Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Eksodosy 12–13, Fizarana 2: “Ataovy izao ho fahatsiarovana Ahy”

“Eksodosy 12–13, Fizarana 2: -Ataovy izao ho fahatsiarovana Ahy,-” Testamenta Taloha: Boky torolalana ho an’ny mpampianatra seminera (2026)

“Eksodosy 12–13, Fizarana 2: -Ataovy izao ho fahatsiarovana Ahy,-” Testamenta Taloha: Boky torolalana ho an’ny mpampianatra seminera

Eksodosy 7–13: Lesona 43

Eksodosy 12–13, Fizarana 2

“Ataovy izao ho fahatsiarovana Ahy”

Nahoana araka ny hevitrao no zava-dehibe ny mahatsiaro ny Ray any An-danitra sy i Jesoa Kristy? Nametraka ny Andro firavoravoan’ny Paska ny Tompo mba hanampiana ny zank’Isiraely hahatsiaro fa nanafaka azy ireo tany Egypta Izy. Nanome antsika fomba vaovao i Jesoa Kristy ahatsiarovantsika Azy mandrakariva rehefa nametraka ny ôrdônansin’ny fanasan’ny Tompo Izy. Afaka manampy ny mpianatra hahatsiaro ny Mpamonjy ity lesona ity, rehefa miomana ho amin’ny ôrdônansin’ny fanasan’ny Tompo sy mandray anjara amin’izany izy ireo.

Fanomanana ny mpianatra: Asao ny mpianatra hiomana hizara zavatra iray izay nanampy azy ireo hahatsiaro ny Mpamojy mialoha, mandritra ary aorian’ny fanasan’ny Tompo. Mety ho isan’izany ny sary, soratra masina, hira ao amin’ny fihirana, na teny nindramina izay tiany indrindra.

Sahanasa fianarana azo atao

Tsarovy mandrakariva

Mba hanampiana ny mpianatra hiaiky ny maha-zava-dehibe ny fahatsiarovana dia asehoy ny sary na zavatra iray izay manampy anao hahatsiaro zavatra na olona manan-danja aminao. Mety ho peratra mariazy, na sary, na fahatsiarovana ohatra izany. Zarao fohy ny fomba hanampian’io zavatra io anao ahatsiaro ilay olona na ilay fotoana. Avy eo dia asao hamaly ireto fanontaniana manaraka ireto ny mpianatra.

Inona ny zavatra na iza no olona tianao hotsarovana mandritra ny androm-piainanao manontolo? Nahoana?
Inona ny zavatra ataonao na efa nataonao ka nanampy anao ahatsiaro io zavatra na olona io?

Azonao atao avy eo ny mampiseho ny sarin’i Jesoa Kristy. Asao ny mpianatra hijery ilay sary eo am-pieritreretan’izy ireo ny Mpamonjy ombam-bavaka. Azonao atao avy eo ny mampiseho ireto fanontaniana manaraka ireto mba hovalian’ny mpianatra ao anatin’ny diary fandalinany.

Inona no zavatra tsapanao momba ny Mpamonjy?
Inona no tsapanao fa zava-dehibe tokony hotsaroana momba Azy? Nahoana?

Rehefa mandalina ianao androany, dia katsaho ny fitarihan’ny Fanahy Masina mba hanampy anao hahafantatra ny zavatra azonao atao mba hahatsiarovana ny Mpamonjy sy izay nataony taminao.

“Izany andro izany dia ho fahatsiarovana ho anareo”

Tao amin’ny lesona teo aloha momba ny “Eksodosy 12–13, Fizarana 1,” dia nianatra ny fomba nanafahan’ny Tompo ny Isiraelita tany Egypta ny mpianatra. Azonao atao ny manoratra ny teny hoe Paska eny amin’ny solaitrabe. Azonao aseho ny sarin’ny Paska nampiasaina tao amin’ny lesona teo aloha. Asao ny mpianatra avy eo hamintina izay tsaroany mikasika ny fahagagana nitranga tamin’ny Paska voalohany (jereo Eksodosy 12:1–13).

Azonao atao ny mandamina ny mpianatra ho vondrona ahitana olona telo. Asao ny mpianatra tsirairay handalina ny iray amin’ireto andala-tsoratra masina ireto ary hizara izay nianarany avy tamin’ireo olona hafa ao amin’ilay vondrona.

Nandidy ny olony ny Tompo hamerina ny sakafon’ny Paska “hatramin’ny taranak’[izy ireo] fara mandimby” (Eksodosy 12:14). Vakio ireto andininy manaraka ireto ary jereo ny teny sy ny andian-teny manondro izay tian’ny Tompo hotsarovan’izy ireo sy hataony:

Eksodosy 12:14, 17

Eksodosy 12:25–27

Eksodosy 13:3, 8–10

Natao mba hanampiana ny Isiraelita ahatsiaro inona momba ny Tompo ny fanomanana sy ny fihinanana ny sakafon’ny Paska?
Tamin’ny fomba ahoana, araka ny hevitrao, no nitahian’ny Tompo ny Isiraelita noho ny fitandremany tamim-pankatoavana ny Andro firavoravoan’ny Paska?

Ny Paska sy ny fanasan’ny Tompo

Jesus Christ seated at a table with His apostles. The apostles are watching Christ as He breaks bread and offers it to them in remembrance of His body and blood. The painting depicts the institution of the Sacrament at the Last Supper.

Vakio ny Lioka 22:13–15, 19–20, dia tadiavo ny ôrdônansy vaovao napetraky ny Mpamonjy.

Ahoana no mampitovy ny ôrdônansin’ny fanasan’ny Tompo amin’ny Paska? Inona no tsy mampitovy azy amin’izany?

Ity fanontaniana manaraka ity dia manampy ny mpianatra hamantatra ireo fahamarinana mifandray amin’ny fiainany. Afaka manampy ny mpianatra ahita zavatra manan-danja amin’ny tenany manokana ao amin’ny soratra masina halalininy ny fanontaniana toy izany. Ny fanontaniana toy izany ihany koa dia mamela ny Ray any An-danitra hampianatra sy hanome fitaomam-panahy ny mpianatra tsirairay.

Raha mila fampiofanana fanampiny momba ny fanampiana ny mpianatra ahita zavatra manan-danja aminy ao amin’ny soratra masina dia jereo ny “Ianaro avy amin’ny ezakao manokana ny filazantsaran’i Jesoa Kristy” ao amin’ny Fahaiza-manao ho fampivoarana ny mpampianatra [2022], 29.
Inona no fahamarinana azontsika ianarana rehefa mandinika ny antony nanomezan’ny Ray any An-danitra sy i Jesoa Kristy antsika ôrdônansy tahaka ny Paska fahiny sy ny fanasan’ny Tompo ankehitriny isika?

Mety hizara fahamarinana isan-karazany ny mpianatra. san’ny fahamarinana mety ho hitan’izy ireo ny hoe Nomen’ny Ray any An-danitra sy i Jesoa Kristy antsika ny ôrdônansy toy ny Paska sy ny fanasan’ny Tompo mba hanampiana antsika ahatsiaro Azy Ireo.

Ny Loholona Dale G. Renlund ao amin’ny Kolejin’ny Apôstôly Roambinifolo dia nanazava antony iray mahatonga ny Ray any An-danitra sy i Jesoa Kristy mamporisika antsika hahatsiaro Azy Ireo:

Tian’ny Raintsika any An-danitra hahatsiaro ny hatsaram-pony sy ny hatsaram-pon’ny Zanaka Malalany isika … noho ny fiantraikan’izany fahatsiarovana izany eo amintsika. Mivelatra ny fomba fijerintsika sy ny fahatakarantsika rehefa misaintsaina ny hatsaram-panahin’Izy Ireo. Lasa manetry tena kokoa, mivavaka kokoa, mazoto kokoa isika rehefa misaintsaina ny famindram-pon’Izy ireo. (“Saintsaino ny hatsaram-po sy ny halehibeazan’ Andriamanitra,” Liahona, mey 2020, 41)

Inona no fiantraikan’ny fatsiarovana ny hatsaram-pon’Andriamanitra teo aminao?

Fahatsiarovana ny Mpamonjy mialoha, mandritra ary aorian’ny fanasan’ny Tompo

Ity sahanasa manaraka ity dia afaka manampy ny mpianatra hiomana hahatsiaro ny Mpamonjy mialoha, mandritra ary aorian’ny fanasan’ny Tompo. Azonao atao ny manome taratasy sy fitaovana fanaovana zava-kanto. Asao ny mpianatra mba hamorona zavatra toy ny afisy, bokikely, meme, na zavatra hafa mampatsiahy ny fanasan’ny Tompo. Amporiisiho ny mpianatra hampiasa ny fahaizany mamorona amin’ny fanaovana izany.

Afaka mamela toerana malalaka ao ambadiky ny taratasin’izy ireo ny mpianatra mba hampiasaina amin’ny faran’ny lesona. Any fiafaran’ny lesona ny mpianara dia hanao drafitra hanaovan-javatra mba hahatsiarovany tsara kokoa ny Mpamonjy mialoha, mandritra ary aorian’ny fanasan’ny Tompo.

Mba hanampiana anao ahatsiaro ny hatsaram-pon’Andriamanitra eo am-piomanana ho amin’ny fanasan’ny Tompo, sy rehefa mandray anjara amin’izany, ary rehefa mahatsiaro ny ôrdônansin’ny fanasan’ny Tompo, dia ataovy ny iray na ny maromaro amin’ireto manaraka ireto:

Ataovy lisitra ireo tandindon’ny Andro firavoravoan’ny Paska izay nohalalininao. Soraty ny fomba ahafahan’ireo tandindon’ny Paska ireo manampy anao ahatsiaro ny Mpamonjy alohan’ny handraisanao ny fanasan’ny Tompo.
Vakio ireo vavaka amin’ny fanasan’ny Tompo ao amin’ny Fotopampianarana sy Fanekempihavanana 20:77, 79. Ataovy lisitra ireo fampanantenana ataontsika rehefa mandray ny fanasan’ny Tompo isika. Avy eo dia ataovy lisitra ny fampanantenan’ny Tompo. Manorata andiam-pehezan-teny fohy momba ny hoe manampy anao hahatsiaro ny Mpamonjy mandritra ny fanasan’ny Tompo amin’ny fomba ahoana ny fieritreretana ireo fampanantenana ireo.
Ataovy lisitra ny andalan-tsoratra masina vitsivitsy na ny teny nambaran’ny mpitarika iray ao amin’ny Fiangonana izay tianao hovakina sy hosaintsainina mandritra ny fanasan’ny Tompo. Misafidiana andalan-tsoratra masina na teny nambara izay afaka manampy anao ahatsiaro ny Mpamonjy.
Misafidiana hiran’ny fanasan’ny Tompo tianao indrindra. Ataovy lisitra ny lohateny sy ny andalana roa na telo ao amin’ilay fihirana. Misafidiana andalana manan-danja aminao izay afaka manampy anao hahatsiaro ny Mpamonjy aorian’ny fanasan’ny Tompo.

Azon’ny mpianatra atao ny mizara ny zavatra noforoniny amin’ny namana mpiara-miasa aminy, amin’ny vondrona na ny mpianatra rehetra. Azonao atao ny mamporisika ny mpianatra hanampy izany amin’ireo hevitra izay zarain’ny mpiara-mianatra hafa.

Manaova drafitra hahatsiarovana ny Mpamonjy

Saintsaino mangina izay nianaranao sy tsapanao androany. Asao ny Fanahy Masina hanampy anao hamantatra ny zavatra azonao atao mba hahatsiarovana tsara kokoa an’i Jesoa Kristy mialoha, mandritra ary aorian’ny fanasan’ny Tompo.

Asao ny mpianatra hampiasa faritra vitsivitsy ao ambadiky ny taratasiny hamaliany ity fanontaniana manaraka ity.

Inona ny zavatra manokana azonao atao mba hahatsiarovana tsara kokoa ny Mpamonjy rehefa miomana, mandray anjara ary misaintsaina ny fanasan’ny Tompo ianao?

Afaka mizara izay zavatra tsapany fa asain’ny Fanahy ataony ny mpianatra vitsivitsy vonona hanao izany. Asao ny mpianatra hitondra ny taratasiny any amin’ny fivorian’ny fanasan’ny Tompo mba hanampy azy ireo hahatsiaro izay nianarany sy tsapany. Zarao ny fijoroana ho vavolombelona anananao mikasika ny hery izay mety ho tonga eo amin’ny fiainantsika rehefa mahatsiaro tsara kokoa ny Mpamonjy isika eo am-piomanana ho amin’ny fanasan’ny Tompo sy eo am-pandraisana anjara amin’izany.

Loharanom-pitaovana fanampiny

Eksodosy 12:17. Inona no mahatonga ny andro firavoravoan’ny Paska ho “ôrdônansy mandrakizay”?

Ny Filoha Boyd K. Packer (1924–2015) ao amin’ny Kôlejin’ny Apôstôly Roambinifolo dia nanazava hoe:

Nalatsaka tao Getsemane sy tao Golgota ny ran’ny Mpamonjy. Taonjato maro talohan’izany dia nosantarina ny Paska ho tandindona sy ho fambara ny zavatra ho avy. Izany dia ôrdônansy iray natao hotandremana mandrakizay (jereo Eksodosy 12). …

Taorian’ny fanomboana ny Tompo dia tsy nitaky fandatsahan-dra intsony ny lalàn’ny fanaovana sorona. … Nanomboka teo ny sorona dia ny fo torotoro sy fanahy manenina, dia ny fibebahana izany.

Ary hankalazaina mandrakizay ho toy ny fanasan’ny Tompo ny Paska, izay hanavaozantsika ny fanekempihavanana tamin’ny batisa ary horaisintsika ho fahatsiarovana ny vatan’ny Zanakondrin’ Andriamanitra sy ny rany, izay nalatsaka ho antsika. (“Atonement, Agency, Accountability,” Ensign, mey 1988, 72)

Inona no tokony hataoko mandritra ny fanasan’ny Tompo?

Rahalahy Milton Camargo, izay Mpanolotsaina Voalohany ao amin’ny Fiadidian’ny Sekoly Alahady Maneran-tany dia nilaza hoe:

Ny fanavaozana ny fanekempihavanantsika mandritra ny fanasan’ny Tompo isaky ny Alahady dia fahafahana lehibe handinihantsika tena sy hampifantohantsika indray ny fiainantsika amin’i Jesoa Kristy. Rehefa mandray ny fanasan’ny Tompo isika dia manambara fa “hahatsiaro Azy mandrakariva.” Manan-danja lehibe tokoa ilay teny hoe mandrakariva. Mampitombo ny herin’ny fitaoman’ny Mpamonjy ho eo amin’ny lafiny rehetra amin’ny fiainantsika izany. Tsy any am-piangonana ihany isika no mahatsiaro Azy, na mandritra ny vavaka ataontsika amin’ny maraina ihany, na rehefa misy olana ihany isika ka misy zavatra ilaintsika.

Ekena fa variana isika indraindray. Manadino isika. Very ny fifantohantsika. Fa ny fanavaozantsika ny fanekempihavanantsika dia midika fa te hahatsiaro ny Mpamonjy mandrakariva isika, fa hiezaka ny hanao izany isika mandritra ny herinandro, ary hamerina hanolo-tena sy hifantoka Aminy indray isika rehefa eo amin’ny latabatry ny fanasan’ny Tompo amin’ny herinandro manaraka. (“Mifantoha amin’i Jesoa Kristy,” Liahona, mey 2023, 65)

Sahanasa fianarana fanampiny

Fomba hafa hanombohana

Asao ny mpianatra haka sary an-tsaina fa fantany fa ho avy hitsidika ny fivorian’ny fanasan’ny Tompo manaraka i Jesoa Kristy. Asao izy ireo hisaintsaina hoe raha fantatr’izy ireo fa ho eo i Jesoa dia ahoana no hanovan’izany ny fomba hiomanan’izy ireo ho amin’ny fivorian’ny fanasan’ny Tompo sy handraisan’izy ireo anjara amin’izany.

Hanao ahoana araka ny eritreritrao izany manatrika fivorian’ny fanasan’ny Tompo hatrehin’ny Mpamonjy mivantana izany?
Inona no hovainao mba hiomanana ho any am-piangonana? Hiomana handray ny fanasan’ny Tompo ve? Inona no tsy hovainao fa hajanona toy ny teo aloha ihany?
Amin’ny fomba ahoana no hanampian’izany zavatra niainanao izany anao hahatsiaro mandrakariva an’i Jesoa Kristy sy ny sorompanavotany rehefa manatrika ny fivorian’ny fanasan’ny Tompo any aoriana any ianao?

Ny hira ho an’ny fanasan’ny Tompo

Mety hanampy ny fahatakaran’ny mpianatra ny maha zava-dehibe ny fihirana ny hiran’ny fanasan’ny Tompo mba hahatsiarovana ny Mpamonjy. Azonao atao ny mampahatsiahy ny mpianatra fa nihira fihirana i Jesoa taloha’ny nandehanany tao amin’ny sahan’i Getsemane (jereo Marka 14:26).

Ny Filoha Jeffrey R. Holland ao amin’ny Kôlejin’ny Apôstôly Roambinifolo dia mampahatsiahy antsika hoe:

Ny fikarakarana sy ny fizarana ny fanasan’ny Tompo dia ialohavan’ny fihihirana izay tokony hiraintsika rehetra. Tsy mampaninona izay karazam-peo manavanana antsika. Ny fihirana ho an’ny fanasan’ny Tompo dia mitovy amin’ny vavaka ihany—ary afaka manambara vavaka avokoa ny olon-drehetra! …

Singa manan-danja amin’ny fitsaohantsika ny fiaraha-miombona amin’ny fanehoana fankasitrahana arahan-tononkira sady mampihetsim-po toy izany. (“This Do in Remembrance of Me,” Ensign, Nôv. 1995, 68)

Asao ny mpianatra hizara ny zavatra niainany rehefa nihira ny fihiranana ho an’ny fanasan’ny Tompo izay nanampy azy ireo hahatsapa ho akaiky kokoa ny Ray any An-danitra sy i Jesoa Kristy.

Azonao atao ny manasa ny mpianatra hisafidy ny fihirana ho an’ny fanasan’ny Tompo tiany indrindra mba hozarainy amin’ny namany, amin’ny vondrona kelikely kokoa na amin’ny kilasy manontolo. Afaka mizara ny andalana tiany indrindra avy amin’ilay fihirana ny mpianatra sy ny mahatonga izany ho manan-danja manokana aminy. Raha mety dia azonareo tendrena na halefa na hiraina ny andininy iray amin’ny fihirana ho an’ny fanasan’ny Tompo izay tena tian’ny mpianatra vitsivitsy. Rehefa mihaino na mihira ny mpianatra dia afaka manasa azy ireo ianao mba hitady ireo andalana manan-danja amin’izy ireo ao amin’ilay hira.

Mahatsapa ny hery avy amin’ny fahatsiarovana ny Mpamonjy

6:29