Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Eksodosy 19: “Rakitra soa ho Ahy”

“Eksodosy 19: -Rakitra soa ho Ahy-”, Testamenta Taloha: Boky torolalana ho an’ny mpampianatra seminera (2026)

“Eksodosy 19: -Rakitra soa ho Ahy-”, Testamenta Taloha: Boky torolalana ho an’ny mpampianatra seminera

Eksodosy 19–20; 24; 31–34: Lesona 48

Eksodosy 19

“Rakitra soa ho Ahy”

A photograph of a mountain thought to be Mount Sinai, rising above a desert landscape on a clear day.

Tia ny zanany rehetra ny Ray any An-danitra ary maniry ny hanana fifandraisana ao amin’ny fanekempihavanana amintsika tsirairay avy Izy. Ny famantarana ny zavatra tsapany momba ny Isiraelita dia afaka manampy antsika hahatakatra ny zavatra tsapany momba antsika. Rehefa avy nitarika ny zanak’ Isiraely hiala tao Egypta ny Tompo dia nentin’ny Tompo tany an-tendrombohitra Sinay izy ireo mba hanao fanekempihavanana Taminy. Ity lesona ity dia afaka manampy ny mpianatra hahatsapa ao am-pon’izy ireo ny fanirian’ Andriamanitra hanana fifandraisana ao amin’ny fanekempihavanana amin’izy ireo.

Fanomanana ny mpianatra: Asao ny mpianatra hisaintsaina ny zavatra mahatonga ny fifandraisana ho manan-danja na zava-dehibe. Afaka mieritreritra olona iray izay ananany fifandraisana manan-danja izy ireo, ary afaka mitondra ny sarin’io olona io izy ireo mba hozaraina any am-piandohan’ny fotoam-pianarana.

Sahanasa fianarana azo atao

Fifandraisana miavaka

Hevero ny hampiseho sarin’olona iray izay manana fifandraisana manan-danja aminao, toy ny olona iray ao amin’ny fianakaviana na ny mpanoro hevitra iray. Zarao ny antony maha-zava-dehibe aminao ny fifandraisanao amin’io olona io. Asao ny mpianatra hieritreritra olona iray manan-danja eo amin’ny fiainan’izy ireo. Raha nitondra sary tao an-dakilasy ny mpianatra dia azon’izy ireo atao ny mizara izany amin’izao fotoana izao.

Inona no mahatonga ny fifandraisanao amin’io olona io ho manan-danja?

Asao ireo mpianatra hisaintsaina ombam-bavaka ireto fanontaniana manaraka ireto: Asao izy ireo hirakitra an-tsoratra ny eritreriny sy ireo zavatra tsapany ao amin’ny diary fandalinan’izy ireo.
Hatraiza ny maha-zava-dehibe aminao ny fifandraisanao amin’ny Ray any An-danitra sy i Jesoa Kristy?
Inona no maha samy hafa ny fifandraisanao amin’ny Ray any An-danitra sy i Jesoa Kristy amin’ireo fifandraisana hafa anananao?
Amin’ny fomba ahoana araka ny eritreritrao no mety hiovan’ny fiainanao rehefa manamafy orina hatrany ny fifandraisanao amin’ny Ray any An-danitra sy i Jesoa Kristy ianao?

Mikatsaha fitarihana avy amin’ny Fanahy mba hahatakarana ny zavatra azonao atao mba hanamafisana orina ny fifandraisanao amin’ny Ray any An-danitra sy i Jesoa Kristy.

“Rakitra soa ho Ahy”

Taorian’ny nandaozan’ny zanak’ Isiraely an’i Egypta dia nitarika azy ireo ho any amin’ny Tendrombohitra Sinay ny Tompo (indraindray ny soratra masina dia manondro ny Tendrombohitra Sinay ho ny Tendrombohitra Horeba; jereo ny Eksodosy 3:1), araka ny nampanantenainy (jereo ny Eksodosy 3:7–12; 19:1–4). Ho an’i Mosesy sy ny zanak’ Isiraely dia toy ny tempoly ny Tendrombohitra Sinay: toerana izay hanaovan’izy ireo fanekempihavanana amin’ Andriamanitra.

Vakio ny Eksodosy 19:3–6, dia tadiavo ireo teny sy andian-teny izay mampianatra momba ny karazana fifandraisana tian’ny Ray any An-danitra sy i Jesoa Kristy hananana amintsika.

Inona no hitanao?

Nohazavain’ny Filoha Russell M. Nelson ny dikan’ny hoe ho “rakitra soa” an’ Andriamanitra (andininy 5):

Ao amin’ny Testamenta Taloha, ny teny hebreo izay niavian’ny dikan’ny hoe soa dia ny hoe segullah, izay midika hoe “fananana sarobidy,” na “harena sarobidy.” …

Hitantsika amin’izany fa ny teny ao amin’ny soratra masina hoe miavaka dia midika hoe “harena sarobidy”, “natao” na “nosafidian’ Andriamanitra.” Ho antsika, ny maha-mpanompon’ny Tompo antsika miavaka dia dera faran’izay avo. (“Children of the Covenant,” Ensign,, May 1995, 34)

Mba hanampiana ny mpianatra hamantatra fitsipika iray dia azonao atao ny mampahafantatra ireo teny hoe raha sy dia ao amin’ny andininy 5.

Inona avy ireo fitsipika hitanao avy amin’ireo andininy ireo?

Mety hahita fitsipika isan-karazany ny mpianatra, anisan’izany ny hoe raha mankatò ny feon’ny Tompo isika ary mitandrina ny fanekempihavanana nataontsika Taminy dia ho lasa vahoakany masina.

Nampianatra momba ny fifandraisana ao amin’ny fanekempihavanana izay azontsika ananana amin’ Andriamanitra ny Filoha Russell M. Nelson:

Rehefa manao fanekempihavanana amin’ Andriamanitra izaho sy ianao, ny fifandraisantsika Aminy dia lasa tena akaiky kokoa noho ny talohan’ny fanekempihavanantsika. Mifamatotra isika izao. Noho ny fanekempihavanantsika amin’ Andriamanitra, dia tsy ho reraka mihitsy Izy amin’ny ezaka ataony hanampiana antsika, ary tsy ho lany mihitsy ny faharetany feno famindram-po amintsika. Samy manana anjara toerana manokana ao am-pon’ Andriamanitra isika tsirairay avy. Avo dia avo ny fanantenany ho antsika. (Russell M. Nelson, “Ny fanekempihavanana maharitra mandrakizay”, Liahona, ôkt. 2022, 6).

Inona no nanan-danja taminao avy amin’io fanambarana io?

Vakio ireto andinin-tsoratra masina manaraka ireto, dia tadiavo ny porofo fa te hanana fifandraisana ao amin’ny fanekempihavanana aminao Andriamanitra. Azonao atao ny mampifandrohy na mampifandray ireo andininy ireo amin’ny Eksodosy 19:5–6.

Matio 11:28–30

Titosy 2:11–14

1 Petera 1:15–16

Môrônia 10:32–33

Asao ny mpianatra hizara teny na andian-teny avy amin’ireo andininy ireo izay mampiseho fa te hanana fifandraisana ao amin’ny fanekempihavanana amintsika Andriamanitra. Mety hilaza ny mpianatra fa manasa antsika hanatona Azy ny Mpamonjy mba hahafahany manampy antsika sy manome antsika fitsaharana (jereo ny Matio 11:28–30). Mety hilaza izy ireo fa nanolotra ny Tenany ny Mpamonjy mba hanavotra sy hanadio antsika amin’ny maha-vahoaka soany antsika (jereo ny Titosy 2:14) na hoe afaka ny ho masina isika satria masina ny Mpamonjy (jereo ny 1 Petera 1:16).

Ny fifandraisako amin’ Andriamanitra

Mba hanomanana ny mpianatra hamaly ireto fanontaniana manaraka ireto ao amin’ny diary fandalinan’izy ireo dia azonao atao ny mizara ireo fomba nahatsapanao fa te hanana fifandraisana ao amin’ny fanekempihavanana aminao Andriamanitra. Asao ny mpianatra hisaintsaina ny zavatra niainan’izy ireo manokana rehefa mizara ianao.

Azonao atao ihany koa ny milaza porofo hafa manamarina fa te hanana fifandraisana ao amin’ny fanekempihavanana amintsika Andriamanitra. Anisan’ireo ohatra ireo ny fahatsapana ny fitiavan’ Andriamanitra na ny fandraisana fahatsapana ara-panahy izay mamporisika antsika hanao ny tsara sy ho lasa tsaratsara kokoa.

Eritrereto izay fahatsapana voarainao avy amin’ny Fanahy, ary valio ao anatin’ny diary fandalinanao ny iray na ny maromaro amin’ireto fanontaniana manaraka ireto:

Inona no nianaranao na tsapanao ka manampy anao haniry hanao sy hitandrina fanekempihavanana amin’ Andriamanitra?
Rehefa fantatrao fa te hifandray akaiky aminao ao amin’ny fanekempihavanana Andriamanitra dia inona no fiantraikan’izany eo amin’ny fanirianao hanatona Azy kokoa?
Ahoana no nitahian’ Andriamanitra anao noho ny fiezahana hitandrina ireo fanekempihavanana izay nataonao Taminy?

Rehefa avy nomena fotoana ampy dia asao ny mpianatra izay vonona mba hizara ny eritreritr’izy ireo sy ny fahatsapany amin’ny iray kilasy. Hevero ny hizara ny fomba nitahian’ Andriamanitra anao noho ny nanaovanao sy nitandremanao fanekempihavanana Taminy.

Miomana hanao fanekempihavanana ny Isiraelita

Ity famintinana manaraka ity dia afaka manampy ny mpianatra hahatakatra ny zavatra nataon’i Isiraely mba hiomanana hanao fanekempihavanana amin’ Andriamanitra. Azonao atao ny milaza fa taorian’izany dia nanambara ny Didy Folo ny Tompo, izay hohalalinin’ny mpianatra ao amin’ireo lesona roa manaraka. Rehefa mamarana ny lesona ianao dia azonao atao ihany koa ny mizara ny eritreritrao sy ny zavatra tsapanao momba ny fomba izay maneho ny fomba tian’ Andriamanitra hanaovana fanekempihavanana amintsika.

Nanaiky ny hanao fanekempihavanana tamin’ Andriamanitra ny Isiraelita mba ho lasa vahoakany masina. Avy eo ny Tompo dia nilaza fa ho avy Izy ary hiresaka amin’ny vahoaka (jereo ny Eksodosy 19:7–9). Nandidy an’i Mosesy ny Tompo mba hanamasina ny vahoaka, na hahatonga azy ireo ho masina, ary ny vahoaka kosa hanadio ny fitafiany ho fiomanana amin’ny fotoana “hidinan’i Jehovah ho eo imason’ny olona rehetra eo an-tapon’ny tendrombohitra Sinay” (Eksodosy 19:11). Nanomana ny tenany ny vahoaka ary niangona teo an-tendrombohitra Sinay “mba hihaona amin’ Andriamanitra” (Eksodosy 19:17). Tao no nahitan’izy ireo porofon’ny fanatrehan’ny Tompo teo an-tendrombohitra. Niantso an’i Mosesy hiakatra tany an-tampon’ny tendrombohitra ny Tompo mba hiresaka Aminy sy hanambara ny sitrapony ho an’ny vahoaka (jereo ny Eksodosy 19:18–25).

Loharanom-pitaovana fanampiny

Inona no maha-samy hafa ny fanaovana fanekempihavanana amin’ Andriamanitra amin’ny fifanekena?

Ny Filoha Emily Belle Freeman, Filohan’ny Zatovovavy maneran-tany, dia niresaka momba ny lalan’ny fanekempihavanana izay zorintsika rehefa manao fanekempihavanana amin’ Andriamanitra isika:

10:24

Antsointsika hoe mandeha eo amin’ny lalan’ny fanekempihavanana izany, lalana miainga eo amin’ny fanekempihavanan’ny batisa ary mitondra mankany amin’ny fanekempihavanana lalina kokoa izay ataontsika any amin’ny tempoly. Mety mandre ireo teny ireo ianao dia mieritreritra lisitry ny zavatra ilaina atao. Mety hoe ny hany hitanao dia lalana feno zavatra takina. Raha mijery akaiky kokoa ianao dia hahita zavatra mandrisika kokoa. Ny fanekempihavanana dia tsy resaka fifanarahana fotsiny ihany, na dia manan-danja aza izany. Resaka fifandraisana izy io. Nampianatra ny Filoha Russell M. Nelson hoe: “Ny lalan’ny fanekempihavanana dia miompana tanteraka amin’ny fifandraisantsika amin’ Andriamanitra” [Russell M. Nelson, “Ny fanekempihavanana maharitra mandrakizay”, Liahona, ôkt. 2022, 11]. (Miara-mandeha amin’i Kristy ao anaty fifandraisana araka ny fanekempihavanana”, Liahona, nôv. 2023, 77–78)

Ahoana no ahafahan’ny fanaovana sy ny fitandremana fanekempihavanana amin’ Andriamanitra mitahy ny fiainako?

Nijoro ho vavolombelona ny Loholona David A. Bednar ao amin’ny Kôlejin’ny Apôstôly Roambinifolo hoe:

Mijoro ho vavolombelona aho fa ny vahoakan’ny fanekempihavanan’ny Tompo ankehitriny dia tena nampirongoana ny fahamarinana sy ny herin’ Andriamanitra amin’ny voninahitra lehibe. Nahita finoana aho, herim-po, fomba fijery, fikirizana ary fifaliana izay mihoatra lavitra noho ny azon’olombelona tratrarina—ary Andriamanitra irery no afaka manome izany. (“Amin’ny herin’ Andriamanitra tamim-boninahitra lehibe”, Liahona, nôv. 2021, 29–30)

Ahoana no ahafahan’ny fanaovana fanekempihavanana sy ny fitandremana izany miantraika amin’ny fomba fiainantsika?

Hoy ny Loholona Neil L. Andersen ao amin’ny Kôlejin’ny Apôstôly Roambinifolo:

15:3

Noho isika mamiratra toy ny hazavana ho an’ireo manodidina antsika, dia volavolaintsika amim-pitandremana tsara ireo faniriantsika, ireo eritreritsika, sy ireo safidintsika ary ireo zavatra ataontsika. Eo am-pikatsahana amin’ny fontsika iray manontolo ny mba hahafantatra sy ny mba hitia ny Mpamonjy, dia mampanalavitra ny tenantsika amin’izao tontolo izao isika amin’ny alalan’ny fanekempihavanana atao amin’ Andriamanitra, amin’ny alalan’ny fampisehoana fa miavaka sy tsy fahita firy ary manana toetra misongadina isika eo am-panajana Azy sy ny fampianarany, nefa tsy manasaraka ny tenantsika amin’ireo olona hafa eto amin’izao tontolo izao izay manana finoana hafa. (“Manakaiky ny Mpamonjy”, Liahona, nôv. 2022, 76)

Rahavavy Becky Craven, izay tao amin’ny Fiadidian’ny Zatovovavy maneran-tany teo aloha, dia nampianatra momba ny zavatra andrasan’ny Tompo amintsika amin’ny maha-“rakitra soa” antsika:

12:24

Noho isika vahoakan’ny fanekempihavanana dia tsy natao hiharoharo amin’ny ambiny sisa amin’izao tontolo izao isika. Nantsoina hoe “olona nalain’ Andriamanitra ho an’ny tenany” isika [1 Petera 2:9]—Fandokafana tsara tokoa izany! Raha tsy mitsaha-mitombo ny faneken’ny fitaoman’izao tontolo izao ny faharatsiana, isika kosa dia tsy maintsy miezaka amin’ny fahazotoana rehetra hijanona amim-pahatokiana eo amin’ilay lalana izay mitondra antsika soa aman-tsara any amin’ny Mpamonjintsika, ka mampitombo ny elanelana misy eo amin’ny fiainantsika mifanaraka amin’ny fanekempihavanana sy ireo fitaoman’izao tontolo izao. (“Mitandrina tsara ampitahaina amin’ny hoe tsy miraharaha firy”, Liahona, mey 2019, 10)

Sahanasa fianarana fanampiny

“Hamasinina ho [an’ny Tompo]”

Azonao ampiasaina ireto manaraka ireto mba hifanakalozana hevitra mikasika ny fomba ahafahantsika ho lasa firenena masina. Asehoy ny mpianatra ny sary iray misy ireo teny hoe “Hamasinina ho [an’ny Tompo]” eo ivelan’ny tempoly. Ampio ny mpianatra hahita ny dikan’ny hoe masina. Fomba iray ahafahan’izy ireo manao izany ny fikarohana ny “Fahamasinana” sy ny “Masina” ao amin’ny Torolalana ho an’ny Soratra Masina.

Ifanakalozy hevitra ny antony maha-ampahany manan-danja amin’ny fiomanana ho any amin’ny tempoly ny fiezahana ho masina. Azonareo ifanakalozana hevitra ihany koa ny fomba ahafahan’ny fanaovana sy ny fitandremana ireo fanekempihavanan’ny tempoly manampy antsika ho lasa masina.

Tsy mitovy amin’izao tontolo izao

Azonao ampiasaina ireto manaraka ireto mba hanampiana ny mpianatra hahatakatra ny fomba hanampian’ny fifandraisana ao amin’ny fanekempihavanana amin’ Andriamanitra antsika hiavaka amin’izao tontolo izao. Azonareo atao ny mifanakalo hevitra momba ny fomba ahafahan’ny dian’ny Isiraelita niala avy tany Egypta nankany an-tendrombohitra Sinay ho tandindon’ny fandaozana an’izao tontolo izao mba hanaovana fanekempihavanana amin’ Andriamanitra.

Ifanakalozy hevitra ny hahatonga ny zanak’ Isiraely hiavaka amin’ireo firenena manodidina azy ireo rehefa mitoetra ho “rakitra soa” (Eksodosy 19:5) sy “firenena masina” (Eksodosy 19:6) izy ireo. Azonao atao ihany koa ny mamaky ny teny nambaran’ny Loholona Neil L. Andersen na ny teny nambaran-dRahavavy Becky Craven ao amin’ny Loharanom-pitaovana fanampiny. Hevero ny hifanakalo hevitra momba ny iray na ny maromaro amin’ireto fanontaniana manaraka ireto:

Manampy antsika hiavaka amin’izao tontolo izao amin’ny fomba ahoana ny fitandremana ny fanekempihavanantsika amin’ Andriamanitra?
Ahoana no ahafahantsika hiavaka amin’izao tontolo izao kanefa tsy manaisotra ny tenantsika tsy ho eo amin’izao tontolo izao?
Mety ho afaka hanova inona eo amin’ny olona manodidina azy ny tanora izay mitandrina ny fanekempihavanan’izy ireo?

Nahita ny vahoakan’ny fanekempihavanan’ny Tompo tamin’ny andro farany i Nefia

Ity manaraka ity dia afaka manampy ny mpianatra hahatsapa ny hery omen’ny Tompo ny vahoakan’ny fanekempihavanany amin’ny andro farany. Azonao atao ny manasa ny mpianatra handalina ny 1 Nefia 14:12–14, ary hitady ny fomba hitahian’ny Tompo ny vahoakan’ny fanekempihavanany. Ifanakalozy hevitra ny fomba nahitan’ny mpianatra ireo fitahiana ireo teo amin’ny fiainany na teo amin’ny fiainan’ny olona fantany. Hevero ny hamaky ny teny nambaran’ny Loholona David A. Bednar ao amin’ny Loharanom-pitaovana fanampiny.

Ny zavatra niainan’i Mosesy sy ny Isiraely niaraka tamin’i Jehovah tao an-tendrombohitra Sinay

Niresaka im-betsaka tamin’ny Tompo teo an-tendrombohitra Sinay i Mosesy rehefa nanao fanekempihavanana tamin’i Jehovah ny Isiraelita. Ireto tabilao manaraka ireto dia afaka manampy ny mpianatra hahatakatra ireo fifampiresahana ireo. Azonao atao ny mampiseho ilay tabilao banga ary ampiasao ilay tabilao efa nofenoina mba hanampiana ny mpianatra hahita ny zava-nitranga isaky ny fitsidihana.