sa Manluluwas sa imong kinabuhi o sa kinabuhi sa usa ka tawo nga imong nailhan?

Ipakita ang pagsabot

Kini nga kalihokan makatabang sa mga estudyante sa pag-summarize unsay ilang nakat-onan karon. Mahimo nimo silang dapiton sa paghuman sa istorya ni Kylie. Ikonsiderar ang pagpakita sa mosunod nga mga pag-aghat aron makompleto sa mga estudyante.

Tungod sa iyang mga kasinatian, tingali si Kylie nakat-on nga ang Langitnong Amahan ug si Jesukristo .
Tungod sa unsay iyang nakat-onan mahitungod sa Langitnong Amahan ug ni Jesukristo, si Kylie nakahukom nga .

Ikonsiderar ang pagdapit sa pipila ka andam nga mga estudyante sa pagpakigbahin diha sa klase kon unsaon nila paghuman ang istorya ni Kylie. Human ang mga estudyante adunay kahigayonan sa pagpakigbahin sa ilang mga tubag, mahimong nimong ipakigbahin kon sa unsang paagi ka nakakita sa kaangayan, kaluoy ug pagkamainantoson sa Ginoo diha sa imong kinabuhi.

Dugang nga mga Kapanguhaan

Sa unsang paagi kita napanalanginan sa kaangayan sa Dios?

Si Presidente Jeffrey R. Holland sa Korum sa Napulog Duha ka Apostoles mipamatuod:

Usa ka kinaiya sa Dios mao ang kaangayan, ug kita walay hugot nga pagtuo—tungod sa kahadlok—nga mopuyo nga matarong o mas mahigugma o mas andam nga maghinulsol kon kita wala nagtuo nga ang kaangayan pabor nato, kon kita naghunahuna nga mausab ang hunahuna sa Dios ug modesisyon nga adunay laing mga balaod. Tungod kay kita nasayod nga ang Dios makiangayon ug mohunong sa pagka-Dios kon dili Siya ingon niini, kita adunay hugot nga pagtuo nga magpadayon, nasayod nga kita dili mahimong mga biktima sa sayop nga pagtuo o dili matag-an nga kausaban o sa usa ka bati nga adlaw o usa ka bati nga komedya. Kana nga kasegurohan makapadasig kaayo. …

Ako nasayod nga kini dili sayon usabon ug maghimo og bag-ong sinugdanan, apan ako nagtuo sa tibuok nakong kasingkasing nga kini mas sayon ug siguradong mas makatagbaw nga magsugod og bag-o kay sa magpadayon ug magtuo nga ang kaangayan dili moepekto. (“Ang Kaangayan ug Kaluoy sa Dios,” Liahona,, Sep. 2013, 22–23)

Exodo 34:7, footnote e. Unsay ipasabot nga ang Ginoo “sa walay bisan unsa nga paagi magapakatarong sa daotan” (masinupakon)?

Si Elder Gerrit W. Gong sa Korum sa Napulog Duha ka Apostoles mitudlo:

Kadtong tuyo nga mipili og daotan, kinsa mituyo sa paglangay sa paghinulsol, o kinsa sa bisan unsang giplanohan nang daan o tinuyo nga paagi misupak sa mga sugo, nga nagplano og sayon nga paghinulsol, pagahukman sa Dios ug sa usa ka “matin-aw nga panumdoman sa tanan nga [ilang] kasaypanan” [Alma 11:43]. Dili mahimo nga kita nasayod sa atong sala pagka-Sabado, dayon maglaom og dihadiha nga kapasayloan pinaagi sa pag-ambit sa sakramento inigka-Dominggo. … Kita dili gayod molangay sa atong paghinulsol. Ang mga panalangin sa paghinulsol magsugod samtang kita magsugod sa paghinulsol. (“Malipayon ug Hangtod sa Hangtod,” Liahona, Nob. 2022, 84)

Aduna bay kalahian tali sa paagi sa pagtan-aw sa Ginoo sa kahuyang ikompara sa masinupakon?

Si Elder Richard G. Scott (1928–2015) sa Korum sa Napulog Duha ka Apostoles mipasabot:

Ang nindot nga balita alang sa tanang nagtinguha nga malikay sa mga sangpotanan sa sayop nga mga pagpili kaniadto mao nga lahi ang pagtan-aw sa Ginoo sa mga kahuyang kay sa pagsupak. Samtang ang Ginoo mipasidaan nga ang wala mahinulsoli nga pagsupak magdala og silot, kon ang Ginoo maghisgot bahin sa mga kahuyang, kanunay inubanan kini sa kaluoy. (“Personal nga Kalig-on pinaagi sa Pag-ula ni Jesukristo,” Liahona, Nob. 2013, 83)

Exodo 24:6–8. Nganong si Moises misablig sa dugo diha sa altar ug sa mga anak sa Israel?

Ang dugo nga gisablig ni Moises diha sa altar nagrepresentar sa dugo ni Jesukristo, diin Iyang gipaagas diha sa Getsemani ug diha sa krus. Sa dihang gisablig ni Moises ang dugo diha sa katawhan, kini misimbolo sa mga panalangin sa Pag-ula ni Jesukristo pinaagi sa pakigsaad nga ilang gihimo ug ang ka ligdong niadto nga mga pakigsaad. Ang pagsablig sa dugo nagpakita nga ang Dios ug ang katawhan nagkauyon nga gibugkos pinaagi sa pakigsaad. (Tan-awa sa “Sakripisyo: Pagkasusama sa Manluluwas,” Liahona, Sept. 2022, digital lamang.)

Dugang nga mga Kalihokan sa Pagkat-on

“Asa ang Kaangayan, Gugma, ug Kaluoy Mag-abot”

Tingali makabenepisyo ang mga estudyante sa usa ka maayong pagsabot kon sa unsang paagi ang kaangayan, gugma ug kaluoy magtinabangay. Pwede ninyong ipasalida ang bidyo nga “Where Justice, Love, and Mercy Meet [Diin ang Hustisya, Gugma, ug Kaluoy Mag-abot],” gikan sa code sa oras nga 0:00 hangtod sa 3:39. Kini nga bidyo nagpakita sa istorya ni Presidente Holland sa duha ka igsoon sa Southern Utah. Ikonsiderar ang paghunong sa bidyo sa dihang ang magulang nga lalaki miambak (code sa oras nga 3:39). Dayon mangutana sa mga estudyante unsa ang mga sangpotanan unya kon ang magulang nga lalaki adunay “kaangayan” lamang. Dapita ang mga estudyante sa pagsiksik sa mga kasulatan nga nagpasabot unsa ang gikinahanglan sa kaangayan sa tanang katawhan. Kon ang mga estudyante nagkinahanglan og dugang giya, pwede nimong ipakita ang mga ehemplo sama sa Mosiah 2:38; ug Alma 42:11–13, 18.

5:37

Dayon mahimo nimong dapiton ang mga estudyante sa pagpamalandong kon sa unsang paagi ang maulaong sakripisyo sa Manluluwas nagtugot sa balaod sa kaluoy sa pagtubos kanato gikan sa pagkapukan nga kahimtang. Ikonsiderar ang pagpakita sa nahibilin nga bidyo, gikan sa code sa oras nga 3:39 hangtod 5:36. Dapita ang mga estudyante sa pagpangita kon sa unsang paagi ang balaod sa kaluoy nagtuman sa balaod sa kaangayan aron sa pagluwas kanato gikan sa mga sangpotanan sa sala. Tingali makadapit kamo sa mga estudyante sa pagpangita og kasulatan nga nagtudlo mahitungod sa kaluoy sa Dios. Ang mga ehemplo naglakip sa Deuteronomio 4:31; Mosiah 29:20; ug Alma 34:16; 42:15.

5:37

“Ang Tigpataliwala”

Kon makabenepisyo ang mga estudyante gikan sa pagpakita sa kaluoy sa Manluluwas nga nagbayad sa gikinahanglan sa kaangayan, ipasalida ang bidyo nga “The Mediator [Ang Tigpataliwala]” (10:44). Kini nga bidyo naggamit sa ehemplo sa usa ka batan-ong lalaki kinsa nakautang sa utang nga dili niya mabayran nga siya ra. Kini nagpakita kon sa unsang paagi ang maulaong sakripisyo sa Manluluwas nagtuman sa gikinahanglan sa kaangayan.

10:47