Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 42–45: “Ko Siosefa Au, Ko Homou Tokouá”

“Sēnesi 42–45: ‘Ko Siosefa Au, Ko Homou Tokouá,’” Fuakava Motuʻá – Tohi Lēsoni ʻa e Faiako Seminelí (2026)

“Sēnesi 42–45: ‘Ko Siosefa Au, Ko Homou Tokouá,’” Fuakava Motuʻá – Tohi Lēsoni ʻa e Faiako Seminelí

Sēnesi 42–45: Lēsoni 35

Sēnesi 42–45

“Ko Siosefa Au, Ko Homou Tokouá”

A painting by Ted Henninger showing Joseph of Egypt surrounded by his brothers, smiling and showing forgiveness toward them.

Hili ha ngaahi taʻu lahi mei hono fakatau ʻo Siosefa ki ʻIsipite ko ha pōpulá, naʻá ne toe fakataha mo hono ngaahi tokouá. Naʻá ne mei ongoʻi ʻita mo loto-mamahi koeʻuhí ko e ngaahi meʻa kotoa naʻá ne faingataʻaʻia aí. Ka neongo ia, hangē ko e Fakamoʻuí, naʻe fili ʻa Siosefa ke ne manavaʻofa mo fakamolemoleʻi hono ngaahi taʻokete naʻa nau ngaohikovia iá. ʻE lava ke tokoni ʻa e lēsoni ko ʻení ki he kau akó ke nau muimui he sīpinga ʻa e Fakamoʻuí ʻaki ʻenau faʻa fakamolemole ange.

Teuteu ʻa e tokotaha akó: Fakaafeʻi e kau akó ke fakalaulauloto ki he fekau ʻa e Fakamoʻuí ke “fakamolemoleʻi ʻa e kakai kotoa pē” (Tokāteline mo e Ngaahi Fuakava 64:10). Kole ange ke nau lisi ha niʻihi ʻo e ngaahi tāpuaki kuo nau aʻusia pe ko ha niʻihi kehe, ʻi hono fakamolemoleʻi ha tahá.

Ngaahi ʻEkitivitī Ako ʻOku Ala Fakahokó

Siosefa ʻo ʻIsipité

Ke kamata e kalasí, fakakaukau ke fakaafeʻi e kau akó ke toe vakaiʻi nounou e fakamatala kia Siosefa ʻo ʻIsipité ʻi he Sēnesi 37–41. Te ke lava ʻo kole ange ke nau fakamatalaʻi fakanounou e ngaahi angafai taʻeʻofa ʻa e ngaahi tokoua ʻo Siosefá mo e ngaahi meʻa naʻe hoko ʻo iku ai ʻa Siosefa ki he tuʻunga ko e fika ua ʻi he pule ki he kotoa ʻo ʻIsipité.

ʻE lava ke fakaʻaongaʻi e ngaahi ʻata fakaʻilekitulōnika ʻi he Lēsoni 33: Sēnesi 37–41 ke tokoni ki he kau akó ke fakamatalaʻi fakanounou e talanoá.

Ko e hā ha niʻihi ʻo e ngaahi founga naʻe faingataʻaʻia ai ʻa Siosefa koeʻuhí ko e ngaahi ngāue ʻa hono ngaahi tokouá?
Te ke ongoʻi fēfē kapau naʻe fai ʻeni ʻe ha taha kiate koe?
Ko e hā te ne lava ʻo fakafaingataʻaʻiaʻi hono fakamolemoleʻi ha tahá?

Fakakaukau ki he founga ʻokú ke faʻa fakahoko ai ha tali ʻi he taimi ʻoku fai pe lea ʻaki ai ʻe ha taha ha meʻa ʻoku fakamamahi kiate koé. ʻI hoʻo ako he ʻaho ní, tokanga ʻaupito ki ha faʻahinga ongo te ke ala maʻu mei he Laumālie Māʻoniʻoní ke tokoniʻi koe ke ke ʻiloʻi e founga te ke lava ai ʻo muimui ki he sīpinga ʻa e Fakamoʻuí ke fakamolemolé.

Naʻe toe fakataha ʻa Siosefa mo hono ngaahi tokouá

Toe vakaiʻi e ngaahi fakamatala fakanounou ko ʻení mo ako e ngaahi vēsí.

Fakamatala Fakanounou 1: Hili ha ngaahi taʻu lahi mei heʻenau fakatau pōpula ʻa Siosefá, naʻe fononga hono ngaahi tokouá ki ʻIsipite ke kumi ha fakafiemālie mei ha honge. ʻI heʻenau tuʻu ʻi he ʻao ʻo Siosefá, ʻa ia kuo hoko ʻeni ko e fika ua ki he pule ʻi kotoa ʻo ʻIsipité, naʻe ʻikai ke nau ʻiloʻi ia. ʻI he ʻikai ke nau ʻiloʻi naʻe ʻiloʻi kinautolu ʻe Siosefa pea lava ke mahino kiate ia honau tuʻungá, naʻe fakahaaʻi ʻe he kau tautehiná ʻenau mamahi mo e fakaʻiseʻisa ʻi he meʻa naʻa nau fai ʻi he ngaahi taʻu kimuʻá.

Lau ʻa e Sēnesi 42:21–24, ʻo kumi e meʻa naʻe fai ʻe Siosefa ʻi heʻene fanongo ki he talanoa hono ngaahi tokouá fekauʻaki mo ʻenau ngaahi angafai kiate iá.

Fakamatala Fakanounou 2: Naʻe foaki ʻe Siosefa ha meʻakai maʻá e fāmilí ka naʻá ne tuku pōpula ʻa Simione pea fakahinohinoʻi e toenga ʻo e kau tautehiná ke ʻoua naʻa nau foki ki ʻIsipite kae ʻoua kuo nau omi mo honau tehina siʻisiʻi taha ko Penisimaní. Naʻe foki ʻa e kau tautehiná ki ʻapi, ka ʻi he toe ʻosi e meʻakai ʻa e fāmilí, naʻa nau foki ki ʻIsipite mo Penisimani.

Lau ʻa e Sēnesi 43:30, ʻo kumi e meʻa naʻe fai ʻe Siosefa ʻi heʻene mamata ki hono tokoua ko Penisimaní.

Fakamatala Fakanounou 3: Naʻe siviʻi ʻe Siosefa e ʻofa hono ngaahi tokouá kia Penisimaní ʻaki ʻene tukuakiʻi ʻa Penisimani naʻe kaihaʻa mo fakamanamana ke lī ia ki he fale fakapōpulá. Naʻe foaki ʻe Siuta ʻene moʻuí ko ha fetongi ʻo Penisimani.

Lau ʻa e Sēnesi 45:1–2, ʻo kumi e meʻa naʻe fai ʻe Siosefa hili e loto-fiemālie ʻa Siuta ke foaki ʻene moʻuí ke maluʻi ʻa Penisimaní.

Hili hono maʻu ʻe he kau akó ha faingamālie ke ako ʻa e ngaahi fakamatala fakanounoú, te ke lava ʻo fakaafeʻi kinautolu ke nau aleaʻi ʻa e fehuʻi ko ʻení.

Ko e hā naʻe mei tokoni kia Siosefa ke ne manatuʻi fekauʻaki mo e Tamai Hēvaní mo Sīsū Kalaisi ʻi heʻene feohi mo hono ngaahi tokouá?

ʻOku Faʻa Fakamolemole ʻa e Tamai Hēvaní mo Sīsū Kalaisi

ʻOku fakahaaʻi ʻe he ngaahi potufolofola ko ʻení ʻa e natula faʻa fakamolemole ʻo e Tamai Hēvaní mo Sīsū Kalaisí fakatouʻosi. Te ke lava ʻo fakaʻaliʻali e ngaahi potufolofola ko ʻení ke ako ʻe he kau akó pe ʻai ke nau kumi ʻenau ngaahi potufolofola fekauʻaki mo e natula faʻa fakamolemole ʻo e Tamai Hēvaní mo Sīsū Kalaisí.

Lau e ngaahi potufolofola ko ʻení, ʻo kumi e meʻa ʻe ʻaonga ki ha taha kuo ngaohikovia ke ne ʻilo fekauʻaki mo e Tamai Hēvaní mo Sīsū Kalaisi.

Luke 6:36

ʻEfesō 4:31–32

Kolose 3:13

Ko e hā te ke vahevahe mei he ngaahi veesi ko ʻení?

Lau ʻa e Sēnesi 45:3–8 mo e 9–15, ʻo kumi e tali ʻa Siosefa ki hono ngaahi tokouá.

Ko e hā ʻoku tau ako fekauʻaki mo e hoko ʻo hangē ko e Tamai Hēvaní mo Sīsū Kalaisi mei he sīpinga ʻa Siosefá?

ʻE lava ke ʻilo ʻe he kau akó ha ngaahi moʻoni kehekehe. Fakamālō ange ʻi he meʻa ʻoku nau vahevahé pea fehuʻi ange pe ko e hā ʻoku nau ongoʻi ai ko ha tokāteline pe tefitoʻi moʻoni mahuʻinga ia ke tau ʻiloʻí. Kapau he ʻikai talaatu ia ʻe he kau akó, vahevahe ʻa e moʻoni ko ʻení pea hiki ia ʻi he palakipoé: ʻOku tau hoko ʻo hangē ko e Tamai Hēvaní mo Sīsū Kalaisi ʻi heʻetau fakamolemoleʻi ʻa e niʻihi kehé.

ʻI heʻetau falala ki he Fakamoʻuí, te tau lava ai ʻo fakamolemoleʻi e niʻihi kehé

Naʻe tokoni ʻa Palesiteni Lāsolo M. Nalesoni ke mahino kiate kitautolu ʻa e founga ʻoku tau falala ai ki he mālohi ʻo e Fakamoʻuí ʻi he taimi ʻoku tau fakamolemoleʻi ai e niʻihi kehé.

17:18

Kapau ʻoku ngali taʻe-malava ʻa e fakamolemolé ʻi he taimí ni, tautapa ki he mālohi ʻi he taʻataʻa fakalelei ʻo Sīsū Kalaisí ke ne tokoniʻi koe. ʻI hoʻo fai iá, ʻoku ou palōmesi atu te ke maʻu ha nonga fakataautaha pea vave fakafokifā mo ho ivi fakalaumālié.

ʻI he taimi ne fakalelei ai ʻa e Fakamoʻuí ki he faʻahinga kotoa ʻo e tangatá, naʻá Ne tofa ha hala maʻanautolu ʻe muimui kiate Iá ke nau lava ʻo maʻu ʻEne fakamoʻuí, mālohí, mo e ivi huhuʻí. ʻOku lava ke maʻu ʻa e ngaahi faingamālie fakalaumālie ko ʻení ʻe kinautolu kotoa ʻoku fekumi ke fanongo mo muimui kiate Iá. (“Ko e Mālohi ʻo e Ivi Fakalaumālié,” Liahona, Mē 2022, 100)

ʻE tokoniʻi fēfē kitautolu ʻe he ngaahi akonaki ʻa Palesiteni Nalesoní ke tau fakamolemoleʻi e niʻihi kehé?
Ko e hā te ke faleʻi ha taha ke ne fai kapau ʻoku nau fāifeinga ke fakamolemoleʻi ha taha? Ko e hā te ke fokotuʻu ange ke nau fai ke fakafalala ki he Fakamoʻuí?

Kapau ʻoku fiemaʻu tokoni e kau akó ʻi he fehuʻi fakaʻosí, te ke lava ʻo fokotuʻu ange ke nau vakai ki he faleʻi ʻa e ʻEikí ʻi he Tokāteline mo e Ngaahi Fuakava 64:9–11, tautautefito ki he veesi 11.

Fakakaukau ke fakaafeʻi e kau akó ke vahevahe ha aʻusia ʻa ia naʻa nau lava ai pe ko ha taha ʻoku nau ʻiloʻi ʻo fakamolemoleʻi ha taha. ʻE ala tokoni ke fakamanatu ki he kau akó ke ʻoua naʻa nau vahevahe ha ngaahi fakaikiiki ʻe ala fuʻu fakataautaha fekauʻaki mo kinautolu pe ko ha taha ʻoku nau ʻilo. Mahalo te ke fie vahevahe foki haʻo aʻusia pē ʻaʻau.

Tokoni ke mau faʻa fakamolemole ʻi he loto-tauʻatāina

Ke tokoni ke fakakaukau e kau akó ki he meʻa kuo nau ako mo ongoʻi fekauʻaki mo e hoko ʻo hangē ko e Tamai Hēvaní mo Sīsū Kalaisí, te ke lava ʻo fakaʻaliʻali ha niʻihi ʻo e ngaahi ʻekitivitī ko ʻení ke fakakakato ʻe he kau akó ʻi heʻenau tohinoa akó.

Fakalaulauloto ʻi he faʻa lotu ki ha ngaahi ongo kuó ke maʻu ʻi hoʻo ako he ʻaho ní. Fakaafeʻi ʻa e Laumālie Māʻoniʻoní ke tokoni atu ke ke ʻiloʻi ha ngaahi liliu ʻoku fiemaʻu ke ke fai. Kole ki he Tamai Hēvaní ke tokoni ke fakalahi hoʻo malava ke fakamolemoleʻi e niʻihi kehé.

Fili ha taha ʻo e ngaahi ʻekitivitī ko ʻení ke fakakakato ʻi hoʻo tohinoa akó.

Hiki ha palakalafi nounou ʻokú ne fakamatalaʻi fakanounou ʻa e founga kuo tāpuekina ai koe ʻi hoʻo feinga ke fakamolemoleʻi e niʻihi kehé. Hiki e meʻa kuó ke fai ke fakakau ai ʻa e Fakamoʻuí ʻi hoʻo ngaahi ngāué. Ko e hā ʻokú ke ongoʻi ʻoku mahuʻinga ke manatuʻi ʻi he taimi hoko te ke fie fakamolemoleʻi ai ha tahá?
Fakakaukau ʻi he faʻa lotu pe ʻoku ʻi ai ha taha ʻi hoʻo moʻuí ʻoku fiemaʻu ke ke fakamolemoleʻi. Hiki ha kiʻi palakalafi nounou ke ʻiloʻi e ngaahi ongo ʻokú ke maʻu fekauʻaki mo hono fakamolemoleʻi ʻo e tokotaha ko iá. Ko e hā ʻokú ke fakatokangaʻi ʻokú ne taʻofi hoʻo malava ke fakamolemolé? Hiki ha ngaahi founga te ke lava ai ʻo fekumi ki he tokoni ʻa e Fakamoʻuí ʻi hoʻo ngaahi feingá.
Fai ha kiʻi tohi ʻe lava ʻo tokoni ki ha kaungāmeʻa ʻoku fāifeinga ke fakamolemoleʻi ha taha. Fakamatalaʻi nounou ʻa e founga naʻe hangē ai e fili ʻa Siosefa ke fakamolemoleʻi hono ngaahi tokouá ko e Fakamoʻuí. Fakakau ha potufolofola ʻoku ʻuhingamālie kiate koe ʻi hoʻo feinga ke fakamolemoleʻi e niʻihi kehé.

Te ke lava ʻo fakaafeʻi ha kau ako ʻe loto-fiemālie ke vahevahe ʻa e meʻa naʻa nau tohí. Fakakaukau ke fakaʻosi e lēsoní ʻaki hano fakaafeʻi e kau akó ke nau ngāueʻi ha faʻahinga ongo fakalaumālie pē ne nau maʻu. Te ke lava ʻo vahevahe hoʻo fakamoʻoni ki he ngaahi tāpuaki ʻoku maʻu ʻi he taimi ʻoku tau muimui ai ki he sīpinga ʻa e Fakamoʻuí ke fakamolemoleʻi e niʻihi kehé.

Ngaahi Maʻuʻanga Tokoni Kehé

Ko e hā mo ha toe meʻa ʻoku fiemaʻu ke u manatuʻi ʻi heʻeku ngāue ke fakamolemoleʻi e niʻihi kehé?

16:13

Naʻe fakamanatu mai ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

Naʻe akoʻi ʻe Kalaisi ʻi he kuonga ʻo e Fuakava Foʻoú “Mou fakamolemole, pea ʻe fakamolemolea ʻakimoutolu.” Pea ʻi hotau kuongá: “Ko au ko e ʻEikí, te u fakamolemoleʻi ʻa ia ʻoku loto ke fakamolemoleʻí, ka ʻoku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē.” Ka neongo ia, ʻoku mahuʻinga ke fakatokangaʻi ʻe hamou niʻihi ʻoku fuʻu moʻui loto mamahí ʻa e meʻa naʻe ʻikai ke Ne folofola ʻakí. Naʻe ʻikai ke Ne pehē, “Oku ʻikai ngofua ke mou ongoʻi ʻa e mamahi moʻoní pe loto mamahi moʻoní, ʻi he ngaahi aʻusia fakamamahi mei he nima ʻo ha taha.” Pe naʻá Ne pehē, “Koeʻuhí ke fakamolemoleʻi kakato kimoutolu, kuo pau ke mou toe foki ki ha ngaahi tūkunga ʻoku ʻikai lelei pe tuʻunga ngaohikovia, pe maumau.” Kae naʻa mo e ngaahi maumau-fono kovi taha ʻe ala hokó, te tau toki lava pē ʻo hao hake mei heʻetau mamahí ʻi ha taimi te tau fokotuʻu ai hotau vaʻé ʻi he hala ki he fakamoʻui moʻoní. Ko e halá ko e fakamolemole ʻa ia naʻe foua ʻe Sīsū ʻo Nāsaletí, ʻa ia ʻokú Ne ui mai kiate kitautolu takitaha, “Haʻu, ʻo muimui ʻiate au.” (“Ko e Ngāue ʻo e Fakaleleí,” Liahona, Nōvema 2018, 78–79)

ʻE tāpuekina fēfē au ʻe he Fakamoʻuí ʻi he taimi ʻoku ou fakamolemoleʻi ai e niʻihi kehé?

Naʻe akonaki ʻa Palesiteni Lāsolo M. Nalesoni ʻo pehē:

“ʻE Tamai, fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí” (Luke 23:34).

ʻOku ʻomi ʻe he ngaahi lea ko ʻeni naʻe folofola ʻaki ʻe he Fakamoʻui ko Sīsū Kalaisí ʻi Heʻene tautau ʻi he kolosí, ha sīpinga ke tau muimui ki ai ʻi heʻetau moʻuí. Naʻá Ne akoʻi kitautolu ke tau ʻofa ki hotau ngaahi filí, ke fai lelei kiate kinautolu ʻoku fehiʻa mai kiate kitautolú, pea aʻu ʻo lotua ʻa kinautolu ʻoku fai kovi mai kiate kitautolú.

ʻI he taimi ʻoku tau fili ai ke fakamolemoleʻi ʻa e niʻihi kehé, ʻoku tau tuku ki he ʻEikí ke Ne toʻo atu ʻa e koví mei hotau laumālié. ʻOku tau fakaʻatā Ia ke fakanonga mo fakamolū hotau lotó koeʻuhí ke tau lava ʻo vakai ki he niʻihi kehé, tautautefito kiate kinautolu kuo faihala mai kiate kitautolú, ko e fānau ʻa e ʻOtuá, pea ko hotau kāinga.

… Te u fakaafeʻi kimoutolu ke fakakaukau ʻi he faʻa lotu kapau ʻoku ʻi ai ha taha ʻoku totonu ke mou fakamolemoleʻi pe ko ha taha ʻoku totonu ke mou kole fakamolemole ki ai. ʻOku ou palōmesi atu ʻe fakatauʻatāinaʻi koe ʻe he Fakamoʻuí mei he ʻitá, tāufehiʻá mo e mamahí. ʻE ʻomi ʻe he Pilinisi ʻo e Melinó ʻa e melinó kiate koe.

… Fakatauange te tau tafoki ki he ʻEiki kuo toetuʻú ʻi Heʻene tokoniʻi kitautolu ke tau aʻusia ʻa e fiefia mo e mana ʻo e fakamolemolé. (Facebook, Apr. 2, 2023, facebook.com/russell.m.nelson)

Ngaahi ʻEkitivitī Fakalahi ki he Akó

Sēnesi 48–49; Ngaahi tāpuaki ʻo e lakanga fakataulaʻeikí

Fakatokangaʻi ange: ʻE akoʻi hono tāpuakiʻi ʻe Sēkope hono ngaahi fohá ʻaki ha tāpuaki fakapēteliaké ko ha konga ʻo e lēsoni ʻo e Ngaahi Tāpuaki Fakapēteliaké. ʻOku nofotaha ʻa e ʻekitivitī ko ʻení ʻi he ngaahi tāpuaki fakalūkufua ʻo e lakanga fakataulaʻeikí.

Ke tokoni ke mahino ki he kau akó ʻa e mālohi ʻo e ngaahi tāpuaki ʻo e lakanga fakataulaʻeikí, te ke lava ʻo fakaafeʻi e kau akó ke nau lau ʻa e Sēnesi 48:8–16, ʻo kumi e ngaahi tāpuaki ʻo e lakanga fakataulaʻeiki naʻe foaki ʻe Sēkope (ʻoku ui he taimí ni ko ʻIsilelí) kia Siosefa, ʻIfalemi, mo Manasé.

Kuo tāpuekina fēfē koe pe ko ha taha ʻokú ke ʻiloʻi ʻaki e ngaahi tāpuaki ʻo e lakanga fakataulaʻeikí?

ʻE lava ke vahevahe ʻe he kau akó ha ngaahi aʻusia ʻo kau ai ʻa e ngaahi tāpuaki fakaetamaí, fakamoʻui ʻo e mahakí, pe vaheʻi ki he ngaahi uiuiʻí pe fakanofó. Fakaafeʻi e kau akó ke vahevahe e founga kuo tokoniʻi ai kinautolu ʻe he ngaahi tāpuaki ʻo e lakanga fakataulaʻeikí ke nau ongoʻi ofi ange ki he Tamai Hēvaní mo Sīsū Kalaisí. Te ke lava ʻo fakamanatu ki he kau akó naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí:

ʻOku totonu foki ke toe tanumaki ʻe he ngaahi tamaí ha fetuʻutaki feʻofoʻofani fakafāmili ke fie kole ʻe he kau mēmipa ʻo e fāmilí ha tāpuaki mei heʻenau tamaí. Pea ʻoku totonu ke fakaʻaiʻai ʻe he ngaahi mātuʻá ke lahi ange hono fakahoko e ngaahi tāpuaki ʻo e lakanga fakataulaʻeikí ʻi he fāmilí. (“Ko e Ngaahi Mālohi ʻo e Lakanga Fakataulaʻeikí,” Liahona, Mē 2018, 67).

Ko e mafasia ʻo e fakafisi ke fakamolemolé

Kapau ʻe ʻaonga ki he kau akó ha mahino kau ki he kavenga taʻeʻaonga ʻoku tau fuesia ʻi he taimi ʻoku tau fakafisi ai ke faʻa fakamolemolé, te ke lava ʻo fakatātaaʻi ʻa e lēsoni fakataumuʻa ko ʻení.

Kole ki he kau akó ke faʻu ha vakapuna pepa. Tepiʻi leva ha koini, foʻi maka, pe meʻa mamafa ki he tafaʻaki ʻe taha ʻo e vakapuná. Kole ki he kau akó ke nau tolongi fakalelei ʻa e vakapuná ki he tafaʻaki ʻe taha ʻo e lokí. Hokó, toʻo hake ʻa e vakapuná pea toʻo ʻa e meʻa naʻe tepiʻí. ʻAi ke toe lī ʻe he tokotaha akó ʻa e vakapuná. Te ke lava ʻo fakaafeʻi e kau akó ke vahevahe ʻa e founga ʻoku fakatātaaʻi ai ʻe he lēsoni fakataumuʻa ko ʻení ʻa e fiemaʻu ke faʻa fakamolemolé. ʻE lava ke kau ʻi he ngaahi fehuʻi fealēleaʻakí ʻa e:

ʻE lava fēfē ʻe ha kiʻi meʻa mamafa siʻisiʻi pē ʻo taʻofi e vakapuná mei heʻene puna totonú? ʻE tatau fēfē nai ʻeni mo e fakafisi ke fakamolemolé?
ʻI heʻetau ngāue ʻi he tui ke fakamolemoleʻi ha tahá, ʻe tāpuekina fēfē nai ʻe he Fakamoʻuí ʻetau ngaahi feingá?

Siosefa ko ha sīpinga ʻo Kalaisi

ʻI he Lēsoni 33: Sēnesi 37–41, mahalo naʻe faʻu ʻe he kau akó ha saati ke tokoniʻi kinautolu ke nau ʻiloʻi e ngaahi founga ʻoku hoko ai ʻa Siosefa ko ha sīpinga ʻo Kalaisí. Ke tānaki atu ki heʻenau akó, fakakaukau ke fakaʻaliʻali ʻa e saati ko ʻení mo e ngaahi potufolofolá pē. Te ke lava ʻo fakaafeʻi e kau akó ke fakamatalaʻi fakanounou e ngaahi potufolofolá mo hanau hoa pe ʻi ha kulupu. ʻI he vakai ʻa e kau akó ki he moʻui ʻa Siosefá ko ha sīpinga mo ha fakamelomelo ʻo Kalaisí, ʻe lava ke tokoni ia ke nau vakai ki Hono mālohí ʻi heʻenau fehangahangai mo e ngaahi faingataʻá.

Siosefa ʻo ʻIsipité	Sīsū Kalaisi
Siosefa ʻo ʻIsipité Sēnesi 45:3–5 (Naʻe fakamolemoleʻi ʻe Siosefa ʻa kinautolu naʻa nau fai hala kiate iá)	Sīsū Kalaisi Mōsaia 26:30
Siosefa ʻo ʻIsipité Sēnesi 45:1–5 (Ko e fakahā ʻe Siosefa ia ki hono ngaahi tokouá ʻi heʻenau toe foki tuʻo uá)	Sīsū Kalaisi Mātiu 24:30–31
Siosefa ʻo ʻIsipité Sēnesi 47:13–19 (Ko e fakahaofi ʻe Siosefa ʻa e kakaí ʻaki e maá)	Sīsū Kalaisi Sione 6:35, 51